Read Mannan 1 പത്തിരോശ് 4 Bible Online

1 പത്തിരോശ് 4 - Mannan bible

1 പത്തിരോശ് 4

¹കിരിശ്ത്തു ഉടയാ ഉടമ്പിൽ കറുമമെ ഏത്തെടുത്തതുനാലെ നിങ്കളും അകനയേതാൻ കറുമമെ ഏത്തെടുപ്പേക്ക് മനശൊള്ളവേരാ ആയിരുക്കോണും. എന്തൊണ്ണാ ഏശു കറുമമടഞ്ചതുവോലെ കറുമമടേനവൻ ആരും ഒരുനാളും പാപമെ ചെയ്യാത്ത്.

²അതുനാലെ ഇപ്പപ്പുടിച്ചി നിങ്കെ ഇം ഉലകത്തിൽ പിശയ്‌ക്കിനെ കാലം ബൂറാ ഉടവനുടവൻ ആശേക്ക് നാത്തെ തെയ്‌വ പിരിയത്തുക്കുതാൻ പിശയ്‌ക്കോണും.

³തെയ്‌വമെ നമ്പാത്തെ ആളുകെ ചെയ് നടന്തെ കാരിയങ്കാടെ താൻ മിന്നേ നിങ്കെ ചൊന്തെ പിരിയത്തുക്ക് ചെയ് നടന്തത്. എടാൺ എടുപെൺ എടുത്തു നടന്തതും നിച്ചനാത്തെ നിനവിലും കള്ളെ കുടിച്ചും കൂട്ടെ കൂടി നെൽത്തണ്ണിയെ കുടിച്ചും തലക്കിരിങ്കി നടക്കിനതും നിച്ചം കെട്ടെ റീതീൽ ചിലയെ കൊണ്ടാടിനതും ഇതെല്ലാം നിങ്കെ ഇത്തിനെ കാലം ചെയ് നടന്ത് പിശച്ച് വന്തെ. ഒണ്ണാ അതെ ചെയ് നടന്തത് മതി.

⁴ഒണ്ണാ ഇപ്പെ നിങ്കെ അവറകാൽ ചേരാത്തതുനാലെ അവറെ അരിശുകപ്പട്ട് നിങ്കളെ വെക്കം കെടുത്തി ചൊല്ലും.

⁵ഒണ്ണാ ഉശിരൊള്ളവേരാളാം ചത്തവേരാളാം നായമെ ഇടുവേക്ക് ഒരിയ്‌ങ്കി ഇരുക്കിനെ തെയ്‌വത്തുകാൽ അവറെ വതിലെ ചൊൽവിളത് വരും.

⁶അതുനാലതാൻ ചത്തവേരാകാൽ പോയി അവൻ എന്തുക്ക് ചത്തതൊണ്ണെ ചേതിയെ വുളിച്ച് ചൊല്ലിയത്. അവറെ തെയ്‌വത്തിലെ ചൊൽപ്പടീക്ക് നടകാതിരുന്ത് ചത്താലും നായവിതീലിരുന്ത് തപ്പിക്കേക്ക് മുടിയാത്ത്.

⁷എല്ലാത്തുക്കും കടശി കാലം വന്തിരുക്കിനെ; അതുനാലെ നിങ്കെ വായാതിനവോളെ നിങ്കെ തെളിഞ്ചെ മനശുകാറായായും ഉടവനുടവൻ പിരിയമെ അടക്കി വയ്‌ക്കിനവേരായായും ഇരിൻ.

⁸എല്ലാത്തുക്കും മീതെ അക്കുമിക്കും ചരിയാനത്തിൽ അക്കറയോടെ ഇരുക്കോണും. എന്തൊണ്ണാ പാപം എത്തിനാരം ഇരുന്താലും പിരിയം അതുകാടയെല്ലാം മറച്ചോകും.

⁹അതുനാലെ നിങ്കെ അക്കുമിക്കും പൊറുപൊറുപ്പ് ഒണ്ണും നാതെ പിരിയമാ ഏത്തെടുക്കോണും.

¹⁰ഒരോരുത്തനും തെയ്‌വ വേലേലെ കങ്കാണിയായ് പലെ തരത്തിലൊള്ളെ വരങ്കാടെ നായമാ നോയ്‌ക്കി നടത്തോണും; തെയ്‌വം ഒവ്വൊരാക്കും കൊടുത്തിരുക്കിനെ ഒവ്വൊരു വരങ്കാടും വോറേ ആളുകെ നൽമേക്കുചൂട്ടി ചെയ്യോണും.

¹¹ഒരാക്കു വുളിച്ച് ചൊൽകേക്ക് വരം കിടച്ചതൊണ്ണാ അവൻ തെയ്‌വ വശനമെ വുളിച്ച് ചൊല്ലട്ടെ. വോറൊരാക്ക് ഏവലെ ചെയ്‌കേക്ക് വരം കിടച്ചതൊണ്ണാ തെയ്‌വം കൊടുത്തെ തകിതിവോലെ ചെയ്യട്ടെ. അകനെ എല്ലാ കാരിയത്തിലും ഏശുകിരിശ്‌ത്തുനാലെ തെയ്‌വ നാമം മകിമപ്പടുകേക്ക് ഇടെവരും. മകിമേം ചക്കിതീം എണ്ണെണ്ണേക്കും അവനുക്കൊള്ളതുതാൻ. ആമേൻ.

¹²പിരിയമാനവേരാളേ, നിങ്കെ നമ്പിക്കെ ചോതനെ ചെയ്യിനവോളെ നിങ്കാക്ക് വരിനെ എപ്പേരുപ്പട്ടെ കറുമമെ കണ്ട് എനക്ക് മട്ടും ഇകനെ വന്തത് എന്തൊൺ നിനച്ചി അരിശുകപ്പടുവാനില്ലെ.

¹³നിങ്കെ കിരിശ്ത്തുവു കായകറുമത്തിൽ പങ്കാളികെ ആനത്തിൽ പിരിയമടേനിൻ. അകനെ അവൻ മകിമെ വെളിപ്പട്ട് വരിനവോളെ നിങ്കെ ചരിയാനത്തിൽ പിരിയമടേകേക്ക് ഇടയാകും.

¹⁴നിങ്കെ കിരിശ്ത്തുവെ നമ്പിനതുനാലെ ആരൊണ്ണാലും നിങ്കളെ വെക്കം കെടുത്തിനതൊണ്ണാ നിങ്കെ ഓകമൊള്ളവേരാതാൻ; എന്തൊണ്ണാ തെയ്‌വത്തിലെ മകിമെ ഒളെള ആത്തുമാവ് നിങ്കളേത്തിൽ ഇരുക്കിനെതാനെ.

¹⁵നിങ്കളേത്തിൽ ആരൊണ്ണാലും കറുമം അടഞ്ചാ അത് വോറേ ഒള്ളവൻ കാരിയത്തിൽ ഇടവട്ടു നടക്കിനവനായോ നിച്ചംകെട്ടെ വേലയെ ചെയ് നടക്കിനവനായോ കളവാണികയായോ ഒരു കുലയാളികയായോ ആയിനാത്തെ കറുമം അടേളത്.

¹⁶ഒണ്ണാ കിരിശ്ത്തുവെ നമ്പിനവേരായൊണ്ണെ പേരിൽ കറുമം അടഞ്ചാ നിങ്കെ വെക്കം കെടുവാനില്ലെ; നിങ്കെ അവനുക്കൊള്ളവനൊൺ നിനച്ചി തെയ്‌വമെ മകിമപ്പടുത്തോണും.

¹⁷തെയ്‌വത്തിലെ നായവിതീൽനുൺ ആരുക്കം തപ്പിക്കേക്ക് മുടിയാത്ത് എന്തൊണ്ണാ അവൻ ഉടയാ മക്കാക്കുതാൻ മുതെ തണ്ടനെ ഇടിനത്. അകനയൊണ്ണാ തെയ്‌വത്തിലെ നല്ലെ ചേതിയെ നമ്പാത്തെ ആളുകെ അവൻ തണ്ടനേൽ നുൺ എകനെ തപ്പിക്കും?

¹⁸“നീതിമാൻ ചെയ്യെ പാപത്തുക്ക് ഇം പൂമീൽ അവൻ തണ്ടനെ കൊടുക്കിനതൊണ്ണാ പാപികേക്ക് അത്തിൽ നുണ്ണും എകനെ തപ്പിക്കേക്ക് മുടിയും?” ഒൺ തെയ്‌വ വശനത്തിൽ ചൊല്ലിയിരുക്കിനെ.

¹⁹നിങ്കളമേ പടച്ചെ തെയ്‌വത്തിലെ കയ്യിൽ ഒപ്പണച്ചി നൽമകാടെ മട്ടും ചെയ് പിശച്ചാലും കറുമം വരിനതൊണ്ണാ അത് തെയ്‌വ പിരിയം താൻ.