Read Manikion WAHYU 4 Bible Online

WAHYU 4 - Manikion bible

WAHYU 4

¹Sug dan dog areg graga augwan dauwohob, kaba, dan deiya deit, doba yen youman deigeigouhw, anai len lec misis hom se bogohob. Hanoba dan douman sud hom genara dou dan sug acgunog graga en mer dag higbei mougb naugb en eija dan deit, endagai: Ban beisaugb aud dan se bogo gini. Dauntoba dan dens dau aremer areg Allah en esedeb naugb lona daiyamo gacin augwan dou banahabi.

²Sug en eija dan dag gin inegohob, kaba, Mena Gogoufu ogod dan dag domom ucugb deit. Hanoba dan deiya, doba len lob maija moc hom se bogo. Dara sud hom eigtou se maija moc ingga toua.

³En mebes esesilo aninim dag igdahab gaugweda mera eisaugb, moho baiduri pandan. Dara igdahab gahani mera eisaugb, moho delima. Dara sidgodgo hom gesisilo, aninim dag igdahab gaugweda mera eisaugb, moho samrud, erbacec men maija moc gin toua.

⁴Dara maija moc sud hom hogu edeisu leb acec sud hom graga men maija moc. Dara mougtir merug sud hom hogu edeisu, len leigtou se maija moc augwan ingga toua. Len gin, kaba, len leg sansun gogouf cucugb. Dara len leg topi dau emas, aninim dag mougt mera medam meren topi toua.

⁵Dara dan deiya se maija moc hom graga, doba bagar mouf ehinya. Dara dan douman bagar mougb oucuc anim dau maija moc. Dara dan deiya, doba smougb mouf senggai lesa deseino sud hom graga men maija moc gini toua. Mouf senggai gin, kaba, dag Allah men merna senggai.

⁶Dara dan deiya dum mohu, doba edag sogo mehir eb ino men maija moc ingga, aninim dag cireg gogoufu namcir. Dara acec sud hom men maija moc gin, kaba, dan deiya ara hogu merireseb, gedig len meriresi amgema ehihim se len meraga dig merdoc dara dig meridigo augwan, len lesa toua.

⁷Hom dau ara hogu graga, kaba, en mebes aninim dag mihibei mog mog medam hom, en moho singa. Hom deit, kaba, en mebes aninim dag sapi mena. Dara hom, kaba, en mebes dag lusud misen. Dara hom deit, kaba, en mebes aninim dag bemihi medam sug en ohw toua.

⁸Dara astesda dau ara hogu merireseb gin, kaba, mebera senggem edagaser namcir. Dara en maga dig medoc, dara medigo, dara mebera meniha, kaba, meriresi amgema ehihim se augwan gin toua. Dara len lemarges dau sug len lohwaresgwemer laineg en touwero. Doba astesda lona loba, kaba, len lagahugouhw an sud hom geigtou se maija moc gin terimda. Hanoba len lenara dou en, lendagai: Adehsud Allah Gedig Ban Abubisamougb namcir, kaba, sesar hom emeb se banero. Doba ban becabeci beb huhugb terimda. Anai ban beis huhugb dau sugragohob. Hanoba ban bemediyebeiya dau lusud touwero. Doba cum, kaba, ban bemen aud len toues.

⁹Dara mougtir merug sud hom hogu edeisu graga, kaba, len lemarges dau sug len lesijaresa sud hom geis huhugb sugraga geigtou se maija moc ingga touwero. Doba astesda sug ara hogu merireseb len lesijaresa en, dara len leigdoumesa en moho, dara len len sijo dou en, kaba, len leijeboho lamuhumlo deseino sud hom geigtou se maija moc gin toua. Hanoba len lohwaresgwemer lagahugouhw an en, lendagai: Banin eng dous edeinyum naugb sug emen emagahugouhw an ban Anai ban bedag emen Adehsud dara emen Allah touohob. Hang emen emeigdoumesa ban aboho dag ban abubisamougb namcir toua. Anai cinogo dara bogo an areg geb se gini, kaba, ban bahasesei dara ban besinsin augwan. Dara ban beic maireseb dou augwan gin toua, aimo dau areg banin bogod an gin sug nosohob. Dangga sug len lagahugouhw an sud hom geigtou se maija moc dag gini, kaba, len lesera topi dau emas, aninim dag mougt mera medam meren topi, dau len merugt. Hanoba len lob deb deseino en se maija moc ucucugb(...)