Read Manikion WAHYU 21 Bible Online

WAHYU 21 - Manikion bible

WAHYU 21

¹Sug dan deiya areg graga augwan dauwohob, kaba, dan deiya, doba Allah en esinsin bogo dara cinogo menau deit. Anai areg geb se bogo dara cinogo mohon, kaba, augwan ediyebeiya namcirohob. Dara dum mohu toua emeb deitero.

²Gin dauwohob, kaba, dan deiya, doba Allah en esa Cinogo Gecabeci hom, moho Yerusalem Menau, gouwaden dau bogo se cinogo gini. Hanoba en obungma bemtemta namcir, aninim dag lusud lobungma gida hom bemtemta naugb sug len lahwan en aud en mesuwa toua.

³Hanoba dan douman mer medam hom dau Allah men maija moc sug en esulou lusud debin gin toua, endagai: Yen yesa, yauweila. Anai Allah men cinogo ouwaden dau bogo se cinogo ginohob. Hang en emeigtou aigusi dau lusud toua deitero. Doba en edag meren Allah naugb en oiharaga, dara eseyeiyo len, dara len ledag enin men lusud toua terimda. Anai en eigtou desij len beb huhugb namcirohob.

⁴Dangga len lemeb toua deitero, doba en ogunin len meridruh dau len meriresi. Anai len lemomom deit touwero, doba len leis huhugb terimda. Hang len merdoc momogo naugb len lemeb dara len lemeic len merug erij toua deitero. Anai areg mohon, kaba, augwan ediyebeiya namcir dau lenohob.

⁵Dauwohob, kaba, sud hom geigtou se maija moc en ouma debin areg sud hom graga esulou dan an ginohob. Hanoba en enara dou dan, endagai: Indeic, cum, kaba, dan desinsin augwan menau deit.

⁶Dauwohob, kaba, en esulou dan ucan gin deit, endagai: Indan geicara areg dan desedeb acgunog naugb lusud, kaba, augwan ouwedocohob. Anai dan dedag Alpa dara Omega. Hang dan indugwengga sug acgunog. Dara dan indugwengga sug augwan ouwedoc toua. Dangga gareg merijebeni naugb en ehilon maireseb huhugb dag duhu dau dan, kaba, dan deic maireseb gini dag duhu mer gededeic dag mogud dou en toua.

⁷Dara gareg en emaimo areg gecgu touwero, doba en ebehnehino enin mos dougwo augwan gini namcir, kaba, dan deigdoumesa en moho dag dan indugwihi mogo en dag misen. Hanoba dan dedag men Allah naugb dan doiharaga dara deseyeiyo en terimda, kaba, dan deic areg graga augwan dag mecigbougb dou en toua namcir.

⁸Doba gareg en ahau dau sug lusud leic mog erij dou en, hanoba en emos emadi dan indoho deseino lusud deitero, doba en aideido dougwo dan namcir. Dara gareg en medoc emebdebin an dan toua deitero, doba en ens enin ainyes dou lusud dag en obsara dau danohob. Dara gareg en aimo areg gogor dara men geicara toua dag mihi men geicara, dara gareg en ohudara, dara gareg en mesira ebsa ligida gus gus aibibrida, dara gareg en agaresa lusud merdoc mes, dara gareg en ecguna dou seiseij, dara gareg en ereiyara, dara en erba mohoisa, kaba, len laugwan gin, kaba, ledomom mougwa cuhwai icira toua. Anai dan dogod dum smougb gedig igdahab gohoseri eb se naugb len debohob. Sug en enara dag graga dou danohob, kaba, en arougb dan deit, endagai: Areg dan desulou ban an gragohob, kaba, ban bog gini se aban surad toua. Anai augwan gini asesa dag misen namcir.

⁹Dauwohob, kaba, malaikad hom dau merug senggai graga, gedig len los mohoi senggai an gogom gouwedoc gin, kaba, en en aud dan. Dangga sug en edebeij danohob, kaba, en eija dan, endagai: Ban bin. Anai dan douwan dens dau gida areg Domba esedeb en naugb en eic en dag en mesouwa dou banahabi.

¹⁰Sug en enara dag gin dou danohob, kaba, Mena Gogoufu ogod dan dag domom gin deit. Hanoba malaikad ahwan dan se menmod gagas medam hom naugb en edens dau Yerusalem Menau Gecabeci graga, gedig Allah esa dau bogaden se cinogo ginohob, dou dan toua.

¹¹Dangga dan deiya, doba cinogo hom ingga, kaba, atij an Allah men gogouf cucugb. Hanoba men mouf esisilo, aninim dag igdahab mera eisaugb, moho baiduri pandan, men mouf. Dara eni ecabeci dara esgiraha namcir, anai dag igdahab gogoufu, moho krisdal, gini toua.

¹²Dara len leic igdahab naugb len len liga gebehibera dara gagas medam acec dougwo cinogo Yerusalem ingga. Hanoba len log mes medam sisa hobjerai dag misis se liga gin toua. Dig igda agunya, kaba, len log mes homoi. Dara aud dig dum mer, kaba, len log mes homoi. Dara aud dig dum moho, kaba, len log mes homoi. Dara dig igda obsaresa, kaba, len log mes homoi toua. Sug len log misis augwanohob, kaba, len log moho hom dau leng Israel meijouhuda sisa hobjerai se astesda misis sisa hobjerai mersdemaga ingga toua. Dauwohob, kaba, malaikad merug sisa hobjerai len lekebem naugb len lesedougwo astesda misis gin augwan toua namcir.

¹³

¹⁴Doba naugb liga ingga, kaba, len leic igdahab medam maga sisa hobjerai. Hanoba len logo dag buc naugb gin touohob. Dauwohob, kaba, len log moho hom dau Domba men logodeh merug sisa hobjerai gaimougtut se astesda buc gin toua.

¹⁵Dara dan deiya deit, doba malaikad genara dou dan graga, kaba, en os ijouhugwa hom dau emas icira en mesira naugb en an cinogo dara misis, dara men liga augwan asesa namcir.

¹⁶Dangga sug en eic ijouhugwa graga an cinogo Yerusalem Menau ginohob, kaba, dan deiya, doba men gebehibera, dara geisaugb, dara gagas, kaba, augwan aninim namcir. Anai en ecic, doba mougwo dara mebera hwas, dara meis, kaba, dag lusud lec merohora se, kaba, edebeij juta hwai ribu huntun hogu astesda augwan toua.

¹⁷Dauwohob, kaba, en eic ijouhugwa an liga men gebehibera toua. Hang dan deiya, doba men gebehibera gini aninim dag meter mos senggem. Anai ijouhugwa areg malaikad en os gini naugb en eic ban liga, kaba, susugb dau lusud misen meren ijouhugwa touwero, doba aninim namcir.

¹⁸Dara liga geb acec cinogo Yerusalem Menau gin, kaba, len leic igdahab mera eisaugb, moho baiduri pandan, mogud eng lou dougwo dous. Dara areg geb se cinogo ingga, kaba, augwan dau emas misen mogud gedig men mouf dag sogomehir gesgiraha gin toua.

¹⁹Dara buc sisa hobjerai graga, gedig len logo naugb liga geb acec Yerusalem Menau ingga, kaba, astesda igdahab mera eisaugb namcir naugb len lobungma toua. Dangga hang, se buc gedig hom, kaba, len leic igdahab moc gogoufu, en moho baiduri pandan. Se buc gedig hwai, kaba, len logo igdahab moc geirir, en moho dag nilam. Se buc gedig homoi, kaba, len logo igdahab moc gaugweda, aninim dag mireh. Se buc gedig hogu, kaba, len leic igdahab moc gaugweda misen, moho samrud.

²⁰Se buc gedig sergem, kaba, len logo igdahab moc gahani, moho baiduri sepah. Se buc gedig senggem, kaba, len leic igdahab moc gahan misen, moho delima. Se buc gedig senggai, kaba, len logo igdahab moc gohoseri dag emas, moho ratna cempaka. Se buc gedig senggemoi, kaba, len leic igdahab moc dag geirir dara gaugweda, moho pirus. Se buc gedig senggegu, kaba, len logo igdahab moc gohoseri misen, moho topas. Se buc gedig sisa, kaba, len leic igdahab moc gaugweda, moho krisopras. Se buc gedig sisa hobjerem, kaba, len logo igdahab moc geirir, moho lasuardi. Dara se buc gedig sisa hobjerai, kaba, len logo igdahab moc gahan geijor, moho kecubung.

²¹Dara misis sisa hobjerai geb se liga graga, kaba, len leic sariou mogo sisa hobjerai naugb misis meh gin toua. Doba astesda misis meh gin, kaba, len lesinsin sariou mogo hom naugb dous. Dara ucina geb se cinogo Yerusalem Menau ingga, kaba, augwan dau emas mogud. Dangga men mouf, kaba, aninim dag sogomehir gesgiraha namcir.

²²Dara dan demeiya tuari emeb se cinogo ingga toua deitero, doba augwan ediyebeiya namcir. Anai maman Adehsud, Allah Gedig En Mobisamougb, dara Domba, kaba, lan ladag tuari naugb lusud ginohob.

²³Dara igda lona, dara igda loba, kaba, lan toua lamerba marufesa deitero. Doba lan laos dauwohob, anai Allah men gogouf cucugb einyedei cinogo augwan. Dara Domba, en toua, edag mouf naugb aisema lusud laugwan toua namcir.

²⁴Dangga, kaba, maran lusud len lemec dara lemeicara se lobeigbogo toua deitero. Doba astesda sug len lec, era len leicara, kaba, mouf gini aisema len terimda. Dara lusud meren mougt mera medam dau cinogo augwan, kaba, len lodo meren aremougb mera eisaugb areg len leimiman lenin an gin dou Allah dara Domba se cinogo Yerusalem Menau ingga besesa terimda toua.

²⁵Dara sug Allah men gogouf cucugb dara Domba men mouf aisema len beb huhugb dag ginohob, kaba, len lemouf misis dougwo areg gecgu dag nosa toua deitero. Doba misis eb dangga terimda, anai loba ediyebeiya dau len namcirohob.

²⁶Hang aremougb areg lusud leimiman lenin an gini, dara areg mera eisaugb, kaba, len lemedug merohora an touwero. Doba len merohora esesa an terimda sungga toua.

²⁷Dangga gareg en aimo areg gogor, hanoba en ecguna dou seiseij, dara en aideidora, dara en ereiyara, kaba, len lemeinesa cinogo Yerusalem Menau gin touwero. Doba len gedig Domba og len meroho se men Surad Maireseb Menau Geb Huhugb ginohob, kaba, len eng lemeinesa cinogo menau gini dous.