Read Manikion IBRANI 6 Bible Online

IBRANI 6 - Manikion bible

IBRANI 6

¹Dangga hang, areg emen emesai dou yen sug nosa dag yen yemaimo meijen geicara aud areg geic gomom dou yen toua deitero, doba yen yesga namcir dou Krisdus. Dara yen meigdoc ebdebin an Allah. Dara areg emen emedidib dou yen eisaugb yedu meijaga, dara lusud logun yen se duhu, dara lob merisira deb se lusud merugt, dara areg emen emesulou yen eisaugb lusud leisa dau gomom dara sug Allah ogod gomom, era eic maireseb beb huhugb dou lusud, kaba, yen yemauwam an augwan gin, dara yen yemogo dag buc gototo se yen meigdoc toua deitero. Doba sug Allah en ouwan, kaba, maman maineg dau namcir. Anai areg graga, kaba, dag meiyo dous. Hanoba maman maic mamuwemougb esesa naugb maman maiji dag lusud mos se Krisdus gin toua terimda.

⁴Maman maic mamuwemougb esesa dag gini, anai gareg en einesa Allah men mouf, dara Allah aigdougwo men sesar augwan dag mogud dau en, hanoba Mena Gogoufu einesa en medoc mes.

⁵Dara en ecinaga Allah en mer dara geigouhw namcir. Dara en ecinaga Allah men goubesa naugb sug en oiharaga lusud ucugb ingma eb dou en touohob.

⁶Doba cum, kaba, en ohw medigo dau areg en medoc ebdebin an ginohob ucugb deit, kaba, Allah dara lusud len laugwan meren goubesa emedeinyum naugb len larautut en medoc mes, Dauntoba en esga men sesar dara ahau an dougwo toua deitero. Anai sug en ocirma Allah Meisi dau enin medoc mes dag ginohob, kaba, gini aninim dag en etob en se sogo salib naugb lusud lesmesman en deitohob. Hang maireseb menau geb huhugb emeb naugb en toua deitero, doba ediyebeiya dau en namcir.

⁷Anai sug los es se lo, doba cum, kaba, lisug mog dara ara mog mog gus augwan eiji dous, kaba, lona ebeij deinyorohob naugb sug Allah ouwara dougwo lo gini. Hanoba en emesa smougb naugb smougb ait lo gin toua mor mor namcir. Anai lo gini era mera, doba mera gin emeigouhw naugb ara deita?

⁸Doba sug los es se lo gini, hanoba aremec eiji borbesbes, dara era mera geigouhw naugb leng les lo gin toua, kaba, Allah eic geigouhw dou lo gin terimda.

⁹Dan indagunerij, dara dan indamouwerij gedig dan indoc gororougb yen, sug emen emenara dag gini dou yenohob, kaba, yen meigdoc momogo an gin touwero. Doba yen meigdoc ebtou namcir. Anai emen emecinaga dag yen, kaba, yen yemaimo len gus se ucina gragero. Doba yen yaimo maireseb menau geb huhugb ginohob. Hang emen emdoc eica dag yen yera mera areg geigouhw debin gin toua terimda.

¹⁰Anai Allah medoc edag beim. Hang en medoc moc dougwo meijen geicara dag yen yeic yen meijug erij naugb en, dara sug yen yousa men lusud gus dau nosa terimda iteitogin touwero. Doba en medoc eiseisan gin namcir. Anai meijen geicara gin, kaba, ens ainyes dag yen meigdoc gororougb enohob.

¹¹Dara emen emouwan naugb yen yemehig dau sug yen meigdoc gororougb dara yen yousa len gus dag gin touwero. Doba yen meigdoc erleij naugb gin namcir. Anai sug yen yeicara dag gini terimda edebeij Lona Sug Ouwedoc, kaba, areg yen yod meijina debsa Allah an ginohob, kaba, augwan emediyebeiya dau yen touwero, doba eb naugb yen toua.

¹²Dangga hang, emen ememouwan naugb sug yen yeisan gurog touwero, doba emen emouwan naugb yen yesogwa deisa leng mohon meruhotimei mohw se meren geicara augwan terimda. Anai len, kaba, len lemobsara dau sug len merdoc ebdebin an areg Allah os dou len. Dara len lemarges dau sug len lod merna debsa Allah an gin touwero. Doba len laiyan merdocesem naugb len les agadgeij namcir. Hang areg Allah os dou lenohob, kaba, augwan emediyebeiya dau len touwero. Doba en eic dou lenohob.

¹³Anai sug Allah os dou Abraham sug nosa dag en eic geigouhw dou lusud laugwan ogdoc en medebeito hom ginohob, kaba, en ou enin moho debin gin toua. Anai sud hom ingma en moho emagas emedreg dau en touwero.

¹⁴Hanoba en enara dou en, endagai: Dan demeic ban abdebeitor leinyana dou bans. Dara dan demereiyara dou ban touwero. Doba dan denara dag misen dou ban namcir.

¹⁵Sug Abraham ouman dau areg Allah os dou en ginohob, kaba, en emarges dau sug en medoc ebdebin an areg Allah os dou en gin touwero. Doba en es agadgeij naugb en od mena debsa en an gini terimda. Dangga hang, areg Allah os dou en gin, kaba, emediyebeiya dau en touwero. Doba eb naugb en toua namcir.

¹⁶Augwan gini aninim dag lusud meren geicara toua. Anai sug lusud lenara merir ledregim eisaugb aremer hom, hanoba len lou sud hom moho agas en moho debin gin touohob, kaba, len merir emedregim an gin deitero. Doba len merdoc obsara dau gin namcir.

¹⁷Dangga hang, Allah en toua sug en os areg graga augwan dou Abrahamohob, kaba, en ou enin moho debin gin toua. Dauntoba maman mameija mamuwesa en an gin touwero. Doba maman macinaga dag areg en os gini, kaba, en aimo augwan dag misen an maman toua. Anai areg en os gini, kaba, en emos dou Abraham hom dousero, doba en os dou en medebeito maman maugwan toua.

¹⁸Hang maman mamdoc emomomtom touwero. Doba sug Allah oiharaga maman dau areg gogom dag ginohob, kaba, maman maiyan mamdocesem. Hanoba maman mamarges dau areg en ens ainyes dou maman augwan gin touwero. Doba maman maod mamina debsa dareg maos agadgeij namcir. Anai sug Allah os dou maman, hanoba en ou enin moho debin men gos dou gin touohob, kaba, hwas gini ens ainyes dou maman dag en emereiyara dara en emeperwei en medoc mes an gin touwero, doba ebsugeb terimda.

¹⁹Dangga hang, sug areg Allah os dou maman emeperwei deitero, kaba, areg maman maod mamina debsa en an gin, kaba, edag kemantu gogod maman mamdoc ebtou namcir. Anai kemantu gin, kaba, emogdoc minc geb dougwo Allah Men Dimei Gecabeci se men tuari geb se bogo diginda dousero. Doba einesa terimda bedogod Allah men maija moc geb se men Dimei Gecabeci ingga an maman.

²⁰Anai Yesus, kaba, en einoisa maman naugb en einesa Allah Men Dimei Gecabeci ginohob. Hanoba en edag Gembala Gesa Taij Moho Agas beperwei maman mamuhw naugb en ogod maman aremer deseino Allah beb huhugb namcir toua, aimo dag Melkisedeg men geicara sug nosa an maman toua. Anai Melkisedeg gin, kaba, en toua edag gembala gesa taij sug nosa se cinogo gini naugb en ogod lusud meren aremer deseino Allah touohob.