Read Manikion WAHYU 19 Bible Online

WAHYU 19 - Manikion bible

WAHYU 19

¹Sug malaikad graga owun cinogo Babel an men geicara gecgu dag ginohob, kaba, dan douman mer medam se bogo, aninim dag lusud leinyana merir sug len lagahugouhw ucan gin toua. Dangga len lenara, lendagai: Allah, emen emagahugouhw an ban, anai ban beigtou se gogouf cucugb namcir. Dara ban bedag emen Allah Gedig En Mobisamougb naugb ban beigdoc emen dau gogom gedig gida eic dou emen augwan gin touohob. Anai ban, kaba, ban bemobsara aud sud hom ingma touwero. Doba areg ban bogod an deb, kaba, augwan dareg beim. Dara aimo ucina se geica terimda toua.

²Dangga hang, ban bemamsoho gida hom gedig en maga eijouhw gin touwero. Doba ban bogod gogom debin en naugb ban bauni emen emugwihi areg en eir dou emen sug nosohob, augwan ucugb dou en toua. Anai en eic en maga barerei lusud se cinogo augwan naugb len lecguna dou seiseij. Dara len laimo en aud areg gecgu dara gogor gus gus augwan touohob.

³Dauwohob, kaba, dan douman, doba len lagahugouhw an Allah mougwa hom ucan gin deit, lendagai: Allah, emen emaugwan emagahugouhw an ban namcir. Anai smougb gait cinogo Babel gin, kaba, emos touwero. Doba moro eisaugb beb huhugb namcirohob.

⁴Dara mougtir merug sud hom hogu edeisu dara ara hogu merireseb, kaba, len toua laugwan louma debin len graga merir an areg len lagahugouhw an Allah gini. Dangga sug len leijeboho lamuhumlo deseino men maija moc ginohob, kaba, len lenara dou en, lendagai: Allah, emen toua emagahugouhw an ban. Anai gogom areg ban besa debin cinogo Babel ginohob, kaba, augwan asesa dag misen namcirohob.

⁵Sug dan douman leng se bogo len laugwan lagahugouhw an Allah dag ginohob, kaba, dan douman mer hom dau maija moc graga, en arougb Allah men lusud se cinogo augwan naugb len toua lagahugouhw an en. Hanoba en enara dou len, endagai: Yeng yedag Allah men sogougb, dara yeng meijoho eb taiba, dara yeng meijoho eb tainya, dara yeng yahau dau en, kaba, yen yaugwan yagahugouhw an en terimda.

⁶Sug dan douman sud hom graga en arougb Allah men lusud se cinogo augwan dag ginohob, kaba, dan douman deit. Doba len laugwan merir eisa, aninim dag duhu gesogwa ai mesihwa dara bagar mougb naugb len lagahugouhw an Allah en toua, lendagai: Allah, emen emaugwan emagahugouhw an ban namcir. Anai ban bedag emen mougt mera medam naugb ban boiharaga augwan. Dara ban bedag emen Allah gedig ban abubisamougb naugb augwan touohob.

⁷Dangga hang, eigouhw naugb emen emdoc eigouhw, dara emen emagahugouhw an ban. Hanoba emen emeigdoumesa ban aboho dareg emen emen sijo dou ban terimda. Anai ban baigdougwo emen sesar augwan dau emen, dara ban bed emen debinim naugb ban. Hang ban beic sansun garjeijaga, dara mohw esisilo, dara gogouf cucugb gansins dou emen naugb emen emeg dougwo emen touohob. Anai Domba men lona naugb sug en eic emen dag en mesouwa, kaba, ebeij deinyorohob. Hang mesouwa emen toua emobungma emenin emaga deigeigouhw naugb en namcir.

⁹Dag gin dauwohob, kaba, malaikad gahwan dan dig lomougwisa graga, kaba, en enara dou dan deit, endagai: Gareg Allah esa mer naugb en, dauntoba en etara dara Domba se lona sug en ougwan ared debin mesouwa gin, kaba, len ingga dous eng Allah eic geigouhw dou len. Len gus laugwan, ga, naro. Sug en esulou dan dag gin dauwohob, kaba, en arougb dan ucan deit, endagai: Areg dan desulou ban an gin, kaba, bog augwan se aban surad namcir. Anai dan demenara augwan gini dau danin indoc mes dou banero. Doba augwan gini en dau Allah enin dous. Hang se geica namcir.

¹⁰Sug dan douman en mer an dag ginohob, kaba, dan douwan deijeboho damuhumlo desij en naugb dan desijaresa en toua. Doba en en dougwo dan, endagai: Ban bemesijaresa danlo. Doba ban besijaresa Allah enin dous. Anai dan toua, dedag Allah men sogougb naugb dan desai Yesus Krisdus en moro dou lusud, aninim dag ban abaguner yen yaugwan gedig yen yesai Krisdus moro dou lusud toua. Anai areg Yesus en ens dou mamanohob, kaba, goubesa medam namcir. Hang emarautut maman naugb maman masai augwan gini dou lusud toua terimda.

¹¹Gin dauwohob, kaba, dan deiya deit. Doba yen youman deigeigouhw namcir, anai len lec misis dau kuda gogoufu hom se bogo. Dara sud hom en eigtou se kuda ingga medgomori toua. En moho dag Medoc Hom Dara Geica. Anai areg en esai dou lusud, kaba, en emarges deb touwero. Doba en esai augwan gini dara medoc hom namcir. Dara en emereiyara touwero, doba en esai augwan dag misen toua terimda. Dangga sug en ogod aremer naugb lusud, dara sug en esara dara leng merug mog, kaba, en emobsara aud sud hom touwero. Doba en aimo augwan gini dareg en medoc edag beim an gin toua namcir.

¹²Dara en maires, kaba, mouf eririj, aninim dag smougb mouf. Dara lusud lecgun sogo mesira einyana an meh se en mougt toua. Anai enin dous eng edag mougt mera gouji naugb augwanohob. Dara len log moho hom se en maga toua. Doba moho gin, kaba, sud hom ingma emecinaga meijouhw touwero. Doba enin dous eng ecinaga moho gini men meijouhw asesa.

¹³En eg sansun gagas hom edogod debin mohotimei. Hanoba merugwihi oukougb men sansun ingga augwan. Anai en aiyan men moc laugwanohob. Dara en moho toua dag Sud Hom Gesai Allah En Moro. Anai en ens dau areg geb se Allah enin medoc mes augwan asesa dou lusudohob.

¹⁴Dara dan deiya, doba leng lomom icira enohob, kaba, len laugwan leg sansun garjeijaga, dara gecabeci, dara gogouf cucugb se leni. Hanoba len leisa kuda medgomori naugb len laimo en dag men sadodor ucan en toua.

¹⁵Dara dan deiya deit, doba krawan mecohw ineinagas agunya dau en mers naugb en aiyan lusud se cinogo augwan len meroho eb tainya namcir. Hanoba en esedougwo len dara goubesa medam toua. Anai dan deiya, doba en os dagamougb dau kermum icira en mesirohob. Dangga gareg en ohoiya en mer, kaba, en eic gogom medam areg Allah Gedig En Mobisamougb en esedeb sug nosohob debin namcir. Aninim dag lusud sug len laiyan anggur mera se cinogo mes toua.

¹⁶Hang se men sansun dara men meida moc gin, kaba, len log endag mougt mera medam naugb mougt mera se cinogo augwan, dara en moho edreg dau leng meroho agas len laugwan toua.

¹⁷Dauwohob, kaba, dan deiya malaikad hom sug en esa se igda lona naugb en omgoij ba gedig len lohw se bogo meniha len laugwan toua. Hanoba en arougb len dara mer medam, endagai: Yen yaugwan yen yin naugb yen yet lusud meren mougt mera medam, dara sadodor meren mougt mera medam, dara leng meroho agas naugb lesara, dara kuda, dara leng leisa kuda medgomori naugb lesara, dara sogougb, dara lusud misen, dara logodeh, dara lusud bod gareg en obsara aud aremeta ginohob, len laugwan merug namcir. Anai Allah esedeb len laugwan gini dag ared naugb yenohob.

¹⁹Dangga dan deiya, doba aremeta gen dau dum mohu, dara lusud se cinogo augwan meren mougt mera medam an meren sadodor, len laugwan loucimdeb se usi hom. Hanoba len lesedeb naugb sug len lesara dara sud hom geisa kuda graga medgomori an men sadodor len laugwan toua.

²⁰Doba sud hom geisa se kuda medgomori gin, kaba, en agaigeij aremeta gen dau dum mohu, dara men gembala areibahau. Hanoba en erba lan an marna agau se dum smougb gedig igdahab gohoseri eb se gin namcir toua. (Anai gembala areibahau, kaba, aremeta eigdoumesa en moho dag men gedeijan. Hanoba en eic goubesa dou en naugb en ens men ganusbus einyana dou lusud. Dauntoba en arerei leng led aremeta men hugba se len mersdemaga, dara leng lecguna dou men mocbobaga, len laugwan toua.)

²¹Doba mougt mera medam an meren sadodor, kaba, sud hom geisa se kuda medgomori graga en eic krawan mec ineinagas gagunya dau en mers graga. Hanoba en edesugb len laugwan louwa namcir. Dangga ba len let sadodor graga len merug merdoumara eigug an namcir toua.