Read Manikion WAHYU 15 Bible Online

WAHYU 15 - Manikion bible

WAHYU 15

¹Gin dauwohob, kaba, dan deiya, doba gansins medam eb ainyes se bogo ucan areg graga deit. Gansins gini eic dan indoc omom dou dan namcir. Anai dan deiya, doba malaikad merug senggai sug len los Allah men gogom senggai gouwedoc icira len merisira toua. Dangga sug len letiniha augwanohob, kaba, Allah emeic gogom dou lusud toua deitero. Doba en arges mesira dau namcir.

²Hanoba dan deiya, doba lusud leinyana gedig len los isadum icira len merisira len lesa se dum mohu hom mebera toua. Isadum gin augwan, kaba, Allah enin eng eic dou lenohob, naugb sug len lagahugouhw an en terimda. Anai len gin, kaba, len lemesijaresa aremeta gen dau dum mohu. Dara len lemecguna dou men mocbobaga, dara len lemousa deisa lusud merir naugb len led aremeta men nomor se len mersdemaga touwero. Doba len lebehnehino lenin merus dau gin augwan namcirohob. Doba dum mohu gin, kaba, mei esgiraha aninim dag sogo mehir. Dara areg gahani dag smougb mouf aihiriri se dum mohu gin toua.

³Dangga sug len lesa se dum mohu mebera gin, kaba, len lagahugouhw an Allah toua, aimo dau areg Allah men sogougb, moho Musa, dara Allah men Domba, Yesus, lan lagahugouhw an en sug nosohob. Hanoba len lohwaresgwemer, lendagai: Adehsud Allah Gedig Ban Abubisamougb, emen emeigdoumesa ban aboho an aban geicara. Anai augwan eigouhw medam dara moho agas namcir. Hang ban bemaimo ucina gagabgebi an lusud laugwan. Dara ban bemobsara aud sud hom touwero. Doba se aremer augwan, kaba, ban baimo ucina se geica dara gedag beim an len dous. Anai ban bedag Mougt Mera Medam Geis Huhugb Sugraga naugb lusud se cinogo augwanohob.

⁴Dangga, kaba, gareng en mou emesbes an ban, dara en emowun ban aboho gin toua? Naro, sud hom ingma en emeic mos naugb ginero. Doba len laugwan lahau dau Adehsud, ban. Dara len leigdoumesa ban aboho agas medam toua terimda. Anai banin dous eng becabeci namcir. Hang lusud se cinogo augwan, kaba, len len aud ban naugb len lesijaresa ban toua. Anai len leiya dau sug ban bogod aremer aga lusud, kaba, dag ban bemobsara aud sud hom touwero, doba ban baimo augwan edag beim an len namcir dous.

⁵Sug dan douman dau areg len lagahugouhw an Allah gin dauwohob, kaba, dan deiya deit. Doba malaikad se Allah men tuari se bogo, kaba, len lasid minc dau dimei hom sug Allah men biruwa an areg en os dou lusud ebsa toua.

⁶Dangga sug len lasid minc dau dimei ginohob, kaba, dan deiya. Doba malaikad merug senggai graga, sug len lagunyen dau dimei ingga len laugwan leg sansun gecabeci mohw esisilo namcir. Hanoba len leic hwigbei mos dau emas lahud se len merogumsa toua.

⁷Gin dauwohob, kaba, dan deiya deit, doba sud hom dau ara hogu merireseb en eic mohoi senggai dau emas gatij an Allah Geis Huhugb Sugraga men gogom dou malaikad merug senggai ingga toua.

⁸Sug en eic mohoi senggai gini dou lenohob, kaba, Allah men gogouf cucugb ocninim se dimei mes graga augwan ucan gin toua. Anai eni mobisamougb naugb augwan ginohob. Dangga, kaba, sud hom ingma emeinesa dimei mes gin touwero. Doba len laugwan leigtou dig medigo terimda malaikad merug senggai graga, len letiniha mohoi an gogom senggai bouwa dauwahabi, len lemeinesa dimei mes gini toua deit.