Read Manikion TESALONIKA HOM 2 Bible Online

TESALONIKA HOM 2 - Manikion bible

TESALONIKA HOM 2

¹Dan indagunerij, dara dan indamouwerij, leng gus, kaba, len lemecic dau meijen geicara graga dou emen dousero. Doba yenin toua yecinaga dau sug emen emesai Mer Geigouhw eisaugb Krisdus dou yen sug nosa, kaba, dag emen emirs emobdobdem an augwougb dou yen touwero. Doba eic dag yen yera mera einyana icira ginohob.

²Dara yen yecinaga dau sug emen emedebeij yen sunggabuma, kaba, dag leng se cinogo Pilipi len leic mog erij. Hanoba len leic emen emoho lacicim toua namcirohob. Dangga hang, sug lusud leinyana lougb sogo maga dougwo emen an dag ginohob, doba maman Allah eic emen emdoc aiyansem dou emen naugb emen emesai en Mer Geigouhw eisaugb Krisdus gin dou lusud toua terimda.

³Dara sug emen emesai Mer Geigouhw eisaugb Krisdus gin dou yen, kaba, emen emeic mer areibahau naugb emen emahurim dara gin touwero. Doba sug emen emenara emaic yen meigdoc mes aud en mer gin, kaba, emen emebedbed augwan se geica mogud dou yen dous. Dara emen emdoc emetrij icira ligida dara ligiji dau yen mougwa hom touwero. Doba emen emebedbed augwan dou yen dara emen gauwamara gecabeci dou yen toua. Dara sug emen emebedbed dou yen gin, kaba, emen emereiyara, dara emerba mohoisa, hanoba emen emaugwohosa yen an ara ara hom dau yen touwero. Doba emen geicara augwan, kaba, emaimo ucina gobosboro an yen dous.

⁴Dangga emen ememaimo areg gecgu an lusud touwero. Doba areg Allah arougb emen anohob, kaba, emen emesai gin augwan dou lusud toua terimda. Anai enin eng eiya emen emdoc mes, doba edeinyum naugb ginohob. Hang en emeigdoumesa emen emoho naugb emen emebedbed en mer gin dou yen toua. Sug en eigdoumesa emen emoho dag ginohob, kaba, emen ememouwan naugb sug emen emeic lusud merdoc eigouhw dou len touwero. Doba emen emouwan naugb sug emen emeic Allah enin medoc eigouhw dou en dous. Anai enin eng eicara bainyen emen emdoc mes an areg emen emebedbed dou lusud gin, kaba, dag emen emdoc hwai, era hom an gin dousei?

⁵Dara yen yecinaga dag misen dau sug emen emebedbed dou yen sug nosa, kaba, dag emen ememouseij emen emir naugb emaunun dougwo emen emdoc getrij icira meijen aremougb touwero. Doba Allah ouma debin emen geicara gini dag emen emens emen emdoc mes an augwan beb ainyes dou yen dag misen. Dara yen toua yecinaga dag emen geicara augwan dag gin touohob.

⁶Dara se emen geicara augwan, kaba, emen ememainyen naugb sug sud hom ingma dau yen en emeigdoumesa emen emoho. Dara emen ememeic emouwemougb esesa naugb sug sud hom ingma dau len gus en emeigdoumesa emen emoho an gini touwero. Doba emen emouwan naugb sug Allah enin eng eigdoumesa emen emoho an emen geicara augwan gin dous. Anai enin eng eigdoumesa emen emoho. Hanoba en arougb emen naugb sug emen emesai Mer Geigouhw eisaugb Krisdus dou lusud toua.

⁷Sug en eigdoumesa emen emoho dag ginohob, kaba, emen goubesa inggebga naugb sug emen emacgeij ara ara einyana dau yen toua. Dobnaro. Emen ememouwan naugb sug emen emeic aguci dou yen touero. Dangga sug emen emugwengga desij yen sug nosa, kaba, emen emug arjaga an yen namcir, aninim dag mem en mog arjaga an mehir naugb en agauwesa len toua terimda.

⁸Doba emen emdoc an yen. Hang emen emesedeb naugb sug emen ememesai Allah Mer Geigouhw eisaugb Krisdus dou yen dousero. Doba emen emesedeb naugb emen emohw emen emougt edug naugb yen toua. Anai emen emdoc gororougb yen medam namcirohob.

⁹Dangga hang, sug emen emugwengga desij yen sug nosa, kaba, emen ememacgeij ara ara hom dau yen touwero. Doba emen emeic emen emug erij astesda lona loba naugb emen emeicara naugb emenin terimda. Dauntoba sug emen emesai Allah Mer Geigouhw eisaugb Krisdus dou yen, kaba, gini emedag ara gogom geb dougwo sud hom ingma dau yen touwero. Doba ucina esgiraha naugb yen dous. Yen meigdoc moc dougwo ginohobei? Naro, yen meigdoc eiseisan gin toua terimdaba.

¹⁰Hang emen geicara augwan deseino yen, kaba, dag lusud lemowun emen emoho an aremer hom touwero. Anai yeni dara Allah, yen youma debin emen dag emen emaimo areg ecabeci dara edag beim an yen.

¹¹Dara yen yecinaga dag emen geicara augwan dou yen astesda, kaba, toua aninim dag mena men geicara dou en mehir touohob.

¹²Anai sug emen emugwengga desij yen sug nosa gin, kaba, emen emesulou yen ucucugb, dara emen emahahumohumesa yen, dara emen emenara emad yen meigdoc mes toua terimda. Dauntoba se meijen geicara augwan, kaba, yen yeic Allah medoc eigouhw dou en dous. Anai enin eng eija yen naugb yen yeinesa men goiharaga dara en ekeba men gogouf cucugb dou yen touohob.

¹³Dara emen ememen sijo dou Allah naugb areg graga augwan gin dousero. Doba emen emen sijo esesa dou en eisaugb meijen geicara augwan toua namcir. Anai sug emen emesai Allah mer eisaugb Krisdus dou yen sug nosa, kaba, yen yebin en mer gini se yen meigdoc mes. Anai yen yecinaga dag areg emen emebedbed dou yen gin, kaba, emen dau lusudero. Doba en dau Allah dag misenohob. Hang sug yen meigdoc ebdebin an en mer ginohob, kaba, yen yera mera areg geigouhw toua terimda. Anai Allah enin eng arautut yen meigdoc mes ogdoc en mer gin toua.

¹⁴Dangga dan indagunerij, dara dan indamouwerij, sug yen yebin Allah en mer se yen meigdoc mes dag ginohob, kaba, gogom areg geb dou Allah men goucimdeb se leng Yudea meren hancob gin, kaba, eb naugb yen touohob. Anai sug len merdoc dag hom dara Krisdus Yesus sug nosa, kaba, leng Yahudi gus len leineg merohotimei an len. Hanoba len leic mog erij medam dou len icira gin toua namcir. Aninim dag leng Yahudi se meijen cinogo ingga, kaba, len lococ yenin meijen lusud naugb len leic mog erij medam dou yen sug yen meigdoc dag hom dara Krisdus gin touohob.

¹⁵Anai leng Yahudi gin, kaba, len merdoc eigouhw an lusud gus len laugwan touwero. Doba gareg en emaimo len se meren gomnomna ginero, kaba, len merdoc esrougb medam an len laugwan namcir. Dangga sug Allah esa men lusud aud len merjemouwer sug nosa naugb len lesai en mer dou len, kaba, len lemebin en mer ginero. Doba len leic gomom dou men logodeh len laugwan. Dara sug maman Adehsud Yesus en esai Allah en mer dou len merner sug nosa, kaba, len merner gini len merdoc emesgiraha an en touwero. Doba len letob en se sogo salib toua. Dara emen toua, sug emen emesai Mer Geigouhw eisaugb Krisdus dou len mersir dau leng Yahudi gin, kaba, len lamsoho emen touwero. Doba len leic mog erij dou emen. Hanoba len locirma emen dau meren tuari dara cinogo gus gus augwan toua terimdohob. Hang Allah medoc emesgiraha an len touwero. Doba en medoc esrougb medam an len namcir.

¹⁶Dara gin dousero, doba sug emen emouwan naugb emesai Mer Geigouhw gini dou lugmahara, kaba, len lebehnehino emen dougwo len toua. Anai len lemouwan naugb Allah emeigdoc len dau sesar men gogom aud maireseb menau geb huhugb touwero. Dangga hang, Allah emamsoho len toua deitero. Doba en medoc mog mog medam an len. Hanoba en esedeb gogom deb naugb len touohob. Anai meren geicara gecgu gin, kaba, edag duhu gatij duga moc toua namcirohob.

¹⁷Doba dan indagunerij, dara dan indamouwerij, ebiji dau sug len graga leiso emen dau meijen cinogo, kaba, emen emdoc eiseisan yen terimda. Anai emen dag sud hom gedig en ougbdedau en mehir laisoboro deb dous. Dangga hang, emen emagodgod lo terimda naugb sug emen emdeiya yen toua deit. Anai emen ematou se igda hosa dau yen. Doba se emen emaga dous. Doba se emen emdoc mes, kaba, emen emugwengga desij yen terimda.

¹⁸Hang emen emainyen naugb sug emen emecicugb aud yen. Dara danin toua dainyen naugb dan dedebeij yen mougwa hosa touohob. Dobnaro. Bilis ougb sogo maga dougwo emen terimdaba.

¹⁹Emen emainyen naugb emecicugb aud yen dag gini. Anai se Lona Sug Maman Adehsud Yesus En Ecicugwen, kaba, emen ememagahugouhw dara ememeimiman emenin an gareng deseino en se lona ingga? Yen youdesa leng gus dousei?

²⁰Naro, emen emagahugouhw dara emeimiman emenin an yen deseino en se lona ingga. Anai yen yedag emen mera touohob. Dara yen yedag ansins dou emen dag emen emeic emen emug emerij augwougb touwero. Doba emen emaingmo deb se usi namcirohob. Hang emen emod emina debsa maman Adehsud gini dag en emecgun sogo mesira an merij naugb en emeg se emen emugt toues.