Read Manikion IBRANI 13 Bible Online

IBRANI 13 - Manikion bible

IBRANI 13

¹Dangga hang, yen toua, sug yen yedag hom se Krisdusohob, kaba, yen yemarges dau sug yen meigdoc gororougb yen meijaguner dara yen meigdamouwer lenero. Doba yen yeicara yaimo dag gin anim terimda.

²Dara yen yemehig dau sug yen yebin lugmahara touwero. Doba yen yeicara yaimo dangga an len toua terimda. Anai ligbum sug len lebin lusud dag gin sug nosa, kaba, len lebin malaikadir augwougb touohob. Anai sug len lebin len, kaba, len lemecinaga dag len lebin malaikadirero.

³Dara yen meigdoc moc dougwo leng Krisden gedig len leigtou se tu gesisug icira Krisdus gin touwero. Doba yen meigdoc eiseisan len naugb yen yousa len dara ara ara augwan toua. Aninim dag yen toua sug yen yeigtou se tu gesisug, kaba, yen youwan len gus merdoc moc dougwo yen touwero, doba yen youwan len merna eiseisan yen naugb lousa yen toua. Dara yen yemehig dau sug yen yousa leng laimo ucina mog erij touwero. Doba yen meigdoc eiseisan len naugb yen yousa len toua. Aninim dag sug yen yaimo ucina mog erij, kaba, yen youwan lusud lemehig dau yen touwero. Doba yen youwan naugb len lousa yen toua terimda.

⁴Dara gareg dau yen en eic mesouwohob, kaba, en emaimo ligida gus toua deitero. Doba en eigdoumesa mesouwa en moho naugb en eic en hom dous. Dara yigida, gareg dau yen en es mesuwohob, kaba, en emohw en maga dou ligiji gus touwero. Doba en eigdoumesa mesuwa en moho naugb en es en hom dous toua. Anai gareg en medoc edreg dau mesuwa era mesouwa, hanoba en mesira ebsa len gus aibibra, kaba, Allah ogod gogom medam deb naugb enohob.

⁵Dara se meijen geicara augwan, kaba, yen meigdoc emetrij icira aremougb dara aregoufu mougwa hom touwero. Doba areg geb naugb yenohob, kaba, yen meigdoc ebtou an gin namcir. Anai Allah oho mer debin maman se Surad Injil Meb Mohon deb sug nosa touohob, endagai: Dan demarges danin dau yen dara dan demamsoho yen deb touwero. Doba dan deigtou desij yen naugb dan deseyeiyo yen beb huhugb namcir.

⁶Dangga hang, sug Allah eni moongga desij maman naugb en eseyeiyo maman dougwo areg gecgu dag ginohob, kaba, maman mamahau dau sug len gus leic gecgu dou maman touwero. Doba maman maic mamus naugb augwan gin toua terimda. Hanoba maman manara dou len toua, maimo dau areg sud hom erba Ugwaremer an deb sug nosa touohob, mandagai: Emen Adehsud, kaba, en en aud emen naugb en eseyeiyo emen dougwo areg gecgu ginohob. Hang emen emahau dau aremer areg yen yeic dou emen gin touwero. Doba emen emeic emus naugb yen an gin namcir.

⁷Dara yen meigdoc moc dougwo meijen mougtir meren geicara sug len meriresebaba touwero. Doba yen meigdoc eiseisan meren geicara gin terimda. Anai sug len lesai Allah en mer eisaugb Krisdus dou yen sug nosa, kaba, len lemobsara dau sug lusud leic mog erij medam dou len icira ginero. Doba len les agadgeij naugb len laimo gin terimda edebeij lona sug len lomom touohob. Dangga hang, yen toua yemobsara dau sug yen meigdoc ebdebin an Allah touwero. Doba yen yesogwa deisa len merohotimei mohw se ucina mog erij gin toua.

⁸Aninim dag Yesus Krisdus, en emobsara dau men geicara touwero. Doba en aimo augwan gini dau sug aimougtut terimda beb huhugb an maman toua namcirohob.

⁹Dangga hang, sug lusud lesai mer areibahau aingma aingma dou yen, kaba, yen yemaimo len merir an gin touwero. Doba yen yebehnehino yenin meigdoc mes dougwo len merir gin namcir. Anai areg len ledidib dou lusud dau sug len lousan lenin dau ara ara, dara len lehig dau ared, kaba, emousa len naugb len les agadgeij se ucina se geica ginero. Doba ahwan len naugb len laijahasero dau gin dous. Doba sug yen yaimo geigouhw areg Allah eic dou yenohob gini terimda, kaba, yen yemobsara dau ucina misen ginero, doba yen yes agadgeij se gin namcir. Anai areg en eic dou yen gin, kaba, aimo dag en medoc eigouhw an yenohob.

¹⁰Dara areg maman mabdeb se boromei naugb mauwaharo dou Allah iteitogini, kaba, toua susugb dau areg leng lesedougwo Allah men tuari sug nosa len lobdeb se boromei naugb len lauwaharo dou en touohob. Anai sug len logug aremeta an mogwihi, kaba, Gembala Gesa Taij Meren Mougt Mera Medam en odo dabei an mogwihi gini bainesa Allah Men Dimei Gecabeci Namcir. Hanoba en eic mogwihi gini bauwaharo naugb enin dara lusud meren sesar dou Allah. Gin dauwohob, kaba, len lodo aremeta medesa dau igtia dig medigo naugb ledec se smougb se boromei taiba sungga toua. Doba maman, kaba, maman mameic aremeta mogwihi mauwaharo dou Allah dag gin deitero. Doba maman maic dau sug maman magahugouhw an Allah dag mauwaharo dou en dous. Hang gembala gesa taij gesedougwo Allah men tuari sug nosa, kaba, meren goubesa ingma naugb sug len let ara ara dau maman boromei touwero.

¹¹

¹²Sug gembala gesa taij lodo aremeta medesa dig medigo naugb ledec se smougb bansins dag lusud meren sesar ediyebeiya dau lenohob, kaba, Yesus en omom taiba sogo salib naugb maman sesar se Yerusalem medigo dag gini touohob. Dauntoba sesar men gogom eb naugb maman toua deitero. Doba en edu maman mamdoc mes ecabeci dau augwan gin namcir, aninim dag gembala gesa taij leic aremeta mogwihi naugb lusud meren sesar sug nosa touohob.

¹³Hang igdebes emeba maman dau Yesus touwero. Doba maman maisa dau igtia mougb ucan en dig medigo naugb maman masogwa deisa en mohotimei mohw se ucina gesmesman gin toua terimda.

¹⁴Anai se cinogo gin, kaba, maman mameigtou dag magun deb se terimdero. Doba maman mamdoc erleij aud cinogo menau geb naugb maman se lona daiyamo gacin beb huhugb namcir dous.

¹⁵Dangga hang, sug Yesus eic en mogwihi ancoho aga maman naugb Allah dag ginohob, kaba, maman mamarges dau sug maman masijaresa Allah dara magahugouhw an en touwero. Doba sug maman maos madi en moho dag maman mougt mera medam dou lusud dag gin, kaba, maman maicara dangga dou en besesa terimda. Anai gini dag maman maic ara ara mauwaharo dou en touohob.

¹⁶Dara yen meigdoc moc dougwo dau sug yen yeicara yaimo areg geigouhw anim touwero. Doba yen yehilon ucina naugb yen yousem ucucugb. Dara yen yeigdoumesa areg gogom geb debin yen daum toua. Anai meijen geicara gin, kaba, aninim dag yen yeic areg mena ouwedebeda yauwaharo dou Allah. Hang eic dag en medoc agahugouhw an yen toua namcirohob.

¹⁷Dara yen yemeicara yemaihagab meijen mougtir, len merir touwero. Doba yen yowun yenin meigdoc mes arjaga deseino len naugb yen yaimo len merir an areg len len dou yen gin toua. Anai len leic meruwemougb esesa naugb len leseyeiyo yen dougwo areg gecgu augwan namcir. Dauntoba yen yemaimo gin deitero, doba yen yaimo areg geigouhw mogud dous. Dangga hang, sug yen meigdoc edag beim an len merir terimda, kaba, len lagauwesa yen dara merdoc agahugouhw an yen toua. Doba sug yen yohoiya len merir, kaba, len lesedougwo yen dara merdoc momogo. Hang emeic dag yen yemesma geigouhw icira gin touwero. Doba eic dag yen yesma gogom medam dau gin dous. Anai se lona daiyamo gacin, kaba, Allah arougb len naugb len lens aremeijouhw astesda dau yen dou en toua.

¹⁸Doba naugb danin, kaba, dan decinaga dag aremer hom emdagunya debin dan an yen touwero. Anai dan deic induwemougb esesa naugb dan daimo areg gedag beim dara areg obosboro an yen dara len gus laugwan touohob. Dangga hang, yen yemarges dau sug yen yocuncum dou Allah naugb dan touwero. Doba yen yeicara yaimo dangga besesa naugb dan terimda.

¹⁹Dara dan dacgeij yen edreg dau nosa deit, dag yen yocuncum termum namcir, dauntoba Allah esedeb ucina naugb dan dedebeij yen sungga dedemeda toua.

²⁰Dara dan toua docuncum dou Allah gedig en eic gesgigouhwesa dou maman dougwo areg gecgu augwanohob, naugb en eic men goubesa edeinyum dou yen. Dauntoba se meijen aremer augwan, kaba, yen yaimo areg asesa enin medoc mes dag lusud mos toua terimda. Anai en, kaba, mobisamougb namcir. Hang en emeigdoumesa maman Adehsud Yesus en eisa ucugb dau leng lomom laugwan touohob.

²¹Dara dan docuncum dou en naugb en arautut yen meigdoc mes, dauntoba areg yen yaimo deseino en ogdoc Yesus Krisdus en men goubesa gin, kaba, eic dag en medoc agahugouhw an yen toua. Anai en, kaba, en eir en mogwihi debin Allah men gos dou maman ginohob. Dauntoba areg Allah os dou maman, kaba, augwan emediyebeiya dau maman touwero, doba eb naugb maman beb huhugb namcir. Dangga hang, eigouhw naugb maman mamarges dau sug maman magahugouhw an Krisdus gin touwero. Doba maman maigdoumesa en moho beb huhugb terimda. Anai sug en eic enin mogwihi bauwaharo dou Allah naugb maman sesar dag ginohob, kaba, en edag Gembala Gesa Taij Moho Agas medam naugb maman touohob. Augwan gini asesa dag misen namcir.

²²Dan indagunerij, dara dan indamouwerij, yen meigdoc emesrougb an areg dan dog dou yen ginlo. Doba yen yeigtou yateteij naugb gin terimda. Anai areg dan dog dou yen gin, kaba, naugb dan denara dad yen meigdoc mes, dauntoba yen yaiyan meigdocesem naugb yen yes agadgeij namcir. Dangga hang, dan demog surad gini emagas naugb yen touwero. Doba dan dog dag agarougb naugb yen dous.

²³Dara dan douwan dens dau maman maguna Timotius men meijouhw augwan asesa dou yen toua. Dauntoba yen yecinaga dag en emeigtou se tu gesisug toua deitero, doba en agunya dauwohob. Dangga hang, sug en edebeij dan sug dan demdeiya yenbuma, kaba, dan dacgeij en naugb en aimo dan. Dauntoba aman amahwas amdoumouma yen toua.

²⁴Dara yen yen dou meijen mougtir dara len gedig Allah ouci len debinim naugb enohob, kaba, dag emen emou len laugwan. Dara leng dau leng Italia meren hancob sugin, kaba, len laugwan lou yen toua.

²⁵Allah medoc eineg an yen yaugwan toua terimda.