Read Manikion TESALONIKA HOM 5 Bible Online

TESALONIKA HOM 5 - Manikion bible

TESALONIKA HOM 5

¹Doba eisaugb Lona Sug Maman Adehsud En Ecicugwen, kaba, emen ememog eisaugb gin dou yen deitero.

²Anai emen emens dau augwan gini dou yen sug nosohob. Hang yen yenin yecinaga dag maman Adehsud, kaba, en emens dau men cumougt dou maman touwero. Doba en en augwougb debin maman dous. Aninim dag sud hom geiyohora se loba, kaba, en emens men lona sug en eiyohora gin dou lusud touwero. Doba en en naugb eiyohora augwougb dousahabi, len lemeijesan toua.

³Dangga hang, se lona sug lusud merdoc obdara anim dag areg gogom emeb naugb len deiterohob, kaba, se lona ingga Allah esa gogom en baiyan len merur mor namcir. Hanoba len lemougb dau gogom ginero, doba len laugwan lesa naugb gin terimda. Aninim dag gida hom sug en menuhwa erijohob, kaba, en emougbdedau gin touwero, doba en aimo gerij gin terimda ouwedoc toua.

⁴Doba dan indagunerij, dara dan indamouwerij, yen, kaba, yen yemeigtou se lobeigbogo deitero. Dangga hang, Lona Sug Maman Adehsud En Ecicugwen gin, kaba, emobsara debin yen augwougb dag sud hom geiyohora gin touwero. Doba yen yecinaga augwan dag misen.

⁵Anai yen yaugwan yedag mouf dara lona maran logodehohob. Sug yen yedag mouf dara lona maran logodeh dag ginohob, kaba, maman mamaimo loba dara lobeigbogo aud areg lan larougb maman aud gin toua deitero. Doba maman marges dau gin toua terimda. Anai maman mamedag maran logodeh deitero, doba maman masid mamanin dau lan namcirohob.

⁶Dangga hang, sug maman mamedag loba dara lobeigbogo maran logodeh dag gin deiterohob, kaba, eigouhw naugb maman mamatou dau Allah men Lona sug en ecicugwen, aninim dag leng gus gin touwero. Doba maman masedeh mauweila, hanoba maman mamu mauti eisaugb Lona gin toua terimda.

⁷Anai leng latou gin, kaba, len latou se loba. Dara leng leg ahwei mohu bed len lomom, kaba, len leicara dag gin se loba toua.

⁸Doba maman gin, kaba, maman madag lona men logodehohob. Dangga hang, maman mamsdemaga emembreij dag len gus touwero. Doba maman mamu maiso aremeijouhw augwan terimda. Hanoba maman mamarges dau sug maman mamdoc ebdebin an Allah dara maman mamdoc gororougb lusud touwero. Doba maman mas agadgeij se gin namcir. Anai sug maman maicara dag gin, kaba, aninim dag maman mag sansun kermum se mamus dougwo Bilis men hu smougwohob. Dara maman mamarges dau sug maman maod mamina debsa Allah an maireseb menau geb huhugb gin touwero. Doba maman maiyan mamdocesem naugb gin terimda toua. Anai sug maman maicara dag gin, kaba, aninim dag maman mag topi dau kermum dougwo maman mamugt. Dauntoba Bilis emeic gomom dou maman dau maireseb menau geb huhugb gin touwero. Doba maman mamina agau naugb madesma touahabi.

⁹Anai Allah emouci maman deb naugb sug en eic gogom dou mamanero. Doba en ouci maman naugb en eigdoc maman dau sesar men gogom aud maireseb menau geb huhugb ogdoc maman Adehsud Yesus Krisdus gin dous.

¹⁰Anai enin dous eng omom naugb maman sesarohob. Dauntoba sug maman mamina agau, era sug maman mamomohob, kaba, maman maugwan mamireseb huhugb dara en se Lona Sug En Ecicugwen gin toua.

¹¹Dangga hang, yen yemarges dau sug yen yenara yad yen meigdoc mes naugb yeic gototo doum touwero. Doba yen yeicara yaimo dag gin anim terimda. Aninim dag yen yeicara yaimo iteitoginohob.

¹²Dan indagunerij, dara dan indamouwerij, emen emesulou yen dara goubesa namcir, dauntoba yen yemamsoho leng ledag mougt naugb lesedougwo yen, dara leng lens ucina misen dou yen, len laugwan touwero. Doba sug len leic merug erij naugb yenohob, kaba, yen yeigdoumesa len meroho naugb yen yeic ara ara bedeinyum dou len toua.

¹³Hang yen yemesbes an len touwero. Doba sug len leicara dangga dou yenohob, kaba, yen meigdoc gororougb len. Hanoba yen yeigdoumesa len meroho agas medam toua namcir. Dara yenin, kaba, yen yemoho aremer doum touwero. Doba se meijen geicara augwan, kaba, yen meigdoc anim ucucugb terimda.

¹⁴Dangga toua, emen emesulou yen dara goubesa namcir. Dauntoba yen yemamsoho leng leisan gurogero. Doba yen yenara dou len dag len lemeisan gurog dag gin deitero, doba len toua merisira eicara naugb lenin terimda. Dara yen yeiya dau leng Krisden gus dag len lahau dau ucina mog erij, kaba, yen yemarges len gin deb touwero. Doba yen yenara yad len merdoc mes, dauntoba len les agadgeij namcir. Dara leng leija meruwesa Krisdus men ucina gin, kaba, yen yemowun len dedemeda toua. Doba yen yarautut len naugb len lecinaga areg se geica touwero. Dara sug yen yenara eisaugb ara ara dou lusud, kaba, yen yemenara se goubesa dou len touwero. Doba yen yenara dara meijir arjaga dou len dous.

¹⁵Hang se meijen geicara augwan, kaba, yen yemauni gecgu doum ucucugb touwero. Doba yen yeic meijuwemougb esesa naugb yen yoho geigouhw anim. Dara yen yeicara dangga dou len gus laugwan toua terimda.

¹⁶Dara yen meigdoc emeijesa eisaugb ara hom touwero. Doba se aremer augwan, kaba, yen yagahugouhw an Allah, dara yen yocuncum dou en, dara yen yen sijo dou en besesa terimda. Anai gareg en medoc dag hom dara Krisdusohob, kaba, Allah ouwan naugb en eicara dag gin toua namcir.

¹⁹Dangga hang, se meijen geicara augwan, kaba, yen yemob Mena Gogoufu dag smougb mouf dau yen meigdoc mes touwero. Doba yen yebin en edag smougb mouf gererij se yen meigdoc mes terimda.

²⁰Dara sug lusud lesai ara ara dou yen, kaba, yen yemebin augwan gini augwougb se yen meigdoc mes touwero. Doba yen yainyen augwan nosahabi. Dauntoba yen yecinaga dag areg len lesai gin, kaba, dau Mena Gogoufu era dau merna mog mog dousei? Dangga hang, sug yen yecinaga dag areg len lens dou yen, doba dau Mena Gogoufohob, kaba, yen yemeicara yemaihagab gin touwero. Doba yen yaimo terimda. Doba sug yen yecinaga dag areg len lebedbed dou yen gini en dau merna mog mog dous, kaba, yen yemaimo touwero. Doba yen yasid yenin dau namcir.

²¹Dara yen yemaimo ara ara gus augwan toua augwougblo. Doba yen yainyen nosahabi. Dauntoba yen yecinaga dag augwan gini eigouhwei? Era, naroei? Sug eigouhw, kaba, yen yeicara yaimo. Doba sug ecgu, kaba, yen yasid yenin dau augwan gin namcir toua.

²³Dangga hang, dan dacgeij Allah naugb en ousa yen. Dauntoba se meijen geicara augwan, kaba, yen yemaimo areg gogor touwero. Doba yen yaimo areg gecabeci dag lusud mos terimda. Anai enin eng sud hom geic gesgigouhwesa dou maman dougwo augwan namcirohob. Dara dan dacgeij en, dauntoba en ebehnehino dougwo yen meijaga, dara yen meijina, dara yen meigdoc mes terimda edebeij Lona Sug Maman Adehsud Yesus Krisdus En Ecicugwen gin toua. Dauntoba se Lona ingga, kaba, meijen geicara gecgu hom emdagunya dau yen touwero, doba augwan ecabeci deseino en namcir.

²⁴Dan dacgeij en an yen dag gini. Anai dan decinaga dau sug en eija yenohob, kaba, dag en emarges dau gin touwero. Doba en aimo augwan gin an yen toua terimda.

²⁵Dara dan dacgeij naugb yen yemarges dau sug yen yocuncum naugb emen touwero. Doba yen yocuncum an emen esesa terimda.

²⁶Dara yen yen dou emen emaguner dara emdamouwer se Krisdus dag emen emou len dara emen emdoc mes an len. Hang sug yen youcimdeb, kaba, yen you meijufesem dara yen meigdoc ecabeci anim toua terimda.

²⁷Dara indan surad gini, kaba, yen yemobdeb touwero. Doba dan desulou yen dara dan dou maman Adehsud en moho debin gin dou yen. Dauntoba yen yecic indan surad gin dou dan indaguner dara dan indamouwer len laugwan toua.

²⁸Maman Adehsud Yesus Krisdus en medoc an yen naugb en eic geigouhw dou yen terimda.