Read Manikion WAHYU 11 Bible Online

WAHYU 11 - Manikion bible

WAHYU 11

¹Sug sud hom mer graga arougb dan dag ginohob, kaba, en eic ameiji maga hom dag ijouhugwa dou dan. Hanoba en arougb dan deit, endagai: Ban bodo gini naugb ban bedeij Allah men tuari dara men boromei geb acec augwan. Dara ban becic lusud areg en esijaresa Allah se men tuari gini len laugwan toua.

²Doba acec Allah men tuari dig nena, kaba, ban bemen ginero. Anai en eic augwan gini dou lugmahara naugb len laiyan men Cinogo Gecabeci ingga se igda sud hwai hwai edeisu ginohob.

³Doba se lona sug len laiyan men cinogo gin, kaba, dan desa indan logodeh lahwai aud len. Hanoba dan deic goubesa dou lan naugb lan lesai Allah en moro areg en esedeb ginohob se lona ribu hom huntun hwai mos senggem edeisu dou len toua. Hang sug lan lemesai Allah en moro dou len gin, kaba, lan lag sansun gogor dag lobeinya dau aremeta mos, dag gansins dou len se lona augwan gin toua terimda. Dauntoba sug lusud len leiya, kaba, len lesga meren sesar. Anai areg lan lesai dou len, kaba, ogom medam namcir.

⁴Anai lan, kaba, lan ladag sogo Saitun maga hwai, dara lan ladag mohora hwai smougb mougb ebsa gin toua. Hanoba lan lasa deseino Allah gin terimda naugb sug lan laimo en mer an areg en arougb lan an gini. Anai en, kaba, en edag lusud se cinogo augwan meren mougt mera medam enohob.

⁵Dangga gareg en esedeb naugb en eic mog erij dou lan, kaba, smougb agunya dau lan marirs naugb ait maran moc. Hang gareg en eic mog erij dou lan ingga, kaba, hom en mena agau touwero. Doba len laugwan merur mor namcir toua. Anai gini aimo dau areg Allah en esedeb naugb len danggohob.

⁶Dara sug lan lasai Allah moro dou lusud ingga, kaba, Allah eic goubesa dou lan naugb lan lauhw dougwo bogo. Dauntoba los emes se lona augwan gin touwero. Hanoba en eic goubesa dou lan naugb lan laperwei duhu augwan dag mogwihi. Dara astesda sug lan lauwan, kaba, maran goubesa inggebga naugb lan lagod cinogo augwan an areg geic gogom dou lusud aingma aingma toua.

⁷Doba sug lan lasai Allah en moro gin bouwohob, kaba, aremeta gen dau ijou mes, kaba, en esara dara lan naugb en aiyan lan. Hanoba en eic gomom dou lan toua.

⁸Sug aremeta eic gomom dou lanohob, kaba, en emec lan touwero. Doba en owun lan maroho naugb amsoho lan mardesa se cinogo moho agas hom men usmougb ingga deb. Lusud leija cinogo ingga laimeh an dag Sodom dara Mesir. Anai len letob lahwai graga maran mougt mera medam taiba sogo salib se cinogo ingga sug nosa touohob.

⁹Dangga lusud dau astesda cinogo, dara meijouhuda, dara meren leci augwan sug len louman dau gin, kaba, len len naugb len louwa debin lan ingga mardesa se lona homoi mougwu gin toua. Dara gareg en esedeb naugb en ec lan mardesa, kaba, len lebehnehino dougwo en toua namcir.

¹⁰Sug lusud se cinogo augwan len leiya, doba lahwai graga lan lamom dag misenohob, kaba, len logo ara gaihim debin lan. Hanoba len leic aremougb naugb len laic lan doum toua. Anai lan, kaba, lan laic mog erij medam dou len laugwanohob. Hang len merdoc emagahugouhw debin lan lamom gin toua.

¹¹Doba sug lona homoi mougwu gin ouwa dauwohob, kaba, Allah en esa mena deb se lan naugb lan laisa dau gomom ucugb deit. Dangga sug lusud leiya dau gin, kaba, len laugwan merdoc omom namcir.

¹²Sug lan laisa ucugwohob, kaba, lan lauman mer gouji hom dau bogo eija lan, endagai: Yan yaisaugb dig bogon. Sug en eija lan, kaba, umer eisaugb an lan abeba maran moc len laugwan meriresi dig bogo toueda.

¹³Irir sug lan laisaugb dig bogo, kaba, inyomda medam eisa betir cinogo moho agas ingga, beinyeinya namcir. Dangga hang, lusud gedig len lemomombuma, kaba, len lemeic merus dou Allah deitero. Doba len lesga meren sesar dou en, anai len lahau dau inyomda medam gini. Hanoba len leigdoumesa sud hom geigtou se gogouf cucugb se bogo en moho agas medam toua namcir. Anai len leiya, doba inyomda eisa betir hom dau ara sisa dau areg geb se meren cinogo ingga, eij baisoboro. Dara eic gomom dou leng mesir merug ribu senggai len laugwan touohob.

¹⁴Hang gogom gedig hwai obsara dauwohob. Doba yen youman deigeigouhw. Anai gogom gedig homoi emagunya ucan gin dedemedes.

¹⁵Dangga sug malaikad gedig senggai en ohw men higbeiyohob, kaba, dan douman, doba malaikad leinyana lagahugouhw medam se bogo, lendagai: Lusud se cinogo augwan, kaba, Bilis emoiharaga len deitero. Doba maman Adehsud, dara Krisdus, lan laperwei en mohw dag mougt mera medam naugb len laugwan deit. Dangga lan maroho emobsara deitero. Doba lan loiharaga len laugwan beb huhugb terimda. Anai maman Adehsud, kaba, en eigdoumesa Krisdus naugb en eigdoc lusud laugwan dau sesar men gogom augwanohob.

¹⁶Sug malaikad lagahugouhw dag ginohob, kaba, mougtir merug sud hom hogu edeisu, gedig len leigtou se maija moc deseino Allah, kaba, len leijeboho lamuhumlo deseino en, naugb len lesijaresa en ucan gin toua.

¹⁷Hanoba len lagahugouhw an Allah, lendagai: Bang Allah Gedig Ban Beis Huhugb sugragohob, kaba, emen emen sijo dou ban terimda, anai ban abubisamougb namcir. Dara ban bedag Adehsud naugb ban aboho oiharaga augwan toua. Dangga ban bemamsoho lusud se cinogo augwan debero, doba ban bebiji naugb ban boiharaga len ucugb deitohob.

¹⁸Hang leng medigo Yesus len laugwan merdoc esrougb an ban. Anai len leiya, doba lona edagasohob naugb sug ban bogod gogom deb naugb len an leng lomom len laugwan toua. Dangga gareg dau len en esara, dara gareg en ohudarohob, kaba, ban bemeic mor mor dou len toues. Anai ban abdoc esrougb an lenohob. Doba naugb leng lesai ban aburo, dara leng lahau dau ban, dau leng meroho eb taiba dara leng meroho eb tainya, kaba, ban besedeb len naugb sug ban beic meren siouwa dou len dous. Anai len lemedreg dau ban abir gin touwero. Doba len leicara laimo areg ban barougb len an gini augwan terimda. Hang ban bemouci len debinim naugb banohob.

¹⁹Sug len lesijaresa Allah dag gin dauwohob, kaba, misis se bogo ec dau. Hanoba lusud len leiya, doba Allah Men Biruwa Gos Dou eb se men tuari mes ingga. Dauntoba len lecinaga dag areg en os deb dou len sug nosohob, kaba, en emedreg dau hom touwero, doba en aimo augwan an len namcir. Hang emeic dag bagar mouf, dara bagar mougb, dara inyomda, dara los an mogo medam, dara mougb aingma aingma eisa ucan sug len lec misis dau gin toua.