Read Manikion WAHYU 14 Bible Online

WAHYU 14 - Manikion bible

WAHYU 14

¹Sug dan deiya areg graga augwan dauwohob, kaba, dan deiya deit, doba yen youman deigeigouhw namcir. Anai dan deiya Domba graga sug en esa taiba mengarougb, moho Sion. Hanoba dan deiya lusud merug ribu huntun hom mos hogu hogu edeisu, gedig Domba ed enin moho dara en Mena moho se len mersdemagohob, len laugwan lesa desij en se mengarougb ingga toua.

²Dauwohob, kaba, dan douman, doba mougb aninim dag lusud sug len lod isadum einyana se bogo. Isadum mougb gin, kaba, mougb eiji aninim dag duhu gesog ai mesihwa dara bagar mougb medam toua.

³Dangga dan deiya, doba lusud merug ribu huntun hom mos hogu hogu edeisu graga, kaba, len laugwan lohu aresgwemer menau hom deseino Allah se men maija moc. Dara ara hogu merireseb, dara mougtir merug sud hom hogu edeisu len laugwan toua. Aresgwemer menau hom gin, kaba, sud hom ingma en emohu gin mougwa hombuma. Dara en emecinaga meijouhw dau augwan gini asesa touebma. Doba lusud merug ribu huntun hom mos hogu hogu edeisu gin dous eng lecinaga meijouhw augwan asesa. Anai lenin dous eng Domba ancoho aga len dau leng se cinogo augwan. Hang Allah eigdoc len dau sesar men gogom aud maireseb menau geb huhugb ginohob naugb sug len ledag enin men lusud toua namcir.

⁴Anai len gin, kaba, len lemohw len meraga dou ligida gus mougwa hombuma. Doba len ledag ligib gedig len lemebarebma mogud dous. Dara len lemaihagab en mer touwero. Doba astesda ucina sug Domba eraga dagiro, kaba, len lesogwa deisa en mohotimei mohw dangga toua. Hang dau lusud gus se cinogo augwan, kaba, lenin dous eng Domba eic en mogwihi ancoho aga len. Hanoba en ouci len debinim dag mera mebin naugb len ledag Allah maran lusud gin toua terimda. Aninim dag lusud louci mera mebin naugb len leic augwan gini dag lauwaharo dou Allah toua.

⁵Dangga aremer hom emdagunya debin len touwero. Doba len lecabeci deseino Allah namcir. Anai len lemaideido dougwo Domba mougwa hom touwero. Doba len los ladi en moho deseino lusud aud gomom ginohob.

⁶Dauwohob, kaba, dan deiya deit, doba malaikad hom ohw bainoc se bogo meniha naugb en esai Mer Geigouhw dau Allah augwan gini dou lusud se astesda hancob, dara meijouhuda, dara merusur, dara meren leci, len laugwan mougwa hom deit. Anai Allah en mer gin, kaba, emeperwei touwero, doba ebsugeb beb huhugb namcir.

⁷Hanoba en enara dou leng se cinogo augwan dara mer medam, endagai: Allah men lona naugb sug en ogod aremer gogom debin yen yaugwan, kaba, edagasohob. Dangga hang, yen yemeic meijus dou en deitero. Doba yen yahau dau en namcir. Hanoba yen yesijaresa en terimda, anai en eng ahasesei bogo dara cinogo dous. Dara enin eng esinsin dum mohu dara duhu mer augwan toua.

⁸Gin dauwohob, kaba, dan deiya, doba malaikad hom agunya oucan malaikad geino graga deit. Dangga sug en agunyohob, kaba, en owun cinogo Babel an men geicara gecgu augwan toua. Hanoba en enara gouji dou en, endagai: Babel, ban, kaba, ban bedag cinogo moho agas medam. Dara ban abubisamougb naugb augwan toua. Doba aban lona naugb sug Allah od ban baisoboro namcir, kaba, ebeij deinyorohob. Anai ban bemebehnehino banin abdoc mes dougwo areg gecgu mougwa hom touwero. Doba ban beic mog an areg gecgu gini dag ahwei mohu dou lusud se cinogo augwan naugb len laimo ban aud areg gogor. Dara len lecguna dou seiseij augwan touohob.

⁹Dauwohob, kaba, dan deiya malaikad gedig homoi en agunya ucan malaikad hwai graga. Dangga sug en agunyohob, kaba, en en dougwo lusud, dauntoba len lemesijaresa aremeta gen dau dum mohu deitero. Doba len lasid lenin dau namcir. Hanoba en enara dou len dara mer medam, endagai: Gareg dau yen en esijaresa aremeta gen dau dum mohu, dara en ecguna dou men mocbobaga. Hanoba en emen dougwo lusud sug len louwan led men hugba se en mecdemaga, era en mosutimei medigo touwero. Doba en amsoho len an gin namcir, kaba, Allah emamsoho en deb touwero. Doba en eic mog erij an men gogom medam dag anggur mohu dou en naugb en eg augwan toua.

¹⁰Anai en medoc esrougb medam an sud hom gin namcirohob. Hang en emeic duhu bemaihirir anggur mohu gin touwero. Doba en eic anggur mohu gobgos mogud se mogahabi, en emeic dou en, bemeg. Hanoba en ederba en se dum smougb gedig igdahab gohoseri ebsa naugb smougb eic mog erij dou en, abeba malaikadir gecabeci dara Domba len laugwan meriresi toua.

¹¹Sungga, kaba, en emarges dau mog erij gin touwero. Doba smougb eic mog erij dou en beb huhugb namcir. Anai en emebehnehino enin medoc mes dau sug en esijaresa aremeta gen dau dum mohu. Dara en emecguna dou en mocbobaga. Hanoba en emen dougwo lusud sug len led en moho se en mecdemaga touwero. Doba en aimo augwan gin terimdohob.

¹²Dangga hang, sug malaikad en dougwo lusud dag ginohob, kaba, esulou maman. Dauntoba maman mamobsara dau sug maman mamdoc ebdebin an Yesus. Dara maman mamarges dau sug maman maimo Allah mohotimei mohw an areg en arougb maman an. Dara maman mamahau dau sug lusud leic gomom dou maman icira gin touwero. Doba sug Allah ouci maman debinim naugb enohob, kaba, maman maiyan mamdocesem naugb maman maimo ucina mog erij gin terimda. Anai sug maman mahau dau sug lusud leic gomom dou maman, dara maman masijaresa aremeta gen dau dum mohu, dara maman mad men nomor se maman mamsdemaga, kaba, Allah erba maman se dum smougb beb huhugb namcir toua.

¹³Dauwohob, kaba, dan douman deit, doba sud hom esulou dan dau bogo icira gin toua. Hanoba en enara dou dan, endagai: Gareg en edag hom dara maman Adehsud ginohob, hanoba en emobsara dau gin touwero. Doba en es agadgeij se ucina mog erij gini terimda sug ouwedoc, kaba, Allah emasidged en touwero, doba en eic geigouhw dou en namcir. Sug en esulou dan dag ginohob, kaba, en arougb dan naugb dan dog areg en en dou dan gini augwan se indan surad toua. Gin dauwohob, kaba, dan douman Mena Gogoufu en mer sug en ouma debin gin deit. Hanoba en enara dou dan, endagai: Areg sud hom graga esulou ban an gin, kaba, augwan asesa dag misen namcir. Anai gareg en emobsara dau ucina mog erij gini, hanoba en emahau dau sug lusud leic gomom dou en touwero. Doba en es agadgeij terimda, kaba, men geicara gini aiseisa en deseino Allah. Hang en emaimo ucina mog erij toua deitero. Doba Allah eic geigouhw dou en naugb en eigtou debin en mog erij beb huhugb namcir.

¹⁴Sug dan douman aremer graga augwan dauwohob, kaba, dan deiya deit, doba yen youman deigeigouhw. Anai dan deiya sud hom men mocbobaga dag Lusud Meraguna Mebin en eigtou se umer mogo gogoufu hom. Se en mougt, kaba, en eg topi hom dau emas, aninim dag mougt mera medam meren topi. Dara en os kebta mecohw magab hom icira en mesira toua.

¹⁵Dara dan deiya deit, doba malaikad hom en agunyen dau Allah men tuari. Sug en agunyenohob, kaba, en arougb sud hom geigtou se umer mogo hom graga dara mer medam, endagai: Ban beij aber an aban kebta magab ingga naugb ban bagod areg gohoserohob dau cinogo augwan. Anai lona edagasa naugb gin namcirohob. Hanoba ban bouci meij augwan debinim toua.

¹⁶Sug malaikad gini en arougb sud hom geigtou se umer mogo hom gragohob, kaba, en eic mebera an kebta magab. Hanoba en ogod meij areg gohoserohob se cinogo augwan toua.

¹⁷Dauwohob, kaba, malaikad hom deit en agunyen dau Allah men tuari se bogo. En toua os kebta mecohw magab hom icira en mesira, aninim dag sud hom geigtou se umer hom graga.

¹⁸Sug en agunyenohob, kaba, malaikad gesedougwo Allah men boromei naugb en ec areg mena ouwedebeda dou en, kaba, en toua en en. Dangga sug en enohob, kaba, en arougb malaikad gos kebta mecohw magab hom graga dara mer medam, endagai: Ban beij aber an aban kebta magab ingga naugb ban bagod anggur mera dau maga se cinogo augwan toua. Anai augwan eijogoij namcirohob.

¹⁹Sug en arougb malaikad gin inegohob, kaba, en eic mebera an men kebta magab ingga naugb en agod anggur mera augwan dau maga namcir. Hanoba en erba augwan gini se Allah men cinogo mes medam naugb en aiyan len toua. Anai cinogo mes gini, kaba, ansins dag gogom medam areg Allah esedeb naugb leng merug mog ginohob.

²⁰Dangga sug en aiyan leng merug mog len laugwan dag anggur mohu se cinogo Yerusalem medigo dag ginohob, kaba, len merugwihi ohw beindaredeb eisaugb edebeij irir lusud merugt. Dara ohw baisoboro aigusi dag lusud lec se lona senggaiyahabi, len lemdebeij sug ouwedoc toua.