Read Manikion WAHYU 9 Bible Online

WAHYU 9 - Manikion bible

WAHYU 9

¹Sug malaikad gedig sergem en ohw men higbei, kaba, dan deiya deit. Doba tebeij hom en og dau bogaden se cinogo gini. Sug en og se cinogo ginohob, kaba, len leic gusin dou en naugb en ec misis dau ijou mes toua.

²Sug en ec misis dau ijou mesohob, kaba, smougb moro medam agunya dau ijou mes ingga. Aninim dag smougb moro medam agunya dau smougb meiyo gouji hom toua. Dangga moro eisaugb baihiron dougwo igda lona dara bogo meniha augwan ebeigbogo namcir.

³Hanoba eic dag amo einyana gougwa len lagunya dau smougb moro ingga naugb leberera se cinogo gin toua. Dauwohob, kaba, malaikad gec misis dau len graga, kaba, en eic goubesa dou len naugb len lau lusud, aninim dag arou geb se cinogo gini sug len lau lusud toua.

⁴Sug en eic goubesa dou lenohob, kaba, en esulou len debin gin deit, endagai: Yen yemau areg geb se cinogo gini dag arec, dara aremec, dara sogo hom touwero. Doba yen yeiya dau lusud areg malaikad lemedi Allah men hugba se en mecdemagaro, kaba, yan yau len ingga dous.

⁵Hanoba yen yemeic gomom dou len touwero. Doba yen yeic mog erij medam dou len se igda sergemahabi. Dangga se lona ingga, kaba, lusud meru en dour naugb len lomom dedemeda dau ginda. Anai sug amo au len, kaba, erij medam, aninim dag sug arou au len toua. Hang len louwan lehilon ucina, dauntoba len lomom dau gin toua. Dobnaro. Anai gomom ougbdedau len namcirohob.

⁷Amo gin, kaba, len merucbobaga aninim dag kuda sug lusud lesedeb len naugb sug len lesara. Dangga hang, len lemeg sogo mesira an meh dau emas se len merugt. Dara len merbes, kaba, aninim dag lusud misen len merbes toua.

⁸Hanoba len merugt modi, kaba, agas medam, aninim dag ligida merugt modi. Dara len merugtimei eririj, aninim dag mihibei mog mog medam hom, moho singa, en mogta toua.

⁹Dara areg len leg dougwo len meruhumes men mocbobaga, kaba, aninim dag merila einyana dau kermum. Dara sug len lohw, kaba, len merubisamougb, aninim dag kuda merohora mougb sug len lohugouhw keropo an sadodor naugb sug lesara toua.

¹⁰Dara len mersera toua, meren goubesa inggebga naugb len leic mog erij medam dou lusud se igda sergem gini. Anai len mersera gin, kaba, aninim dag arou meismobo naugb sug len lau lusud toua.

¹¹Amo gin, kaba, meren mougt mera medam lusud leija en moho se lec Ibrani mer dag Abadon, era Sud Hom Geic Mor Mor Dou Lusud. Doba se lec Grika mer, kaba, len leija en dag Apolion. Anai en, kaba, en edag malaikad hom gesedougwo ijou mes graga an len toua.

¹²Gogom hom gin geino obsara dauwohob, kaba, yen youman deigeigouhw namcir. Anai gogom hwai ucan deit inggebgaba.

¹³Dangga sug malaikad gedig senggem en ohw men higbeiyohob, kaba, dan douman. Doba sud hom en mer agunya dau boromei dau emas men mobog hogu geb deseino Allah men maija moc ingga naugb en enara dou malaikad gedig senggem gos higbei ucan gin toua.

¹⁴Hanoba en arougb en, endagai: Ban beihweda se duhu Eprata mebera naugb ban bedesga aigdaga dau merna mog mog merug hogu gedig len lecba len deb se duhu mebera ingga toua.

¹⁵Dangga sug malaikad en esga aigdaga dau merna mog mog merug hogu ginohob, kaba, len leda naugb len logod lusud hom yom dau astesda homoi len laugwan lomom toua. Anai arisogomoc, dara igda, dara lona, dara cumougt naugb sug len logod lusud lomom dag gin, kaba, Allah esedeb augwan gini naugb len debohob.

¹⁶Dara men sadodor gedig len laimo merna mog mog merug hogu gin, kaba, len merug ribu einyana dag lebedero namcir. Anai dan douman, doba len laugwan ladedim dag ginohob.

¹⁷Dara dan deiya len laugwan leigtou se kuda meridgomori. Dara len leg sansun dau kermum toua. Ligbum, kaba, len leg sansun gahandidi dag smougb mouf. Lingma, kaba, len leg sansun gaugweda, aninim dag igdahab mera eisaugb, moho nilam. Dara ligbum deit, kaba, len leg sansun gohoseri dag igdahab gohoseri toua. Doba meren kuda, kaba, len merugt aninim dag mihibei mog mog medam hom, moho singa, en mougt. Hanoba smougb mougb, dara smougb moro, dara smougb moro dau igdahab gohoseri augwan agunya dau kuda merirs esesa terimda toua. Dan decinaga gini, anai Mena Gogoufu ogod dan domom. Hang dan demeiya kuda len merucbobaga dara areg leng leigtou se kuda meridgomori ingga, len leg augwan dag misen touohob.

¹⁸Dangga ogdoc smougb mouf, dara smougb moro, dara smougb mouf dau igdahab gohoseri gin, kaba, len logod lusud hom dau merug homoi len laugwan lomom ogdoc gin toua. Anai areg gagunya dau len merirs, kaba, men goubesa edeinyum naugb ginohob.

¹⁹Goubesa gin, kaba, emeb se len merirs dousero. Doba eb se len mersera toua naugb sug len leic mog erij medam dou lusud namcir. Anai se len mersera mob, kaba, edag hinogo einyana merugt mera esa iririm naugb sug len lau lusud touohob.

²⁰Doba lusud gedig len lemomom ogdoc gogom homoi ginero, kaba, len lemarges dau sug len lesijaresa merna mog mog. Hanoba len lemasid lenin dau sug len lecguna dou meren seiseij dau emas, dara perag, dara kermum gohoseri, dara igdahab, dara sogo augwan touwero. Doba len leic merus naugb len lecguna dou seiseij areg len lesinsin se len merisira gin terimda. Doba areg len lecguna dou gin, kaba, len meriresi emai naugb len lemeiya lo asesa. Dara len lemouman areg lusud lacgeij dau len. Dara len lemec merohora naugb sug len lousa len touwero. Doba len leb augwougb dous.

²¹Dara len lemahau dau sug len lohudara, dara les len gus. Dara len lagaresa lusud merdoc mes. Dara len merisira ebsa ligida aibibrida. Dara sug len leiyohora, dara lecincara, dara lesedi len gus meren aremougb touwero, doba len leic merus naugb len leicara laimo augwan gini smougb mougb terimda.