Read Manikion WAHYU 16 Bible Online

WAHYU 16 - Manikion bible

WAHYU 16

¹Dauwohob, kaba, dan douman Allah sug en arougb malaikad merug senggai dau dimei graga naugb len letiniha meren mohoi gin toua. Hanoba en enara dou len dara mer gouji, endagai: Yen yihweda naugb yen yedetiniha meijen mohoi senggai an indan gogom areg dan desedeb naugb lusudohob.

²Dangga sug malaikad gaimougtut en edetiniha men mohoi debin lusud se cinogo ginohob, kaba, bugwo gerij dara men geiyema agunya se lusud areg en ed aremeta gen dau dum mohu graga men nomor se en mecdemaga. Dara en ecguna dou men mocbobagohob, len laugwan meraga toua namcir.

³Dauwohob, kaba, malaikad gedig hwai en edetiniha men mohoi se dum mohu. Dangga hang, areg geb se dum mohu, kaba, augwan omom namcir toua. Anai mohu augwan eperwei aninim dag sud hom gomom en mogwihi ginohob.

⁴Gin ouwohob, kaba, malaikad gedig homoi en edetiniha men mohoi an gogom se duhu mer dara duhu geindaredeb augwan deit. Hang duhu mer dara duhu geindaredeb augwan toua eperwei dag mogwihi namcir.

⁵Dangga dan douman deit, doba malaikad hom gesedougwo duhu augwan ingga, kaba, en eimiman dau Allah men geicara an gin toua. Hanoba en enara dou en, endagai: Adehsud, banin dous eng beis huhugb sugragohob. Dara ban becabeci namcir toua. Dangga hang, gogom areg ban besa debin lusud se cinogo ginohob, kaba, augwan dareg beim terimda.

⁶Anai len gini, kaba, len logod aban lusud areg ban bouci len debinim naugb ban. Dara len leic gomom dou leng lesai ban aburo sug nosa len laugwan touohob. Hang ban bemamsoho len gin deb touwero. Doba ban bedug leng lomom gini merugwihi dag siouwa ucugb dou len, dauntoba len leg toua.

⁷Gin dauwohob, kaba, dan douman leng lomom ogdoc aremeta graga gedig len leigtou se Allah men boromei louwaharesa se bogo, kaba, len toua louma debin malaikad graga en mer an gini. Hanoba len lenara dou Allah, lendagai: Adehsud Allah Gedig Ban Abubisamougb terimda, kaba, areg malaikad agahugouhw an ban gin, kaba, augwan asesa dag misen namcir. Anai gogom areg ban bogod deinaugb lusud se cinogo ginohob, kaba, augwan dareg beim. Dara aimo ucina se geica an len touohob.

⁸Sug len louma debin malaikad graga en mer dauwohob, kaba, malaikad gedig hogu en edetiniha men mohoi an gogom debin igda lona deit. Dangga hang, Allah ousa deisa igda lona gini naugb en esij lusud merus, aninim dag smougb esij lusud merus toua. Anai gogom areg geb se mohoi gin, kaba, eic dag igda lona mohora oubesa namcirohob.

⁹Doba lusud, kaba, len lemesga meren sesar, hanoba len lemahau an dougwo meren geicara gecgu. Dara len lemeigdoumesa Allah en moho touwero. Doba sug igdes mohora esij len merus dag gin, kaba, len louwareij Allah an gin terimda. Anai men goubesa inggebga naugb sug en esa gogom medam aingma aingma dag graga debin lenohob.

¹⁰Sug malaikad gedig sergem en edetiniha men mohoi an gogom, kaba, en etiniha men gogom gini debin aremeta gen dau dum mohu men maija moc sug en eigtousa. Dangga hang, aremeta an men lusud, kaba, len laugwan leg merugta an gogom gini. Anai gogom gini eic dag aremeta graga men hancob augwan edag lobeigbogo namcirohob.

¹¹Hanoba len louwareij Allah an lobeigbogo dara meren bugwo geb se len meraga toua. Anai bugwo eic mog erij medam dou lenohob. Dara len lemesga meren sesar dara len lemahau an dougwo meren geicara gecgu touwero. Doba len leic merus naugb len leicara laimo dangga esesa terimda.

¹²Dauwohob, kaba, malaikad gedig senggem en edetiniha men mohoi an gogom debin duhu medam hom moho Eprata. Dangga duhu ingga esa berouhw namcir. Dauntoba medibo gini edag ucina naugb leng medigo Yesus meren mougt mera medam dau dig igda eisaugwu an meren sadodor, len laugwan leraga toua.

¹³Dara dan deiya merna mog mog merug homoi len merucbobaga aninim dag arobo, len lagunyen ucan gin toua. Homa, kaba, en agunyen dau wor mers. Homa, kaba, en agunyen dau aremeta gen dau dum mohu en mers. Dara homa deit, kaba, en agunyen dau gembala areibahau en mers toua.

¹⁴Len gin, kaba, len ledag merna mog mog. Dangga hang, sug len lagunyenohob, kaba, len leihweda se cinogo gus gus augwan namcir naugb sug len ledouci mougt mera medam an meren sadodor debinim hom. Dara meren goubesa inggebga naugb sug len lens ganusbus einyana debin gin dou len toua. Sug len ledouci len laugwan debinimohob, kaba, len lahwan len aud usi hom, en moho se leci Ibrani mer dag Harmagedon, naugb sug len lesara dara Allah Gedig En Mobisamougb se men Lona Gouji Sug En Ogod Aremer Aga Lusud sungga toua. Sug dan deiya dau areg graga augwan dauwohob, kaba, dan douman maman Adehsud Yesus Krisdus sug en esulou maman ucan gin toua. Hanoba en enara dou maman, endagai: Yen youman dan indir gin deigeigouhwahabi. Dauntoba yen yematou dau lona sug dan decicugb aud yen gin touwero. Doba yen meijires agai namcir. Anai dan demens dau indan lona gin dou yen touwero. Doba dan den aud yen augwougb, aninim dag sud hom geiyoho lusud meren aremougb, kaba, en emens dau men lona gin dou len touwero. Doba en en augwougb (...)

¹⁷Dauwohob, kaba, malaikad gedig senggai en edetiniha men mohoi an gogom se bogo meniha taiba augwan. Hanoba dan douman Allah sug en enara dau men maija moc geb se tuari se bogo dou lusud laugwan deit, endagai: Gogom areg dan desedeb naugb lusud, kaba, augwan ouwa dougwo namcirohob.

¹⁸Sug en esulou len dag ginohob, kaba, dan deiya, doba bagar mouf ehinya men mougb toua oucuc anim. Hanoba dan douman bagar mougb sug ebiji namcir, dara mer medam oucuc anim. Dara inyomda medam gougwa eisa sug ucan gin toua. Dangga, kaba, eic cinogo medam ingga obrugb homoi icira. Dara lugmahara meren beimes, kaba, inyomda etitir augwan mor mor toua. Anai dau lona sug Allah en esinsin lusud terimda lona ingga, kaba, inyomda gouji gedag gini ingma emeisa touebma. Doba inyomda hom gin, kaba, edreg dau gus augwan namcir. Dara Allah medoc moc dougwo cinogo medam, moho Babel, an men geicara gecgu touwero. Doba en eic mog an men gogom dag anggur mohu naugb en eg augwan toua. Anai en medoc esrougb medam an men geicara gecgu augwan ginohob.

²⁰Dara lomos dara menmod, kaba, augwan ediyebeiya toua. Anai inyomda etir augwan mor mor touohob.

²¹Dara los an mogo medam obsara dau bogo. Astesda los an mogo men mogo hom, kaba, men gogom edebeij dag mos sergem. Dangga hang, emeic dag lusud lemouwareij Allah toua terimda. Anai gogom areg en esa debin len, kaba, medam gougwa dag len merdoc ohudibed an namcir.