Read Manikion WAHYU 10 Bible Online

WAHYU 10 - Manikion bible

WAHYU 10

¹Sug dan deiya areg graga augwan dauwohob, kaba, dan deiya, doba malaikad hom deit, gedig en mobisamougb namcir, kaba, en ouwaden dau bogo se cinogo gini. Sug en en, kaba, umer odundun en maga. Dara sidgodgo toua ecgun aga en mougt. Dangga en mebes toua esesilo, aninim dag igda lona mohora. Dara en mohora hwas toua mouf eririj aninim dag smougb mouf gererij namcir.

²Dara en os surad meh mogurei hom geh teiteiyohob icira en mesira toua. Dangga sug en ouwaden se cinogo ginohob, kaba, en erba mohora misen baiyan dum mohu. Hanoba en erba mohora metigi baiyan dig lonog.

³Dauwohob, kaba, en eijara dour. Dara en mer gin, kaba, aninim dag mihibei mena, moho singa, sug en esa mer toua. Sug en eijara gin, kaba, bagar mougb senggai mougb eiseisum len launi malaikad graga en mer ucugb dou en deit.

⁴Sug len lenara merir edinohob, kaba, dan desedeb naugb dan dog areg len launi dou malaikad graga augwan se indan surad gini toua. Doba dan douman mer hom dau bogo en dougwo dan, endagai: Areg ban bouman dau bagar mougb senggai len merir ginohob, kaba, ban bemog augwan se aban surad touwero, doba ban betin se banin abdoc mes dous.

⁵Sug mer hom dau bogo en dougwo dan dag ginohob, kaba, malaikad graga en os dou dan ucan gin deit, endagai: Areg Allah esedeb naugb Lona Gouwedoc gin, kaba, en emeigtou emateteij. Dara en emecgoneh augwan gini dau lusud toua deitero. Doba se lona sug malaikad gedig senggai en ohw men higbei, kaba, en eicara esogwa deisa enin mogtimei mohw an augwan gin namcir, aimo dau areg en ens deb dou leng lesai en moro sug nosa touohob. Sug malaikad graga os augwan gini dou danohob, kaba, en ou mesira misen augb bogo. Hanoba en ou Allah en moho debin gin toua. Anai Allah, kaba, en eis huhugb sugragohob. Hang en ahasesei bogo, dara cinogo, dara dum mohu. Dara en esinsin areg geb se gin augwan toua.

⁸Dauwohob, kaba, dan douman mer hom genara dau bogo dag graga, en enara dou dan ucugb deit, endagai: Ban beihwedaud malaikad gedig en mohora homa esesa dum mohu, dara en mohora homa esesa lonog gini. Hanoba ban bedeic surad meh mogurei hom geh teitei dau en mesira toua.

⁹Dangga sug dan deihwedaud malaikad ginohob, kaba, dan dacgeij en naugb en eic surad meh mogurei hom gini dou dan toua. Doba en arougb dan, endagai: Ban beic surad meh gini, hanoba ban bet toua namcir. Sug ban bet, kaba, ahaufoufo se ban abirs dag mohu. Doba sug edebsa ban abinuhwa, kaba, edougdaha namcir.

¹⁰Dangga sug dan deic surad meh mogurei gini dau en mesirohob, kaba, dan det toua. Sug dan det dag gini, kaba, ahaufoufo se dan indirs. Doba sug bedebsa dan indinuhwa mesohob, kaba, edougdaha namcir.

¹¹Dauwohob, kaba, sud hom graga en arougb dan ucan gin deit, endagai: Ban bida naugb ban besai Allah en moro an gogom areg en esedeb se surad gini augwan dou lusud, dara merusur, dara astesda len leci an meren mougt mera medam, len laugwan toua. Anai gini aimo dau areg Allah esedeb naugb banohob.