Read Manikion WAHYU 5 Bible Online

WAHYU 5 - Manikion bible

WAHYU 5

¹Sug dan douman areg graga augwan dauwohob, kaba, dan deiya, doba sud hom geigtou se maija moc en ou mesira misen an surad meh goud hom deit. Surad gin, kaba, len log meb dig medoc dara medigo. Hanoba len leic sidgod ladra debin mougwa senggai icira toua.

²Dangga dan deiya, doba malaikad hom gedig en moho agas medam, kaba, en esa beiyaga dara mer medam dou leng se bogo, dara cinogo, dara leng se cinogo mei, len laugwan toua. Hanoba en eijidougwo len, endagai: Gareg dau yen en mog eng edeinyum naugb sug en emeila sidgod dau surad gini naugb en emeha?

³Doba se bogo, dara cinogo, dara cinogo mei gin, kaba, sud hom ingma en moho agas emedeinyum naugb en emeh surad, dara en emecic areg len log se gin touwero.

⁴Dangga sug dan deiya, doba len lemesma sud hom ingma en moho agas edeinyum naugb sug en eh surad dara en ecic areg len log se gin touwero, kaba, dan deb medam an gin namcir.

⁵Doba sud hom dau mougtir merug sud hom hogu edeisu graga, kaba, en oho mer debin dan. Hanoba en enara dou dan, endagai: Ban bemeblo. Anai ban beiya, doba meijouhuda Yehuda meren mihibei mena hom, kaba, en aiyan augwan eb tainya enohob. Hang en moho agas emedeinyum naugb sug en eila sidgod senggai dau surad meh gini. Dara en eh toua, anai eni Daud medebeito mohora hom gedig en eigdoc maman dau sesar men gogom augwan namcir.

⁶Sug en oho mer debin dan dag ginohob, kaba, dan deiya deit, doba sud hom, gedig en mocbobaga dag Domba, kaba, en esa deseino maija moc ingga. Dara ara hogu merireseb, dara mougtir merug sud hom hogu edeisu graga, len laugwan leigtou acec en toua. En momboung mog senggai. Dara en maires toua senggai. Gin, kaba, Allah men merna senggai, gedig en esa len aud cinogo gus gus, naugb len leiya augwan asesa toua. Dara dan deiya, doba len logug Domba gini bomom sug nosohob. Doba en eigouhw ucugwohob.

⁷Dangga, kaba, en eihwedaud sud hom geigtou se maija moc ingga. Hanoba en eic surad meh goud graga dau en mesira misen toua.

⁸Gin dauwohob, kaba, ara hogu merireseb, dara mougtir merug sud hom hogu edeisu graga, kaba, len laugwan leijeboho lamuhumlo deseino Domba gini. Astesda dau len, kaba, en os isadum. Dara mohoi aibibra dau emas atij an areg men ouwadebeda icira en mesira toua. Men ouwadebeda gini, kaba, ansins dag Allah men lusud meren gocuncum.

⁹Sug len leijeboho lamuhumlo deseino Domba dag ginohob, kaba, len lohwaresgwemer lagahugouhw an en. Dara areg len lohu gini, kaba, sud hom ingma en emohu touebma, doba dag menenau namcir. Hanoba len lohu dou en, lendagai: Banin eng ban aboho agas edeinyum namcir naugb sug ban beic surad hom gini. Hanoba ban bemeila sidgod dau toua. Anai ban beic ban abugwihi bancoho aga lusud dau astesda meijouhuda, dara leci, dara merusur, dara mougt mera medam meren hancob augwan dou Allah. Anai len logug ban bomom debin ginohob.

¹⁰Dauwohob, kaba, ban beigdoumesa len meroho dag gembala naugb len leic ara ara dag lauwaharo dou Allah. Dara ban besedeb len naugb len ledag lusud se cinogo gini meren mougt mera medam se lona sug ban becicugwen gin toua.

¹¹Sug dan douman gin dauwohob, kaba, dan deiya deit, doba malaikad ribu einyana gougwa gedig emedeinyum naugb sug lusud lecicero, kaba, len lesa acec maija moc, dara ara hogu merireseb, dara mougtir laugwan gin toua. Hanoba dan douman.

¹²Doba len laugwan lagahugouhw an Domba dara merir medam toua, lendagai: Ban aboho agas edeinyum naugb sug emen emagahugouhw an ban. Anai ban aboho eb taiba, dara aiga augwan, dara ban absoho mougb namcir. Dara ban abu ouforoho naugb ban becinaga meijouhw augwan asesa. Dara ban abubisamougb naugb ban bahasesei dara ban besinsin augwan touohob. Dangga hang, emen emeigdoumesa ban aboho, dara emesijaresa ban, dara emen emen sijo dou ban toua terimda.

¹³Dauwohob, kaba, dan douman deit, doba leng se bogo, dara cinogo, dara cinogo mei, dara dum mohu an areg Allah esinsin se ginohob, kaba, len laugwan lagahugouhw an Allah dara Domba lan ucan gin toua, lendagai: Emen emagahugouhw an bang beigtou se maija moc gini dara Domba, yan yahwas namcir. Hanoba emen emeigdoumesa yan maijoho agas medam, dara emen emesijaresa yan beb huhugb terimda toua. Anai yan maijubisamougb naugb augwan toua namcirohob.

¹⁴Sug len laugwan lagahugouhw an Allah dara Domba dag ginohob, kaba, ara hogu merireseb graga len louma debin gin ucan toua deit, lendagai: Areg yen yohu gin, kaba, asesa dag misen namcir. Dauwohob, kaba, mougtir graga len toua leijeboho lamuhumlo naugb len lesijaresa lan toua deit.