Read Manikion IBRANI 9 Bible Online

IBRANI 9 - Manikion bible

IBRANI 9

¹Dara Allah emeic men gomnomna ogdoc Musa gin augwougb dou maman mamjemouwer sug nosa touwero. Doba sug en eic men gos dou mohon gin dou lenohob, kaba, en ens dau gembala gesa taij dara lusud meren geicara aud gousanara debin gin dou len toua. Dauntoba sug len lesijaresa en dara leic ara ara naugb lauwaharo dou en, kaba, len laimo augwan asesa toua namcir. Dara len lesinsin Allah Men Tuari Dau Hugbei debin gini naugb sug len lesijaresa en se gin toua.

²Sug len lesinsin Tuari Dau Hugbei gin debohob, kaba, len lekeba dag dimei hwai icira. Dimei geb ino ginda, kaba, len leija dag Dimei Gecabeci. Se dimei mes ingga, kaba, len lob smougb mouf maga senggai, dara boromei naugb sug gembala gesa taij en ob roti mogo sisa hobjerai areg len leic dou Allah dag lauwaharo deb se toua.

³Se dimei geb ino gin medigo, kaba, dimei hom toua inggebga. Dimei gin, kaba, len leija dag Dimei Gecabeci Namcir. Hang len leh minc medam hom dougwo gin toua. Anai dimei gin, kaba, Allah men dimei sug en eigtousa. Dara len leija minc gini toua dag minc geb ucan.

⁴Se dimei gin, kaba, len lob boromei dau emas debsa. Se boromei gin, kaba, len leic areg men ouwadebeda naugb len lasaih dou Allah. Dara Biruwa hom dau sogo gedig len leic emas mogud lasinsin dougwohob, kaba, len lob se dimei gin toua. Se Biruwa mes ingga, kaba, len lob dabei hom dau emas an ared, moho mana. Dara Harun men ijouhugwa gedig mesgougb agunya se nosohob. Dara igdahab mehir hwai gedig Musa en og Allah men gomnomna sisa debsa toua. Dangga hang, lusud lemeija Biruwa gini dag Allah Men Biruwa Gos Dou.

⁵Dara se Biruwa moc gin, kaba, len lesinsin emas hwai lan marucbobaga dag malaikad. Hanoba laingma lasa dig nagama, kaba, laingma lasa dig nagama toua. Lan maroho dag Kerub, anai ansins dag Adehsud Geis Huhugb eni toua moongga se dimei mes inggohob. Dara lan laih marbera naugb laihiron dougwo Biruwa meh gin toua. Anai meh gin, kaba, dag Adehsud Geis Huhugb men usi geigtousa naugb sug en aigdougwo lusud meren sesar sungga terimda. Dan douwan dens dau areg graga augwan meijouhw ingma dou yen deit, anai einyana inggebga. Doba iteitogin, kaba, cumougt ingma naugb sug dan dens dou yen touwero.

⁶Sug len lesinsin areg graga augwan bouwohob, kaba, gembala gesa taij len lebiji naugb len leinesa dimei mes geb dougwo Adehsud Men Dimei Gecabeci Namcir graga astesda lona toua. Hanoba len leicara laimo areg Allah arougb len an ginohob naugb lasijaresa en se dimei mes gin toua terimda.

⁷Doba se Adehsud Men Dimei Gecabeci Namcir geb dig medigo gin, kaba, Gembala Gesa Taij Meren Mougt Mera Medam enin eng einesa astesda arisogomoc mougwa cum dous. Dara sug en einesa dimei mes gin, kaba, en emeinesa augwougb touwero, doba en odo dabei an aremeta mogwihi toua. Hanoba en eic mogwihi gini bauwaharo dou Allah naugb enin men sesar dauwahabi, en emeic ingma bemauwaharo dou en naugb lusud gus meren sesar ucan gin toua. Dara en emeic aremeta mogwihi gini dou Allah naugb lusud meren sesar gedig len lesedeb dara leic merus an gin touwero. Doba en eic naugb lusud an meren sesar gedig len laimo augwougb dous. Anai len lemecinaga meijouhw dag meren geicara gin, kaba, dag sesar touwero.

⁸Ogdoc areg graga augwan, hang Mena Gogoufu ens meijouhw asesa dou maman dag misis emec dau lusud naugb sug len leinesa Dimei Gecabeci Namcir aud Allah touebma. Doba eb dougwo len terimdaba. Anai sug Dimei Gecabeci geb dougwo moc eb naugb len terimda, kaba, gini ansins dou maman dag lusud lemeic merus naugb sug len ledebeij Allah touebma. Doba len leigtou aigusi dau enaba.

⁹Hang areg graga, kaba, men meijouhw dag areg gembala gesa taij leic dag lauwaharo dau aremeta mogwihi dou Allah naugb lusud meren sesar. Dara areg lusud leic dag mogud dou en naugb len lesijaresa en, kaba, augwan emedeinyum naugb edu len merdoc mes dau sesar augwan touwero. Doba gini dag aihnehina deb naugb maman daiyamo gin dous.

¹⁰Anai meren geicara graga augwan, kaba, eisaugb areg len let dara leg. Dara eisaugb sug len ledu len meraga augwan, dauntoba len lecabeci deseino Allah toua. Dobnaro. Augwan gin, kaba, dag gousanara dous gedig Allah eic dou len terimda edebeij lona sug men gos dou menau agunya toua.

¹¹Doba Krisdus, kaba, en agunyen dag Gembala Gesa Taij Moho Agas naugb mamanohob. Hanoba en ogod an areg geigouhw einyana dau Allah naugb maman touohob. Dara tuari gedig en edag Gembala Gesa Taij Moho Agas se gin, kaba, aninim dag Allah men tuari gedig leng Israel lohud se cinogo gin touwero. Doba moho agas dara eigouhw bedreg dau tuari geb se cinogo gin namcir. Anai tuari gin, kaba, lusud lenin lemohud se merisira. Hang emen dau areg Allah en ahasesei dara esinsin gin touwero.

¹²Dara sug Krisdus einesa tuari geigouhw gin, kaba, en emogdoc Dimei geb ino ginda touwero. Doba en edreg Dimei gini naugb en edeinesa Allah Men Dimei Gecabeci Namcir mougwa cum beb huhugb namcir. Sug en einesa dimei gin, kaba, en emodo dabei an kambing giji dara sapi meh meijaba mogwihi dag gauwaharo dou Allah naugb maman sesar touwero. Doba en odo dabei an enin mogwihi naugb asga maman dau sesar men gogom beb huhugb namcir.

¹³Anai sug lusud logor deseino Allah sug nosa, kaba, gembala gesa taij en eic kambing dara sapi giji mogwihi. Dara sapi gida meijaba gedig smougb ait mor mor namcirohob, kaba, en eic mor ingma toua. Hanoba sug en eic mogwihi dara mor bahurimohob, kaba, en eic mogwihi ingga argeh leng logor gin toua. Dauntoba len lemogor deseino Allah deitero, doba len lecabeci deseino en deit.

¹⁴Sug aremeta mogwihi edu lusud meraga ecabeci deseino Allah dag ginohob, kaba, Krisdus en mogwihi era mera einyana edreg dau aremeta mogwihi gin toua namcir. Anai ogdoc Mena Gogoufu Geis Huhugb men goubesa gin, kaba, en eic enin maga dag gauwaharo gecabeci dou Allah naugb maman sesar ginohob. Dangga hang, maman mamdoc emeijesan sesar men gogom toua deitero. Doba Krisdus edu maman mamdoc mes an maman geicara dag gousanara augwan dau maman toua namcirohob. Dauntoba maman mamaimo augwan gin toua deitero. Doba maman maimo areg asesa Allah gedig en maireseb huhugb enin medoc mes gin terimda. Anai maman geicara dag gousanara gin, kaba, emahwan maman aud maireseb menau geb huhugb ginero. Doba ahwan maman aud gomom dous.

¹⁵Doba Krisdus, kaba, en eic enin mogwihi bauwaharo dou Allah naugb maman sesar ginohob. Dangga hang, areg Allah os dou maman se men gos dou menau gin, kaba, emediyebeiya dau maman touwero. Doba Krisdus en edag maman Gembala Gesa Taij Moho Agas naugb en ogod areg geigouhw gini augwan aga maman gedig Allah eija maman aud enohob beb huhugb namcir. Anai sug Krisdus en omom taiba sogo salib naugb maman sesar dag ginohob, kaba, gos dou mohon men gogom emeb naugb maman toua deitero. Doba en esga maman dau augwan gini namcirohob.

¹⁶Dara areg sud hom en os dou lusud, kaba, emeb naugb len augwougb touwero. Doba esloulougb naugb len louma debin dag en omom dauwahabi, len lemeic toua.

¹⁷Anai sud hom areg en os ara ara dou len gus sug en mairesebaba, kaba, areg en os gini emeb naugb len touebma. Doba sug en omom dauwohob, kaba, eb naugb len dag misen namcir.

¹⁸Dangga hang, areg Allah os dou maman mamjemouwer acgunog ogdoc Musa sug nosa, kaba, en emeic augwan gini augwougb dou len touwero. Doba sug len logug aremeta an mogwihi debin ginohob, kaba, areg en os gini eb naugb len touohob.

¹⁹Anai sug Musa ecic dau areg Allah arougb len an se men gomnomna ginohob, kaba, en eic sapi meh meijaba dara kambing giji mogwihi bahurim dara duhu. Hanoba en eic igdebes mog gahani naugb en ahud aremerij dau hisob darem. Dauwohob, kaba, en ogun hisob ingga se aremeta mogwihi naugb en eic bargeh surad an Allah men gomnomna dara lusud meraga augwan toua.

²⁰Sug en eic mogwihi bargeh surad dara lusud laugwan dauwohob, kaba, en esulou len debin gin toua, endagai: Ara mogwihi gini, kaba, ansins dag areg Allah os dou yen gin, kaba, hom emediyebeiya dau yen touwero. Doba augwan ebiji naugb yenohob. Dangga hang, yen yemedreg men gomnomna gin hom touwero. Doba yen yaimo augwan terimda. Anai gini aimo dau areg en arougb yen anohob.

²¹Dangga toua, sug len lohud Allah Men Tuari Dau Hugbei sug nosohob, kaba, Musa eic aremeta mogwihi. Hanoba en eic bargeh tuari maga dara areg geb se dimei mes augwan gin toua.

²²Hang ara moho hom yom dous eng len lemeic ara mogwihi debin ginero. Doba areg gus augwan, kaba, Allah men gomnomna arougb gembala gesa taij naugb len leic ara mogwihi largeh augwanda, dauntoba ecabeci deseino Allah namcir toua. Dangga hang, Allah emaigdougwo sesar hom augwougb touwero. Doba ogdoc sug len leir ara mogwihi nosahabi, en emaigdougwo meren sesar dou len ucan gin toua. Naro, kab, naro.

²³Doba tuari an areg geb se graga augwan, kaba, men mocbobaga aimo dau tuari geb se bogo dous. Hang edeinyum naugb len leic aremeta mogwihi largeh augwan, dauntoba ecabeci deseino Allah toua. Doba naugb tuari geb se bogo an areg geb se dimei sungga, kaba, aremeta mogwihi emedeinyumero. Doba esloulougb naugb len leic ara mogwihi gedig mera eisaugb bedreg dau ingga namcir, dauntoba eic gecabeci dou tuari gin toua.

²⁴Dangga sug Krisdus eic enin mogwihi ancoho aga mamanohob, kaba, en emeinesa Allah Men Dimei Gecabeci Namcir se tuari gedig lusud lohud se merisira gin touwero. Doba en einesa Allah Men Dimei Gecabeci Namcir se tuari geb se bogo naugb en edag maman Gembala Gesa Taij Moho Agas deseino Allah sungga toua terimda. Anai tuari geb se cinogo gin, kaba, mocbobaga lainyen dous. Doba tuari se bogo, kaba, tuari misen namcir.

²⁵Hang en emesogwa deisa Gembala Gesa Taij Meren Mougt Mera Medam an men geicara se tuari se cinogo gin touwero. Anai Mougt Mera Medam gin, kaba, en einesa Allah Men Dimei Gecabeci Namcir an aremeta mogwihi mougwa hom astesda arisogomoc terimda.

²⁶Doba Krisdus, kaba, en emeinesa Allah Men Dimei Gecabeci Namcir se tuari geb se bogo ucucugb terimda dag ginero. Hanoba en emeic en mogwihi bauwaharo dou Allah naugb maman sesar ucucugb dag gin touwero. Doba en einesa Allah men dimei gini mougwa cum dous. Anai sug en eicara dag gin ucucugb terimda, kaba, gini aninim dag en omom naugb maman sesar mougwa einyana touohob, ebiji dau lona sug Allah ahasesei cinogo, terimda edebeij lona gin toua. Dobnaro. Edebeij sug Lona Ouwedoc gin, kaba, en ens enin ainyes dou maman mougwa cum dag gin dous. Dangga hang, sug en eic enin maga ancoho aga maman dou Allah mougwa cum dag ginohob, kaba, en eigdoc maman dau sesar men gogom augwan toua beb huhugb namcir.

²⁷Dangga hang, Krisdus en emomom mougwa einyana touwero. Doba sug en eic enin maga bauwaharo dou Allah mougwa cum dag ginohob, kaba, edeinyum naugb sug en esga lusud leinyana dau sesar men gogom augwan toua beb huhugb namcir. Aninim dag Allah ogod an lusud dag len lemomom mougwa einyana touwero. Doba sug len lomom mougwa cumohob, kaba, en ogod aremer naugb len toua. Dara leng leigtou lateteij naugb Krisdus sug en ecicugwen, kaba, en en aud len mougwa cum deit. Doba sug en ecicugb gin, kaba, en emomom naugb meren sesar toua deitero. Doba en en aud len naugb en ahwan len aud maireseb menau geb huhugb gin dous.