Read Manikion TITUS 2 Bible Online

TITUS 2 - Manikion bible

TITUS 2

¹Doba ban, kaba, ban bebedbed areg geic lusud merdoc erleij dou len dous.

²Dangga hang, ban besulou leng Krisden ligiji gedig len ledag lusudbodohob, kaba, dag len merdoc emetrij icira ara ara touwero. Doba len leses meraga se dous. Hanoba len meru auti augwan dara geigouhw toua namcir. Anai sug len leicara dag gin, kaba, edeinyum naugb lusud leigdoumesa len meroho an toua. Dara ban besulou len, dauntoba len merdoc erleij icira mer misen gin toua. Hanoba len lemarges dau sug len merdoc gororougb lusud. Dara sug len laimo ucina mog erij gin touwero. Doba len les agadgeij se augwan terimda.

³Dara ligida Krisden gedig len ledag lusudbodohob, kaba, ban besulou len, dauntoba len lemecic len gus meroho gohw genes. Dara len lemedag sogougb naugb ahwei mohu touwero. Doba meren geicara augwan aninim dag lusud gedig len laimo Allah dag misenohob dous.

⁴Hanoba len lomnomnan areg geigouhw dou ligida ligdob gedig len les mersuwohob. Dauntoba sug len lecinaga meijouhw augwan dau ginohob, kaba, len lemesenagan len mersuwer touwero. Doba len leicara edag beim an len dara len merihir laugwan toua terimda.

⁵Dara len lesulou ligida ligdob gini, dauntoba len meru aiso aremer augwan. Dara meren geicara augwan toua ecabeci namcir. Dara len larautut len eisaugb lesara dara lohwara, dauntoba len lesedougwo meren tu toua dara geigouhw. Dara len lesulou len, dauntoba len lemeicara lemaihagab mersuwer touwero. Doba len lowun lenin merdoc mes arjaga deseino len terimda. Anai sug len leicara dag gin, kaba, lusud lemeic Allah mer eisaugb Krisdus gin lemacecim touwero, doba len leigdoumesa len meroho an namcir.

⁶Dangga toua, lugdeh mes, kaba, ban besulou len dara goubesa namcir. Dauntoba len lemaimo areg len merdoc emetrij icira touwero. Doba len meru aiso aremer augwan toua terimda.

⁷Dara banin, kaba, aban geicara augwan toua obosboro dara edag beim an len gus. Dauntoba sug len leiya icira ban, kaba, len lesogwa deisa ban abohotimei mohw an gin toua namcir. Dangga toua, sug ban bedidib Krisdus mer meijouhw dou lusud, kaba, ban bemeicara ara ara bemahurim dara gin touwero. Doba ban bens areg se geica dara ban abdoc hom an dou len. Hanoba ban bemagahugouhw debin gin dou len touwero.

⁸Doba ban benara se misen dou len dous. Anai sug ban beicara dag gin, kaba, emata lusud naugb len lemaijahasero touwero. Doba eic dag len merdoc erleij icira mer misen gin namcir. Dangga hang, len lemeic areg ban besai gin naugb len lemacecim touwero. Doba len lod merna debsa terimda. Dara eic igdebes dou maman moc toua. Anai maman aremer naugb sug len lowun maman mamoho an gin, kaba, hom touwero.

⁹Dara leng Krisden gedig len ledag sogougb, kaba, ban besulou len. Dauntoba len lemohoiya meren mougtir merir touwero. Doba len laimo len merir se aremer augwan terimda. Hanoba len leic meruwemougb esesa, dauntoba meren geicara augwan, kaba, eic meren mougtir merdoc esgiraha dou len toua.

¹⁰Dara ban besulou len, dauntoba len lemenara ucucugb, dara len lemesedi meren mougt men aremougb touwero. Doba se meren geicara augwan, kaba, len lens lenin ainyes dou len dag len lemeicara dara merdoc hwaiyero, doba len leicara dou len dara medoc hom dous. Dauntoba meren geicara augwan gini, kaba, emeic dag lusud lemesbes an Allah en mer gin touwero. Doba len leigdoumesa gin moho agas terimda. Anai en, kaba, en eigdoc maman dau sesar men gogom augwan namcir.

¹¹Mamang Krisden maicara dag graga, anai Allah ens en medoc ainyes dou lusud se cinogo augwanohob, dag en medoc an len naugb en eigdoc len dau sesar men gogom augwan toua.

¹²Dangga hang, maman mameicara mamaihagab areg Allah arougb maman an. Dara maman mamdoc emetrij icira areg geb se cinogo gin toua deitero. Doba sug Allah medoc an maman dag ginohob, kaba, arautut maman naugb sug maman mabehnehino mamanin mamdoc mes dougwo areg gecgu. Hanoba maman maimo areg gedag beim dara obosboro an lusud. Dara areg Allah arougb maman an sug maman mamugwengga se cinogo ginaba, kaba, maman masogwa deisa en mohotimei mohw an augwan toua terimda.

¹³Dauwohob, kaba, maman maigtou mateteij. Hanoba maman maod mamina debsa Yesus Krisdus an Men Lona Geigouhw Sug En Ecicugwen gin toua. Anai en, kaba, en edag maman Allah Gedig En Moho Agas Medam. Dara en edag Sud Hom Gedig En Eigdoc Maman Dau Sesar Men Gogom Augwan aud maireseb menau geb huhugb gin toua namcir. Dangga hang, se lona ingga, kaba, en ens enin ainyes dou maman. Dara men gogouf cucugb erbacec en toua.

¹⁴Anai en, kaba, en eic enin maga bancoho aga maman dou Allah naugb sug en eigdoc maman dau areg gecgu augwan ginohob. Hanoba en ouci maman dag enin men lusud gedig len lemaimo sesar deitero. Doba len leic meruwemougb esesa naugb len laimo areg geigouhw mogud dous.

¹⁵Ban bens dau aremer graga augwan dou aban lusud naugb len louman. Hanoba ban besulou len naugb len laimo. Dara sug len ledreg gin, kaba, ban ben dougwo len, aimo dau goubesa areg Allah ogugwo dou banohob an len toua. Anai dan demouwan naugb sud hom ingma emowun ban aboho touwero. Doba len laugwan leigdoumesa ban aboho an gin terimda.