Read Manikion TIMOTIUS HOM 5 Bible Online

TIMOTIUS HOM 5 - Manikion bible

TIMOTIUS HOM 5

¹Sug sud bod hom dau leng Krisden en ebesesar, kaba, ban bemesa ban abir debin enlo. Doba ban benara baded en medoc mes dous, aninim dag ban benara baded ban abina misen toua. Dangga toua, sug lugdeh mes len lebesesar, kaba, ban bemenara gouji dou len touwero. Doba ban benara dara garjaga dou len dous. Aninim dag ban benara dara ban abir arjaga dou ban abaguner dara ban abagtor misen len toua.

²Dangga toua, sug ligida lusudbod laimo areg gecguohob, kaba, ban abir bemaic len touwero. Doba ban besulou len aninim dag ban besulou ban abim misen toua. Dara sug ligdob toua leicara gecgu, kaba, ban bemenara medam dou len touwero. Doba ban ben dougwo len dara ban abir arjaga. Aninim dag ban ben dougwo banin abdemeitor toua. Doba sug ban besulou len dag gin, kaba, ban besedougwo banin abdoc mes agadgeij dau len namcir.

³Doba eisaugb debdesir, kaba, dan demouwan naugb yen yemousa len aibibrero. Doba yen yousa debdes misen dous.

⁴Anai en, kaba, en mehir dara medebeitor lingma naugb sug lousa en touwero. Doba en eigtou dou enin terimda. Hang men ara ara hom emeb naugb enero, kaba, en acgeij Allah astesda lona loba terimda naugb sug en eic ara ara dou en toua. Anai en od mena debsa en hom dous.

⁵Doba debdes gedig en mehir dara medebeitor toua merugwengga, kaba, eigouhw naugb lenin eng merdoc an en naugb len lagauwesa en nosahabi. Dauntoba len ledug men geicara geigouhw dou len ingma ucugb dou en toua. Anai sug len leicara dangga, kaba, len leicara laimo Allah en mer se ginohob. Hang emeic en medoc esgiraha an len toua.

⁶Doba debdes hom gedig en ohw en maga dou lusud naugb en arei aremougb dau len dous, kaba, yen yemousa en touwero. Doba yen yasid en dau goucimdeb. Anai se maga, kaba, en mairesebaba. Doba se en medoc mes, kaba, en omom dau Krisdus namcirohob.

⁷Ban bens dau augwan gini dou debdes an en mehir dara en medebeitor len laugwan. Hanoba ban barougb len naugb len laimo toua terimda. Dauntoba ogdoc aremer gin, kaba, lusud lemowun len touwero.

⁸Anai gareg en emagauwesa mosur, hanoba en emeigdoumesa enin men lusud naugb en emagauwesa len debinbin touwero, kaba, gin dag en aideido dougwo Krisdusohob. Hang en moho eiyema edreg dau leng medigo Yesus len laugwan toua namcirohob.

⁹Dangga hang, debdes gedig en men arisogomoc sud homoi, hanoba en es mesuwa hom terimda en omom dauwohob, kaba, enin dous eng yen yog en moho se surad naugb yen yousa en. Debdes gus, kaba, ban bemog len meroho se suradero.

¹⁰Dara esloulougb toua dag lusud leigdoumesa en moho an men geicara geigouhw dag en emedag medehidera touwero, doba en edag hweij lomoumougb an en mehir. Dara en ebin leng Krisden gus. Hanoba en owun enin medoc mes arjaga dag sogougb deseino len naugb en ousa len dara ara ara. Dara en eigdoumesa gogom dau leng gedig meren aremer eb debin len. Dara en ecgun mesira naugb en aimo ucina geigouhw an lusud gus len laugwan toua terimdohob.

¹¹Doba debdes gedig en edag ligdobaba, kaba, yen yemog en moho se surad ginero. Anai cum, kaba, en medoc etrij icira ligiji deit. Hanoba en emeicara dou Krisdus toua deitero. Doba en arges dau en namcir naugb en edes mesuwa menau toua.

¹²Dangga hang, Allah eic gogom dou en toua namcir. Anai sug yen yog en moho se surad gin, kaba, gini aninim dag en os dou Krisdus dag en emdes mesuwa deitero, doba en eicara naugb en hom dous. Doba sug en edes mesuwa deit, kaba, gini dag en edreg dau areg en os dou Krisdus aimougtut augwan gini touohob.

¹³Dara len lemedreg dau gin dousero. Doba sug yen yousa debdes ligdobaba dag gin, kaba, eic dag len lesebesa augwougb naugb len loc desan len gus meren aremer se len gus meren tu toua terimda. Dara gin dousero, doba eic dag len lecic len gus meroho gouhw genes. Dara len lodo meraga se len gus meren aremer. Hang len merirs emogom an ara ara touwero. Doba len merirs eijouhw naugb len lecic dau areg Allah en dougwohob gin toua namcir.

¹⁴Dangga hang, dan douwan naugb debdes ligdobaba, kaba, len ledes mersuwa deit, dara len lemouwadan merihir, hanoba len ledag hweij lomoumougb an len. Dara len leicara edag beim an leng se meren tu len laugwan toua terimda. Anai sug len leicara dag gin, kaba, emeic cumougt dou maman moc dau leng medigo Yesus naugb len lemeic maman mamoho lemacecim touwero.

¹⁵Anai ligbum dau debdes ligdobaba gin, kaba, len lobsara dau ucina gini. Hanoba len laimo Setan aud areg gecgu ucugb touohob.

¹⁶Doba sug debdes merugwengga desij ligida gedig len merdoc ebdebin an Krisdusohob, kaba, dan douwan naugb len lenin lousa debdes ginahabi. Dauntoba augwan emogomcin goucimdebero. Doba ebsa laugwan merbera toua. Anai sug len leicara dag ginohob, kaba, eic goubesa dou goucimdeb naugb len lousa debdes hom yom gedig len merihir dara merdebeitor ingmaro len dous.

¹⁷Leng lesedougwo meijen tuari, doba leic meruwemougb esesa se gin terimda, kaba, yen yeigdoumesa len meroho edreg dau mougtir gus gus laugwan namcir. Hanoba yen yousa len dara ara ara edreg dou len toua. Anai len leic len merug erij medam naugb len lesedougwo meijen tuari deigeigouhwohob. Dara leng lemesedougwo meijen tuari gin dousero. Doba len leic meruwemougb esesa dara len leic merug erij laos dara naugb len lebedbed dara ledidib meijouhw asesa dou yen toua, kaba, yen yed len gin eng ino naugb yen yousa len edreg dau len gus laugwan toua namcir.

¹⁸Anai augwan gini esogwa deisa areg Musa en og deb se Surad Injil Meb Mohon deb sug nosa touohob, endagai: Ban bemeg aigdaga mes dougwo sapi mers sug en aiyan tramero. Doba ban bamsoho en naugb en et toua. Dara maman Adehsud Yesus enara dangga dou men logodeh sug nosa touohob, endagai: Gareg en esai Allah moro dou lusud, kaba, eigouhw naugb leng louman en mer gini, kaba, len lousa en toua.

¹⁹Sug sud hom ohobas mougt hom en moho deseino ban, kaba, ban bemeic en mer an gin dedemedero. Doba sug lahwai era merug homoi len louma debin aremer gin dou ban, kaba, ban bemousa deisa len merir an gin toua.

²⁰Dangga sug ban becinaga, doba mougt hom gini en ebesesar dag misenohob, kaba, ban bemod aremer gini se simei touwero. Doba ban ben dougwo len deseino goucimdeb laugwan dara goubesa namcir. Dauntoba sug leng se goucimdeb len louman, kaba, len lemeicara danggero. Doba len lahau an dougwo toua. Dau, kaba, ban bowun en moho, dauntoba en emesedougwo goucimdeb toua deitero.

²¹Hang se aremer augwan, kaba, ban bemobsara aud sud hom ingma mougwa hom touwero. Doba deseino Allah dara Krisdus Yesus an men malaikad gecabeci len laugwan, kaba, dan darougb ban naugb ban bagod meren aremer augwan dara ban abdoc gedag beim an len dous.

²²Dara sug ban bowun mougt hom en moho ginohob, kaba, ban bemob ban absira se sud hom ingga en mougt naugb ban bemeigdoumesa en ucugb dedemeda touwero. Doba ban beigtou bateteijahabi. Dauntoba ban bemaimo en se men sesar ginero. Doba ban baimo ucina gecabeci dara gedag beim an gin dous.

²³Anai ligbum, kaba, meren aremer ens ainyes naugb lusud logod an ginohob. Doba lingma, kaba, meren aremer emdagunya se lona daiyamo gacin deits. Aninim dag lusud meren geicara geigouhw, kaba, ligbum eb ainyes deseino lusud naugb len lecinaga dedemeda. Doba lingma, kaba, ban bemeiya dau meren geicara geigouhw gin dedemedero. Doba emdagunya se lona daiyamo gacin. Anai emedeinyum naugb sug len lemecgoneh gin touwero. Dangga sug ban beigdoumesa sud hom graga en mougt dedemeda deit. Doba en medoc emobsara dau men sesar augwan touebma, kaba, gini aninim dag ban baimo men sesar gin touohob. Dara naugb banin, kaba, ban bemeg duhu mogud toua deitero. Doba ban beg anggur mohu gurereito dag ariawen debin duhu gin, dauntoba edis areg geb se ban abdoc mes augwan dau ban toua. Anai areba ban ucucugb terimdohob.