Read Manikion TITUS 3 Bible Online

TITUS 3 - Manikion bible

TITUS 3

¹Dara ban besulou aban lusud, dauntoba len lemohoiya mougtir dau pemerintah an meren gedeijan len merir touwero. Doba len lowun lenin merdoc mes arjaga naugb len laimo len merir aududi an areg len larougb len an gin toua terimda. Hanoba len lesedeb len merdoc mes naugb len laimo len se aremer geigouhw augwan toua.

²Dara ban besulou len, dauntoba len lemecic sud hom ingma en moho gohw genes deseino lusud, dara len lemenara lemaised sud hom touwero. Doba len lowun lenin merdoc mes arjaga. Dauntoba meren geicara augwan, kaba, dag edouder an len gus toua namcir.

³Ban besulou len dangga, anai sug nosa, kaba, maman geicara augwan toua dag leng meru edgom naugb maman mamaimo areg Allah arougb maman an gin touwero. Doba maman mahoiya en mer naugb maman mabesesar terimda. Dara maman madag sogougb naugb maman maimo areg maman mamdoc etrij icira. Dara areg eic maman mamdoc oungmogo aud gini dous. Dangga hang, maman mamdoc edag beim an lusud touwero. Doba astesda lona, kaba, maman maho aremer debin len. Hang len merdoc mog mog an maman. Dara maman mamdoc mog mog an len toua namcirohob.

⁴Doba Allah ens enin ainyes dou maman dag en medoc eigouhw an maman. Dara en medoc gororougb maman. Anai en esa Krisdus ouwaden dau bogo se cinogo gini, hanoba en eigdoc maman dau sesar men gogom augwan aud maireseb menau geb huhugb gin touohob. Anai enin dous eng Sud Hom Geigdoc Lusud Dau Meren Gogom Augwan namcir.

⁵Dangga hang, Allah emeigdoc maman dau sesar men gogom ogdoc maman geicara geigouhw touwero. Doba en eigdoc maman dau sug en medoc eineg an maman gin dous. Hanoba en esa Mena Gogoufu se maman mamdoc mes naugb en edu areg gecgu dau maman. Dauntoba maman mamireseb dara maman gauwamara augwan toua dag mohon deitero. Doba sug Mena Gogoufu einesa maman mamdoc mes dag ginohob, kaba, en arautut maman naugb maman mamireseb dara maman gauwamara augwan dag menau namcir.

⁶Anai sug Yesus Krisdus eigdoc maman dau sesar men gogom augwan dag ginohob, kaba, Allah esa Mena Gogoufu gini batij bobdaga an men goubesa se maman mamdoc mes touohob.

⁷Hang maman mamedag Allah men moc toua deitero. Doba ogdoc Krisdus medoc an maman dag gin, kaba, Allah eic gesgigouhwesa dou maman toua. Sug en eicara dag gin naugb mamanohob, kaba, maman macinaga dag maireseb menau geb huhugb areg en esedeb naugb maman, kaba, augwan emediyebeiya dau maman touwero. Doba maman maod mamina debsa en an gin terimda. Areg graga augwan, kaba, asesa dag buc gototo namcir. Hang ban bemeija abuwesa ginero, doba ban bod abina debsa gin terimda.

⁸Dangga hang, ban bemamsoho gin deb touwero. Doba dan douwan naugb ban bou abiresa gini ucucugb dou aban lusud. Dauntoba leng gedig merdoc ebdebin an Allah enohob, kaba, len lemaimo areg gecgu an lusud toua deitero. Doba len leic meruwemougb esesa naugb len laimo areg edag beim dara obosboro an len laugwan. Dauntoba len lesa mera geigouhw einyana icira len. Anai augwan gin, kaba, mera eisaugb toua namcir.

⁹Doba lusud gedig len lenara laisedim eisaugb maman mamjemouwer, era malaikad len meroho, dara leng lenara lauwim dara lenara merir edregim eisaugb ara moho hom yom men meijouhw se Musa men gomnomna, kaba, ban bemaimo len aud ginero. Doba ban basid banin dau len. Anai meren geicara gin, kaba, aninim dag leng meru emaiyero dara leng meru edgom meren geicara dous. Hang emeic dag lusud lemera mera geigouhw icira gin touwero, doba augwan dag augwougb namcir.

¹⁰Dangga toua, gareg en ouwan ekeba lusud se goucimdeb daum, kaba, ban ben dougwo en mougwa cuhwai dous. Dobnaro, kaba, ban basid en dau goucimdeb. Hanoba ban bemedag hom dara en touwero.

¹¹Anai ban becinaga dag sud hom gin, kaba, en emaimo areg se geica toua deitero. Doba en medoc mes eiyema an areg gecgu namcirohob. Hang ens ainyes dou enin dag Allah men gogom eb naugb en touaba. Anai en emarges dau sug en ebesesar touwero, doba en eicara dangga terimda.

¹²Dan desedeb Artemas, era Tikikus laingma laperwei naugb ban abuhw se lomos Kreta inggohob. Dangga hang, sug sud hom dau lan en edebeij banohob, kaba, ban bobursa en medigo dedemeda naugb ban bedebeij dan se cinogo Nikopolis gin toua. Anai dan dogod anohob dag dan deigtou sugini terimda igda goho dugurij augwan obsara dauwahabi, dan demeihwedig cinogo gus deita.

¹³Doba sug Senas gedig en mou ouforoho se Musa men gomnomna, dara Apolos, lan ladebeij ban, kaba, ban abdoc an lan toua. Hanoba sug lan laihwededau ban deit, kaba, ban besedeb ara ara naugb lan. Dauntoba lan mardoc emecgu asa ucina touwero. Doba areg ban beic, kaba, edeinyum naugb lanohob.

¹⁴Dara ban benara barautut maman logodeh, dauntoba len lemehig dau sug len lousa lusud touwero. Doba len leicara lainyeinyen naugb len laimo areg geigouhw an len terimda. Dauntoba sug len leiya, doba gareg men ara ara emedeinyum naugb sug en eigtouero, kaba, len toua lecinaga naugb lousa len. Anai dan demouwan naugb len lemaimo Krisdus men ucina augwougwero, doba len lera mera geigouhw an len gus toua.

¹⁵Leng leigtou desij dan sugini, kaba, emen emaugwan emou ban. Dara ban ben dou nanan nansir gedig len merdoc ebdebin an Krisdusohob, kaba, dag emen emaugwan emou len toua. Allah enin eng medoc eineg an yen yaugwan namcir.