Read Manikion IBRANI 5 Bible Online

IBRANI 5 - Manikion bible

IBRANI 5

¹Dangga hang, maman mameigtou dau sug maman mamdebeij Allah touwero. Doba maman madebeij en debinbin terimda. Anai astesda gembala gesa taij moho agas gedig Allah ouci en, kaba, en ouci en dau lusud misen dous. Dauntoba en eic areg lusud leic dag mogud dara aremeta mogwihi bauwaharo dou Allah naugb len toua. Anai en eperwei len meruhw deseino Allah naugb ginohob.

²Sug gembala gesa taij dau lusud misen dag gin dous, kaba, en medoc emagadgeij an en mesir gedig len lebesesar augwougb dara len laijahasero dau Allah men ucina misen gin touwero. Doba en medoc arjaga an len namcir. Anai se aremer einyana, kaba, enin toua emaiyan medocesem dau touwero. Doba en obsara aud gin mougwa einyana touohob.

³Sug en emes agadgeij dau sesar dag gin touwero, kaba, en emeic aremeta mogwihi bauwaharo dou Allah naugb lusud meren sesar dousero. Doba esloulougb naugb en eic ingma dou Allah naugb enin men sesar gin toua.

⁴Dara sud hom ingma, kaba, en emeigdoumesa enin moho naugb en edag gembala gesa taij moho agas gini touwero. Doba Allah enin eng eija en, hanoba eigdoumesa en moho naugb gin toua. Aninim dag sug nosa, kaba, Harun emeigdoumesa enin moho dag Gembala Gesa Taij Meren Mougt Mera Medam augwougb dau enin touwero. Doba Allah enin eija en, hanoba eigdoumesa en moho naugb ginohob.

⁵Dangga, kaba, Krisdus en toua emeigdoumesa enin moho dag Gembala Gesa Taij Moho Agas augwougb touwero. Doba Allah enin eng eigdoumesa en moho naugb gini. Hanoba en enara dou en se Surad Injil Meb Mohon deb sug nosa touohob, endagai: Ban bedag dan Indisi. Hanoba se lona gin, kaba, dan dedag ban Abina toua.

⁶Dara se medagas hom deit, kaba, Allah enara dag gini dou en toua, endagai: Dan deigdoumesa ban bedag gembala gesa taij beb huhugb namcir. Aninim dag dan deigdoumesa Melkisedeg dag gembala gesa taij sug nosa touohob. Hanoba ban beicara augwan aninim dag men geicara gin toua terimda.

⁷Sug Allah eigdoumesa Krisdus en moho dag gembala gesa taij beb huhugb dag ginohob, kaba, en emarges dau sug en aimo ucina mog erij aud gomom touwero. Doba sug en moongga se cinogo gin, kaba, en owun enin medoc mes arjaga deseino Allah naugb en aimo ucina gin toua terimda. Dangga hang, sug Yesus acgeij dau en, dauntoba en emomom terimdero, kaba, Allah emoc dou moms dougwo en mer touwero. Doba en ouman en mer an gin toua namcir. Anai en emacgeij gin dareg en medoc emagasero. Doba en owun enin medoc arjaga naugb en acgeij augwan dareg eiyagarij dou en dous.

⁸Hang en edag Allah Meisi mohora hom dag misen namcir. Doba en owun enin medoc mes arjaga naugb en aimo ucina mog erij gin toua terimda. Anai gin, kaba, eic dag en aimo areg Allah esedeb naugb enohob.

⁹Dangga sug en aimo areg Allah esedeb naugb en bedebeij sug ouwedocohob, kaba, en edag mebin naugb en eigdoc lusud leinyana dau sesar men gogom augwan aud maireseb menau geb huhugb gin toua. Anai len lemohoiya en mer touwero. Doba len laimo en an areg en arougb len an gin toua namcirohob.

¹⁰Anai Allah eigdoumesa en moho dag gembala gesa taij moho agas naugb len. Aninim dag en eigdoumesa sud hom, moho Melkisedeg, dauntoba en esa taij naugb lusud sug nosa touohob.

¹¹Dara eisaugb Krisdus en edag gembala gesa taij. Aninim dag Melkisedeg gin, kaba, meijouhw einyana ingma inggebga naugb dan dedens dou yen toua deit. Doba ogom naugb yen meiju obgesa, anai yen meigdoc eisem dougwo augwan ucugwohob.

¹²Dangga hang, lona naugb sug yen yedidib meijouhw dau Surad Injil Meb dou len gus, kaba, edeinyumohob. Dobnaro. Esloulougb naugb sug sud hom edens dau Allah en mer areg edag meiyo dou yen deitahabi. Anai yen yedag mahaniheni terimda. Hang emedeinyum naugb yen yet Allah en mer gini dag ared misen touebma. Doba yen yeg en mer gini dag aring mohu dousaba.

¹³Anai gareg en edag mahanihenaba, kaba, en emet ared misen touwero. Doba en eg arij mohu dous. Hang en mou emauti naugb sug en ecinaga areg geigouhw dara areg gecgu touebma.

¹⁴Doba gareg en edag sud se Krisdusohob, kaba, en emeija mouwesa areg geigouhw dara areg gecgu gini toua deitero. Doba en mou auti naugb augwan namcirohob. Hang en emeg arij mohu touwero, doba en et ared misen mogud dous.