Read Manikion WAHYU 12 Bible Online

WAHYU 12 - Manikion bible

WAHYU 12

¹Dauwohob, kaba, gansins medam hom agunya se bogo deit. Anai dan deiya, doba igda lona mouf edag sansun gerba debin gida hom namcir. Dara en mohora hwas esesa igda loba, kaba, tebeij sisa hobjerai ehihim acec en mougt toua.

²Eni deinyor sug en ouwadan meh. Dangga hang, en etarerij an namcir, anai en menuhwa erij medamohob.

³Dara dan deiya gansins hom deit agunya se bogo meniha. Doba yen youman deigeigouhw. Anai dan deiya Wor medam hom sug en esa deseino gida graga naugb sug en ouwan omga en meh gin toua. En mos augwan ahan namcir. Dara en mougt senggai, dara en momboung mog sisa, dara astesda men mougt senggai gin, kaba, en eg topi hom, aninim dag mougt mera medam meren topi toua. Anai en moho eb taiba lusud laugwanohob.

⁴Dara dan deiya deit, doba en esedougwo gida ingga. Dauntoba sug en ouwadan meh ginohob, kaba, en omga toua. Anai meh gin, kaba, Allah esedeb en naugb en edag lusud se cinogo augwan meren mougt mera medam ginohob. Dauntoba en esedougwo len dara goubesa medam namcir. Dangga hang, Wor en medoc esrougb medam an gida meh gini. Anai dan deiya, doba sug en esedougwo gida ingga, kaba, en ebib mesira naugb agig tebeij hom dau ara homoi se bogo augwan terimda lobsara se cinogo gin toua. Dobnaro. Anai sug gida ouwadan meisi hom inegohob, kaba, malaikad esma en dau Wor graga. Hanoba en oho en aud Allah se men maija moc gin toua.

⁶Dara gida graga, kaba, en toua ougb dig lomougwisa dau Wor ingga namcir. Dauntoba Allah eseyeiyo dara agauwesa en sungga se lona ribu hom huntun hwai mos senggem edeisu gin toua. Anai en esedeb usi hom sungga naugb enohob.

⁷Sug gida ougb dig lomougwisa dau Wor ginohob, kaba, malaikad meren mougt mera medam hom, moho Mikel, an men logodeh len lebiji naugb len lesara dara Wor an men merna mog mog toua. Dauntoba len locirma len laugwan dau bogo namcir. Anai en, kaba, en augwohosa lusud se cinogo augwan naugb len lemaimo Allah en mer deitero. Doba len laijahasero dau en naugb len lebesesar terimda. Hang meren usi ingma emeb naugb len se bogo toua deitero. Dangga Wor, kaba, en esan men merna mog mog ingga naugb len lebemocedou Mikel an men logodeh len laugwan icira gin toua.

⁸Dobnaro. Mikel dara men logodeh len laiyan Wor an men merna mog mog len laugwan namcir.

⁹Hanoba len lerba Wor medam gini dau bogo toua. Anai en, kaba, en edag hinogo gaimougtut. Hang en augwohosa lusud se cinogo augwan naugb len laijahasero dau ucina geica aud sesar touohob. Dara lusud leija en moho toua dag Bilis. Anai en, kaba, en ohobas Allah men lusud maman deseino en lona loba. Dara len leija en toua dag Setan, anai eni sud hom gesedeh dougwo lusud toua terimda. Dauwohob, kaba, Mikel an men sadodor len lerba Wor medam se cinogo gini. Dara len lerba men merna mog mog len laugwan dau bogo ucan en toua.

¹⁰Sug len locirma Wor an men merna mog mog len laugwan dau bogohob, kaba, dan douman, doba sud hom dau leng lomom se bogo icira sug len los ladi Yesus en moho se cinogo gini sug nosa, kaba, en ouma debin gin toua dara mer medam namcir, endagai: Lona naugb sug Allah eigdoc maman mamsir se cinogo dau meren sesar men gogom augwan. Hanoba en oiharaga len ucugb dara men goubesa medam. Dara lona sug Krisdus en edag mougt mera medam, dara en moho aiga lusud laugwan toua, kaba, augwan edagasa namcirohob. Anai sud hom areg en ohobas maman mamsir an meren aremer deseino maman Allah lona loba terimda, kaba, len lerba en dau bogohob. Hang en emdohobas len dag nosa deitero, doba len laiyan en bobsara namcir.

¹¹Anai en ahacugb gogom debin len terimdohob. Doba Domba, kaba, en mogwihi aihiron dougwo meren gogom augwanohob. Hang len lemahau dau sug lusud leic gomom dou len touwero. Doba len leic merus naugb len los ladi Domba en moho deseino len terimda.

¹²Dangga yeng yeigtou se bogo gin, kaba, yen yaugwan yagahugouhw medam an gin namcir. Doba yeng se lonog, dara dum mohu, kaba, gogom medam eb naugb yen dous, anai Bilis en en aud yenohob. Dareg en medoc obgos medam toua, anai en ecinaga dag men lona gouji augwan ebeij deinyor sug ouwedocohob.

¹³Sug sud hom graga enara dag gin dou leng se bogo dauwohob, kaba, dan deiya, doba Wor en osos ucucan gida hom gouwadan meh graga naugb sug en eic gogom dou en toua. Anai en ecinaga dag en emeinesa bogo deitero. Doba len locirma en dau namcirohob.

¹⁴Dobnaro. Anai Allah esedeb usi hom se lomougwisa naugb enohob, dauntoba sug en eseyeiyo en sungga se arisogomoc homoi mougwu dau hinogo gacgunog gini. Hang Allah emeic mebera hwai, aninim dag bemihi medam mebera dou en naugb en ohw se lomougwisa dau hinogo gin toua.

¹⁵Hang hinogo en esa duhu medam dau en mers ucan gida ingga, dauntoba duhu ougwan en namcir.

¹⁶Dobnaro. Anai lonog oiharaga gida ingga. Hanoba en aga mers naugb en om duhu areg agunya dau Wor graga en mers ingga namcir.

¹⁷Dangga sug Wor en eiya, doba gida graga ougb dau enohob, kaba, en medoc esrougb medam an en. Hanoba en eihweda naugb en osos ucucan gida graga en mehir gus gus areg en aimo Allah men gomnomna. Dara areg os badi Yesus en moho deseino lusud len laugwan, dauntoba en esara dara len toua.

¹⁸Dauwohob, kaba, dan deiya Wor gini sug en esa se dum mebera toua.