Read Mannan ലൂക്കോശ് 16 Bible Online

ലൂക്കോശ് 16 - Mannan bible

ലൂക്കോശ് 16

¹ഏശു ഉടയാ ശിശിയരുകാക്ക്, “ഒരു പണ്ണേൽ പണക്കാറനാനെ ഒരു മനിശനുക്ക് ഒരു കങ്കാണി ഇരുന്തെ; അവൻ ഉടയാ എശമാനനുക്കിരുന്തെ ഏത്തുകാടെ പൊങ്കു പൊടിയാക്കിനെ ഒൺ ചിലവേരാ അവനെ ചൊല്ലി കുത്തമെ ചൊല്ലിയെ.

²അതുനാലെ പണക്കാറൻ അം കങ്കാണിയെ വുളിച്ച്, ‘നിന്നചൊല്ലി ഏൻ കോക്കിനെ കേൾവി എന്ത്? നിൻ മേൽനോട്ടത്തിലെ എല്ലാ കണക്കാം തര്; നിനക്ക് ഇനി കങ്കാണിയാ ഇരുപ്പേക്ക് മുടിയാത്ത്’ ഒൺ ചൊല്ലിയെ.

³അത്തുക്ക് കങ്കാണി ഉടയാളെ നിനച്ചത്, ‘ഏൻ ഇനി എന്തെ ചെയ്യിളെ? ഏമാൻ എന്നെ എൻ കങ്കാണി വേലേൽ നുൺ മാത്തുകേക്ക് പോനെ; കിളയ്‌പ്പേക്ക് എനക്ക് തുറമില്ലെ; ഇരക്കുവേക്ക് എനക്ക് വെക്കമായും ഇരുക്കിനെ.

⁴എന്നെ എശമാനൻ കങ്കാണി വേലേൽ നുൺ പുറിച്ച് വുടുക്കിനവോളെ വോറെ ഒള്ളെ ഇണങ്കര് എന്നെ ഉടവുറെ കൂരേൽ ഏത്തെടുപ്പേക്കുചൂട്ടി എന്തെ ചെയ്യിളതൊൺ എനക്ക് തിക്കിലൊള്ളെ’.

⁵പിന്നെ അം കങ്കാണി ഉടയാ ഏമാൻകാൽ നുൺ കടനെ വായ്‌ങ്കവേരാളെ ബൂറാ വുളിച്ച് മുതെ വന്താകാൽ, ‘നീ ഏമാൻകാൽ നുൺ എത്തിനെ കടനെ വായ്‌ങ്കിരുക്കിനെ’ ഒൺ കേട്ടെ.

⁶അത്തുക്ക് അവൻ ‘നൂറ് കുടം ഒലിവെണ്ണെ’[18] ഒൺ ചൊല്ലിയെ. കങ്കാണി അവൻകാക്ക്, ‘നീ കണക്ക് എളുതിനെ കായിതമെ വേമായേ വായ്‌ങ്കി ഇരുന്ത് അമ്പതു ഒൺ എളുത്’ ഒൺ ചൊല്ലിയെ.

⁷അതോഞ്ച് കങ്കാണി വോറൊരാകാൽ, ‘നീ എത്തിനെ കടനെ വായ്‌ങ്കിയിരുക്കിനെ’ ഒൺ കേട്ടെ. അത്തുക്ക് അവൻ ‘നൂറ് പടി കോതമ്മെ’ ഒൺ ചൊല്ലിയെ; കങ്കാണി അവൻകാക്ക് ‘നീ കണക്ക് എളുതിനെ കായിതമെ വായ്‌ങ്കെടുത്ത് എമ്പത് ഒൺ എളുത്’ ഒൺ ചൊല്ലിയെ.

⁸ഇം അനീതിയൊള്ളെ കങ്കാണി പുത്തി പോതത്തോടെ ചെയ്യനാലെ എശമാനൻ അവനെ പെരുമപ്പടുത്തിയെ; എന്തൊണ്ണാ ഇം ഉലകത്തിലെ ആളുകെ തെയ്‌വ രാച്ചത്തുക്കൊള്ളെ ആളുകളക്കാട്ടി അറിവോടെ ഉടവനുടവൻ കാരിയങ്കാടെ ചെയ്യിനെ.

⁹ഇം ഉലകത്തിലെ ചൊത്ത് ചുമുത്തിരത്തിൽ വോറൊള്ളവനുക്ക് ഉതവിയെ ചെയ് ഇണങ്കരെ ചമ്പാരിച്ചോൻ. അകനയൊണ്ണാ അത് നാതയാനവോളെ നിങ്കളെ എണ്ണേക്കുമൊള്ളെ കൂരേൽ ചേത്തോകേക്ക് ഇടയാകും.

¹⁰ചുറിയെ കാരിയങ്കാട്ടിൽ നേരുമയാനവൻ വൻ കാരിയങ്കാട്ടിലും നേരുമയൊള്ളാ താൻ; ചുറിയെ കാരിയങ്കാട്ടിൽ നീതി കെട്ടാ വൻ കാരിയങ്കാട്ടിലും നീതി കെട്ടാതാൻ.

¹¹അതുനാലെ ഇവ്വുലകത്തിലെ ചൊത്തിൽ നിങ്കെ നമ്പിക്കെ നാത്തവേരായായാ തെയ്‌വത്തിലെ കാരിയങ്കാടെ ആര് നിങ്കാക്ക് ഏത്തു തരും.

¹²അതുവോലെ അന്നിയവനുക്ക് ഒള്ളത്തിൽ നമ്പിക്കെ നാത്തവനായാ നിങ്കാക്ക് ചൊന്തക്കമാനതെ ആര് തരുവിളെ?

¹³ഇരണ്ട് എശമാനൻകാട്ടുക്ക് ഏവലെ എടുപ്പേക്ക് ഒരു പണ്ണക്കാറനുക്കും മുടിയാത്ത്; ഒരാളെ വൊറുത്ത് ഇനിയൊരാകാൽ ആത്തിരമാ ഇരുക്കും; അല്ലേയ്‌ക്കൊണ്ണാ ഒരാകാൽ ചേന്ത് ഇനിയൊരാളെ പുറിച്ച് തള്ളുകേം ചെയ്യും. ഒരേ നേരം തെയ്‌വത്തുക്ക് ഏവലെ എടുപ്പേക്കും പണത്തുകാക്ക് ആത്തിരമായ് ഇരുപ്പേക്കും നിങ്കാക്ക് മുടിയാത്ത്.”

¹⁴ഏശു ചൊല്ലിയതെ കേട്ടാലെ പണത്തുക്ക് ചാനവേരായാനെ ചിലെ പരീശരുകാട് അവനെ ഒടിയോറെ ചൊല്ലിയെ.

¹⁵അവൻ അവറകാക്ക്, “നിങ്കെ നിങ്കളമേ മനിശനുക്ക് മില്ലോട് നീതിയൊള്ളവേരാ ഒൺ കാട്ടിനെ; ഒണ്ണാ തെയ്‌വത്തുക്ക് നിങ്കെ ഇതയങ്കാടെ തിക്കിനൊള്ളെ; മനിശനുക്ക് മില്ലോട് പെരുമപ്പടിനത് തെയ്‌വത്തുക്ക് മില്ലോട് ഒണ്ണും നാത്തതാകും.

¹⁶രാട്ടിപിരാട്ടുകാറൻ ഓകന്നാൻ വരിനത് വരേക്ക് നായപുറമാണമും പലകപ്പാട്ടുക്കാറാളും നിങ്കാക്ക് വശികാട്ടികയായ് ഇരുന്തെ; ഒണ്ണാ ഓകന്നാൻ വന്തകാലമിരുന്ത് തെയ്‌വരാച്ചമെ ചൊല്ലിയൊള്ളെ നല്ലെ ചേതിയെ വുളിച്ച് ചൊൽവെ തുടങ്കുകേം എല്ലാരും എകനേം അത്തിൽ കടപ്പേക്ക് നോയ്‌ക്കികിട്ടും ഇരുക്കിനെ.

¹⁷ഒണ്ണാ മോശേലെ നായപുറമാണത്തിലെ അച്ചരത്തിലെ ഒരു വള്ളിയൊണ്ണാലും പുള്ളി ഒണ്ണാലും നാതയാനതക്കാട്ടി വാനമും പൂമീം മാഞ്ച് പോനത് എളുപ്പം.

¹⁸ആരൊണ്ണാലും ഉടയാ പെണ്ണെ വുട്ടാലെ വോറൊരു പെൺ പുള്ളയെ കൂട്ടിയാ അവൻ എടാൺ എടുപെൺ കിടന്തു നടക്കിനെ; ആരൊണ്ണാലും ആൺ വുട്ടുപോയെ പെൺ പുള്ളയെ കൂട്ടിയാ അവനുമേ എടാൺ എടുപെൺ കിടന്തു നടക്കിനെ.”

¹⁹പണക്കാറനാനെ ഒരു മനിശൻ ഇരുന്തെ; അവൻ എപ്പണും ചരിയാനെ വിലയൊള്ളെ നയമാനെ തുണിയെ ഇട്ട് നന്തി പിശയ്‌ക്കുമെ.

²⁰ലാശര് ഒൺ പേരൊള്ളെ ഉടമ്പൊത്തേ പുൺ പുടിച്ച് അപ്പുറാണിയാനെ ഒരു മനിശൻ അം പണക്കാറൻ കൂരെ വാതലുകാൽ കിടക്കുമെ.

²¹അവൻ പണക്കാറൻ തീനെ തിന്നെ മേശേൽ നുൺ അടീക്ക് ബൂശിനെ എച്ചിൽ തീനെ തുൺ പഞ്ചമെ അടക്കുവെ ആശിച്ചെ; നായ്‌കാട് വന്ത് അവൻ പുണ്ണെ നക്കുകേം ചെയ്‌മെ.

²²അം അപ്പുറാണിയാനെ മനിശൻ ചത്തവോളെ തെയ്‌വ തൂതരുകാട് വന്ത് അവനെ അബുറാകാമിലെ കൊടുക്കുക്ക് കൊണ്ടേയെ. അം പണക്കാറനാനെ മനിശനുമേ ചത്ത് ചാവെ മടേൽ പൂക്കുകേം ചെയ്യെ.

²³അവൻ പാതാളത്തിൽ കിടന്ത് കറുമമടഞ്ച് മീത്തുക്ക് നോയ്‌ക്കവോളെ തുലേൽ അബുറാകാം കൊടുക്കിൽ കിടക്കിനെ ലാശരെ കണ്ടെ.

²⁴“അബുറാകാം തകപ്പനേ, എൻകാൽ കനിവെ കാട്ട്; ഉടയാ വിരളിലെ അത്തമെ തണ്ണീൽ മുയ്‌ക്കി എൻ നാക്കാറുകേക്ക് ലാശരെ എൻകാക്ക് കടത്തി വുടുക്കോണുമേ; എന്തൊണ്ണാ ഏൻ ഇങ്ക് തീയിൽ കിടന്ത് കറുമമടേനെ” ഒൺ അവൻ വലിയതാ വുളിച്ച് കോന്തെ.

²⁵അത്തുക്ക് അബുറാകാം, “മകനേ, നീ ഉശിരോടിരുന്തെ കാലത്തിൽ നിനക്ക് നൽമേം അതുവോലെ ലാശരുക്ക് തിൻമേം കിടച്ചെ ഒൺ നീ നിനച്ചോകോണും; ഒണ്ണാ ഇപ്പെ അവൻ ഇങ്ക് നിമതി അടേനെ; നീയോ അങ്ക് കറുമമടേനെ.

²⁶അതുമട്ടുമില്ലെ എങ്കാക്കും നിങ്കാക്കും നടുവെ ചരിയാനെ ഒരു വിടവ് ഒണ്ട്. അതെ കടന്ത് ഇങ്ക് നുൺ നിങ്കകാക്ക് വരുകേക്കും അങ്ക് നുൺ എങ്കകാക്ക് വരുകേക്കും മുടിയാത്ത്” ഒൺ ചൊല്ലിയെ.

²⁷അത്തുക്ക് പണക്കാറനാനെ മനിശൻ, “അബുറാകാം തകപ്പനേ, അവനെ എൻ തന്താര് കൂരേക്ക് ചൊല്ലി കടത്തി വുടുക്കോണുമേ;

²⁸എന്തൊണ്ണാ എനക്ക് അഞ്ച് തമ്പിയേര് ഇരുക്കിനെ; അവറളും ഇം കറുമമടേനെ ഇടത്തിൽ വന്ത് എമ്പട്ടോകാതിരുപ്പേക്ക് അവൻ അവറാത്തുക്ക് മുന്നമേ താക്കലെ കൊടുക്കട്ടെ ഒൺ ഏൻ നിൻകാൽ ഇരക്കിനെ” ഒൺ ചൊല്ലിയെ.

²⁹ഒണ്ണാ അബുറാകാം അവൻകാക്ക്, “അവറാത്തുക്ക് മോശേം പലകപ്പാട്ടുക്കാറാളും ഒള്ളെ; അവറെ ചൊന്നെ പേച്ചെ അവറെ കോക്കട്ടെ” ഒൺ ചൊല്ലിയെ.

³⁰അത്തുക്ക് പണക്കാറൻ, “തകപ്പനേ, അകനയില്ലെ ചത്തവേരാ കൂട്ടത്തിൽ നുൺ ഒരാ ഉശിരോറി എന്തി പോയ് ചൊല്ലിയതൊണ്ണാ അവറെ കോക്കും” ഒൺ അബുറാകാമുകാക്ക് ചൊല്ലിയെ.

³¹ഒണ്ണാ അബുറാകാം അവൻകാക്ക്, “മോശേം പലകപ്പാട്ടുക്കാറാളും ചൊന്നതെ അവറെ നമ്പാതെ ഇരുന്താ ചത്തവേരാ കൂട്ടത്തിൽ നുൺ ഒരാ ഉശിരോറി പോയ് ചൊല്ലിയാലും അവറെ നമ്പാത്ത്” ഒൺ ചൊല്ലിയെ.