Read Manikion TESALONIKA HWAI 3 Bible Online

TESALONIKA HWAI 3 - Manikion bible

TESALONIKA HWAI 3

¹Dan indagunerij, dara dan indamouwerij, sug surad gin ouwedoc, kaba, dan dacgeij naugb yen yocuncum naugb emen toua. Dauntoba maman Adehsud en mer gin, kaba, emebtou touwero, doba ec bagaha dedemeda sungga sungga namcirahabi. Dara yen yocuncum naugb emen, dauntoba sug emen emesai Mer Geigouhw eisaugb Krisdus gin dou lusud, kaba, dag len lemesbes emen emir an touwero. Doba len lebin dara geigouhw namcir, aninim dag yen yebin en mer gin dara geigouhw sug nosa touohob.

²Dara yen yocuncum naugb emen toua, dauntoba Allah eigdoc emen dau areg gecgu augwan toua namcir. Anai leinyana, kaba, len merdoc emebdebin an maman Adehsud en mer ginero. Doba len merdoc esrougb dara merug mog an emen toua terimda.

³Doba maman Adehsud, kaba, en medoc dag hom an mamanohob. Dangga hang, en emamsoho yen touwero. Doba en eic goubesa dou yen, dauntoba yen yaiyan meigdocesem. Dara en eseyeiyo yen dougwo Sud Hom Mobgos Maha toua terimda.

⁴Dara emen emod emina debsa maman Adehsud dara goubesa dag en arautut yen. Dauntoba yen yemehig dau areg emen emarougb yen an gin touwero, doba yen yeicara yaimo augwan gin toua namcir.

⁵Hang emen emacgeij en, dauntoba yen yemobsara dau sug yen yaimo ucina mog erij gin touwero. Doba en eic yen meigdoc aiyansem dou yen naugb yen yaimo gin terimda. Aninim dag enin toua aimo ucina mog erij naugb yen sug nosa touohob. Dara emen emacgeij en naugb en ousa yen, dauntoba yen yecinaga dau sug Allah medoc gororougb yen gini meijouhw augwan bedreg dau sug nosa toua deit.

⁶Doba dan indagunerij, dara dan indamouwerij, eisaugb leng lesbes emen emir an areg emen emesai dou yenohob. Hanoba len lagaij merisira dougwo sug len leicara terimda, kaba, emen emesulou yen se maman Adehsud Yesus Krisdus, en moho, dag yen yemeigtou desij lenero. Doba yen yasid yenin dau len namcir, anai emen emeperwei en mohw naugb ginohob.

⁷Dara yen yenin yecinaga dag Allah emouwan naugb yen yesogwa deisa leng lagaij merisira len meruhotimei mohw aud meren geicara gin touwero. Doba en ouwan naugb yen yaimo emen aud emen geicara gin dous. Anai sug emen emugwengga desij yen sug nosa, kaba, emen ememagaij emen emsira touwero.

⁸Doba emen emeic emen emug erij naugb emenin astesda lona loba terimda. Dauntoba emen ememedag areg gogomcin sud hom ingma dau yen touwero. Doba yen meigdoc ebtou naugb ucina hom gin dous. Dangga hang, sug emen emacgeij ara ara dau yen, kaba, emen ememacgeij dag mogud dau yen touwero. Doba emen emouma augwan teitei dau yen namcir.

⁹Emen goubesa inggebga naugb sug emen emacgeij ara ara dag mogud dau yen. Doba emen ememeicara dag gin dou yenero. Anai emen emouwan dauntoba emen emedag gansins dou yen naugb yen yesogwa deisa emen emohotimei mohw an emen geicara gin toua terimda.

¹⁰Augwan gini aimo dau areg emen emesulou yen an sug emen emugwengga desij yen sug nosa touohob. Anai emen emenara dou yen, dag gareg en agaij mesira namcir dougwo sug en eicara, kaba, eigouhw naugb yen yemeic ared dou en touwero. Doba yen yamsoho en namcir.

¹¹Emen emesulou yen an dag gini, anai emen emouman dag merug hosa se meijen cinogo ingga, kaba, len lemeicara deitero. Doba len lesugrog namcir, hanoba len lemehigdog touwero. Doba len merohora esesa naugb len lodo len meraga se len gus meren aremer toua namcirohob.

¹²Dangga hang, se maman Adehsud Yesus Krisdus men goubesa, kaba, emen emen dougwo len. Hanoba emen emesulou len dara goubesa toua. Dauntoba len lemeicara dag gin deitero. Doba len lehigdog naugb len merisira eicara an lenin terimda.

¹³Doba dan indagunerij, dara dan indamouwerij, yen, kaba, yen yemehig dau sug yen yaimo areg gedag beim dara obosboro an lusud touwero. Doba yen yos debin gin terimda.

¹⁴Doba gareg en emaimo emen emir an areg emen emesulou yen an se surad ginero. Hanoba en eic mos terimda, kaba, yen youmesem dougwo en naugb yen yemeigtou desij en touwero. Doba yen yasid en dau yen. Dauntoba sug meijen geicara gini eic igdebes dou enohob, kaba, eic dag en mos obsara an men geicara gin toua namcir.

¹⁵Doba yen yemowun en moho dag meijen moc touwero. Doba yen yesulou en an men geicara dag yen meijaguna se Krisdus dous.

¹⁶Dan dacgeij maman Adehsud en eng, dauntoba en moongga desij yen naugb en eseyeiyo yen dougwo aremer augwan toua terimda. Anai enin eng eic gesgigouhwesa dou lusud dous.

¹⁷Dang, Paulus, dan dou yen toua. Dan dog moho hom gini ai danin insira naugb yen. Anai astesda surad gus gus augwan, kaba, danin deic dan insira mena eb debin dag gin dou lusud terimda.

¹⁸Maman Adehsud Yesus Krisdus medoc eigouhw an yen yaugwan namcir.