Read Manikion WAHYU 17 Bible Online

WAHYU 17 - Manikion bible

WAHYU 17

¹Dauwohob, kaba, malaikad hom dau merug senggai graga gos mohoi hom an gogom, kaba, en en aud dan. Hanoba en enara dou dan, endagai: Ban bin suginahabi. Dan demens dau gogom areg Allah esedeb naugb cinogo Babel moho agas medam gini meijouhw augwan asesa dou ban. Anai en edag gida hom gedig en maga eijouhw namcir. Dara en eigtou boiharaga duhu mohu augwan toua.

²Hang en ohw en maga dou lusud se cinogo augwan meren mougt mera medam. Dara len toua merisira ebsa en terimda. Anai len laimo en naugb len lecguna dou seiseij. Dara len lesogwesa en mohotimei mohw aud areg gecgu gus gus augwan toua terimda. Hanoba en eic mog an men geicara gecgu gini dag anggur mohu dou mougt mera medam graga meren lusud len laugwan. Dauntoba sug len mersdemaga embreij anohob, kaba, len merisira ebsa en naugb len lecguna dou seiseij, dara len laimo en aud areg gecgu gus gus augwan toua.

³Sug malaikad enara dou dan dag graga dauwohob, kaba, Mena Gogoufu en ogod dan dag domom debin gin toua. Hanoba malaikad graga en eigdoumesa dan dig lomougwisa hom deit. Dangga sug dan dedebeij se lomougwisa ginohob, kaba, dan deiya, doba gida hom, gedig en maga eijouhw graga, en aingmo beigtou se aremeta gen dau dum mohu graga medgomori. Aremeta gin, kaba, en maga augwan dag gahan namcir, dara en mougt senggai, dara en momboung mog sisa. Hanoba en og moho einyana areg eic Allah en moho bacecim se en maga augwan toua.

⁴Dara gida graga, kaba, en toua eg sansun gahan misen dara gahan geijor namcir. Anai en eigdoumesa en moho agas dag mougt mera medam naugb augwanohob. Hanoba en obungma en maga dara emas dara igdahab mera eisaugb aingma aingma. Dara en ed sariou mogo einyana. En os mog hom dau emas atij an men geicara gecgu augwan sug en ohw en maga dou lusud icira en mesira toua. Hang areg geb se mog gin, kaba, dag ogor dara eiyema namcir.

⁵Dara en ed moho homoi dag aimeh se en mecdemaga toua, ed gendagai: Dan dedag cinogo Babel gedig moho agas namcir. Dangga hang, dan demedag ligida gedig len meraga eijouhw laugwan merim dan. Dara areg dag geiyema se cinogo gin, kaba, dan darautut lusud aud gin toua, anai dan indubisamougb naugb augwan ginohob.

⁶Dara dan deiya, doba len gedig Allah ouci len debinim naugb enohob, kaba, gida graga eg len laugwan merugwihi touohob. Anai len lemobsara aud enero. Doba len les agadgeij namcir naugb len merdoc ebdebin an Yesus. Hanoba len los ladi en moho deseino lusud toua terimda. Hang gida medoc emesrougb an len naugb en emogod len laugwan toua. Dangga sug dan deiya dau men geicara gin, kaba, dan deimiman dau gin namcir. Anai dan deiya, doba en mecdemaga embreij an len graga laugwan merugwihi touohob.

⁷Doba malaikad gahwan dan graga, kaba, en enara debin dan, endagai: Dagiro, naugwe hang, ban bemeimiman dau gida an men geicara gina? Ban bemecinaga meijouhw gin touebmei? Dangga dan dens dau gida geigtou se aremeta medgomori dara aremeta, gedig en mougt senggai dara momboung mog sisa graga, meijouhw augwan asesa dou banahabi, dauntoba ban becinaga dag misen toua.

⁸Aremeta gedig ban beiya gragohob, kaba, men meijouhw dag gini: Nosa, kaba, en toua maireseb. Doba iteitogin, kaba, en omomohob. Hang lusud lemeiya en touwero. Doba cum, kaba, en emdagunya dau ijou mes debin len toues. Dangga, kaba, lusud areg Allah emog len meroho se Surad Maireseb Menau Geb Huhugb dau sug en ahasesei cinogo ginbuma, kaba, len laugwan leimiman dau en namcir. Anai sug nosa, kaba, en omom dau len, doba len leiya en eisa maireseb deitohob. Dobnaro. Anai Allah en esedeb naugb en eic mor mor dou en se dum smougb teiteiyohob. Hang en ens mog dou lusud, doba cum cum dous.

⁹Doba areg gin augwan, kaba, naugb len gedig merdoc obrugbsa meijouhw gin dous. Dangga gareg dau yen en mou ouforoho, kaba, aremeta graga men mougt senggai gin, kaba, aninim dag menmod senggai gedig gida graga en eigtou taiba naugb oiharaga len laugwanohob. Anai mougt senggai gin, kaba, aninim dag mougt mera medam merug senggai toua.

¹⁰Merug sergem dau mougt mera senggai gin, kaba, len lomomohob. Doba hom, kaba, en edag mougt mera medam iteitogini. Dara hom deit, kaba, en emagunya debin lusudbuma. Doba sug en agunyohob, kaba, en edag mougt mera medam, cum cum, naugb len dous. Anai gini aimo dau areg Allah esedeb naugb enohob.

¹¹Dara aremeta gen dau dum mohu gin, kaba, enin eng sud hom dau mougt mera medam merug senggai gin toua. Dangga sug en agunya debin lusudohob, kaba, en eperwei mougt mera gedig senggai graga, en mohw, naugb en edag mougt mera medam gedig senggemoi gin an len deit. Anai sug nosa, kaba, en omom dau men lusudohob. Hang len lemeiya en toua deitero. Doba cum, kaba, en eisa dau gomom ucugb naugb en oiharaga len laugwan mougwa hom deit. Dara en emesedougwo len terberbahabero. Doba sug men lona augwan edagasohob, kaba, Allah erba en se dum smougb ucugb deit.

¹²Dara momboung mog sisa gedig ban beiya graga, kaba, gini aninim dag lusud merug sisa gedig len lemagunyabuma. Doba sug len lagunyohob, kaba, aremeta eigdoumesa len meroho dag mougt mera medam naugb len lesa desij en. Hanoba en eic goubesa dou len naugb len lesedougwo lusud laugwan toua, doba cum cum, dous.

¹³Sug aremeta eigdoumesa len meroho ginohob, kaba, len lemohoiya en mer touwero. Doba len lohw meru doum naugb len leic len meroho dara meren goubesa augwan ucugb dou en.

¹⁴Hanoba len laimo en naugb len lesara dara maman Domba an men lusud toua. Doba Domba dara men logodeh gedig len laimo en mer gin terimdohob, kaba, len lesa debin aremeta dara men gedeijan len laugwan louwa namcir. Anai Domba, kaba, en moho agas edreg dau leng meroho agas augwan. Dara en edag mougt mera medam edreg dau mougt mera medam se cinogo augwan toua. Dara men lusud gin, kaba, len lemobsara aud aremeta graga mougwa hom touebma. Doba len les agadgeij toua namcirohob. Hang en emouci len debinim naugb en, anai en eija len naugb len len aud en sug nosa touohob.

¹⁵Sug malaikad ens dau gida dara aremeta graga meijouhw augwan asesa dou danohob, kaba, en ens dau duhu areg gida eigtou boiharaga graga meijouhw augwan asesa ucan dou dan deit. Hanoba en enara dou dan, endagai: Duhu areg ban beiya graga, kaba, aninim dag cinogo an meijouhuder, dara merusur, dara lusud meren leci augwan. Anai ban beiya gida gedig en maga eijouhw gin, kaba, dag en eigtou boiharaga len laugwanohob.

¹⁶Dangga hang, aremeta dara momboung mog sisa gedig ban beiya graga, kaba, len laugwan merdoc esrougb an gida gedig en maga eijouhw gin namcir. Hanoba len leic men aremougb, dara len leg men sansun augwan dau en naugb en eigtou an mog mogud deb dous. Dauwohob, kaba, len let en mog igbum. Doba igbum, kaba, len lec se smougb naugb smougb ait mor mor namcir toua.

¹⁷Doba sug mougt mera gedeijan merug sisa graga len leic len meroho dou aremeta ucugb, dara len lohw meru doum naugb len leic meren goubesa augwan dou en. Hanoba len laimo en naugb len leic gomom dou gida graga toua, kaba, augwan gini dau lenin merdoc mes dousero. Doba aimo dau Allah enin mer gin toua. Anai enin eng outi se len merdoc mes. Hang len leicara dangga, terimda areg en esedeb naugb gida gin, kaba, augwan acgunog namcirohob.

¹⁸Dara gida maga eijouhw gedig ban beiya graga, kaba, eni aninim dag cinogo moho agas medam hom gedig en moho oiharaga lusud se cinogo gin augwanohob. Anai en, kaba, mobisamougb namcir.