Read Manikion YAKOBUS 5 Bible Online

YAKOBUS 5 - Manikion bible

YAKOBUS 5

¹Dara yeng meijisoho mougb, kaba, yen toua youman dan indir an areg dan den dou yen gin deigeigouhw namcir. Dauntoba yen yemeija meijuwesa meijen aremougb gin terimlo. Doba yen meigdoc ohwohu dara yeb an yenin teitei. Anai lona gacin, kaba, Allah esa ara gogom en baiyan yen dangga.

²Anai meijen aremougb augwan, kaba, etaha. Dara meijen minc, kaba, agur et.

³Dara meijen emas dara perag, kaba, prab et augwan touohob. Dangga hang, se Lona Sug Allah Ogod Aremer Aga Lusud, kaba, prab gini emet yen yaugwan toues, aninim dag smougb ait lusud laugwan louwa namcir toua. Anai se Lona ingga, kaba, prab gini edag sud hom naugb ehin merisa yen dag yen yemagaha yen meisira an meijen aremougb gini dou leng merunggwereij touwero. Doba yen meigdoc agadgeij an len. Hanoba yen yob augwan gin deb naugb yenin dous.

⁴Dara yen youman dan indir an areg dan den dou yen gin deigeigouhw deit. Anai leng leic merug erij dou yen se meijen lo, kaba, yen yerei len. Hanoba yen yemeic meren siouwa dou len touwero. Doba yen yesedi meren siouwa dau len toua terimdohob. Dangga leng louci meijen areg geb se lo debinim se meijen tu meij gin, kaba, len leiyagarij Allah naugb en ousa len. Hang meren geiyagarij gin, kaba, edebeij en touohob. Hang en emauni gogom medam dou yen toues. Anai en, kaba, en edag mougt mera medam naugb areg geb se bogo augwan toua namcir.

⁵Dara yen, kaba, yen yemarges dau areg yen meigdoc agahugouhw an, dara geic yen meigdoc eigouhw dou yen augwan se cinogo gin touwero. Doba yen yogo ara gaihim, hanoba yen yaimo augwan gini ucucugb terimda toua. Hang gini dag yen yod aror se yenin dag hweij mering moto moto debohob. Doba deb naugb lona sug Allah eic gomom dou yen dous, aninim dag hweij sug lusud lod aror se en toua.

⁶Dara yen yemogo ara gaihim dousero. Doba yen yoho yas lusud deseino sud hom gogod aremer an lusud. Hanoba yen yeic cicmogo dou en naugb en eic gomom dou len touohob. Dobnaro. Len gedig yen yoho yas len gin, kaba, meren geicara gecgu hom dou yen touwero. Doba len merdoc ogoufu namcir. Anai len lemen dougwo yen se aremer hom touwero. Doba len ledag ara gosum naugb yen dous.

⁷Dangga dan indagunerij, dara dan indamouwerij, sug Allah esedeb gogom naugb leng merisoho mougb dag ginohob, kaba, yen yemobsara dau men ucina gin sug len leic mog erij dou yen touwero. Doba yen yes agadgeij dara yeigtou yateteij terimda Lona Sug Maman Adehsud Yesus Krisdus En Ecicugwen. Aninim dag sud hom areg en es meijohob, kaba, en emera mera dou en se lona ingga touwero. Doba en eigtou ateteij naugb sug Allah esa los debin meij gini sug aimougtut dara lona daiyamo gacinahabi, en emera mera dou en toua.

⁸Sug sud hom geba meij en eigtou ateteij naugb Allah esa los debin meij dag gin, kaba, yen yemobsara dau ucina mog erij gin touwero. Doba yen yaiyan meigdocesem naugb yen yes agadgeij dara yeigtou yateteij namcir toua. Anai Lona Naugb Sug Maman Adehsud Yesus Krisdus En Ecicugwen gin, kaba, ebeij deinyorohob.

⁹Dara sug aremer eb debin yen dag gin, kaba, yen yemenara ucucugb anim. Hanoba yen yemahacugb gogom debinim touwero. Doba yen yarges dau namcir. Dauntoba se lona gacin, kaba, Allah emowun yen, hanoba en emogod gogom debin yen touwero. Doba en amsoho yen namcir. Anai men Lona Naugb Sug En Ogod Aremer Aga Lusud gin, kaba, ebeij deinyor touohob. Yen youman dan indir an areg dan den dou yen gini deigeigouhw namcir toua.

¹⁰Dara yen meigdoc moc dougwo leng leperwei maman Adehsud en mohw naugb len lesai en moro sug nosa an meren geicara gin touwero. Doba yen meigdoc eiseisan len toua. Anai len ledag gansins dou maman dau lusud gedig len lemobsara dau ucina mog erij gin touwero. Doba len laiyan merdocesem naugb len les agadgeij namcirohob.

¹¹Sug len les agadgeij dag ginohob, kaba, maman mamowun len meroho an gini touwero. Doba maman maigdoumesa len meroho an gin toua namcir. Anai lusud lecic dau Ayub men geicara dou yen dag en toua aimo ucina mog erij medam sug nosa touohob. Hanoba yen yecinaga dag en emobsara dau sug en medoc ebdebin an maman Adehsud gin touwero. Doba en aiyan medocesem naugb en es agadgeij terimda. Dangga hang, maman Adehsud medoc emagadgeij an en touwero. Doba sug Ayub aimo ucina mog erij gini terimda edebeij sug ouwedocohob, kaba, maman Adehsud eigdoc en dau mog erij augwan gin toua. Anai maman Adehsud gin, kaba, en medoc eigouhw. Hanoba en medoc eineg an maman toua namcirohob.

¹²Doba dan indagunerij, dara dan indamouwerij, aremer gesloulougb edreg dau aremer gus augwan namcir, kaba, dag yen yemou areg geb se bogo, dara areg geb se cinogo, dara areg gus augwan len meroho debin areg yen yos dou lusud, dara debin meijen aremer gus gus augwan touwero. Doba sug aremer misenohob, kaba, yen yenara, endag: You. Era sug misenero, kaba, yen yauni, endag: Naro. Anai sug yen youwara dougwo meijen aremer, era yen youwara debin areg yen yos dou lusudohob, hanoba yen yemaimo ginero, era misen touwero, kaba, cum, Allah ogod aremer gogom deinaugb yen namcir.

¹³Dangga toua, sug sud hom dau yen en aimo ucina mog erij, era areg gecgu eb naugb en touohob, kaba, en emenara ucucugb an ginlo. Doba en ocuncum dou Allah naugb gin dous. Era sug sud hom en medoc ebtouohob, kaba, en emeigtou augwougb touwero. Doba en agahugouhw an Allah terimda toua.

¹⁴Era sug sud hom dau yen en areba, kaba, en emeigtou augwougb touwero. Doba en acgeij mougtir se goucimdeb naugb len len aud en, dauntoba len lehin mani se en maga. Hanoba len locuncum dou Allah aga en, aimo dau areg maman Adehsud en mer ogod an gin deb naugb len. Anai len leperwei en mohw naugb ginohob.

¹⁵Sug len locuncum dou maman Adehsud dara len merdoc ebdebin an naugwohob, kaba, en eic geingmos agauwesa dou sud hom gin ucugb. Dara sesar areg en aimohob, kaba, en aigdougwo augwan gini ediyebeiya dau en toua.

¹⁶Dangga hang, sug meijen sesar eic dag areba an yenohob, kaba, yen yemecgoneh meijen sesar gin daum touwero. Doba yen yesga doum. Hanoba yen yocuncum anim ucucugb toua. Dauntoba aremeba yen touwero. Doba Allah eic geingmos agauwesa dou yen ucugb deit. Anai gareg en medoc edag beim deseino Allah naugb en aimo areg asesa enin medoc mes augwan namcirohob, kaba, men goubesa inggebga naugb en eic ara ara dau Allah toua terimda.

¹⁷Augwan gini aninim dag Elias men geicara sug nosa. Anai en, kaba, en toua dau maman masud misen. Doba sug en acgeij Allah dauntoba los emes se leng Israel meren hancob ginero, kaba, Allah ouf misis se bogo dougwo los toua. Anai en emacgeij augwougwero. Doba en acgeij dara medoc ebdebin an namcir. Hang los emes se meren hancob se arisogomoc homoi mougwu toua deitero.

¹⁸Dauwohob, kaba, en acgeij Allah naugb los es ucugb deit. Hang sir emeb se leng Israel meren hancob toua deitero. Doba ared dara sogo mera dara ara gus gus augwan, kaba, eb naugb len terimda. Anai Allah ec misis se bogo, hanoba los es deitohob.

¹⁹Dangga dan indagunerij, dara dan indamouwerij, sug sud hom dau yen en obsara dau ucina misen ginohob, kaba, yen yemamsoho en touwero. Doba yen yahwan en ucugb dedemeda.

²⁰Anai gareg dau yen en ahwan sud hom gebesesar dau ucina gecgu gin, kaba, yen yecinaga dag sud hom gini eigdoc en dau gomom ucugb touohob. Hanoba en ousa en naugb Allah aigdougwo men sesar areg en aimohob augwan ediyebeiya dau en toua.