Read Manikion YOHANES HWAI 1 Bible Online

YOHANES HWAI 1 - Manikion bible

YOHANES HWAI 1

¹Surad gini dau dang, Adehsud, dou bang, Danehsud, an ban abihir, gedig dan indoc gororougb yen yaugwan.

²Anai sug maman mauman mer misen eisaugb Krisdus sug nosa, kaba, maman mamohoiya mer geica gin touwero. Doba maman mabin mer gini se maman mamdoc mes namcirohob. Hang areg se geica gin, kaba, emediyebeiya dau maman touwero. Doba eb beb huhugb terimda. Dara dan indoc gororougb yen dousero. Doba leng gus gedig leng lebin mer misen eisaugb Krisdus se len merdoc mesohob, kaba, len laugwan merdoc gororougb yen toua.

³Dangga hang, sug maman maimo areg se geica, hanoba maman mamdoc gororougwim dag gin touohob, kaba, dan dacgeij maman Mamina Allah, dara en Meisi Yesus Krisdus naugb lan mardoc eigouhw dara eineg an yen. Dara lan laic gesgigouhwesa dou yen dougwo areg gecgu augwan toua terimda.

⁴Dan indoc eigouhw namcir. Anai dan douman dag ligbum dau ban abihir, kaba, len lemobsara dau areg se geica gin touwero. Doba len laimo mer misen areg maman Mamina Allah en arougb maman an ginohob augwan toua terimda.

⁵Hang dan desulou Danehsud ban dara goubesa namcir, dauntoba maman mamobsara dau sug maman mamdoc gororougwim gin touwero. Doba maman maos debin gin namcir. Dara areg dan desulou ban an gin, kaba, mer menenau touwero. Doba eb naugb maman dau sug maman mamdoc ebdebin an Krisdus aimougtutohob.

⁶Dara medoc gororougb gin, kaba, men meijouhw misen dag maman mamedreg dau areg Allah arougb maman an gin touwero. Doba maman maimo augwan dara maman mamdoc hom namcir. Dara areg en arougb maman an gin, kaba, dag maman mamdoc gororougwim toua terimda. Augwan gin, kaba, menenau touwero. Doba yen youman augwan gini dau sug len lesai Mer Geigouhw eisaugb Krisdus dou yen sug acgunogohob.

⁷Yen yeicara yaimo anim dag gin terimda. Anai lusud gedig len laugwohosa yen naugb sug yen yaijahasero dau ucina misen gin, kaba, leinyana laisoboro se cinogo augwanohob. Anai len, kaba, len lemeigdoumesa Yesus Krisdus dag en emouwaden dau bogo dag lusud misen touwero. Doba len laideido dougwo en namcir. Hang len lemedag Sud Hom Eic Geic Mos dougwo Krisdus en mehir misen gin touohob. Anai sug en en, kaba, en emaugwohosa lusud naugb len laijahasero dau ucina misen gin toua.

⁸Dangga hang, yen yebehnehino yenin meigdoc mes dougwo mer areibahau areg len lesai dou yen gin toua terimda. Dauntoba areg yen yaimohob gin, kaba, hom emediyebeiya dau yen touwero. Doba Allah eic meijen siouwa augwan dou yen toua namcir.

⁹Gareg en emaimo Yesus en mer ginero, doba en edreg dau areg en arougb maman an namcir, kaba, en medoc dag hom dara Allah toua deitero. Doba gareg en aimo Krisdus en mer augwan gin terimda, kaba, en medoc dag hom dara maman Mamina Allah dara en Meisi Krisdus lahwas dag misen touohob.

¹⁰Dangga gembala gareg en edebeij meijen tu, hanoba en emesai Krisdus dag en emouwaden dau bogo dag lusud misen dou yenero. Doba en ebedbed susugb dou yen, kaba, yen yemebin en. Dara yen yemos en mesira touwero, doba yen yen dougwo en namcir.

¹¹Anai gareg en os en mesira, kaba, gini aninim dag en ousa deisa en an men gebedbed gecgu ginohob.

¹²Aremer einyana ingma inggebga naugb dan desulou yen an gini. Doba dan demouwan naugb dan demog augwan gin se surad ginero. Anai danin demenbo sungga augwougb dous naugb dan demen ai danin indirs dou yen toues. Dauntoba maman mamdoc agahugouhw anim ucucugb terimda.

¹³Ban abdamouwa Danehsud sugini en mehir len laugwan lou ban toua.