Read Manikion IBRANI 11 Bible Online

IBRANI 11 - Manikion bible

IBRANI 11

¹Dangga sug maman mamdoc ebdebin an Allah dag misen namcirohob, kaba, maman mameija mamdocesa en an areg en os dou maman gin touwero. Doba maman maod mamina debsa en dag areg en os dou maman ginohob, kaba, en emeic augwan dou maman toues. Hang maman mamdoc toua ebtou namcir dag areg maman mameiya dara maman mamiresebma, kaba, inggebga naugb maman touohob.

²Aninim dag maman mamjemouwer, kaba, len lemeija merdocesa Allah an areg en en dou len sug nosa touwero. Doba len merdoc ebdebin en mer an gin terimda. Hang eic dag Allah medoc agahugouhw an len toua namcirohob.

³Sug maman mamdoc ebdebin an Allah en mer gin dag misenohob, kaba, maman macinaga dag bogo, dara cinogo, dara areg gus augwan, kaba, lemeb augwougb dag gin touwero. Doba augwan gini, kaba, ebiji namcir dau sug Allah en mer an ginohob. Hang maman macinaga dag areg maman maiya gin, kaba, emen dau areg maman macinaga ginero, doba en dau areg maman mamecinaga gin dous.

⁴Dangga Habel en toua, sug en eic ara ara bauwaharo dou Allah naugb men sesar sug nosa, kaba, Allah emotogoto en an ginero. Doba en eigdoumesa en moho an gin namcir. Anai en emedreg Allah en mer an areg graga augwan touwero. Doba sug en medoc ebdebin an en mer ginohob, kaba, en aimo areg asesa Allah enin medoc mes se gin toua terimda. Hang areg en eic dou Allah gin, kaba, eigouhw edreg dau areg en maguna Kain eic dou Allah toua namcir. Anai Kain, kaba, en medoc emebdebin an areg Allah arougb en an ginero. Doba en eic ara ara bauwaharo dou en augwougb dau enin medoc mes dous. Dangga Habel gin, kaba, en toua omom dau ginohob. Doba men geicara gin, kaba, dag gansins eb deinaugb maman terimda.

⁵Dangga toua, sud hom, moho Henog, kaba, en emomom touwero. Doba sug eni moongga se cinogo ginaba, kaba, Allah eperwei en maga, hanoba eigdoumesa en dig bogoda. Anai en emobsara dau sug en medoc ebdebin an Allah touwero. Doba en od mena debsa en an areg en os dou en gin toua terimda. Hang Surad Injil Meb Mohon enara dou maman dag lusud lehilon dougwo en, doba len lemeiya en touwero. Anai Allah eigdoumesa en dau lenohob. Dara Surad Injil Meb enara dou maman toua dau sug Allah emeigdoumesa enbuma, kaba, dag Allah medoc agahugouhw an en namcir touohob.

⁶Dangga gareg en en aud Allah naugb en acgeij ara ara dau en, kaba, esloulougb medam dag en emeija mouwesa Allah dag en moongga, era mogero touwero. Doba en en aud en dara medoc eica namcir dag en eis huhugwohob, anai gini aimo dau areg Allah en ouwan dangga. Dara esloulougb toua dag en od mena debsa Allah dau sug en medoc etrij icira naugb ehilon en terimda, kaba, dag en emeic areg en acgeij en an ingga dou en toues. Anai gareg en en aud Allah, doba en eija mouwesa endag Allah maires inggebgei? Era en emauni en meresei? Era naroei? Kaba, Allah medoc emeigouhw an enero, doba en medoc esrougb an en namcir. Hang en emeic ara ara hom dou en touwero.

⁷Dara Nuh en toua emeiya dau gogom areg Allah en esedeb naugb lusud se lona daiyamo gacin touebma. Doba sug Allah esulou en an ginohob, kaba, en medoc emaihagab en mer an gin touwero. Doba en medoc eiseisan gin namcir. Hanoba en esinsin ij medam hom. Dauntoba ij eigdoc en an en mesouwa, dara en mehir merug homoi an len mersouwer len laugwan toua. Dangga sug Nuh medoc ebdebin an Allah en mer dag ginohob, kaba, Allah eigdoumesa en dag en eic gesgigouhwesa dou en ucugwohob. Doba len gus, kaba, Nuh men geicara geigouhw gini owun len meroho namcir. Anai len lemaimo en naugb len leicara geigouhwero. Doba len leic merus naugb len laimo areg gecgu terimda. Hang gogom emeb dau len touwero, doba obsara baiyan len laugwan namcir.

⁸Dangga toua, Abraham sug Allah arougb en naugb en eihwedig cinogo menau areg Allah os dou enohob, kaba, en emeija medocesa Allah en mer gin touwero. Doba en medoc hom naugb en aimo areg Allah arougb en an gin toua namcir. Hanoba en eihwededau men cinogo mohon augwougb dous. Anai en emecinaga ucina aud cinogo menau gin touebma.

⁹Dara sug en edebeij cinogo menau areg Allah os dou en ginohob, kaba, en emohud tu misen naugb sug en atou se touwero. Doba en ohud hugbei naugb en eigtou dag lugmahara desij lugun sungga dous, aimo dau areg Allah os dou enohob gin terimda. Dara en meisi Isag dara en medebeito Yakub, kaba, Allah os cinogo gin dou lan touohob. Hang lan toua lameigtou se tu misen touwero. Doba len latou desij Abraham se men tu hugbei gin toua terimda.

¹⁰Anai Abraham, kaba, en eigtou bateteij naugb cinogo misen gedig Allah enin eng esedeb, hanoba ohud deb naugb enohob. Hang gin, kaba, emediyebeiya dau en touwero, doba eb naugb en beb huhugb namcir.

¹¹Dara Abraham, kaba, en edag sudbod. Dara Sarai, kaba, en toua edag duga mec namcir. Hang emedeinyum naugb lan laic marih deiterohob. Doba Abraham, kaba, en emeija medocesa Allah an areg en os dou en gini touwero. Doba en medoc ebdebin an en dag areg en os dou en ginohob, kaba, en emeperwei medoc mes an gini touwero. Doba en aimo augwan gini an en toua terimda.

¹²Dangga hang, Abraham, kaba, deinyor sug en omom. Doba sug en medoc ebdebin an Allah dag ginohob, kaba, en medebeitor lebedero dag tebeij se bogo, dara lebedero dag geria se dum mebera toua namcir.

¹³Doba len gin laugwan, kaba, len lomom dau cinogo areg Allah os dou len ginohob. Anai areg en os dou len gin, kaba, en emeic dou len se cinogo ginero. Doba len leiya cinogo gin dag eb aigusaba se len merdoc mes dous. Hanoba len merdoc erleij aud gin toua. Dangga hang, igdebes emeba len sug len los ladi lenin deseino lugun se cinogo gin touwero. Doba len los ladi lenin dag lugmahara dara lusud gedig len latou sousougb se ucina mogumsi aud cinogo menau deseino len terimda.

¹⁴Sug len los ladi lenin dou lusud dag gin, kaba, gini ansins dou maman dag len lemoudesan lugun se cinogo gin deitero. Doba len merdoc erleij aud lugun se cinogo menau hom gin dous. Anai sug len merdoc acincin an meren cinogo areg len leihwededau ginohob, kaba, cumougt inggebga naugb len lecicugb aud meren cinogo mohon ucugb deit.

¹⁵

¹⁶Dobnaro. Len merdoc erleij aud cinogo menau geb se bogo hom dous. Anai cinogo menau gin, kaba, eigouhw bedreg dau meren cinogo mohon geb se cinogo gin namcir. Dangga hang, sug len merdoc erleij aud Allah men cinogo dag ginohob, kaba, igdebes emeba en dau sug len leija en dag meren Allah touwero. Doba en ouma debin len an gin namcir. Anai enin eng esedeb cinogo menau gin deb naugb lenohob.

¹⁷Dangga toua, sug Allah ainyen Abraham naugb en eic en meisi Isag bauwaharo dou en sug nosa, kaba, Abraham medoc emagadgeij dau en touwero. Doba en medoc ebdebin an areg Allah os dou en gin namcir. Hang en esedeb naugb en eic en meisi mohora hom gini bauwaharo dou en toua.

¹⁸Anai en ogod se enin medoc mes dag Allah men goubesa edeinyum naugb sug en eigdoumesa Isag dau gomom ucugb dou en toua. Dangga hang, en emen dougwo Allah en mer an gin touwero. Doba en esedeb naugb en aimo en mer an gin namcir. Anai en ecinaga dag Allah os dou en sug nosohob, endagai: Ban abdebeitor areg dan dos dou banohob, kaba, dan deic len laugwan dou ban ogdoc ban abisi Isag gini dous. Hang maman manara dag Allah eic en meisi gini aninim dag sud hom geisa dau gomom ucugb dou en toua. Anai se medoc mes, kaba, Abraham eic gomom dou en meisi ginohob.

¹⁹

²⁰Dara Isag, kaba, en toua acgeij Allah naugb en eic geigouhw dou Yakub dara Esau. Anai en medoc ebdebin an Allah dag areg en os dou Abraham eisaugb cinogo Kanaan naugb lona daiyamo gacin, kaba, eb naugb en meisi lan. Hang en ouma debin gin dou lan toua.

²¹Dara Yakub en toua medoc ebdebin an areg Allah os dou Abraham eisaugb cinogo Kanaan gin toua. Dangga hang, sug en deinyor omomohob, kaba, en os ijouhugwa adedeic mohumes naugb en esijaresa Allah. Hanoba en acgeij Allah naugb en eic geigouhw dou Yusub meisi lahwai, lan maroho Epraim dara Menase, eisaugb cinogo Kanaan gin toua.

²²Dangga toua, Yusub sug eni deinyor omomohob, kaba, en ens dou leng Israel dag se lona daiyamo gacin, kaba, len leihwededau cinogo Mesir aud Kanaan gin toua deit. Anai en medoc ebdebin an Allah dag areg en os dou Abraham eisaugb cinogo ginohob, kaba, en emereiyara touwero. Doba en enara se misen namcirohob. Hang en emenara dou leng Israel dau sug len leihwededau cinogo Mesir gin, kaba, dag len lodo en mori dau cinogo ingga dig Kanaan toua.

²³Dara Musa mena dara mem, kaba, lan toua mardoc ebdebin an areg Allah os dou Abraham ginohob. Dangga hang, lan lamahau dau Piraun an areg en arougb leng Israel naugb len logod meren logodeh ligiji laugwan lomom gin touwero. Doba sug Musa mem ouwadan enohob, kaba, lan lacgoneh en dau Piraun se igda homoi toua. Anai lan laiya, doba en mebes ecabeci namcir. Hang lan lacinaga dag Allah esedeb en naugb ara ara touohob.

²⁴Dangga toua, Musa sug en edag sudohob, kaba, en emouwan naugb lusud lemeigdoumesa en moho dag Piraun mehida mogwihi mogo en toua deitero. Doba en ouwan naugb len larges merir dau gin namcir. Anai en toua medoc ebdebin an areg Allah os dou Abraham eisaugb cinogo Kanaan ginohob.

²⁵Hang en emaimo leng Mesir meren geicara dag sesar aud areg eic en medoc eigouhw dou en dag cum cum dous gin toua deitero. Doba en ouci naugb en aimo Allah men lusud leng Israel se ucina mog erij gin terimda.

²⁶Anai en toua medoc eiseisan areg Allah os dou leng Israel ginohob. Hang en emogod se enin medoc mes naugb en emaimo leng Israel se meren ucina gesmesman gini. Aninim dag Krisdus aimo ucina gesmesman se lona daiyamo gacin gin touohob. Anai en eigdoumesa Allah men gos dou gin, kaba, mera eisaugb medam edreg dau leng Mesir meren aremougb augwan namcirohob.

²⁷Dangga hang, en emahau dau sug Piraun medoc esrougb an en touwero. Doba sug en medoc ebdebin an areg Allah os dou Abraham dag ginohob, kaba, arges maga dau Mesir gin deb namcir. Hanoba en emecicugb aud cinogo Mesir gin toua deitero. Doba en eihwedaud cinogo Kanaan gin dous. Anai en emeiya Allah dara en mairesero, doba en ecinaga eni moongga desij enohob.

²⁸Hanoba en arougb leng Israel naugb len leic domba mogwihi largeh meren misis mecdemaga augwan dougwo malaikad. Dauntoba en emogod len merisi mebin lemomom touwero, doba len merna agau namcir. Anai en medoc ebdebin an areg Allah os dou Abraham eisaugb Kanaan gin terimda. Dangga hang, en emenara dou leng Israel, dauntoba len merdoc moc dougwo Lona Gohw Bedreg gin touwero. Doba len merna eiseisan naugb len lougwan ared debin gin se lona daiyamo gacin toua terimda. Anai sug malaikad en eiya, doba mogwihi eb se misis mecdemaga ginohob, kaba, en emogod meis mebin se tu ingga touwero, doba en edreg namcir.

²⁹Dara leng Israel len toua lod merna debsa Allah an areg en os dou Abraham gin touohob. Dangga hang, sug len ledebeij se Duhu Gahani meberohob, kaba, duhu eij dau len. Hanoba len leraga se medi, aninim dag len leraga se lonog gin toua. Doba sug Piraun men sadodor len lainyen naugb len leraga ucan leng Israel se medi gini, kaba, duhu eij baijahasem debin len laugwan lomom louwa namcir.

³⁰Dangga toua, sug leng Israel lec merohora acec cinogo Yeriko se leng Kanaan meren hancob se lona senggai, kaba, Allah ahacugb liga geb acec cinogo ingga augwan mor mor dau len namcir. Anai len merdoc emaihagab Allah mer an areg en en dou len eisaugb gin touwero. Doba len merdoc ebdebin an en mer gin terimda, hanoba len laimo touohob.

³¹Dara gida hom gedig en maga eijouhw se cinogo Yeriko ingga, en moho Rahab, kaba, sug lahwai dau leng Israel laino len merin naugb ladogmac dougwo lusud se cinogo ingga, kaba, en emens lan dou men mougtir touwero. Doba en ebin lan dara geigouhw se men tu. Hanoba en ecgoneh lan toua. Anai sug en ouman dag Allah os cinogo Kanaan ingga dou leng Israel ginohob, kaba, en medoc emaihagab gin touwero. Doba en toua medoc ebdebin an gin namcir. Dangga hang, sug leng Israel leinesa cinogo ingga, kaba, len lemogod en touwero. Doba len logod leng gus laugwan eng lomom dous. Anai len loududa Allah en mer an areg len louman dau len gusohob.

³²Dara dan douwan decic dau Gideon, Barag, Simson, Yebta, Daud, Semuel, dara leng lesai Allah moro sug nosa, len laugwan meren geicara dou yen toua. Doba cumougt emedeinyum naugb sug dan dens dau meren geicara augwan dou yenero.

³³Anai len toua merdoc emaihagab Allah mer an areg en os dou Abraham gin touwero. Doba len merdoc ebdebin an en mer gin toua terimda. Dangga hang, Allah en emamsoho lenero. Doba en eic goubesa dou len naugb len laiyan mougt mera goujir an meren logodeh leinyana, dara len laimo areg asesa Allah enin medoc mes augwan an len gus toua terimda. Hang areg Allah os dou lenohob, kaba, augwan emediyebeiya dau len touwero. Doba len lesma namcir. Dara len lemahau dau sug aremeta mog mog au len touwero. Doba sug len merdoc ebdebin an Allah dag ginohob, kaba, meren goubesa inggebga naugb len lagaigeij len merirs dougwo namcir.

³⁴Dara len lob smougb dau len naugb smougb emait len. Dara lusud lemedesugb len touwero, doba len merna agau dau augwan gin terimda. Len laugwan gin, kaba, lenin meren goubesa ingmaro. Doba sug len merdoc ebdebin an Allah en mer dag ginohob, kaba, Allah eic goubesa medam dou len. Dangga hang, sug len lesara dara lugmahara meren sadodor, kaba, len locir len laugwan lougb dau len toua namcir.

³⁵Dara ligida merug hosa, kaba, Allah eigdoumesa len merusur merug aibibra dau gomom ucugb. Hanoba en eic len ucugb dou len toua. Anai len merdoc emaihagab Allah mer touwero. Doba sug len merdoc ebdebin an areg Allah arougb len an ginohob, kaba, len laimo en mer gin toua. Dara lusud merug hosa deit, kaba, leng merug mog lenara dou len, lendagai: Sug yen yobsara dau Allah naugb yen yemesijaresa en deitero, doba yen yesijaresa emen seiseij gin dous, kaba, emen emeic mog erij medam dou yenero. Doba emen emarges dau yen namcir. Dobnaro. Len lemousa deisa len merir an touwero. Doba len louci naugb len laimo ucina mog erij aud gomom gin dous. Anai len merdoc ebdebin an Allah dau sug len lomomohob, kaba, dag en emeigdoumesa len aud maireseb menau geb huhugb gin toues. Anai maireseb menau gin, kaba, eigouhw bedreg dau maireseb se cinogo gin toua namcir.

³⁶Dara ligbum, kaba, lusud lesmesman len, hanoba len labosbos len. Doba lingma, kaba, len louf len se tu gesisug. Hanoba len leic kawamab naugb len lohud len merisira dara merohora darem sungga toua.

³⁷Dara lingma, kaba, len leic igdahab lad len lomom. Dara lingma deit, kaba, len leic sigigeser, hanoba len lougb len meraga dag hwai icira. Dara ligbum, kaba, len leic krawan naugb ladesugb len lomom toua. Anai len laugwan gin, kaba, len lemouwan naugb lemobsara dau Allah enero. Doba len louwan naugb len merdoc ebdebin an areg en os dou len gin dous. Dara ligbum, kaba, lusud lerba len dau meren tu, hanoba len leida meren aremougb augwan dau len toua. Hang len ledag irinya naugb len leg domba dara kambing mos dag sansun dougwo len. Dara sireba len toua namcir. Dara lusud lemamsoho len touwero. Doba len losos ucucan len naugb len leic mog erij dou len toua terimda.

³⁸Dara lingma deit, kaba, len lougb dau leng merug mog gini. Hanoba len lesebesa se lomougwisa dara menmod. Dara len latou se cinogo dara igdohos mes dau len gin toua namcir. Anai len merdoc emarges dau areg Allah os dou len gin touwero. Doba len lod merna debsa en an gin terimda. Dangga hang, len laugwan gin, kaba, emedeinyum naugb sug len leija lusud gedig Bilis oiharaga len se cinogo gin dag len mersir deitero, doba len merdoc susugb dau lenohob.

³⁹Dara Allah enin toua ouma debin meren geicara gini se Surad Injil Meb Mohon deb sug nosa touohob. Anai len lemobsara dau areg en os dou len gin touwero, doba len les agadgeij namcir. Anai areg Allah os dou maman se lona daiyamo gacin gin, kaba, augwan eigouhw edreg dau areg en os dou len graga sug nosa ingga toua namcir. Dangga hang, areg en os gacgunog dou len gin, kaba, en emeic dou len touebma. Doba en eigtou naugb sug gos dou menau gin eb naugb maman touahabi, en emeic dou len dara maman maugwan cum dous. Anai en emouwan naugb leng nosa gin, kaba, lemedebeij usi ino maman mamin touwero. Doba en ouwan naugb maman maugwan madebeij usi gin mougwa cum aninim dous.