Read Mannan അപ്പോശ്‌ത്തലര് തെയ്‌വ വേലെ 23 Bible Online

അപ്പോശ്‌ത്തലര് തെയ്‌വ വേലെ 23 - Mannan bible

അപ്പോശ്‌ത്തലര് തെയ്‌വ വേലെ 23

¹ശന്നത്തിരീം കൂട്ടക്കാറാളെ കുറിപ്പാ നോയ്‌ക്കാലെ പവുലോശ്, “അണ്ണൻ തമ്പിയേരേ, ഉണ്ണേക്ക് വരെ ഏൻ നല്ലെ മനശോടെ താൻ തെയ്‌വത്തുക്ക് മില്ലോട് നടന്തിരുക്കിനത്” ഒൺ ചൊല്ലിയെ.

²പെട്ടൊൺ വലിയെ വലിയെ പൂയാരി അനന്നിയാശ്, പവുലോശുകാൽ നുണ്ണവേരാകാക്ക്, “അവൻ വായടകേക്ക് ഒണ്ണെ കൊടിൻ” ഒൺ കൽപ്പനേ ഇട്ടെ.

³അത്തുക്ക് പവുലോശ് വലിയെ പൂയാരീകാക്ക്, “കണ്ടിപ്പാ തെയ്‌വം നിന്നെ അടിക്കും, വെള്ളയടിച്ചെ പിത്തിയേ, നായപുറമാണത്താലെ എനക്ക് നായമിടുവതാനേ ഇരുക്കിനത്. എന്ന അടിപ്പേക്ക് കൽപ്പനേ ഇടിനതുനാലെ നായപുറമാണത്തുക്ക് വെതിലതാനേ നീ ചെയ്യിനത്?”

⁴അന്നേരം പവുലോശുകാൽ നുണ്ണവേരാ, “നീ തെയ്‌വത്തുകാലെ വലിയെ വലിയെ പൂയാരിയതാൻ നിച്ചനാതെ ചൊന്നത്” ഒൺ ചൊല്ലിയെ.

⁵അത്തുക്ക് പവുലോശ്, “ഇശ്‌രവേലിലെ അണ്ണൻ തമ്പിയേരേ, അവ്വാൾ വലിയെ വലിയെ പൂയാരി ഒൺ എനക്ക് തിക്കിനാപ്പോയെ; തെയ്‌വ വശനത്തിൽ ഇകനെ ചൊല്ലിയിരുക്കിനെ, ‘നിങ്കെ വലിയെ വലിയോരുകാടെ നിച്ചനാതെ ചൊൽവാനില്ലെ’” ഒൺ.

⁶അങ്ക് കൂടി വന്തവേരാളിൽ ഒരു കൂട്ടം ശതൂക്കിയരും ഒരു കൂട്ടം പരീശരും താൻ ഇരിക്കിനതൊൺ തിക്കിനൊണ്ടായതും പവുലോശ് ശന്നത്തിരീം കൂട്ടക്കാറാകാക്ക് ഇകനെ വലിയെ വായിൽ ചൊല്ലിയെ, “അണ്ണൻ തമ്പിയേരേ, ഏൻ ഒരു പരീശൻ; എൻ തന്താരും ഒരു പരീശൻ താൻ; ചത്തവേരാ ഉശിരോറി എന്തിവരും ഒൺ ഏൻ നമ്പുനനാലതാൻ എന്ന നായമിടിനത്.”

⁷പവുലോശ് ഇതെ ചൊല്ലാങ്കാട്ടീലേം പരീശരിലേം ശതൂക്കിയരിലേം ഇടേൽ കലകമൊണ്ടായെ. അകനെ അവുടെ കൂടി ഇരുന്തവേരാ ഇരണ്ടു പങ്കായ് പുറിഞ്ചെ.

⁸ചത്തോഞ്ച് എന്തിവരുമൊണ്ണും തൂതനോ ആത്തുമാവോ നാത്തെ ഒണ്ണും ചൊന്നവേരാതാൻ ശതൂക്കിയര്; പരീശരൊണ്ണാ ഇതെല്ലാം ഒള്ളതൊൺ നമ്പിനവേരാതാൻ.

⁹ഇകനെ ചരിയാനെ കുലവെ നടന്തവോളെ പരീശര് കൂട്ടത്തിലെ മതപണ്ടിതരുകാട്ടിൽ ചിലവേരാ എന്തി നുൺ കട്ടായമാ ഒരേപുടി, “ഇം മനിശനേത്തിൽ എങ്കെ ഒരു കുത്തമാം കാണതില്ലെ; ചിലപ്പെ ഒരു ആത്തുമാവോ തൂതനോ ഇവ്വാൾകാൽ കുരവുട്ടുകാണും” ഒൺ ചൊല്ലിയെ.

¹⁰അവറെ ഏയിലെ കെട്ടി അടിച്ച് പിണയ്‌ങ്കവോളെ പവുലോശെ അവറെ വലിച്ചുകിച്ചാവനോ ഒൺ പടയാളികളിലെ തലവൻ അരണ്ടാലെ, അവ്വാളെ അവറെ ഇടേലിരുന്ത് കോട്ടേക്ക് കൊമ്മണ്ടുകേക്ക് പടയാളികകാക്ക് കൽപ്പനയിട്ടെ.

¹¹അണ്ണേക്ക് റാവ് കരുത്താവ് പവുലോശുകാൽ വന്താലെ, “പേടിയാതെ ഇര്; നീ എരുശലേമിൽ എനക്ക് ശാച്ചിയാ ഇരുന്തവോലെ റോമിലും ശാച്ചിയാ ഇരുക്കോണും” ഒൺ ചൊല്ലിയെ.

¹²പിത്തുനാ വാനം ബുടിഞ്ചതും ചിലെ എകൂതര് പവുലോശുക്ക് വുറോതമാ ചൊല്ലി കൂട്ടിയെ; പവുലോശെ കൊൽനത് വരേക്ക് തങ്കെ തീൻ തണ്ണിയെ കുടിയാത്ത് ഒൺ അവറെ മുടിവെടുത്തെ.

¹³ഇകനെ മുടിവെടുത്തവേരാളേ നാപ്പതുക്കും മേൽ ആൾകെ താൻ ഇരുന്തത്.

¹⁴അവറെ വലിയെ പൂയാരിയേരുകാലും മൂപ്പരുകാലും പോയോൺ, “പവുലോശെ കൊൽനത് വരേക്ക് എങ്കെ തീൻ തണ്ണിയെ കുടിയാത്തൊൺ മുടിവെടുത്തിരുക്കിനെ.

¹⁵അതുനാലെ ഇപ്പെ നിങ്കെ ശന്നത്തിരീം കൂട്ടമും ചേന്ത് അവ്വാൾ കാരിയമെ കെവുനമാ പടിക്കോണും; അത്തുക്ക് അവ്വോളയെ നിങ്കകാക്ക് ഉറക്കി കുടക്കുവെ പടയാളികളിലെ തലവൻകാൽ കോളാരാ കോക്കോണും; ഇങ്ക് വരിനത്തുക്ക് മിന്നേ അവ്വാളെ കൊൽകേക്ക് എങ്കെ ഒരിയ്‌ങ്കി ഇരുക്കിനെ” ഒൺ ചൊല്ലിയെ.

¹⁶ഇകനെ ചൊല്ലി കൂട്ടിയെ ചേതി പവുലോശ് പെയ്‌ങ്കാ മകനുക്ക് കേൾവിപ്പട്ടെ. അവ്വാൾ കോട്ടേൽ പോയ് പവുലോശുകാക്ക് ഇം ചേതിയെ വെളിയേത്തിയെ.

¹⁷പവുലോശ് ശതാതിപരുകാട്ടിൽ ഒരാളെ വുളിച്ചാപ്പിലെ, “ഇവ്വുളന്താരീക്ക് പടത്തലവൻകാക്ക് എന്തമോ ചൊൽകേക്കൊള്ളെ അതുനാലെ ഇവ്വുളന്താരിയെ അവൻകാക്ക് കൊണ്ടോൻ” ഒൺ ചൊല്ലിയെ.

¹⁸ശതാതിപൻ അം ഉളന്താരിയെ കൂട്ടിയെടുത്ത് പടത്തലവൻകാക്ക് പോയ്, “ഇം ഉളന്താരിയെ നിൻകാക്ക് കൊണ്ടോ ചെന്നുക്ക് നിൻകാൽ എന്തമോ ചൊൽകേക്കൊള്ളെ ഒൺ ഇരുട്ടറേൽ കിടക്കിനെ പവുലോശ് എന്നെ വുളിച്ച് ചൊല്ലി കടത്തിവുട്ടിരുക്കിനെ” ഒൺ ചൊല്ലിയെ.

¹⁹പടത്തലവൻ അം ഉളന്താരീലെ കയ്‌ക്ക് പുടിച്ച് ഒരുക്കോട്ടുക്ക് മാത്തി നുറുത്തിയാലെ, “ചൊൽ, നിനക്ക് എന്തുനേ എൻകാൽ ചൊൽകേക്ക് ഒള്ളത്?” ഒൺ ആരും കോളാതെ കേട്ടെ.

²⁰അത്തുക്ക് അം ഉളന്താരി, “പവുലോശുക്ക് കെവുനമാ നായമിടുകേക്ക് ഒണ്ണോൺ നാളെ ശന്നത്തിരീം കൂട്ടത്തുക്ക് മില്ലോട്ടുക്ക് കുടപ്പേക്ക് നിൻകാൽ ചൊൽകേക്ക് എകൂതര് കോളാരെ ചൊല്ലിക്കൂട്ടിയിരുക്കിനെ.

²¹ഒണ്ണാ നീ അത് നമ്പുവാനില്ലെ; എന്തൊണ്ണാ അത്തിൽ നാപ്പതുക്കും മേൽ ആളുകെ പവുലോശെ കൊൽനത് വരേക്ക് തീൻ തണ്ണിയെ കുടിയാത്തൊൺ ഏത്തുചൊല്ലി പതുങ്കിയിരുക്കിനെ; നീ എന്തെ ചൊന്നതൊൺ തിക്കിനൊണ്ടാളത്തുക്ക് അവറെ ഒരിയ്‌ങ്കി ഇരുക്കിനെ.”

²²ഇം ചേതിയെ തൻകാൽ ചൊല്ലിയതെ ആരുകാലും ചൊൽവാനില്ലെ ഒൺ തിട്ടമിട്ടാലെ പടത്തലവൻ അം ഉളന്താരിയെ കടത്തിവുട്ടെ.

²³പിന്നെ പടത്തലവൻ ഇരണ്ടു ശതാതിപരുകാടെ വുളിച്ചെടുത്താപ്പിലെ, “ഉണ്ണേക്ക് റാവ് ഒമ്പത് മണീക്ക് കയ്‌ശരിയാവുക്ക് പോകേക്ക് ഇരുനൂറു കാലാളാം അവറെ കൂട്ടത്തിൽ എളുവതു കുതിരെ പടയാളികളാം ഇരുനൂറു കുന്തക്കാറാളാം പയണപ്പടുത്തി നുറുത്ത്.

²⁴പവുലോശുക്ക് പോകേക്ക് തേവയാനെ കുതിരകാടാം കൊടുക്കോണും; അകനെ അമ്പാളെ ചൂതാനമാ നാട്ടുമന്നൻ പെലിക്കിശികാക്ക് കൊണ്ടോകോണും” ഒൺ കൽപ്പനയിട്ടെ.

²⁵പടത്തലവൻ ഒരു എളുത്താം എളുതി കൊടുത്തുവുട്ടെ; ഇകനതാൻ അം എളുത്ത്,

²⁶“നാട്ടുമന്നൻ പെലിക്കിശിക്ക് കിലോതിയശ് ലൂശിയാശ് ഒണ്ണെ ഏൻ എളുതിനത്, നിനക്ക് വണക്കം.

²⁷ഇം മനിശനെ എകൂതര് പുടിച്ച് കൊണ്ണാകേക്ക് നോയ്‌ക്കവോളെ ഇവ്വാൾ ഒരു റോമാക്കാറൻ ഒൺ തിക്കിനൊണ്ടായതും ഏൻ പടയാളികളെ കൂട്ടി എടുത്തു പോയ് ഇവ്വാളെ കാപ്പാത്തിയ.

²⁸അവറെ ചെന്നേത്തിൽ ചൊന്നെ കുത്തം എന്തനേത്ത് ഒൺ തിക്കിലൊണ്ടാളത്തുക്ക് അവറെ ശന്നത്തിരീം കൂട്ടത്തുക്ക് ഏൻ ഇവ്വാളെ കൊണ്ടേയെ.

²⁹ചാവുക്കാനതോ ഇരുട്ടറേൽ ഇടുവേക്കാനതോയാനെ ഒരു കുത്തമാം ചെൻ ചെയ്യതില്ലെ ഒൺ ഏൻ കണ്ടേയെ; ഉടവുറെ ചട്ടമെ പേരേത്തിതാൻ ചേരെ ചെന്നുക്ക് വുറോതമാ കുത്തമെ ചൊന്നത്.

³⁰ചെന്നുക്ക് വുറോതമാ കൊണ്ണാകേക്ക് അവറെ കൂട്ടമിടിനെ ഒൺ എനക്ക് തിക്കിനൊണ്ടായവോളയേ ഏൻ ഇവ്വാളയെ നിൻകാക്ക് കടത്തിവുടുക്കിനെ; ഇവ്വാൾക്ക് എതിരിയാ പരാതിയെ തന്തവേരാക്ക് എന്തൊണ്ണാലും ചൊൽകേക്ക് ഇരുന്താ നിൻകാൽ വന്ത് ചൊല്ലട്ടെ ഒണ്ണും എളുതിയിരുക്കിനെ.”

³¹പടത്തലവൻ ഇട്ടെ കൽപ്പനനാലെ പടയാളികാട് റാത്തേക്കുറാവേ പവുലോശെ കൂട്ടിയെടുത്ത് അന്തിപ്പത്തിരീശ് വരേക്ക് പോയ് ചേന്തെ.

³²പിത്തുനാ കുതിരെ പടയാളികളെ പവുലോശ് കൂട്ടത്തിൽ വുട്ടാപ്പിലെ കാലാളുകെ കോട്ടേക്കേ തിരുമ്പി പോയെ.

³³അവറെ കയ്‌ശരിയാവില് പോയ് നാട്ടുമന്നൻകാൽ എളുത്തെ കൊടുത്ത് പവുലോശെ നാട്ടുമന്നനുക്ക് മില്ലോട് നുറുത്തിയെ.

³⁴എളുത്തെ വാശിച്ചാലെ പവുലോശ് ഏളെ തേശക്കാറൻ ഒൺ കേട്ടെ. കിലിക്കിയാവുകാറൻ ഒൺ തിക്കിനൊണ്ടായതും,

³⁵നാട്ടുമന്നൻ ഇകനെ ചൊല്ലിയെ, “പരാതീ തന്തവേരാളും വന്താപ്പിലെ നിനക്ക് ചൊൽകേക്ക് ഇരുക്കിനതെ ഏൻ കോക്കാം” ഒണ്ണാപ്പിലെ പവുലോശെ കെരോതാവിലെ കൊട്ടാരത്തിൽ കാപ്പാത്തുകേക്ക് കൽപ്പനയിട്ടെ.