Read Manikion WAHYU 8 Bible Online

WAHYU 8 - Manikion bible

WAHYU 8

¹Sug Domba eila sidgod gedig senggai dauwohob, kaba, dan deiya deit, doba Allah eic higbei senggai dou men malaikad merug senggai, gedig len lesa deseino men maija moc graga naugb len laimo en mer an namcir. Dangga sug leng se bogo leiya dag gin, kaba, len lemenara touwero. Doba len leigtou dag lodinabena anir itoterba toua.

³Dauwohob, kaba, malaikad hom gos dabei hom dau emas icira en mesira, kaba, en agunyen deit naugb en esa deseino Allah men boromei gouwaharesa. Sug en edebeij boromei ginohob, kaba, len leic areg mena ouwadebeda einyana dou en naugb en eic augwan gini, bahurim dara areg leng lomom graga len laugwan leiyagarij Allah an gragohob. Anai meren gomom gini dag gouwaharo toua. Sug en eic areg mena ouwadebeda dara leng lomom graga meren gocuncum, bahurim se men dabeiyohob, kaba, en etiniha gin augwan taiba Allah men boromei geb ino men maija moc ingga toua.

⁴Dangga smougb moro eisaugb an gin augwan dau malaikad geigtou deseino Allah en mesira aud Allah terimda.

⁵Sug en asaih smougb moro edinohob, kaba, en eic dabei naugb en asgun smougb mor dau boromei graga ucugb se dabei mes. Hanoba en os dabei an smougb mor ingga naugb en etiniha augwan gini se cinogo gin toua. Dangga dan douman, doba bagar mougb ebiji. Dara mer medam oucuc anim. Dara dan deiya bagar mouf ehinya. Dara inyomda medam eisa ucan gin toua.

⁶Sug malaikad graga en etiniha smougb mor se cinogo ginohob, kaba, malaikad merug senggai graga, len lesedeb naugb len lohw meren higbei senggai geb icira len merisira ingga toua.

⁷Dangga sug malaikad hom gaimougtut en ohw men higbeiyohob, kaba, los an mogo dara smougb gahurim dara mogwihi obsara dau bogo debin cinogo augwan. Hang hom dau ara homoi dau sogo dara arec mec an areg geb se cinogo gus gus, kaba, smougb ait augwan gini mor mor namcir.

⁸Sug malaikad gedig hwai en ohw men higbei ucan deit, kaba, malaikad gus len lerba smougb medam, aninim dag menmod gouji, se dum mohu. Dangga dum mohu augwan ekeba dau ara homoi eperwei dag mogwihi namcir.

⁹Dauwohob, kaba, areg geb se dum mohu, kaba, hom dau ara homoi len lomom. Dara ij, kaba, smougb ait hom dau ara homoi dau augwan mor mor namcir toua.

¹⁰Sug malaikad gedig homoi en ohw men higbeiyohob, kaba, tebeij medam hom gedig en mouf eririj dag smougb mouf en obsara dau bogaden se cinogo gin toua. Sug en obsara dau bogo se cinogo ginohob, kaba, en ekeba hom dau ara homoi dau astesda duhu mem dara duhu mer augwan namcir.

¹¹(Tebeij gin, kaba, en moho dag Gedougdaha.) Hang hom dau ara homoi dau duhu mem dara duhu mer eperwei dag gedougdaha toua. Dangga lusud leinyana sug len leg duhu gin, kaba, len laugwan gini lomom. Anai duhu eperwei dag gedougdaha namcirohob.

¹²Sug malaikad gedig hogu en ohw men higbei deitohob, kaba, len logod igda lona, dara igda loba, dara hom dau ara homoi dau tebeij augwan meren mouf nagama dau toua. Dangga hang, igda lona emerba mohora dau lonamen terimda edebeij loba toua deitero. Doba sug edebeij se losogohob, kaba, eic dag lobeigbogohob. Dara igda lona dara tebeij len lemerba meruf dag nosa toua deitero. Doba deinyor sug lona esga, kaba, len larges meruf doc sungga touohob.

¹³Dauwohob, kaba, dan deiya bemihi medam hom sug en ohw bainoc se bogo meniha. Hanoba dan douman, doba en eiyaga dara eiman dou lusud, endagai: Ayou, dan indoc erij an yeng yeigtou se cinogo yen yaugwan namcir. Anai malaikad merug homoi merugwengginaba. Sug len lohw meren higbei, kaba, gogom medam en baiyan yen yaugwan dangga.