Read Manikion TIMOTIUS HWAI 4 Bible Online

TIMOTIUS HWAI 4 - Manikion bible

TIMOTIUS HWAI 4

¹Timotius, sug Surad Injil Meb men goubesa edeinyum naugb maman dag ginohob, kaba, dan desulou ban deseino Allah dara Krisdus Yesus dara goubesa namcir, naugb ban bemarges dau sug ban besai Mer Geigouhw eisaugb Krisdus gin dou lusud touwero. Doba sug aremer eb dougwo ban, era emeb dougwo banero, kaba, ban beic abuwemougb esesa naugb ban baimo gin terimda. Anai cum, kaba, Krisdus Yesus en ecicugwen naugb en ogod aremer deinaugb leng merireseb dara leng lomom. Dara en edag mougt mera medam naugb en oiharaga len laugwan toua deit.

²Dangga toua, sug lusud leija meruwesa an ara ara eisaugb Allah en mer gin, kaba, ban bedidib meijouhw augwan asesa dou len, dauntoba len merdoc eica namcir. Dara sug lusud lebesesar, kaba, ban ben dougwo len. Hanoba ban bahwan len naugb len laimo areg se geica ucugb. Dara gareg en medoc omomtom sug len laimo ucina mog erij gin, kaba, ban benara bad len merdoc mes, dauntoba len merdoc erleij toua deit. Dara sug ban bedidib mer misen men meijouhw gin dou len, kaba, ban abdoc emetrij naugb sug ban benara dedemeda dara mog mog dou len touwero. Doba sug ban besai Allah en mer gin dou len, kaba, ban beigtou bateteij len, aimo dau aban goubesa an len toua terimda.

³Anai lona ebeij deinyorohob naugb sug lusud lemouman areg geij merdoc erleij dou len deitero. Doba len merums ehigehi naugb len louman mer susugb deit. Hanoba len louci gembala einyana debinim naugb len lebedbed areg len merums ehigehi gin dou len toua.

⁴Dangga hang, len loc dou merums dougwo areg se geica gin deit touwero. Doba len laijahasero icira areg lusud lecic dag huhugb mer gin dous.

⁵Doba naugb ban, kaba, ban bemarges dau sug ban besai Mer Geigouhw eisaugb Krisdus gin touwero. Doba areg Allah arougb ban an ginohob, kaba, ban baimo augwan gini dara ban abdoc augwan namcir. Dangga hang, ban absdemaga emembreij icira ara ara hom touwero. Doba se aremer augwan, kaba, ban abu aiso augwan deigeigouhw toua. Dara ban bemahau dau sug ban baimo ucina mog erij icira sug ban besai Krisdus moro gin touwero. Doba ban baiyan abdocesem naugb ban baimo gini toua terimda.

⁶Anai dan, kaba, lusud lesedeb dan naugb sug len leic gomom dou danohob. Doba meren geicara gin, kaba, aninim dag len leic dan dag gauwaharo dou Allah dous. Hang indan lona naugb sug dan deihwededau sugini aud bogo, kaba, ebeij deinyor namcir touohob.

⁷Anai dan, kaba, dan demedis dau ucina aud maireseb menau geb huhugb gin touwero. Doba dan decgun dan insira dara dan daiyan indinesem naugb dan dobgasa ucina gini terimda dan dedebeij usohob. Dara dan demobsara dau sug dan indoc ebdebin an Krisdus gin touwero. Doba dan daimo en dara dan indoc hom toua namcirohob.

⁸Hang maireseb menau geb huhugb gini, kaba, emediyebeiya dau dan touwero. Doba sug dan daimo areg asesa Allah enin medoc mes dag ginohob, kaba, maman Adehsud emeic maireseb gini se Lona Sug En Ogod Aremer Aga Lusud laugwan dou dan toues. Anai en, kaba, en emobsara aud sud hom touwero. Doba en ogod aremer augwan dara medoc edag beim an lusud laugwan namcir. Dara en emeicara dag gini dou dan dousero. Doba gareg en medoc ebehibeh naugb en sug en ecicugwen, kaba, maireseb menau geb huhugb gini emediyebeiya dau en touwero. Doba maman Adehsud emeic dou en se Lona ingga toues.

⁹Dangga sug ban becinaga dag lusud lesedeb naugb len leic gomom dou danohob, kaba, ban bemeigtou bemateteijlo. Doba ban beijeijo dedemeda sugin toua.

¹⁰Anai Demas, kaba, en medoc etrij icira areg geb se cinogo gin ucugb. Hang en emousa dan deitero. Doba sug en ohw en medigo dou danohob, kaba, en eihwedig cinogo Tesalonika dau dan touohob. Dara Kresges en, kaba, en eihwedig leng Galatia meren hancob. Dara Titus en eihwedig leng Dalmatia meren hancob toua.

¹¹Doba Tikikus, kaba, dan desa en aud ban dig cinogo Epesus sungga naugb en eperwei ban abuhw. Dangga hang, sug ban ben aud dan, kaba, ban bahwan Markus teitei naugb en ousa dan an ara ara toua. Anai Lukas enin dous eng eigtou desij dan deb gini.

¹³Dara ban bodo indan sansun gesrougb gedig dan darges se Karpus men tu se Troas, dara indan surad dau mangkerum augwan toua. Doba areg gesloulougb edreg dau areg gus augwan namcir, kaba, dag ban bodo indan surad dau aremeta mos hom naugb dan dous.

¹⁴Doba ban abires badeijlo dougwo sud hom, moho Aleksander, gedig en mou ouforoho naugb en esinsin ara ara dau kermum gohoseri en namcir. Anai en, kaba, en ehigdud maman icira sug maman masai Mer Geigouhw eisaugb Krisdus dou lusud terimda. Hang en eic gecgwan dan mougwa einyana touohob. Doba maman Adehsud enin, kaba, en emauni men geicara gecgu gini ucugb dou en toues.

¹⁶Doba eisaugb dan insir leng Krisden sugin, kaba, dan dacgeij Allah dauntoba en emowun len meroho an meren geicara dou dan touwero. Anai sug dan denara an danin dou leng Roma meren mougt mera medam sug aimougtut gin, kaba, sud hom ingma dau len en emouma debin dan indir an areg dan den dou en touwero. Doba maman Adehsud enin dous eng moongga dara dan. Len gus, kaba, len laugwan lougbdedau dan namcir. Hanoba en eic goubesa dara mou ouforoho dou dan naugb dan desai Mer Geigouhw eisaugb Krisdus men meijouhw augwan asesa dou leng medigo Yesus len laugwan toua. Hang dan demobsara se len merisira mes touwero. Doba maman Adehsud enin eng eigdoc dan indina agau ucugwohob.

¹⁸Dara en emeigdoc dan dau len gin merisira mes dousero. Doba en eseyeiyo dan dougwo len gus meren geicara gecgu augwan. Hanoba en ahwan dan dara dan indina agau se bogo naugb en oiharaga dan sungga toua namcir. Dangga eigouhw naugb maman maigdoumesa en moho dara magahugouhw an en beb huhugb terimda. Augwan gini asesa dag misen namcir.

¹⁹Ban ben dou Priskila, dara Akwila, dara leng leigtou desij Onesiporus se men tu dag len laugwan meriresi.

²⁰Erasdus eni moongga se Korintusaba. Tropimus, kaba, dan darges en se Miletus deb, anai arebeni.

²¹Ban beijeijo dedemeda naugb ban bedebeij dan sugini sug igda goho dugurij gini emebijebma. Anai ebijohob, kaba, ban bemeisa ij sugin deitero. Eubulus, Pudens, Linus, Klaudia, dara leng Krisden gus gus sugin, kaba, len laugwan lou ban toua.

²²Maman Adehsud Yesus Krisdus eseyeiyo ban dougwo augwan ucucugb terimda. Allah enin eng medoc eineg an yen yaugwan sungga toua.