Read Manikion TIMOTIUS HOM 4 Bible Online

TIMOTIUS HOM 4 - Manikion bible

TIMOTIUS HOM 4

¹Doba Mena Gogoufu ens se misen dou mamanohob, dag se lona daiyamo gacin, kaba, ligbum dau maman len merdoc emebdebin an Mer Geigouhw eisaugb Krisdus areg maman mabedbed dou len gini deitero. Doba len lei merums naugb merna gaugwohosa dara merna mog mog an areg len lebedbed dou len ogdoc lusud gedig len merdoc omom dau mer misen eisaugb Krisdus gin namcirohob.

²Hang len lemebedbed areg se geica dou lusud toua deitero. Doba len lebedbed mer areibahau dou len. Hanoba len leicara larerei len meriresi naugb len laijahasero dous.

³Anai len len dougwo lusud dag len lemeicim deitero. Dara len lagodgod len naugb len lousan areg Allah en esinsin gin toua. Dobnaro. Maman gedig maman mamdoc ebdebin an Krisdus dag misenohob, kaba, maman mamehig dau ared hom deitero. Doba maman maic augwan dareg man sijo dou en dauwahabi, maman mamet toua. Anai maman macinaga areg se geica augwanohob.

⁴Anai areg Allah en ahasesei dara en esinsin naugb maman gin, kaba, en ouma debin dag augwan gini ecabeci namcirohob. Dangga hang, maman mamousan hom touwero. Doba maman maic augwan dara man sijo dou en toua. Anai sug maman man sijo dag gin, kaba, gini aninim dag maman mauma debin en mer dag hom emogor touwero. Doba augwan ecabecohob. Hang en emowun maman an areg maman mat hom touwero. Doba en eigdoumesa augwan dag eigouhw deseino en toua terimda.

⁶Ban bens dau areg dan desulou ban an graga augwan asesa dou nanan nanaguner dara nandamouwer len laugwan toua. Anai sug ban beicara dag gin, kaba, ban bedag Krisdus Yesus men sogougb hom gedig en aimo en deigeigouhw namcirohob. Dara ban bemeisan gurog dau mer misen eisaugb Krisdus. Dara meijouhw areg lusud ledidib dou banohob gin touwero. Doba ban abir ebdebin areg ban abdoc ebdebin an dara baimohob gin toua terimda. Anai sug ban beicara dag gin, kaba, eic gerleij dou ban toua.

⁷Hang ban bemaimo leng lecic huhugb dara len merjemouwer meroho graga touwero. Doba ban basid banin aigusi dau leng merirs obdobdem ingga namcir. Anai areg len lecic gin, kaba, dag lusud gedig len meru emaiyero meren genara. Hang emousa ban naugb ban bemaimo Allah en mer se aremer augwan touwero, doba ahwan ban dau gin dous.

⁸Dara ban bemeic abuwemougb esesa naugb ban abaga eiji dag goubesa touwero. Doba ban beicara baimo naugb ban abdoc ecabeci. Dara ban beic abuwemougb esesa naugb ban baimo Allah en mer se men aremer augwan toua terimda. Anai sug ban becgun ban absira naugb ban abaga eiji dag goubesa, kaba, gini ousa ban. Doba cum cum dous. Doba sug ban beic abuwemougb esesa naugb ban baimo Allah en mer se men aremer augwan dag gin, kaba, ban bemec mera sug ban abireseb gin dousero. Doba os dou ban dag ban bemdec mera beb huhugb se lona daiyamo gacin toua. Hang gini emedeinyum naugb aremer hom graga dousero. Doba edeinyum naugb aremer augwan toua namcir.

⁹Dangga sug maman macinaga dau ginohob, kaba, maman mamarges dau sug maman maimo Allah se aremer augwan gin touwero. Doba maman maic mamug erij dara maic mamuwemougb esesa se gin terimda. Anai maman macinaga dau sug maman maicara dag gin, kaba, dag maman mamom touwero. Doba Allah eigdoc maman dau sesar men gogom aud maireseb menau geb huhugb gin toua. Dangga hang, maman mamarges en deb touwero. Doba maman maod mamina debsa en terimda. Anai en, kaba, mobisamougb namcir naugb en eic maireseb huhugb dou maman. Dara maman macinaga dag en emeigdoc maman dau sesar men gogom gin dousero. Doba astesda gareg en medoc ebdebin an en dara od mena debsa en dag misen, kaba, en eigdoc len laugwan dau sesar men gogom augwan aud maireseb menau geb huhugb gin toua. Ban bens dau augwan gini meijouhw esesa dou aban goucimdeb. Hanoba ban barougb len, dauntoba len lemobsara dau gin touwero. Doba len leicara laimo gin terimda. Anai areg dan den dou ban gini, kaba, augwan asesa dag misen namcir. Hang yen yemohoiya touwero, (...)

¹²Dangga ban bemaimo areg gecgu homero. Doba areg agunya dau ban abirs. Dara aban geicara augwan, kaba, edag beim dara ecabeci namcir. Hanoba ban bemarges dau sug ban abdoc gororougb lusud. Dara ban abdoc ebdebin an Krisdus touwero. Doba se aremer gin augwan, kaba, ban bedag gansins naugb len gedig len merdoc ebdebin an Krisdusohob len laugwan toua terimda. Hang dan demouwan naugb lusud lowun ban dag bugdeh mesaba touwero.

¹³Doba astesda sug yen youcimdeb, kaba, dan douwan naugb ban becic dau Surad Injil Meb dou len. Hanoba ban bebedbed dara bedidib meijouhw ucan dou len toua. Dara ban bemarges dau gin touwero. Doba ban bos debin augwan gin terimda dan dedacu ban sungga toua.

¹⁴Dangga hang, ban bemeisan gurog an mou gouforoho areg Allah eic dou banohob sug en esa men lusud aud ban gin touwero. Doba ban beic abuwemougb esesa naugb ban beicara baimo gini terimda. Anai Allah en esa en mer dou ban ogdoc leng lesai en moro sug nosohob dag en ouwan naugb ban besai en mer eisaugb Krisdus dou lusud. Dara ban bens meijouhw augwan dou len toua. Dangga hang, sug mougtir se goucimdeb len lob merisira se ban abugtohob, kaba, Allah eic mou ouforoho dou ban naugb gin touohob.

¹⁵Dangga hang, ban bemarges dau areg Allah eic dou banohob ginlo. Doba ban bogoncin hom gin terimda. Anai sug ban beicara baimo dag gin, kaba, ban beiji dag lusud mos se Krisdus namcir. Hanoba eb ainyes naugb lusud laugwan leiya toua.

¹⁶Doba esloulougb medam naugb ban bebehnehino banin abdoc dougwo areg gecgu augwan. Dara ban besedougwo areg ban bebedbed ingga toua. Dauntoba areg misen mogud eng agunya dou lusud dous. Anai sug ban beicara baimo dangga, kaba, ban bemeigdoc banin dau sesar men gogom dousero. Doba ban beigdoc leng louman ban abir an gin len laugwan dau sesar men gogom gin touohob.