Read Manikion KOLOSE 3 Bible Online

KOLOSE 3 - Manikion bible

KOLOSE 3

¹Doba yen, kaba, Allah eigdoumesa yen dau gomom aud maireseb menau geb huhugb dara Krisdus ginohob. Dangga hang, yen meigdoc emetrij icira areg geb se cinogo gin toua deitero, doba yen meigdoc erleij aud areg geb se bogo dous. Anai sungga, kaba, Krisdus en eigtou se Allah men maija moc dig en mesira misen naugb en edag mougt mera medam toua.

²Dara meijen gauwamara augwan, kaba, emeb debin areg geb se cinogo gin toua deitlo, doba eb debin areg geb se bogo toua terimda.

³Anai yen yomom dau areg mohon augwan naugb yen yeinesa maireseb menau geb huhugb ginohob. Dara yen meijireseb menau gin, kaba, lusud lemeiya touebma. Doba eb desij Allah, aninim dag len lemeiya dau Krisdus men gogouf cucugb touabuma. Doba en moongga desij Allah en touaba.

⁴Doba edebeij lona sug Allah ens en ainyes dou lusud, kaba, en ens yen toua ainyes dou len laugwan dag yen yeinesa maireseb menau geb huhugb. Dara yen yeb se men gogouf cucugb naugb erbacec yen touohob. Anai maireseb menau gin, kaba, en dau Krisdus enin dous.

⁵Dangga hang, sug yen meijireseb menau dara Krisdus desij Allah dag ginohob, kaba, yen meisira emebser, dara meijen geicara emedag mihi, dara yen meigdoc emetrij icira ara ara, dara yen meigdoc emehigehi naugb yen yoho areg gecgu dou lusud, dara yen yemagungun len an meren aremougb toua deitero. Doba yen yogod an se yen meigdoc mes dag yen yemaimo areg arautut yen aud gecgu gini augwan deitero. Doba yen meigdoc dag omom dau gin namcir. Anai areg graga augwan, kaba, aninim dag lusud gedig Bilis oiharaga len se cinogo gini meren geicara dous. Dara gagungunara gin, kaba, dag yen yecguna dou seiseij touohob.

⁶Yen yemaimo augwan gin deitero. Anai gareg en emaimo areg Allah arougb en an ginero, doba en eic mos naugb en en edreg dau en mer gin namcir, kaba, Allah medoc esrougb medam an en. Hanoba en esedeb naugb en eic gogom medam dou en toua.

⁷Sug nosa, kaba, yen yaimo areg graga augwan touohob. Dara yen meigdoc emarges dau gin touwero. Anai yen meigdoc getrij icira gin, kaba arautut yen naugb yen yaimo gin toua ucucugb terimda.

⁸Doba iteitogin, kaba, yen yerba areg gecgu gini augwan dau yenohob. Dangga kaba, yen meigdoc mog mog dara emesrougb an len gus, dara yen meiju emehigehi naugb yen yeicara yarses lusud, dara yen yemeic len gus yemacecim, dara yen yemeihwur dara yen yemobob deisara toua deitlo, doba yen yarges dau augwan gin namcir.

⁹Dara yen yemereiyara doum ucucugb toua deitlo. Doba yen yesa doc gin terimda. Anai Allah en mer an yen gin, kaba, eic dag yen yehino dau meijus mohon dag menau deitohob. Hanoba en eic areg menau bauloulo astesda lona dou yen toua. Dauntoba meijen geicara augwan aninim dag men geicara toua terimda. Anai sug yen yeiji se areg menau dag ginohob, kaba, yen yecinaga areg asesa Allah enin medoc mes augwan dag misen toua namcir.

¹⁰

¹¹Hang meijouhuda dau leng Yahudi, dara meijouhuda gus, dara len lec merus dau, dara leng lemec merus dauwero, dara leng lugmahara, dara leng leigtou se lomesmes, dara leng ledag sogougb, dara leng ledag lusud misen, kaba, maman maugwan mameijem dag maingma susugb toua deitero, doba maman maugwan maijem dag hom dous. Anai Krisdus einesa maman maugwan mamdoc mes. Hanoba enin dous eng en moho eb taiba naugb maman maugwan touohob.

¹²Sug yen yehino dau yen meijus mohon aud areg menau dag ginohob, kaba, yen yemaimo areg gecgu anim ucucugb toua deitero. Doba yen meigdoc eineg dara eigouhw anim ucucugb terimda dous. Anai Allah en medoc agug yen sug nosa. Hanoba en ouci yen debinim dag men lusud naugb enin, dara en medoc gororougb yen toua namcirohob. Dangga hang, yen meigdoc emagas anim touwero, doba yen yowun yenin meigdoc mes arjaga. Dara yen yougarij anim ucucugb. Dara yen yeigtou yateteijim terimda toua.

¹³Hanoba yen yemauni gecgu dedemeda doum touwero. Doba sug aremer inggebga naugb yen, kaba, yen yesogwa deisa maman Adehsud en mohotimei mohw an men geicara dag yen yeigtou naugb denden dous. Dara yen yaigdougwo meijen aremer anim dag mogud toua terimda. Aninim dag maman Adehsud en emauni gogom dou yen sug yen yebesesar touwero, doba en eigtou ateteij terimda naugb en aigdougwo meijen sesar augwan dag mogud dau yen touohob.

¹⁴Doba aremer gesloulougb edreg dau aremer gus augwan, kaba, dag yen yemarges dau sug yen meigdoc gororougwim touwero. Doba yen yaimo gini anim ucucugb debin areg graga augwan toua terimda. Anai gini edag aigdaga naugb ohud yen yaugwan darem dag hom namcir.

¹⁵Dangga yen meigdoc emedregim touwero. Doba sug Krisdus eic yen meigdoc ebtou dou yenohob, kaba, yen yaimo dag gin anim ucucugb toua terimda. Anai Allah ouci yen debinim naugb yen yedag maga homohob. Hang en emouwan naugb yen meijir edregim toua deitero, doba yen meigdoc ebtou anim dag gin dous. Dara yen yemarges dau sug yen yen sijo dou Allah touwero, doba yen yeicara dangga toua terimda.

¹⁶Dangga toua, sug yen yedidib Mer Geigouhw eisaugb Krisdus men meijouhw doum, dara sug yen yesuloum an, aimo dau mou ouforoho areg geb dou yenohob, kaba, yen yemebin augwan gini dag gurerei se yen meigdoc mes touwero. Doba yen meigdoc eisa naugb man, dauntoba era mera se yen meigdoc mes beiseisaugb namcir. Dara yen yen sijo dara yagahugouhw an Allah se yen meigdoc mes besesa toua terimda, aimo dau areg len lei ugwaremer an deb, dara areg len lagahugouhw an Yesus, dara areg Mena Gogoufu ens dou yen touohob.

¹⁷Dara sug yen yen sijo dou maman Mamina Allah eisaugb areg en eic dou yen ogdoc Krisdus men geicara ginohob, kaba, yen yemedreg maman Adehsud Yesus en mer touwero. Doba se meijen geicara dara areg agunya dau yen meijirs, kaba, yen yesogwa deisa en mohotimei mohw an gin dous. Anai yen yeperwei en mohw naugb ginohob.

¹⁸Yigida sug yen yes meisuwohob, kaba, yen yemeicara yemaihagab en mer touwero. Doba yen yowun yenin meigdoc mes arjaga naugb yen yaimo en mer se aremer augwan terimda. Anai sug yen yedag hom dara Krisdusohob, kaba, yen yeicara yaimo dangga toua namcir.

¹⁹Dara yigiji, kaba, yen yemenara gouji dara mog mog dou yen meisouwer touwero, doba yen meigdoc gororougb len terimda.

²⁰Dangga toua, yugdeh sug yen yedag hom dara maman Adehsud ginohob, kaba, yen yemeicara yamaihagab yen meijiner dara yen meijimir len merir touwero. Doba yen meigdoc edag beim naugb len merir terimda. Anai sug yen yeicara dag gini, kaba, eic dag maman Adehsud en medoc agahugouhw an yen toua namcirohob.

²¹Dara yigiji gedig yen yeic meijihirohob, kaba, yen yemowun len meroho an meren geicara ucucugb touwero. Doba yen yeimiman len an meren geicara dou yen toua. Anai sug yen yesbes len an meren geicara terimda, kaba, eic dag len merdoc edougdaha dou len. Hang len lemeicara dag graga dou yen toua deitero, doba len merdoc obsara dau augwan namcir.

²²Dangga toua, yeng Krisden gedig yen yedag sogougb, kaba, yen yemeicara yemaihagab meijen mougtir len merir touwero. Doba yen yowun yenin meigdoc mes arjaga naugb yen yaimo len merir se aremer augwan toua terimda. Dara yen yemaimo len merir sug len merugwengga desij yen naugb len leigdoumesa yen meijoho an meijen geicara dousero. Doba sug yen meigdoc ahau dau Allah, kaba, yen yaimo meijen geicara augwan dara yen meigdoc hom namcir sug len merugwero toua.

²³Anai yen yecinaga dag yen yemeicara dou leng se cinogo gin dousero. Doba yen yeicara dou maman mougt mera misen, kaba, Krisdus enin dous. Hang areg maman Adehsud gini en esedeb se bogo naugb yenohob, kaba, augwan emediyebeiya dau yen touwero. Doba enin eng emeic dou yen toues. Dangga hang, areg yen yeicara yaimo, kaba, yen yaimo augwan gini dara yen meigdoc augwan namcir. Anai yen yemeicara dou lusud se cinogo ginero, doba yen yeicara gini aninim dag dou maman Adehsud enin dous.

²⁴

²⁵Hang yen yemedreg dau areg meijen mougt mera arougb yen an touwero. Doba yen yaimo len merir an terimda. Anai gareg en edreg men mougt mera en mer gin namcir, kaba, maman Adehsud emauni men geicara gecgu gini ucugb dou en toues. Anai en emos medoc an sud hom ingma touwero, doba en aimo augwan dara en medoc edag beim an len dous.