Read Manikion IBRANI 4 Bible Online

IBRANI 4 - Manikion bible

IBRANI 4

¹Doba areg Allah os dou maman mamjemouwer naugb len leigtou debin len merug se men uro mes gin, kaba, augwan gini eb naugb maman touaba. Dangga hang, esloulougb medam naugb maman mamaimo maman mamjemouwer meren geicara, dauntoba maman mamohoiya Allah en mer an gin touwero. Doba maman mabehnehino mamanin mamdoc mes naugb gin terimda. Dauntoba sud hom ingma dau yen, kaba, Allah emowun en dau areg en os dou maman gini touwero. Doba edeinyum naugb sug Allah ousa deisa en naugb gin toua namcir.

²Anai lusud lesai Allah Mer Geigouhw eisaugb geigtou debin mog gini dou maman. Aninim dag len lesai Mer Geigouhw gini dou maman mamjemouwer sug nosa touohob. Doba len, kaba, len merdoc emebdebin an areg len louman ginero. Doba len merdoc agadgeij naugb len leic merus dougwo gin terimda. Hang emedeinyum naugb sug len leinesa Allah men uro mes gin touwero, doba len leigtou dig medigo namcir.

³Doba maman, kaba, areg Allah os dou maman mamjemouwer gin, kaba, maman macinaga dag en emeic augwan gini dou maman dag misen toues. Anai maman, kaba, maman mamohoiya en mer aninim dag lenero. Doba maman mamdoc ebdebin an en mer ginohob. Dangga hang, maman mameigtou dig medigo, aninim dag len ingga touwero. Doba maman mainesa Allah men uro mes naugb maman maigtou debin maman mamug sungga toua namcir. Doba eisaugb maman mamjemouwer meren geicara gin, kaba, augwan gini esogwa deisa areg Allah enara se Surad Injil Meb Mohon eisaugb len deb sug nosa touohob, endagai: Dan indoc esrougb medam an len, anai len lohoiya dan indir an areg dan dos dou lenohob terimda. Hang dan demouwara dougwo len dendag len lemeigtou debin len merug desij dan se indan uro mes beb huhugb touwero. Doba areg Allah enara dou maman mamjemouwer gin, kaba, en emenara dou len sug en emahasesei dara emesinsin augwan touebma. Doba en enara dou len sug en arges en mesira dau augwan gini namcirohob. Hang uro mes naugb s(...)

⁴Augwan gini esogwa deisa areg len log deb se Surad Injil Meb Mohon deb sug nosa touohob. Anai len lenara eisaugb lona gedig senggai se medagas hom, lendagai: Edebeij lona gedig senggai, kaba, Allah en arges dau areg en ahasesei dara esinsin augwan namcir. Hanoba en eigtou debin en mog touohob.

⁵Dara Allah enin eng enara eisaugb uro mes gini se medagas hom toua deit, endagai: Len lemeinesa indan uro mes naugb sug len leigtou debin len merug desij dan beb huhugb touwero.

⁶Dangga hang, naugb leng louman en mer aimougtut gin, kaba, Allah ouf misis dougwo len. Anai len merdoc emebdebin an areg en os dou len naugb sug len leigtou debin len merug se men uro gin touwero. Doba len ledreg en mer gin namcirohob. Doba naugb len gus, kaba, Allah emouf misis dougwo lenbuma. Doba en ec misis dau len naugb len leigtou debin len merug se men uro mes ginaba.

⁷Sug Allah ec misis naugb lingma deit dag ginaba, kaba, en esedeb lona mohw hom naugb len toua deitaba. Anai sug Yosua einoisa maman mamjemouwer naugb len leigtou debin len merug se cinogo Kanaan sug nosohob, kaba, Allah enara eisaugb lona mohw hom se lona daiyamo gacin dag gin deitei? Naro, en emenara eisaugb lona mohw hom naugb lusud gus deitero. Doba en arges mers dau namcirohob. Anai areg en os gin, kaba, ebsugeb naugb lenohob. Dobnaro. Yosua, kaba, en emeinoisa maman mamjemouwer naugb len lemeigtou debin len merug se cinogo areg Allah os dou len ginero. Hang arisogomoc einyana debin gin, kaba, Allah arougb Daud naugb en erba Ugwaremer an areg dan dens dou yen gragohob deit, endagai: Irogini sug yen youman Allah en mer, kaba, yen yemeic meijus naugb yen yemohoiya en mer gin touwero. Doba yen yowun yenin meigdoc mes arjaga naugb yen yaimo terimda.

⁹Dangga hang, naugb Allah men lusud maman, kaba, uro mes naugb sug maman maigtou debin maman mamug, kaba, inggeb naugb mamanaba. Aninim dag se lona gedig senggai, kaba, Allah emeicara toua deitero. Doba en arges en mesira dau augwan gini. Hanoba en eigtou debin en mog se lona gin touohob.

¹⁰Anai sud hom areg Allah ec misis dau en, hanoba en ousa deisa en naugb en einesa men uro mes gini toua, kaba, sud hom gini en emeic mog erij naugb ara ara toua deitero. Doba en eigtou debin en mog se Allah men uro mes beb huhugb namcir. Aninim dag Allah sug en ahasesei dara esinsin augwanohob, kaba, en emeic mog erij toua deitero. Doba en eigtou debin en mog namcirohob. Anai gini aimo dau areg en os dou mamanohob.

¹¹Dangga hang, sug misis ec naugb maman dag gin terimdaba, kaba, maman mamaimo maman mamjemouwer se meren geicara sug nosa ginero. Doba maman maic mamuwemougb esesa. Dauntoba maman mamdobsara taij dau ucina geihwedaud uro mes gini, aninim dag leng nosa ingga touwero. Doba maman mas agadgeij terimda naugb maman madeigtou debin maman mamug desij Allah se men uro mes gini toua namcir. Anai leng nosa gin, kaba, len merdoc emebdebin an areg Allah os dou len. Hang len lemeinesa men uro mes touwero. Doba len ledobsara deb taij dau ginohob.

¹²Dara maman mamohoiya Allah en mer gin touwero. Doba maman maimo augwan gini terimda. Anai en mer gin, kaba, edag maireseb dara mobisamougb edreg dau krawan mec ineinagas. Hang emogod an areg maman mamu en dou dara areg maman mauwam an, kaba, dag augwan gini eigouhw era ecgu dou maman toua. Anai en mer gin, kaba, men goubesa edeinyum naugb ekeba maman mamina dau mamin, dara maman mamori dau maman mamucdo toua namcirohob.

¹³Dangga areg Allah en ahasesei dara en esinsin ginohob, kaba, hom emecgoneh en mog dau en touwero. Doba augwan eb ainyes deseino en. Hang se Lona Gouwedoc gin, kaba, enin eng sud hom gedig maman mans aremeijouhw augwan asesa dou en toua namcir.

¹⁴Sug uro mes naugb sug maman maigtou desij maman mamug eb naugb maman dag ginaba, kaba, maman mamarges dau areg maman mamdoc ebdebin anohob gin touwero. Doba maman maiyan mamdocesem naugb maman maimo augwan toua terimda. Anai maman Gembala Gesa Taij Moho Agas moongga naugb mamanohob. Hanoba en eisaugb dig bogo naugb en ogod maman aremer deseino Allah beb huhugb namcir toua. En, kaba, eni Yesus gedig en edag Allah Meisi mohora hom gin dous.

¹⁵Dara maman Gembala Gesa Taij Moho Agas gin, kaba, Bilis ainyen en se aremer augwan, aninim dag en ainyen maman touohob. Doba en emobsara aud Bilis naugb en ebesesar mougwa hom touwero. Dangga hang, sug maman maobsara se sesarohob, kaba, en emehig dau maman touwero. Doba en medoc eineg an maman namcir. Anai en ecinaga dag maman goubesa naugb sug maman mas agadgeij dougwo Bilis, kaba, emedeinyumero, doba gurereito dous.

¹⁶Sug Yesus medoc eineg an maman dag ginohob, kaba, maman mamahau dau sug maman man audi Allah se men maija moc, moho medoc eineg an, gin touwero. Doba maman maic mamus naugb maman madebeij en. Dauntoba se lona sug aremer eb debin maman, kaba, en ousa maman an, aimo dau en medoc geineg an dara eigouhw an maman toua.