Read Mannan ലൂക്കോശ് 18 Bible Online

ലൂക്കോശ് 18 - Mannan bible

ലൂക്കോശ് 18

¹പിന്നെ ഏശു അവറകാൽ മടുക്കാതെ എപ്പണും വായാതോണും ഒണ്ണത്തുക്ക് ഒരു കതെ പേരേത്തി ചൊല്ലിയത്,

²“ഒരു പട്ടണത്തിൽ തെയ്‌വമെ പേടി നാത്തതും മനിശനെ കെവുനിയാത്തവനുമാനെ ഒരു നായാതിപൻ ഇരുന്തെ.

³അം പട്ടണത്തിൽ ഒരു തൂക്കാലിച്ചീം ഇരുന്തെ. അവെ എപ്പണും അവൻകാൽ പോയ്, ‘എൻകാൽ വുറോതമാ ഇരുക്കിനവേരാളും മത്തുമൊള്ളെ എൻ പരാതീക്ക് തീര്‌പ്പിട്ട് തരോണുമെ’ ഒൺ ചൊല്ലികിട്ടേ ഇരുന്തെ.

⁴ബൊകുനാളേക്ക് അമ്പാളുക്ക് അപ്പിൺ പരാതീക്ക് തീര്‌പ്പിടുവെ മനശ് നാതിരുന്തെ; പിന്നെ കൊഞ്ചനായോഞ്ച് അവൻ ഉടയാളമേ ചൊല്ലിയത്, ‘ഏൻ തെയ്‌വത്തുകാൽ പേടിനാതേം മനിശനെ കെവുനിയാതേം ഇരുന്താ,

⁵ഇം തൂക്കാലിച്ചിയാനെ പെൺ പുള്ളെ എന്നെ തൊന്തരവെ ചെയ്യിനനാലെ ഏൻ അപ്പിൺ പരാതീക്ക് തീര്‌പ്പിടും; അകനെ ചെയ്യതൊണ്ണാ തൊപ്പനേക്കും വന്ത് അവെ എന്നെ തൊന്തരവെ ചെയ്യാത്തെ.’”

⁶പിന്നേം കരുത്താവ് ചൊല്ലിയത്, “അനീതിയൊള്ളെ നായാതിപൻ ചൊന്നതെ കോളിൻ.

⁷അകനയൊണ്ണാ റാവും പകലും ഉടയാളമേ നോയ്‌ക്കി വലിയെ വായിൽ കതറി കോന്ത് വുളിക്കിനെ തൻ ആളുകേക്ക് തെയ്‌വം നീതി നായമെ നടത്തി കൊടുക്കും. പുടീയൊണ്ണേ അവറാത്തുക്ക് ഉതവിയെ ചെയ്യുകേം ചെയ്യും.

⁸ഏൻ നിങ്കകാൽ ചൊന്നത് അവൻ പുടീയൊൺ അവറാത്തുക്ക് നായമെ നടത്തി കൊടുക്കും. ഒണ്ണാ മനിശൻ മകനാനെ ഏൻ പൂമീക്ക് വരിനവോളെ എൻകാൽ നമ്പിക്കയോടെ ഇരുക്കിനവേരാളെ കാണുമീ?” ഒൺ ഏശു കേട്ടെ.

⁹തങ്കെ നീതിയാനവേരായൊൺ ഉടവുറളെ ചൊല്ലി വോറെ വേരാളെ മാനിയാതെ നടക്കിനെ ചിലവേരാകാൽ ഏശു ഒരു കതേ പേരേത്തി ചൊല്ലിയത്.

¹⁰“ഒരുനാ തെയ്‌വ ആലയത്തിൽ വായാതുവേക്ക് ഇരണ്ടാ പോയെ. അവറളിൽ ഒരാ പരീശനും ഒരാ കരമെ പിരിക്കാനാളും താൻ.

¹¹പരീശൻ നുൺ ഉടയാളമേ ഇകനെ ചൊല്ലി വായാതിയെ, ‘തെയ്‌വമേ, ഏൻ വോറൊള്ളാളുകവോലെ കളുക്കനോ നീതി കെട്ടവനോ എടാൺ എടുപെൺ കിടന്തു നടക്കിനാളോ ഇം കരമെ പിരിക്കിനാവോലയോ അല്ലാത്തനാലെ നിനക്ക് നണ്ണി.

¹²ഒരു വാരത്തിൽ ഇരണ്ടു വട്ടം ഏൻ നോയ്‌മ്പെ എടുക്കിനെ; എനക്ക് കിടയ്‌ക്കിനത്തിലെല്ലാം പത്തിലൊരു പങ്കെ പതമായ് തെയ്‌വത്തുക്ക് കൊടുക്കിനെ’.

¹³ഒണ്ണാ കരമെ പിരിക്കിനാളോ തുലേൽ നുൺ മേലോകത്തുക്ക് നോക്കുകേക്ക് കൂടി തുനിയാതെ ചങ്കുക്കടിച്ച്, ‘തെയ്‌വമേ, ഇം പാപിയാനെ എൻകാൽ കനിവെ കാട്ടോണുമെ’ ഒൺ ചൊല്ലിയെ.

¹⁴ഏൻ നിങ്കകാക്ക് ചൊന്നത്, ഇം മനിശൻ നീതി കിടച്ചാളായ് കൂരേക്ക് പോയെ; ഒണ്ണാ പരീശനുക്കോ നീതി കിടച്ചതില്ലെ. എന്തൊണ്ണാ ഉടവൻ ഉടവനമേ വലിയവൻ ഒൺ നിനയ്‌ക്കിനവനെല്ലാം മാനം കെട്ടോകും; ഉടയാളമേ ചുറിയാ ഒൺ നിനയ്‌ക്കിനവൻ വലിയവനും ആകും.”

¹⁵അവൻ കയ്യെ വച്ച് വായാതുകേക്കുചൂട്ടി ചിലയാളുകെ ഉടവുറെ കുഞ്ചിക്കാടെ ഏശുവുകാക്ക് കുടത്തെ; ഒണ്ണാ ശിശിയരുകാട് ഇതെ കണ്ടാലെ അവറളെ വിലയ്‌ക്കെ.

¹⁶ഒണ്ണാ ഏശു കുഞ്ചിക്കാടെ കിട്ടേക്ക് വുളിച്ചാലെ ശിശിയരുകാക്ക് ചൊല്ലിയത്, “കുഞ്ചിക്കാടെ എൻകാക്ക് വരുകേക്ക് വുടിൻ; അവറളെ വിലക്കുവാനില്ലെ; തെയ്‌വ രാച്ചം ഇകത്തവേരാക്ക് ഒള്ളതാൻ.

¹⁷തെയ്‌വ രാച്ചമെ കുഞ്ചിക്കാടുവോലെ ഏത്തെടാത്തവൻ ഒരുനാളും അത്തിൽ കടകാത്ത്” ഒൺ ഏൻ ചത്തിയമാ നിങ്കകാക്ക് ചൊന്നെ.

¹⁸ഒരുനാ എകൂതാ ചാതീലെ ഒരു തലവൻ ഏശുവുകാക്ക്, “നല്ലവനാനെ എശമാനനേ, എണ്ണെണ്ണേക്കുമൊള്ളെ ഉശിരു കിടപ്പെ ഏൻ എന്തെ ചെയ്യിളനേ” ഒൺ കേട്ടെ.

¹⁹അത്തുക്ക് ഏശു അവൻകാൽ, “നീ എന്തുക്ക് എന്നെ നല്ലവൻ ഒൺ വുളിക്കിനെ?” ഒൺ കേട്ടെ. “തെയ്‌വം ഒരാമട്ടും താൻ നല്ലവൻ; വോറെ ആരും നാത്തെ” ഒൺ ചൊല്ലിയെ.

²⁰“നിനക്ക് കൽപ്പനകാടെ തിക്കിനൊള്ളതാനെ? എടാൺ എടുപെൺ കിടന്തു നടപ്പാനില്ലെ; കുലേ ചെയ്‌വാനില്ലെ; കളവെ ചെയ്‌വാനില്ലെ; കള്ളെ ശാച്ചിയമെ ചൊൽവാനില്ലെ; നിൻ തായ് തന്തേരുക്ക് ബൊകുമാനമെ കൊടുക്കോണും ഒണ്ണും താനെ?” ഒൺ ഏശു കേട്ടെ.

²¹“ഇതുകാടയെല്ലാം ഏൻ കുഞ്ചീൽ പുടിച്ചേ ചെയ് വരിനെതാൻ” ഒൺ അവൻ വതിലെ ചൊല്ലിയെ.

²²ഇതകേട്ടാലെ ഏശു അവൻകാക്ക്, “നിനക്ക് ഒരു കുറയിരുക്കിനെ; നിൻ ചൊത്ത് ചുമുത്തിരമെ മൊത്തമാ വിത്ത് കറുമമടേനവേരാക്ക് കൊടിൻ; അപ്പെ മേലോകെ രാച്ചത്തിൽ നിനക്ക് ചമ്പാത്തം ഒണ്ടാകും; അതോഞ്ച് നീ എനക്ക് പുറകോടേ വര്” ഒൺ ചൊല്ലിയെ.

²³അവനുക്ക് കനേം ചൊത്ത് ചുമുത്തിരമെ ഇരുന്തനാലെ ഇം വശനങ്കാടെ കേട്ടത്തിലേ ചരിയാനത്തിൽ കവലയൊള്ള ആളായേയെ.

²⁴അവൻ ചരിയാനത്തിൽ കവലയടഞ്ചിരുക്കിനതെ കണ്ടാലെ, “കനേം ചൊത്ത് ചുമുത്തിരമെ ഒള്ളാ തെയ്‌വ രാച്ചത്തിൽ കടക്കിനത് ചരിയാനെ കറുമം താൻ.

²⁵കനേം ചൊത്ത് ചുമുത്തിരമെ ഒള്ളാ തെയ്‌വ രാച്ചത്തിൽ കടക്കിനതക്കാട്ടി ഒട്ടകം ഊയിലെ തുളെ വശീക്ക് കടന്തു പോനതുതാൻ എളുപ്പം” ഒൺ ചൊല്ലിയെ.

²⁶ഇതെ കേട്ട് നുണ്ണവേരാ അവൻകാക്ക്, “ഒണ്ണാ രച്ചിക്കപ്പടുകേക്ക് ആരുനാലെ മുടിഞ്ചോകും” ഒൺ കേട്ടെ.

²⁷അത്തുക്ക് ഏശു, “മനിശനുക്കാകാത്തെ കാരിയങ്കാട് തെയ്‌വത്തുക്കാകും” ഒണ്ണെ.

²⁸അത്തുക്ക് പത്തിരോശ് അവൻകാക്ക്, “അള്ളേ, എങ്കെ എങ്കാക്ക് ചൊന്തമായതുകാടെ എല്ലാം വീയ് ഒറിഞ്ചാപ്പിലെ നിനക്ക് പുറകോടേ വന്തിരുക്കിനെ” ഒൺ ചൊല്ലിയെ.

²⁹അത്തുക്ക് ഏശു അവറകാക്ക്, “തെയ്‌വ രാച്ചംനാലെ കൂരയമോ പെണ്ണമോ അണ്ണൻ തമ്പിയേരമോ പെയ്‌ങ്കാമാരമോ തായ് തന്തേരമോ പുള്ളെ കുട്ടികളയോ വീയ് ഒറീകേം

³⁰ഇം ഉലകത്തിൽ കനേകമായും വരുകേക്കിരുക്കിനെ ലോകത്തിൽ എണ്ണേക്കുമൊള്ളെ ഉശിരാം നേടാത്തവൻ ആരുമില്ലെ ഒൺ ഏൻ നിങ്കകാക്ക് ചത്തിയമാ ചൊന്നെ.”

³¹പിന്നെ ഏശു പന്നണ്ട് ശിശിയരാം കിട്ടേക്ക് വുളിച്ചാപ്പിലെ ചൊല്ലിയത്, “നോക്കിൻ, നങ്കെ എരുശലേമുക്കു പോനെ; മനിശനായ് വന്തെ എന്നചൊല്ലി പലകപ്പാട്ടുക്കാറാ എളുതിയതുവോലയെല്ലാം നടപ്പെ പോനെ.

³²അവനെ എകൂതരല്ലാത്തവേരാ കയ്യിൽ ഏൽപ്പിച്ച് കൊടുക്കുവെ പോനെ അവറെ അവനെ ഒടിയോറ ചൊല്ലുകേം മാനം കെടുത്തുകേം തുപ്പുകേം

³³ചാട്ടവാറിൽ അടിക്കുകേം കൊല്ലുകേം മൂണാമതുനാ ഉശിരോടെ എന്തി വരുകേം ചെയ്യും” ഒൺ ചൊല്ലിയെ.

³⁴ഒണ്ണാ അവുടെ ചൊല്ലിയതൊണ്ണും ശിശിയരുക്ക് വുളയ്‌ങ്കതില്ലെ; അത്തിലെ പൊരുൾ അവറാത്തുക്ക് മറവായിരുന്തെ; അവൻ എന്തനേത്തചൊല്ലി ചൊല്ലിയതൊൺ അവറാത്തുക്കു തിക്കിനാതേം ഇരുന്തെ.

³⁵ഏശു എരീകോവിൽ വന്തു ചേന്തവോളെ കുരുടനാനെ ഒരു മനിശൻ വശിയരുകിൽ ഇരുന്ത് ഇരക്കുമെ.

³⁶ഒരു കൂട്ടമാളുകെ അത്തോടെ നടന്ത് പോനതെ കേട്ടവോളെ “ഇതെന്ത്?” ഒൺ അവൻ കേട്ടെ.

³⁷“നശരായൻ ഏശുതാൻ ഇത്തോടെ നടന്ത് പോനത്” ഒൺ അവറെ അവൻകാക്ക് ചൊല്ലിയെ.

³⁸അത്തുക്ക് അവൻ, “ഏശുവേ, താവീത് മകനേ, എൻകാക്ക് കനിവെ കാട്ടോണുമേ” ഒൺ വലിയതാ കതറി കോന്ത് വുളിച്ചെ.

³⁹മിന്നുക്ക് നടന്ത് പോയവേരാ അവൻകാക്ക് “ബുറീനെ ഇര്” ഒൺ ചൊല്ലിയാലെ അവൻകാക്ക് പിണയ്‌ങ്കെ; അപ്പണും അവൻ വലിയതാ, “താവീത് മകനേ, എൻകാക്ക് കനിവെ കാട്ടോണുമേ” ഒൺ പിന്നേം കതറി കതറി വുളിച്ച് കോന്തെ.

⁴⁰ഏശു അവുടെ നുണ്ണാപ്പിലെ അവനെ തൻകാക്ക് കുടക്കുവെ തിട്ടമിട്ടെ. കൺ തോണാത്താ കിട്ടെ വന്തതും ഏശു അവൻകാക്ക്,

⁴¹“ഏൻ നിനക്ക് എന്തെ ചെയ് തരിളെ?” ഒൺ കേട്ടെ. “കരുത്താവേ, എൻ കണ്ണുക്ക് പാരുവെ കിടയ്‌ക്കോണും” ഒൺ കൺ തോണാത്താ ചൊല്ലിയെ.

⁴²ഏശു അവൻകാക്ക്, “നിനക്ക് പാരുവെ കിടയ്‌ക്കട്ടെ; നീ നമ്പിയതുനാലെ നിനക്ക് ചുകമായിരുക്കിനെ” ഒൺ ചൊല്ലിയെ.

⁴³അപ്പണേ അവൻ കണ്ണുക്ക് പാരുവെ കിടച്ചെ. അവൻ തെയ്‌വത്തുക്ക് മകത്തമെ കൊടുത്ത് ഏശുവുക്ക് പുറകോടേ പോയെ; ഇതെ കണ്ടു നുണ്ണെ മാനടവനൊത്തേ തെയ്‌വത്തുക്ക് മകത്തമെ കൊടുത്തെ.