Read Manikion PETRUS HOM 4 Bible Online

PETRUS HOM 4 - Manikion bible

PETRUS HOM 4

¹Dangga hang, sug Krisdus emobsara dau ucina mog erij ginero, doba en aiyan medocesem naugb en aimo ucina gin aud gomom dag gin touohob, kaba, yen yeic men gauwamara gini se yen meigdoc mes naugb sug yen yemobsara dau ucina mog erij gin touwero. Doba yen yaiyan meigdocesem naugb yen yaimo ucina mog erij aninim dag en toua. Anai gareg en aimo ucina mog erij dag gin, kaba, eic dag en emaimo sesar toua deitero. Doba en arges dau sesar gin namcirohob.

²Hang sug cumougt mougwebaba, kaba, yen yemaimo areg yen meigdoc etrij icira toua deitlo. Doba yen yaimo areg Allah en arougb yen an gin dous.

³Anai sug nosa, kaba, yen yaimo leng medigo Yesus aud areg len meru ehigehi se lona einyana bedeinyum touohob. Hang se lona augwan gin, kaba, yen yemaimo areg geigouhw hom touwero. Doba yen meigdoc etrij naugb yen yohw yen meijaga doum aibibra namcir. Dara yen meigdoc oungmogo naugb yen yaimo areg gecgu gus gus toua. Dara yen yemarges dau sug yen yeg ahwei mohu touwero. Doba yen yeg ahwei mohu bed yen yomom icira gin namcir. Dara yen yogo ara gaihim. Dara yen yegara yaigeigem. Dara yen yecguna dou seiseij. Hanoba yen yaimo areg lusud merus eijeij dau debin gin toua namcir.

⁴Doba iteitogin, kaba, yen yemaimo len aud meren geicara dag mihi. Dara edag duhu ohw baihagab gin toua deitero. Doba yen yasid yenin dau gin namcirohob. Dangga hang, sug leng medigo Yesus len leiya dau gin, kaba, len lomi, hanoba len lowun yen meijoho an meijen geicara menau gin toua terimda.

⁵Doba inggaida. Anai cum, kaba, len ledens dau meren geicara gecgu gini meijouhw augwan asesa dou Allah toua. Anai en, kaba, en esedeb Lona naugb sug en ogod aremer deb naugb leng merna agau dara leng lomom len laugwanohob.

⁶Sug Allah esedeb Lona naugb len dag ginohob. Hang Krisdus en emeihwedig Seol naugb en esai Mer Geigouhw eisaugb enin dou leng lomom laugwan sungga toua. Dauntoba sug leng ledag merna gini len merdoc ebdebin an en, kaba, len lemomom namcirero. Doba len merireseb aninim dag Allah en maireseb huhugb gin toua. Krisdus eicara dag gini, anai sug len merna agau sug nosa, kaba, len lebesesarohob. Hang Allah emogod gomom deb naugb len, aninim dag en ogod gomom deb naugb lusud gus laugwan touohob.

⁷Dara lona naugb sug areg se cinogo gini ediyebeiya, kaba, ebeij toua deinyor namcirohob. Dangga hang, yen yematou touwero, doba yen meiju auti. Hanoba yen yogmac yenin meigdoc mes dougwo aremer augwan toua. Dauntoba ara ara emedag sogo maga dougwo yen naugb yen yocuncum dou Allah touwero. Doba yen yocuncum esesa dou en terimda.

⁸Doba aremer gesloulougb edreg dau aremer gus augwan namcir, kaba, dag yen yemarges dau sug yen meigdoc gororougwim touwero. Doba yen yeic meijuwemougb esesa naugb yen yeicara yaimo dag gin anim terimda. Anai sug yen meigdoc gororougwim, kaba, yen yemecic dau sug yen yebesesar anim ucucugb touwero. Doba yen yeic gesgigouhwesem naugb yen yaihiron dougwom augwan toua namcir.

⁹Dara sug yen yebin yen meijaguner dara yen meigdamouwer se Krisdus, kaba, yen yemenara ucucugb an len touwero. Doba yen yebin len laugwan dara yen meigdoc eigouhw an len terimda.

¹⁰Dara yen yemeisan gurog dau mou ouforoho era goubesa aingma aingma areg Allah eic dou yenohob gin touwero. Doba yen yesedougwo augwan gin deigeigouhw namcir. Dara yen yemeic gini naugb yenin dousero. Doba yen yeic gini naugb yousem ucucugb terimda toua. Anai mou gouforoho dara goubesa gedig maman masma, kaba, augwan aninimero, doba susugb toua namcir.

¹¹Dangga hang, gareg dau yen en mou ouforoho naugb sug en esai Allah enin mer eisaugb Krisdus dou lusud, kaba, en emarges dau gin touwero. Doba en ebedbed en mer gin dou lusud. Dara gareg dau yen Allah eic goubesa dou en naugb en ousa leng lentog moc moho dara leng mecicgu, kaba, en aimo augwan gini dara medoc hom an len. Dauntoba se meijen geicara augwan, kaba, yen yeigdoumesa Allah en moho gin terimda. Anai en, kaba, en eigtou se gogouf cucugb. Dara en edag mougt mera medam naugb augwan beb huhugb toua. Yen yeicara dangga, anai yen yedag hom dara Krisdusohob. Augwan gini asesa dag misen namcir.

¹²Dan indagunerij, dara dan indamouwerij gedig dan indoc gororougb yen, sug yen yaimo ucina mog erij medam iteitogin, kaba, yen yemeija meigdocesa dag aremer ganusbus inggeb debin yen touwero. Doba yen yaiyan meigdocesem naugb yen yaimo gin terimda. Anai Allah eic gini bainyen yen meigdoc mes, endag yen meigdoc ebdebin an en dag misenohobei? Era anambei? Aninim dag lusud lec ara ara se smougb naugb lainyen toua. Dangga areg misen, kaba, smougb emaitero. Doba areg misenero, kaba, smougb ait bediyebeiya namcir.

¹³Hang yen yemeija meigdocesa areg gainyen yen touwero. Doba sug yen yesogwa deisa Krisdus mohotimei mohw se men ucina mog erij gin, kaba, yen meigdoc eigouhw an. Dara yen yagahugouhw naugb gin toua. Anai sug yen yes agadgeij se gini terimda, kaba, yen meigdoc emeijesa se lona sug Allah ens Krisdus se gogouf cucugb ainyes dou lusud touwero. Doba yen meigdoc agahugouhw se lona ingga toua namcir.

¹⁴Dangga sug yen yedag hom dara Krisdusohob, hanoba lusud lowun yen meijoho icira gin, kaba, yen meigdoc momogo an touwero. Doba yen meigdoc ebtou namcir. Anai gini ansins dou yen dag Allah esa Mena Gogoufu gedig en eigtou se gogouf cucugb se yen meigdoc mes touohob. Hang geigouhw areg Allah esedeb naugb yenohob, kaba, hom emediyebeiya dau yen touwero, doba en emeic augwan dou yen toues.

¹⁵Doba sug yen yaimo ucina mog erij gin, kaba, eigouhw naugb yen yemaimo gini ogdoc sug yen yeic gomom dou len gus, dara yen yeiyohora, dara yen yodo yen meijaga se len gus meren aremer, dara sug yen yeicara gecgu gus gus touwero.

¹⁶Doba yen yaimo ucina mog erij gini dau sug yen yedag Krisdus men logodeh gin dous. Anai sug yen yaimo ucina mog erij icira gin, kaba, igdebes emeba yen dau gin touwero. Doba yen yen sijo dou Allah, anai gini ansins dag Krisdus en moho aiga yenohob.

¹⁷Anai Lona ebeij deinyorohob naugb sug en ogod aremer aga lusud laugwan ebiji dara men lusud maman nosahabi. Dangga hang, sug Allah emedreg maman debero. Doba en ogod aremer aga maman nosahabi, kaba, dagiro eisaugb leng merdoc aihagab en Mer Geigouhw eisaugb Krisdus gina? En amsoho lenei? Naro, en emamsoho len deb namcirero. Doba en emeic gogom medam dou len se lona ingga toues.

¹⁸Augwan gini esogwa deisa areg sud hom en og deb se Surad Injil Meb Mohon deb sug nosa touohob, endagai: Ogom medam naugb leng laimo areg asesa Allah enin medoc mes len leinesa maireseb menau geb huhugb gini. Dangga dagiro eisaugb leng leic Allah moho lacecim. Hanoba len ledreg men gomnomna gin toua terimda? Len toua leinesa maireseb menau geb huhugb ginei? Naro, len lemeinesa namcirero, doba Allah eic mor mor dou len dous.

¹⁹Dangga hang, sug Allah esedeb naugb yen yaimo ucina mog erij dag ginohob, kaba, yen yemarges dau gin touwero. Doba yen yaimo areg asesa enin medoc mes sug yen yeraga asa ucina gin terimda. Hanoba yen yogugwo yenin debsa enin mesira toua. Anai en emamsoho yenero, doba sug en esinsin yenohob, kaba, en eseyeiyo yen dougwo areg gecgu augwan. Anai en emereiyara dou yen touwero. Doba en aimo areg en os dou yenohob, augwan dag misen an yen toua namcir.