Read Mannan എബുറായര് 2 Bible Online

എബുറായര് 2 - Mannan bible

എബുറായര് 2

¹അതുനാലെ എപ്പനൊണ്ണാലും തവറി പോകാതിരുക്കേക്ക് നങ്കെ കേട്ടതെ കെവുനമാ വച്ചിരുക്കോണും.

²തെയ്‌വ തൂതരുകാട് ചൊല്ലിയെ വശനം ചത്തിയം താൻ; അതെ പാലിയാപ്പോയവേരാക്ക് തണ്ടനെ കിടയ്‌ക്കുകേം ചെയ്യെ.

³അകനയൊണ്ണാ ഇത്തിനെ വലിയെ രച്ചെ കെവുനമാക്കാതവോയാ നങ്കെ എകനെ തണ്ടനേൽ നുൺ തപ്പിക്കും? ഇം രച്ചെ കരുത്താവുതാൻ മുതെ ചൊല്ലിയത്. അവൻകാൽ നുൺ കേട്ടവേരാ അതെ എങ്കാക്ക് വിളക്കമായ്‌ക്കീം തന്തിരുക്കിനെ.

⁴അടകാളത്താലേം അരിശുകത്താലേം വൻ വൻ ചെയ്‌തികയാലേം ഉടയാ പിരിയത്തിൽ തന്തെ തെയ്‌വ ആത്തുമാവിലെ വരത്താലേം തെയ്‌വമും ഇതെ ചത്തിയം താൻ ഒൺ കാട്ടിയെ.

⁵നങ്കെ ചൊന്നെ വരുകേക്കിരുക്കിനെ ഉലകമെ തെയ്‌വം തൂതരുകാട്ടുക്ക് നാത്തെ കീൾപ്പടുത്തി ഇരുക്കിനത്.

⁶അത്തുക്ക് പകറം തിരുവെളുത്തിൽ ഇകനെ എളുതിയിരുക്കിനെ, “മനിശനെ നീ നിനയ്‌ക്കിളത്തുക്ക് അവൻ എന്ത്? മനിശൻ മകനെ കാൺമ്പിളത്തുക്ക് അവനുക്ക് എന്തൊള്ളെ?

⁷നീ അവനെ തൂതരുകാടക്കാട്ടി ഇത്തിനെ നേരത്തുക്ക് മട്ടും താത്തി മകിമേം മാനമും അവനുക്ക് ഇട്ടിരുക്കിനെ.

⁸തെയ്‌വം മുച്ചൂടാം അവൻ കാൽക്കീശിൽ ആയ്‌ക്കിരുക്കിനെ.” അകനെ മുച്ചൂടാം അവനിലെ കാൽക്കീശിലായ്‌ക്കി വച്ചവോളെ ഒണ്ണാം അവൻ അതികാരത്തിൽ നുൺ മാത്തി വച്ചതില്ലെ. ഇപ്പയൊണ്ണാ എല്ലാം അവനിലെ അതികാരത്തിലുമില്ലെ നങ്കെ കാണത്.

⁹ഒണ്ണാ തെയ്‌വ പിന്നിയത്തിൽ ഏശു എല്ലാരുക്കുചൂട്ടീം ചാകേക്ക് കൊഞ്ചെ കാലത്തുക്ക് തൂതരുകാടക്കാട്ടി താത്തപ്പട്ടപ്പണും അവൻ ചാവെ ഏത്തനാലെ മകിമയാലേം ബൊകുമാനത്താലേം കിരികിടമെ ചൂടി ഇരുക്കിനതായ് നങ്കെ കാണെ.

¹⁰എല്ലാം തെയ്‌വത്തുക്കൊള്ളതാൻ; മുച്ചൂടാം പടച്ചതും അവൻതാൻ; കനേകം തെയ്‌വ മക്കെ രച്ചപ്പടിളത്തുക്കും അവൻ മകിമേൽ പങ്കുകാറനാകിളത്തുക്കും ഏശുവെ കറുമംനാലെ തികഞ്ചവനാക്കിനത് നല്ലത് ഒൺ തെയ്‌വത്തുക്ക് തോണെ.

¹¹ചുത്തമാക്കിനാളുക്കും ചുത്തമാനവേരാക്കും എല്ലാം ഒരാതാൻ തകപ്പൻ; അതുനാലതാൻ ഏശു അവറളെ ഉടപ്പുറവികെ ഒൺ വുളിപ്പേക്ക് വെക്കക്കേട് നിനയാത്തത്.

¹²“ഏൻ നിൻ നാമമെ എൻ ഉടപ്പുറവികകാൽ ചൊല്ലും; മാനടവൻകാട്ടുക്ക് മില്ലോട് ഏൻ നിന്നെ മകിമപ്പടുത്തും.

¹³ഏൻ തെയ്‌വത്തിൽ അരുവണയും” ഒണ്ണും “ഇതീ ഏനും തെയ്‌വം എനക്ക് തന്തെ മക്കേം” ഒൺ അവൻ തെയ്‌വത്തുകാക്ക് ചൊന്നെ.

¹⁴മക്കെ ഉടമ്പും ഇലത്തമും ഒള്ളവേരാനാലെ അവനും ഉടമ്പും ഇലത്തമുമൊള്ളവനായ് ചാവുക്ക് അതികാരിയാനെ പിശാശെ ഉടയാ ചാവാലെ നീയ്‌ക്കെ.

¹⁵അകനെ ഉശിരൊള്ളെ കാലം ബൂറാ ചാവിലെ പേടീക്ക് അടിമയായിരുന്തവേരാക്ക് അവൻ വുടുതലെ കൊടുത്തെ.

¹⁶ഒണ്ണാലും തൂതരുകാട്ടുക്ക് ഉതവിയെ ചെയ്‌കേക്ക് നാത്തെ അബുറാകാമിലെ മക്കകാട്ടുക്ക് ഉതവിയെ ചെയ്‌കേക്ക് താൻ ഏശു വന്തത്.

¹⁷അകനെ അവൻ തെയ്‌വത്തിലെ വേലേൽ കനിവ് ഒള്ളാളും നമ്പുകേക്കാനവനുമാനെ ഒരു വലിയെ പൂയാരിയുമായെ. എന്തൊണ്ണാ മാനടവൻകാട്ടിലെ പാപങ്കാട്ടുക്ക് പകറമായ് എല്ലാ കാരിയത്തിലും അവൻ ഉടയാ കൂടപ്പുറപ്പുകാടുവോലെ ആകവേണ്ടിയിരുന്തെ.

¹⁸അവൻ കറുമമടയുകേം ചോതനപ്പടുകേം ചെയ്യനാലെ ചോതനേൽ അകപ്പടിനവേരാക്ക് ഉതവിയായിരുപ്പേക്കു തകിതി ഒള്ളാതാൻ അവൻ.