Read Manikion TIMOTIUS HOM 1 Bible Online

TIMOTIUS HOM 1 - Manikion bible

TIMOTIUS HOM 1

¹Surad gini dau dang, Paulus, dou Timotius, ban, gedig dan deija ban dag dan indisi misen se Krisdusohob. Anai Allah dara Krisdus Yesus lan laigdoumesa dan indoho, hanoba lan larougb dan naugb dan desai Mer Geigouhw eisaugb Krisdus Yesus dou lusud laugwan toua. Hang dan dacgeij maman Mamina Allah dara maman Adehsud Krisdus Yesus naugb lan mardoc an ban namcir. Dara lan mardoc eineg an ban, hanoba lan laseyeiyo ban dougwo areg gecgu augwan toua terimda. Anai Allah gin, kaba, eni Sud Hom Geigdoc Maman Dau Sesar Men Gogom Augwan namcir. Dara Krisdus, kaba, eni sud hom gedig maman maod mamina debsa en naugb en eic maireseb menau geb huhugb dou maman toua.

³Dan dog surad gini dou ban, dauntoba ban bemeihwededau cinogo Epesus inggaro. Doba ban beigtou sungga terimda naugb ban ben dougwo lusud merug aibibra dag len lemamimiri an areg dag huhugb, dara maman mamjemouwer, dara malaikadir len meroho. Hanoba len lemebedbed mer areibahau eisaugb Krisdus debin gin touwero, doba len larges dau namcir. Anai areg len lamimiri an gin, kaba, emousa Allah an areg en esedeb naugb en eigdoc lusud dau sesar men gogom ginero. Doba eic dag len lenara laisedim dous.

⁴Hang ban ben dougwo len dara goubesa namcir, dauntoba len lemedidib dau areg graga dou lusud deitero. Doba len merdoc ebdebin an Krisdus terimda. Anai areg Allah en esedeb naugb mamanohob, kaba, eb naugb maman ogdoc sug maman mamdoc ebdebin an Krisdus hom gin dous. Dan denara dau areg graga augwan dou banohob sug dan demeihwededau ban dig leng Makedonia meren hancob touebma, doba dan deigtou desij banaba. Hang dan demens dau leng lebedbed mer areibahau gini len meroho dou ban touwero. Anai ban becinaga len laugwan dag misenohob.

⁵Dara indan gauwamara dau sug dan den dougwo leng graga an meren geicara, kaba, dag len lemarges dau gin dousero. Doba ousa maman naugb sug maman mamdoc gororougwim toua terimda. Dangga hang, dan demouwan naugb sug len lemeisa merir an ara ara deitero. Doba len leic meruwemougb esesa naugb len merdoc emogdogda len an aremer hom touwero. Doba lousa deisa len an dag len merdoc ecabeci namcir. Dara dan demouwan naugb sug len lemekeba merdoc hwai icira touwero. Doba len merdoc ebdebin an Krisdus dag misen namcirahabi, len lemaimo en an areg en arougb len an gini dara merdoc hom toua terimda. Anai sug len leicara dag gin, kaba, eic dag maman mamdoc gororougwim toua namcir.

⁶Dan den dangga dou len, anai ligbum dau leng lesai mer areibahau gin, kaba, len leigdoumesa lenin meroho dag len meru ouforoho naugb len ledidib meijouhw dau Allah men gomnomna areg en eic dou Musa augwan asesa dou lusud touohob. Dobnaro. Areg len louma debin gin, kaba, len lemecinaga moho hom dara meijouhw dau augwan gin touwero. Doba len merirs obdobdem an gin dous. Dangga hang, len lemaimo ucina an areg ousa len naugb len merdoc gororougb lusud toua deitero. Doba len laijahasero dau augwan gin namcirohob. Hanoba len lenara laisedim eisaugb huhugb dara meroho gin toua terimda.

⁸Doba maman macinaga dag Allah men gomnomna areg en eic dou Musa ginohob, kaba, augwan eigouhw namcir. Dangga hang, esloulougb naugb sug maman maimo gomnomna gini an lusud, kaba, dag maman mamedreg Allah men gauwamara eisaugb men gomnomna gin touwero. Doba maman maimo men gauwamara gini an lusud gin dous.

⁹Anai maman macinaga dau sug Allah eic men gomnomna dou Musa, kaba, dag en emeic men gomnomna gini dou en naugb len gedig laimo areg asesa Allah enin medoc mes ginero. Doba en eic men gomnomna gin dou en naugb leng lohoiya dara laiga gomnomna gin terimda. Dara len gedig lemaimo areg Allah arougb len an ginero, doba lebesesar abeba en mer gin namcir. Dara leng ledegeij merir an en, hanoba len lemesijaresa en touero. Doba len laimo areg geb se cinogo gin dous. Dara leng logod merner, dara leng merimir, dara leng lohudara.

¹⁰Dara leng merisirebsem, dara ligida dara ligiji gedig len leicara dag mihi naugb laidim aibibrida, dara leng los lusud dag sogougb naugb latagaij aremougb terimda, dara leng laideidoro, dara leng lerba mohoisa, dara leng loho meh dougwo leng gus, dara areg gedreg dau mamang Krisden maman gomnomna gus gus augwan gin toua. Anai gomnomna gin, kaba, eic lusud merdoc erleij dou len dous, aimo dau Mer Geigouhw eisaugb Krisdus areg Allah en ogugwo dou danohob naugb sug dan desai dou lusud laugwan toua. En, kaba, en moho agas medam namcir. Hang en eigouhw naugb maman magahugouhw an en dareg masijaresa en toua terimda.

¹²Dan den sijo medam dou maman Adehsud Krisdus Yesus, anai en eic mou ouforoho dara goubesa dou dan naugb dan desai Mer Geigouhw eisaugb en dou lusud. Anai en eiya dan indoc mes, doba edeinyum naugb ginohob. Hang en emeigdoumesa dan indoho naugb gin toua.

¹³En eicara dangga dou dan gedig dan indug mog mog an en, hanoba dan deic en moho bacecim. Dara dan deic mog erij dou men lusud len laugwan sug nosa touohob. Doba en medoc eineg an dan. Hanoba en aigdougwo indan geicara gecgu gin augwan dau dan toua. Anai dan daimo augwan gini dau sug dan demecinaga meijouhw eisaugb en dag misen touebma. Doba dani moongga se lobeigbogaba,

¹⁴Dara maman Adehsud emarges dau sug en medoc eineg an dan gin touwero. Doba en medoc eineg an dan beiseisaugb terimda. Hang en emeic dan indoc aiyansem dou dan naugb sug dan indoc ebdebin an en. Dara dan indoc gororougb lusud toua terimda. Anai sug maman madag hom dara Krisdus Yesusohob, kaba, areg gin augwan eb naugb maman toua namcir.

¹⁵Anai Krisdus Yesus gin, kaba, en emouwaden dau bogo naugb leng ledag beimero. Doba en ouwaden dau bogo naugb en eigdoc leng lebesesar len laugwan dau meren gogom dous. Augwan gini asesa dag misen namcir. Dangga yen yemetogoto en mer gini touwero. Doba yen yebin se yen meigdoc mes, anai se geica namcirohob. Hang eigouhw naugb lusud laugwan merdoc ebdebin an dara laimo toua terimda. Doba gareg Yesus eigdoc en dau sesar men gogomohob, kaba, dan eng debesesar edreg dau len laugwan namcirohob.

¹⁶Doba Krisdus Yesus, kaba, en ouwan dan dedag gansins naugb lusud se lona daiyamo gacin toua. Dauntoba sug len leiya dag en emeic gogom dou dan gedig dan debesesar edreg dau len laugwanohob gin dedemedero. Doba en eigtou bateteij dan dag gin terimda, kaba, eic len merdoc erleij dou len naugb len merdoc ebdebin an en. Dauntoba en eic maireseb menau geb huhugb dou len toua. Hang en medoc emeineg an dan naugb en emaigdougwo indan sesar augwan dau dan toua namcir.

¹⁷Dangga hang, eigouhw naugb maman magahugouhw dara maigdoumesa Allah en moho agas beb huhugb terimda. Anai enin dous eng sud hom areg en mou ouforoho naugb sug en ecinaga meijouhw dau augwan asesa toua namcir. Dara enin eng edag Allah hom dous gedig maman mameiya en se maman mamiresi mougwa hombuma. Dara en emomom touwero. Doba en edag mougt mera medam beb huhugb terimda toua. Augwan gini asesa dag misen namcir.

¹⁸Timotius, dan indisi, areg leng lesai Allah moro len lens deb dou leng se goucimdeb eisaugb ban sug len leigdoumesa ban dag gembala sug nosohob, kaba, dan desulou ban dara goubesa namcir naugb ban abdoc moc dougwo gin touwero. Doba ban abdoc eiseisan gin namcir. Dauntoba areg len louma debin ban ginohob, kaba, ousa ban naugb sug ban bemahau touwero. Doba eic geic mos dou ban naugb sug ban besara dara areg gecgu deigeigouhw terimda.

¹⁹Dara ban bemobsara dau sug ban abdoc ebdebin an Krisdus touwero. Doba ban bes agadgeij naugb ban baimo en terimda. Hanoba ban bebehnehino banin abdoc mes dougwo areg gecgu augwan toua, dauntoba aremer hom emen dougwo ban touwero. Doba aban geicara augwan ecabeci namcir. Anai ligbum, kaba, len merdoc emogdoc aremer augwan ginero, doba len ledreg ginohob. Hang len merdoc emebdebin an Krisdus toua deitero. Doba len ledag ij mebes ocro bobrugb naugb len lobsara dau en namcir touohob.

²⁰Lahwai dau len gin, kaba, lan maroho dag Himeneus dara Aleksander. Hang dan dogugwo lan deb se Setan mesira ucugwohob. Dauntoba sug en eic mog erij medam dou lan, kaba, lan lameic Allah en moho lamacecim dag gin toua deitero. Doba lan lahau an dougwo namcir.