Read Manikion WAHYU 3 Bible Online

WAHYU 3 - Manikion bible

WAHYU 3

¹Sug en ens dau areg dan dog dou leng se cinogo Tiatira augwan dauwohob, kaba, en arougb dan deit, endagai: Dou gembala gesedougwo goucimdeb se cinogo Sardis, kaba, ban bog dag gini, bendagai: Surad gini dau dan gedig dan indoho aiga Allah men merna senggai. Dara dan dos tebeij senggai se dan insira gin toua. Hang dan decinaga dau meijen geicara augwan, kaba, dag lusud leimiman dau gin namcir, lendagai: Leng Krisden se goucimdeb gin, kaba, len laimo areg se maireseb menau geb huhugb augwan dag misen terim dangga. Dobnaro. Dan decinaga dag maireseb emeb naugb yen toua deitero. Doba yen yomom dau gin namcirohob.

²Dara dan deiya dau areg indan Allah en arougb yen anohob, naugb sug yen yaimo, kaba, dag yen yemaimo augwan terimda deitero. Doba yen yaimo hom yom dous. Areg gus augwan, kaba, yen yarges dauwohob. Dangga hang, yen yematou deitero. Doba yen yeisa dau gomom ucugb dedemeda. Hanoba yen yaiyan meigdocesem dara yen yos agadgeij se areg dag mougb geb gini naugb yen yeicara yaimo dag misen toua deit. Anai mougb geb gin, kaba, deinyor naugb sug yen yedag yomom dau gin touohob.

³Sug yen yeisohob, kaba, yen yesga meijen sesar an areg yen meigdoc omom icira gin augwan moho asesa dou dan. Dara yen yahau an dougwo namcir toua. Hanoba yen meigdoc eiseisan areg lusud lesai dou yen. Dara areg yen yebin se yen meigdoc mes sug nosohob, kaba, yen yaimo augwan gini toua deitahabi. Anai sug yen yemeisa dau yematoudero, kaba, dan den aud yen augwougb naugb dan deic mor mor dou yen augwan namcir. Aninim dag sud hom geiyohora, kaba, en emens mog ainyes dou lusudero. Doba en en augwougb debin len dous. Hang yen yemecinaga lona sug dan den aud yen gin touwero.

⁴Doba merug hosa dau aban lusud se Sardis, kaba, len laimo areg asesa Allah enin medoc mes augwanohob. Dangga hang, dan demeic mor mor dou len touwero. Doba sug dan decicugwen, kaba, dan deigdoumesa len meroho naugb len laimo dan an meren sansun gogoufu dinga dingada toua. Anai len lemaimo areg gogor ginero. Doba len lebehnehino lenin meren sansun gogoufu dau gin namcir. Hang len meroho emedeinyum naugb gin touohob.

⁵Dangga gareg en ebehnehino enin medoc dougwo areg gecgu augwan namcir, kaba, dan demeic sansun gogouf cucugb demeg seni. Hanoba dan demoguc en moho dau Surad Maireseb Menau Geb Huhugb touwero. Doba dan dos dadi en moho deseino dan Indina an men malaikadir, dendagai: Sud hom gin, kaba, en edag indan lugdeh misenohob.

⁶Gareg dau yen en moms ai, kaba, en oc moms naugb Mena Gogoufu en mer an areg en en dou goucimdeb augwan gin dareg geigouhw namcir.

⁷Sug en ens dau areg dan dog dou leng se cinogo Sardis augwan dauwohob, kaba, en arougb dan deit, endagai: Dou gembala gesedougwo goucimdeb se cinogo Piladelpia, kaba, ban bog dag gini, bendagai: Surad gini dau dan gedig Allah ouci dan debinim naugb enohob. Dauntoba dan deigdoc lusud dau sesar men gogom augwan namcir. Dara dan dedag sud hom gedig dan demereiyara mougwa hom touwero. Doba areg dan dos dou yenohob, kaba, dan deicara daimo augwan gini dag misen an yen toua. Anai danin dous eng dos Daud men gusin naugb dan dec misis dau Allah men goiharaga. Anai dan dedag mougt mera medam naugb ginohob. Dangga hang, sud hom areg dan dec misis dau enohob, kaba, sud hom gus ingma en emouf misis dougwo enero. Era sud hom areg dan douf misis dougwo enohob, kaba, sud hom gus ingma emec misis dau en touwero. Doba en eigtou dig medigo namcir.

⁸Dangga dan decinaga dau meijen geicara dag yen yemaideido dougwo dan mougwa hom touebma. Doba yen yos yadi dan indoho deseino lusud terimdohob. Dara areg dan darougb yen anohob, kaba, yen yemobsara dau gin touwero. Doba yen yes agadgeij naugb yen yeicara yaimo augwan gin esesa terimda toua. Dara dan decinaga dag meijen goubesa toua dag goujero. Doba yen youman dan indir gini deigeigouhwahabi, anai dan dec misis dau augwan dou yenohob naugb sug yen yesai Mer Geigouhw eisaugb dan dou lusud sungga toua terimda. Hang sud hom ingma dau gin, kaba, en emouf misis gin dougwo yen deitero, doba eb naugb yen namcir.

⁹Doba eisaugb leng leigdoumesa lenin meroho deseino yen dag len ledag leng Yahudi misen, kaba, dan dowun len meroho eb tainya yen namcir. Hanoba dan darougb len naugb len leic len merohorbrida ladedeij cinogo naugb len lecguna dou yen toua. Dauntoba len lecinaga dag dan indoc gororougb yen dag misenohob. Anai len, kaba, len lemedag leng Yahudi misenero. Doba len ledag Setan men goucimdeb dous.

¹⁰Sug yen yemobsara dau sug lusud leic gogom dou yen touwero. Doba yen yaiyan meigdocesem naugb yen yeraga ucina gini terimda, aimo dau areg dan darougb yen an ginohob, kaba, gogom areg Allah esa debin lusud se lona gouwedoc naugb en ainyen len, kaba, augwan gini emogod yen touwero. Doba dan demoiharaga yen dougwo augwan gin toues.

¹¹Dangga hang, areg yen yaimohob, kaba, yen yemobsara dau touwero. Doba yen yes agadgeij namcir. Dauntoba lusud lemaugwohosa yen dau areg dan desedeb naugb yenohob gin touwero. Doba eb naugb yen beb huhugb terimda. Anai lona naugb sug dan decicugb aud yen, kaba, ebeij deinyorohob.

¹²Gareg dau yen en emobsara dau ucina mog erij ginero. Doba en aiyan medocesem naugb en aimo gin terimda, kaba, dan deigdoumesa en moho dag buc gototo se dan Indina men tuari gecabeci se bogo. Dara en emerses dau mohw ingga touwero. Doba en eb sungga beb huhugb namcir. Hanoba dan dog dan Indina aman amoho, dara Yerusalem menau moho gedig dan Indina esa dau bogo se cinogo gini se en toua.

¹³Gareg dau yen en moms ai, kaba, en oc moms naugb Mena Gogoufu en mer an areg en en dou goucimdeb augwan gin dareg geigouhw namcir.

¹⁴Sug en ens dau areg dan dog dou leng se cinogo Piladelpia augwan dauwohob, kaba, en arougb dan deit, endagai: Dou gembala gesedougwo cinogo Laodikia, kaba, ban bog dag gini, bendagai: Surad gini dau dan gedig dan indoho dag Amin. Anai Allah esa dan aud yen, dauntoba yen yecinaga dag areg en os dou yenohob, kaba, hom ediyebeiya dau yen touwero. Doba eb naugb yen dag misen namcir. Dara surad gini dau dan gedig dan desai Allah en moro dou yen toua. Dara areg dan douma debin dara dan dos dadi dou yen gin, kaba, dan demereiyara mougwa hom dou yen touwero. Doba dan denara se geica mogud dou yen dous. Hanoba dan demarges dau gin touwero. Doba dan deicara daimo augwan gini dara dan indoc hom an yen toua. Dara surad gini dau dan gedig dan dahasesei dara desinsin augwan touohob. Anai areg Allah en esedeb naugb en ahasesei dara en esinsin ginohob, kaba, augwan acgunog ogdoc dan dous.

¹⁵Dangga dan decinaga dau meijen geicara augwanohob. Doba yen meigdoc ememtereta dau dan. Dara yen meigdoc emesrougb icira dan touwero. Doba yen meigdoc mes edag duhu gemta dara gesrougb larbem dousaba. Dan demouwan danggero. Doba dan douwan naugb meijen geicara dag duhu gemta, kaba, gemta namcir. Era gesrougb, kaba, gesrougb namcir toua.

¹⁶Dangga sug meijen geicara emedag duhu gemta, era gesrougb mogudero, doba yen yedag duhu gemta dara gesrougb larbem dous, kaba, dan dersa an meijen geicara augwan. Hanoba dan dotogoto yen dau dan toua namcir.

¹⁷Anai yen yeigdoumesa yenin meijoho deseino lusud dag yen meijisoho mougb namcirohob, hang len gus lemousa yen touwero. Anai meijen aremougb augwan edeinyum naugb sug yen yeigtou touohob. Dobnaro. Yen yedag lusud moc moho gedig lusud merdoc eineg an len. Anai se yen meigdoc mes, kaba, yen yedag sud hom monggwereij, dara meihw agaga, dara mairesmougb dous. Doba yen yemecinaga gin touwero. Anai yen youdesa dag areg geb naugb yen, kaba, augwan eigouhw namcirohob.

¹⁸Dangga hang, dan desulou yen naugb yen yacgeij emas gecabeci mogud dau dan. Dauntoba yen meijunggwereij deitero. Doba yeni meijisoho mougb se yen meigdoc mes toua terimda. Dara dan den dou yen naugb yen yacgeij sansun gogoufu dau dan. Dauntoba sug yen yeg dougwo yenohob, kaba, igdebes emeba yen touwero. Doba yen yeic meijus namcir. Dara yen yacgeij ariawen dau dan toua. Dauntoba sug yen yehin se yen meijiresohob, kaba, yen meijiresmougb dag nosa deitero. Doba yen meijires esga naugb yen yeiya lo asesa ucugb deit.

¹⁹Areg dan desulou yen an graga, kaba, men meijouhw dag dan indoc emesrougb an yen namcirbuma. Doba ansins dag dan indoc gororougb yenaba. Anai gareg dan indoc gororougb en, kaba, dan demamsoho en touwero. Doba dan den dougwo en an men geicara gecgu. Hanoba dan desa gogom debin en toua. Dauntoba en emaimo men geicara gecgu gin deitero, doba arges dau namcir. Dangga hang, yen yemeic meijus dougwo areg dan desulou yen an ginlo. Doba yen yeic meijuwemougb esesa terimda naugb yen yesga meijen sesar augwan asesa dou danahabi, yen yemaimo areg dan desulou yen an gin dag misen toua.

²⁰Anai dan desa deinyor meijen misis naugb dan douma touohob. Dangga gareg dau yen en ouman dan indir, hanoba en ec misis dau dan, kaba, dan deinesa aud en naugb aman amatara hom toua. Yen youman dan indir an areg dan desulou yen an gin deigeigouhw namcir.

²¹Gareg dau yen en emaimo areg gecgu ginero, doba en ebehnehino enin medoc mes dougwo, kaba, dan demotogoto en touwero. Doba dan deigdoumesa en moho naugb en eigtou desij dan se indan maija moc hom namcir. Aninim dag dan deigtou desij dan Indina se men maija moc homohob. Anai dan demaimo areg gecgu mougwa hom sug nosa touwero. Doba dan debehnehino danin indoc mes dougwo augwan gini touohob.

²²Dangga gareg en moms ai, kaba, en oc moms naugb Mena Gogoufu en mer an areg en en dou goucimdeb augwan gin dareg geigouhw namcir.