Read Manikion YOHANES HOM 3 Bible Online

YOHANES HOM 3 - Manikion bible

YOHANES HOM 3

¹Sug maman Mamina Allah eigdoumesa maman mamoho dag en mogwihi mogo maman dag ginohob, kaba, ens ainyes dou maman dag en medoc emarges maman touwero. Doba en medoc gororougb maman dag misen namcir. Dara ens ainyes dou maman dag en emeigdoumesa maman aibibra touwero, doba en eigdoumesa maman dag misen touohob. Hang lusud gedig Bilis oiharaga len se cinogo gin, kaba, len merdoc dag hom dara maman touwero. Anai len lemedag hom dara Allah touebma.

²Dan indagunerij, dara dan indamouwerij gedig dan indoc gororougb yen, sug maman madag Allah mogwihi mogo maman dag ginohob, kaba, maman macinaga dau sug Krisdus ens enin ainyes dou maman gin, kaba, dag maman aninim dag en toua namcir. Anai se lona ingga, kaba, maman maiya en mog se maman mamiresi dag misen namcir. Aremer hom gin, kaba, maman macinaga dag misen toua. Doba ara gus areg Allah esedeb naugb mamanohob, kaba, maman mamecinaga augwan dag misen touebma.

³Dangga gareg en od mena debsa dag lona hom, kaba, eni aninim dag Krisdus gin, kaba, en emaimo sesar toua deitero. Doba en asid enin dau areg gecgu augwan namcir. Aninim dag Krisdus, kaba, en emaimo sesar touwero. Doba en asid enin maga dau areg gecgu augwan terimda touohob.

⁴Doba gareg en ebesesar, kaba, gini dag en eic mos baihagab Allah men gomnomna. Anai sug en ebesesar, kaba, gini aninim dag en edreg dau Allah men gomnomna gin namcir touohob.

⁵Doba yen yecinaga dau sug Krisdus en ouwaden dau bogo, kaba, dag en emouwaden naugb en aimo sesar touwero. Doba en ouwaden dau bogo naugb en eic en mogwihi bauwaharo dou Allah naugb lusud meren sesar dous. Dauntoba sesar men gogom emeb naugb len toua deitero. Doba en oguc dougwo meren sesar augwan dau len. Dara yen yecinaga dag en, kaba, sesar hom emeb se en medoc mes touwero, doba en ecabeci namcirohob.

⁶Dangga hang, gareg en medoc dag hom dara Krisdusohob, kaba, en emebesesar toua deitero, doba en eineg dau terimda. Doba gareg en ebesesar namcir, kaba, en emecinaga Krisdus, hanoba en medoc dag hom dara en mougwa hom touebma.

⁷Dan indihirija, sug Krisdus ouwaden dau bogo naugb oguc dougwo maman sesar dag ginohob, kaba, yen yemaimo gembala areibahau len merir an areg len lebedbed dou yen touwero. Doba yen yebehnehino yenin meigdoc mes dougwo areg len ledidib dou yen gin namcir. Dauntoba areg len lebedbed dou yen gin, kaba, emaugwohosa yen dau ucina misen touwero. Anai gareg en aimo areg asesa Allah enin medoc mes augwan terimda, kaba, enin dous eng eraga ucina se geica gini. Aninim dag Krisdus en aimo ucina se geica an maman touohob.

⁸Doba gareg en ebesesar namcir, kaba, en emedag Allah mogwihi mogo en dag misen touebma. Doba en edag Bilis mogwihi mogo en dousaba. Anai Bilis gin, kaba, en ebesesar dau sug aimougtutohob. Hang Allah Meisi, kaba, en emouwaden dau bogo naugb en emeic mor mor dou Bilis an men geicara augwan gini toua.

⁹Dangga sud hom gareg Allah eigdoumesa en moho dag en mogwihi mogo enohob, kaba, en emebesesar touwero. Doba en arges doc dau augwan gin terimda. Anai areg geb se Allah enin medoc mes, kaba, augwan eb se sud hom medoc mes gin touohob. Hang en emebesesar toua deitero, anai Allah edag en Mena ginohob.

¹⁰Dau gini, hang maman mamecinaga Allah dara Bilis lan marihir dag misen toua. Gareg en aimo areg asesa Allah enin medoc mes terimda, kaba, eni Allah mogwihi mogo en dag misenohob. Doba gareg en emaimo areg asesa Allah enin medoc mesero, hanoba en medoc gororougb en maguner dara en medamouwer se Krisdus touwero, kaba, en emedag Allah mogwihi mogo en dag misen touebma. Doba en edag Bilis mogwihi mogo en smougb mougwaba.

¹¹Aremer graga augwan, kaba, aimo dau areg emen emenara dou yen sug nosa touohob. Anai sug emen emesai Mer Geigouhw eisaugb Krisdus dou yen se lona ingga, kaba, emen emesulou yen ucan gin deit, dag yen meigdoc emecgwanim, aninim dag Kain en medoc ecgwan en magto Habel touwero. Doba yen meigdoc gororougwim dous. Anai Kain, kaba, en edag Sud Hom Mobgos Maha en mogwihi mogo en teiteiyohob. Hang en emamsoho en magto touwero. Doba en ogod en bomom dous. Doba dagiro, naugwe hang, en ogod en magto gina? En ogod en, anai men geicara augwan dag mog mog namcir. Doba en magto, kaba, en aimo areg asesa Allah enin medoc mes augwan dag misen terimdohob.

¹³Dangga dan indagunerij, dara dan indamouwerij, sug Kain medoc mog mog an en magto dag ginohob, kaba, yen yemomi dau sug lusud gedig Bilis oiharaga len se cinogo gini len merdoc mog mog an yen touwero. Anai len toua ledag Sud Hom Mobgos Maha en mogwihi mogo len teitei, aninim dag Kain gini touohob.

¹⁴Doba maman, kaba, maman mamdoc mog mog anim deitero. Doba maman mamdoc gororougwim dous. Hang maman macinaga dag maman maigtou se gomom toua deitero. Doba maman mainesa maireseb menau beb huhugb ginohob. Dangga gareg en medoc mog mog an en maguner dara en medamouwer se Krisdus namcir, kaba, en emeinesa maireseb menau geb huhugb gin touebma. Doba en eigtou se gomom beb huhugb terimdaba.

¹⁵Anai gareg en medoc mog mog an en maguner dara medamouwer gin, kaba, en edag sud hom ges lusudohob. Dangga maireseb menau geb huhugb emeb naugb en touwero. Anai yen yecinaga dag sug sud hom en es len gus, kaba, maireseb menau huhugb emeb naugb en toua deitero, doba ediyebeiya dau en namcirohob.

¹⁶Dara eisaugb aremer medoc gororougb, kaba, maman maugwan macinaga dau gini dag misenohob. Anai sug Krisdus ohw en mougt edug naugb en omom taiba sogo salib naugb maman sesar dag gin, kaba, en ens aremer medoc gororougb dou maman dag misen touohob. Dangga hang, sug Krisdus ohw en mougt edug naugb maman dag ginohob, kaba, esloulougb medam naugb maman toua maohw maman mamugt edug naugb maman mamsir se Krisdus gin toua terimda.

¹⁷Dangga gareg dau maman men aremougb edeinyum naugb sug en eigtouohob, hanoba en eiya en maguner dara en medamouwer se Krisdus meren ara ara emedeinyum naugb sug len leigtouwero. Doba en medoc agadgeij naugb en emousa lenero, kaba, dagiro, naugwe hang, sud hom gini en eigdoumesa en moho dag en medoc gororougb Allah dag misenohoba? Naro, en medoc gororougb en touebma.

¹⁸Dangga hang, dan indihirija, eigouhw naugb maman mamdoc gororougwim dara maman mamir dousero. Doba sug maman mamdoc gororougwim dag misen, kaba, maman geicara aimo dangga toua.

¹⁹Sug maman maicara dag gin, kaba, maman mamdoc emeijesa dau lona sug maman man aremeijouhw augwan asesa dou Allah touwero. Doba maman mamdoc ebtou deseino en namcir. Anai sug maman mamdoc gororougwim dara maman mamir dousero, doba maman geicara aimo dangga dag misen toua, kaba, maman macinaga dag maman masogwa deisa areg se geica augwan dag misenohob.

²⁰Dangga sug maman mamdoc owun mamanin an maman geicara, kaba, maman mamdoc momogo an gini touwero. Anai Allah, kaba, en ecinaga dau maman geicara augwan dag misen. Hang en moho eb taiba dau areg maman mamdoc owun mamanin an gin toua namcirohob.

²¹Dan indagunerij, dara dan indamouwerij gedig dan indoc gororougb yen, sug maman mamdoc ebtou deseino Allah dag ginohob, kaba, maman mamahau dau sug maman macgeij ara ara dau en touwero. Doba maman maic mamus naugb maman macgeij ara ara dau en terimda.

²²Dara areg maman macgeij dau enohob, kaba, maman macinaga dag en emeic augwan dou maman toues. Anai maman mamedreg en mer gin touwero. Doba maman maicara maimo areg en arougb maman an, dara areg eic en medoc eigouhw dou en augwan dag misen namcirohob.

²³Dara men gomnomna hom areg en arougb maman an gin, kaba, dag maman mamdoc ebdebin an en Meisi Yesus Krisdus. Hanoba maman mamdoc gororougwim toua terimda, aimo dau areg Krisdus en arougb maman an gini sug nosohob.

²⁴Dangga gareg en aimo Allah en mer an areg en arougb en an gin terimda, kaba, en medoc dag hom dara Allah. Hanoba Allah en medoc dag hom dara en toua. Dara maman macinaga dau sug Allah en medoc dag hom dara maman, anai en esa Mena Gogoufu se maman mamdoc mes naugb en ouma debin maman an gin touohob.