Read Manikion TESALONIKA HOM 3 Bible Online

TESALONIKA HOM 3 - Manikion bible

TESALONIKA HOM 3

¹Sug emen emdoc esesa an yen dag gin terimdohob, kaba, emen ememouwan emeigtou emateteij deitero. Doba emen emogod an dag Silas aman, kaba, aman amanin ameigtou se cinogo Atena gini deb.

²Doba Timotius, kaba, en edeiya yen sungga naugb en enara bad yen meigdoc mes, dauntoba yen yemobsara dau ucina mog erij ginero. Doba yen yes agadgeij naugb yen meigdoc ebdebin an Krisdus terimda. Anai maman mamaguna Timotius gin, kaba, en toua eicara baimo Allah en mer se aremer augwanohob. Hang en emousa Silas aman naugb sug emen emaugwan emesai Mer Geigouhw eisaugb Krisdus dou lusud toua. Dara eisaugb ucina mog erij gin, kaba, yen yenin yecinaga dag augwan gini aimo dau areg Allah enin ogod deb naugb mamanohob.

⁴Anai sug emen emugwengga desij yen sug nosa, kaba, emen emesulou yen deb dag cum, kaba, maman maimo ucina mog erij gin toua. Hang areg emen ememesulou yen an ingga, kaba, yen yecinaga dag augwan gini acgunog dou yen dag misenohob.

⁵Dangga sug dan decinaga dag yen yaimo ucina mog erij dag ginohob kaba, dan demeigtou demateteij toua deitero. Doba dan darougb Timotius aud yen naugb en edogod dougwo yen endag yen meigdoc ebdebin an Krisdus terimdei? Era mog erij gini eic dag yen yobsara dau endohobei? Anai dan dahau dag cum, kaba, Bilis augwohosa yen dau Krisdus men ucina gini. Hang emen emeic emen emug erij augwougb touohob.

⁶Doba iteitogin, kaba, Timotius en ecicugb an mer geigouhw aud amanohob. Hanoba en edecic dou aman dag yen yemobsara dau Krisdus touebma, doba yen yes agadgeij naugb yen meigdoc ebdebin an en. Dara yen meigdoc gororougwim toua terimdaba. Dara en edecic dou aman dag yen meigdoc esesa an aman toua naugb yen yedeiya aman deit. Aninim dag aman amdoc esesa an yen naugb aman amdeiya yen toua.

⁷Dangga dan indagunerij, dara dan indamouwerij, sug Timotius ens dau areg graga augwan dou amanohob, kaba, aman amdoc momogo sug aman amaimo ucina mog erij dara ara gogom toua deitero. Doba aman amdoc ebtou naugb aman amaimo ucina gini toua terimda. Anai sug aman amouman dag yen yemobsara dau Krisdusero, doba yen yes agadgeij naugb yen meigdoc ebdebin an en terimda, kaba, eic dag aman amdoc ebtou toua namcirohob.

⁸Hang aman amdoc amomomtom toua deitero. Doba sug aman amecinaga dag yen meigdoc dag hom dara Krisdus dag ginohob, kaba, eic gerleij dou aman naugb sug aman amaimo ucina gin toua terimda. Naro, kab, naro.

⁹Sug yen yeic aman amdoc erleij dou aman dag ginohob, kaba, aman amen sijo dag ara dou Allah naugb yen toua deita? Naro, meijen geicara geigouhw gin, kaba, eic dag aman amdoc agahugouhw medam gougwa deseino enohob.

¹⁰Hang aman amemarges dau sug aman amocuncum dou Allah touwero. Doba aman amocuncum astesda lona loba dara aman amdoc augwan dou en. Dauntoba en ousa aman amir naugb sug aman amdeiya yen se aman amires touahabi. Anai aman amdoc erleij naugb aman amousa yen. Dauntoba areg aman amarges mougwa deb graga, kaba, aman amaulo gin deit, terimda augwan edeinyum dou yen toua namcirohob.

¹¹Dangga hang, aman amacgeij dau maman Mamina Allah enin dara maman Adehsud Yesus naugb lan lagririj sogo maga augwan dau ucina an aman, dauntoba aman amedebeij yen toua.

¹²Dara aman amocuncum dou maman Adehsud naugb en ousa yen. Dauntoba yen meigdoc gororougwim an len gus laugwan toua eiseisaugb terimda. Dara yen meigdoc gororougwim gin, kaba, edeinyum dag aman amdoc gororougwim yen sug nosa touohob.

¹³Anai sug yen yeicara dag gin, kaba, eic dag maman Adehsud eic gototo se yen meigdoc mes dougwo areg gecgu augwan toua namcir. Hang edebeij Lona Sug Maman Adehsud Yesus En Ecicugwen an men logodeh laugwan, kaba, lusud lemowun yen an aremer hom deseino maman Mamina Allah touwero. Doba meijen geicara augwan ecabeci deseino en terimda.