Read Manikion IBRANI 1 Bible Online

IBRANI 1 - Manikion bible

IBRANI 1

¹Sug Allah enara dou maman mamjemouwer sug nosa, kaba, en emens dau areg geb se enin medoc mes augwan dou len se lona homero. Doba en ekeba naugb en ens moho hom yom dou leng lesai en mer ginahabi, len lemens dau mer gini dou len ucucugb toua. Dara sug en enara dou maman mamjemouwer gin, kaba, en emaimo ucina hom an len touwero. Doba en enara ogdoc ara aingma aingma dou len toua.

²Doba edebeij lona sug ouwedoc gin, kaba, Allah en esa en mer dou maman ogdoc en Meisi mohora hom gini naugb en esai augwan dag misen dou maman deit. Anai areg Allah en ahasesei dara en esinsin, kaba, en emesinsin hom dau eninero. Doba eni dara en Meisi, lan lahwas laohw mardocedoum naugb augwanahabi, en Meisi emesinsin toua. Dauwohob, kaba, Allah esedeb en dara eigdoumesa en naugb en moho aiga augwan se Lona Gouwedoc gin toua namcir.

³Anai en, kaba, Allah men gogouf cucugb augwan ebsa eni. Dara en mog toua dag Allah teiteiyohob. Hanoba en mer ogod an deb toua. Dauntoba areg en ahasesei dara esinsinohob, kaba, emedregim touwero, doba ec dara gesgiraha terimda. Anai en mer gin, kaba, mobisamougb toua namcirohob. Dangga sug en eic en mogwihi bauwaharo dou Allah naugb maman sesar augwanohob, kaba, en eisaugb dig bogo bedreg dau malaikad laugwan naugb en edeigtou desij Allah se en mesira misen. Hanoba en edag mougt mera medam desij en toua. Anai Allah gin, kaba, en mobisamougb edreg dau augwan namcir.

⁴Allah eigdoumesa en Meisi en moho naugb en eigtou se maija moc edreg dau malaikad laugwan dag gini. Anai en moho gedig Allah eic dou en gin, kaba, agas medam edreg dau malaikad len meroho gedig Allah eic dou lenohob augwan toua namcir.

⁵Anai Allah emenara dou sud hom ingma dau men malaikad, endag: Se lona gin, kaba, ban bedag dan Indisi. Hanoba dan dedag ban Abina. Dara en emenara eisaugb men malaikad hom ingma dag cum, kaba, en edag en Mena dara en edag en Meisi mougwa hom touebma. Doba en enara dag gini dou en Meisi mohora hom gini dous.

⁶Dangga edebeij lona sug Allah esa en Meisi mebin mohora hom gini se cinogo, kaba, en arougb len, endagai: Dan douwan naugb indan malaikad yen yaugwan yesijaresa dan Indisi hom gin terimda.

⁷Doba eisaugb men malaikadir gin, kaba, Allah owun len meroho dag gini, endagai: Dan dos len laugwan dag loungmen mohora dara smougb mouf, anai len laugwan ledag sogougb desij danohob.

⁸Doba eisaugb en Meisi, kaba, Allah eigdoumesa en moho aninim dag enin touohob. Hanoba en enara dou en, endagai: Areg ban boiharaga, kaba, augwan emediyebeiya dau ban touwero. Doba eb naugb ban beb huhugb namcir, anai ban aboho toua bedag Allah danohob. Dara ban bemaimo ucina agabgeb an lusud touwero. Doba areg ban boiharaga gin, kaba, ban baimo ucina edag beim an len dous.

⁹Anai ban abdoc erleij naugb ban baimo areg asesa danin indoc mes terimda. Doba areg gecgu, kaba, ban abdoc esdigeij gin namcir. Dangga hang, dan demeigdoumesa ban aboho agas medam edreg dau ban absir len laugwan. Dauntoba ban abdoc agahugouhw an gin toua terimda, anai dan dedag aban Allah dag misenohob.

¹⁰Dara Allah emeigdoumesa en Meisi en moho aninim dag enin moho dousero. Doba en eigdoumesa en moho edag sud hom gahasesei augwan toua. Hang en og deb se Surad Injil Meb Mohon deb dag gin sug nosa touohob, endagai: Adehsud, banin dous eng bahasesei cinogo augwan deb sug acgunog. Dara bogo, kaba, ban bahasesei augwan dara banin absira touohob. Hang banin dous eng bedag mougt mera medam naugb augwan gin toua.

¹¹Dara areg ban bahasesei dara besinsinohob, kaba, cum, augwan ediyebeiya ucugb dangga. Aninim dag sansun sug lusud leg se merus terimda, kaba, emeb terberba touwero, doba cum, kaba, edugdug toua. Doba banin, kaba ban beis huhugb namcir.

¹²Hang ban bemouwedoc dara bemeperwei touwero. Doba ban bebsugeb, dara ban abireseb huhugb toua. Doba areg ban bahasesei dara besinsin gin, kaba, cum, ban bodunggon augwan naugb berba dous. Hanoba ban beperwei augwan dag menau ucugb deit toua.

¹³Dara Allah enara dou en Meisi gin deit, endagai: Ban beigtou desij dan dig dan insira misen terimda dan dowun aban moc len laugwan dag hotingga leb tainya ban abohora nosahabi, ban bemedag mougt mera medam desij dan beb huhugb namcir toua. Doba dou men malaikadir, kaba, Allah emenara dangga dou sud hom ingma dau len touebma.

¹⁴Anai len, kaba, meren geicara dag ara dousa? Len, kaba, len ledag Allah men sogougb gedig en esa len aud maman naugb len lousa maman. Anai maman, kaba, Allah esedeb maman naugb en eic maireseb menau geb huhugb dou mamanohob.