Read Yamano Máfìù 16 Bible Online

Máfìù 16 - Yamano bible

Máfìù 16

¹Fálásíì‐mìà wà Sáyúsíì‐mìà dò o nu Zízɛ̀ píé. Wa naa ó à yí dã́. À mɔ́ɔ̀ wɔ̃̀ mɔ̀ɔ, o à gèe à lɛ̀ɛ é lé‐pa‐wɔ̃̀ kɛ o lɛ̀ɛ, kɛ á zɔ̃̀ɔ̃̀ kélɛ̀ à zì yíkɛ̀ gáàa lɛ́ɛ̀ go Wálà kɛ̀lɛ̀ lɛ̀í.

²Lɛ̀ e kɛ kília, Zízɛ̀ a là nìɛ̀ weeá kélɛ̀, “Yé nyɛ́nɛ́ aà kɛ dàpìàa, káà à gèe kélɛ̀, ‘Lɛ̀ɛ lɛ̀ɛ́ ló bãã̀ dɛɛ ká, ɓii lɛ̀í lɛ zólóa mɔ́ɔ̀ wɔ̃̀ mɔ̀.’

³Tó làapíé bɛ̃̀ɛ̃, káà à gèe, ‘Lɛ̀ɛ lɛ́ɛ̀ lo bãã̀ pɛ́nɛɛ, ɓii lɛ̀í lɛ zóló ɛ̃́ɛ̃́ à gɔ̀ũ̀ yàà lɛ.’ Káà bɛ̀i à mɔ̀ ka lɛ̀í gɛ̃̀, káà wɔ̃́ lɛ́ à gbɛ̃̀ɛ̃̀ lɛ à mɔ̀ɔ gèè. Kɛɛ kàá bɛ̀i à mɔ̀ ká pɛ lɛ́ è lúó lɛ́ e pɛ́nɛɛ̀ɛ wɔ̃̀ yí ɓo ko lɛ̀ɛ dɔ.

⁴Míá o ɓe yà kɔa ɓoa yía, o sɔ̃̀ɔ̃ wá sɛ̀, ɛ̃́ɛ̃́ óò o ko gbɛ̃̀ Wálà mɔ̀. O nyìɛ lɛ lé‐pa‐wɔ̃̀ kɛɛ̀ mɔ̀. Kɛɛ lé‐pa‐wɔ̃̀ gbɛɛ lɛ̀ɛ́ ló kɛɛ̀ ɓe o lɛ̀ɛ, é kã́ Zónà zìa mɔ̀ɔ ká.” Lɛ̀ e kɛ kília, Zízɛ̀ e gó gbaa o bà, e là ló ɓo.

⁵Lɛ̀ tòà‐píé‐mìàa o yíía kã́a, òó gbaa ló belè ká, ɓii o zò e ni à mɔ̀.

⁶Zízɛ̀ a gèe o lɛ̀ɛ, “Kà ka líé dɔ, ɛ̃́ɛ̃́ kà ka yɛ́lɛ́ kɛ ka dìè píé Fálásíì‐mìà wà Sáyúsíì‐mìà zì belè‐fɔ̀ɔ‐pɛ̀ɛ wɛ̃́ĩ̀.”

⁷O gbɛ̃̀ gbaa, wáà wɔ̃́ gèè o kíe píé weeá kélɛ̀, “A gèe kíli, ɓii kòó gbaa nu belè káa wɛ̃́ĩ̀.”

⁸Zízɛ̀ e wɔ̃́ lɛ́ o kɛ à gèepìàa dɔ. A mɔ́ɔ̀ à gèe ɓo o lɛ̀ɛ, “Mɛ́ e kɛ lɛ́ kà zi lɛ́ belè wá à ká ka kɛ̀lɛ̀ɛ, wɔ̃̀ gèe ka kíe nì lɛ̀ɛ ɓɛ? Ka zì zò‐dɔ̀à‐mɔ̀ lɛ dóo nyɔ̀nɔ́ kpó‐kpó ɓo.

⁹Kàá à yí dɔ nɛ́? Ka zò lɛ̀ɛ́ vùò lúó lɛ́ m belè‐kpo sɔ́ɔ́li kpuú yɛ́ à ká gɔ̃à wáá sɔ́ɔ́li lɛ̀ɛ ká? Ƃɛ̀lɛ̀‐kolo‐kɔ̃̀ɛ̃̀ wɛ̀ɛɛ̀ lɛ́ ka pa à yé e tóa ká?

¹⁰Kó ma belè‐kpo sálápèèlɛ lɛ́ ma kpuú yɛ́ gɔ̃à wáá yììsɛ lɛ̀ɛ píé? Támé‐kɔ̃̀ɛ̃̀ wɛ̀ɛɛ̀ lɛ́ ka pa à yé e tóa ká?

¹¹E dɔ kpɛɛ̀ lɛ́ kàá yí dɔ kélɛ̀ m̀ḿ gbaa kɛ belè‐wɔ̃̀ gèepìà ka lɛ̀ɛ? Kà ka yɛ́lɛ́ kɛ ka dìè píé Fálásíì‐mìà wà Sáyúsíì‐mìàa o zì belè‐fɔ̀ɔ‐pɛ̀ɛ wɛ̃́ĩ̀.”

¹²Lɛ̀ e kɛ kília, wa yí dɔ gbaa kélɛ̀ Zízɛ̀ lɛ̀ɛ́ gbaa kɛ à gèepìà o lɛ̀ɛ ó o yɛ́lɛ́ kɛ o dìè píé belè‐fɔ̀ɔ‐pɛ̀ yé ò kàà belè bàa mɔ́ɔ̀ wɔ̃̀ mɔ̀. Kɛɛ Fálásíì‐mìà wà Sáyúsíì‐mìà o zì pɛ‐zɔ̃̀ɔ̃̀‐kɔ̀ lɛ́ e kɛ wéépìà à káa.

¹³Zízɛ̀ e ló sɛ́lɛ́ lɛ́ e kɛ Sízàlíà Félépà mɛ̀ĩ́a yí. Lɛ̀ e ɓɔ yía, e là tòà‐píé‐mìà wɛ̃́ĩ́‐lɔ̀ɔ kɛ weeá kélɛ̀, “Míáa óò gèe dé e Mi Gbe ká?”

¹⁴Wa gèe, “Mia gbṹũ̀ óò gèe i Zɔ̃̀ɔ̃́ mia bàtáì‐kɛ‐mì ká. Tó mia gbṹũ̀ bɛ̃̀ɛ̃ wáà gèè Ìláyà lɛ́ e i káa. O dò wáà gèè zeĩ́ i Zɛlèmáyà, ɛ̃́ɛ̃́ dɔ̀‐Wálà‐lé‐là‐mìàa dò ká.”

¹⁵Zízɛ̀ a gèe o lɛ̀ɛ, “Ka bɛ̃̀ɛ̃, káà gèe deĩ̀ lɛ́ e m ká?”

¹⁶Sáímɔ̀ Pílɛ̀ e à yí ɓo weeá kélɛ̀, “Kɛ́lɛ̀ì lɛ́ e Wálà ɓéèea Gbe káa, lɛ́ e i káa.”

¹⁷Zízɛ̀ a gèe à lɛ̀ɛ, “Sáímɔ̀ Bàzónà, i zì lɛ sɛ̀. Ƃii wánà‐wɔ̃̀ e kéa, mi wá kɛ é lɛ́ɛ́ ɓo à là i lɛ̀ɛ. M Dàa lɛ́ e lɛ̀ía, lɛ́ e lɛ́ɛ́ ɓo à là i lɛ̀ɛ.

¹⁸Ɛ́ɛ̃́ zéniía, ḿm̀ gèe i lɛ̀ɛ, óò i si Pílɛ̀. Pílɛ̀ lɛ́ e kélɛ̀, gɛ̀lɛ̀. Ɛ́ɛ̃́ gɛ̀lɛ̀ e kéa là lɛ́ m̀ lo m̀ mia nì séĩ́ gã̀ gbɛ̃̀ɛ̃̀ yia. Ɛ́ɛ̃́ ga‐kɔ̀ lɛ̀ɛ́ ló diè o là gbɛɛ ɓo.

¹⁹Ḿm̀ lo lɛ̀ lɛ́ Wálà lɛ́ e lɛ̀ía, tóò lɛ mia là yia, à mɔ́ɔ̀ kíì nɔɔ̀ i lɛ̀ɛ. Wɔ̃́ ìí ló wéè à kɛ‐wɔ̃̀ mɔ̀ tã́ã̀ zèea, òó ló wéè à kɛ‐wɔ̃̀ mɔ̀ lɛ̀í. Ɛ́ɛ̃́ wɔ̃́ lɛ́ ì lo wéè à kɛ‐wɔ̃̀ mɔ̀ tã́ã̀ zèea, óò lo wéè à kɛ‐wɔ̃̀ mɔ̀ lɛ̀í.”

²⁰Lɛ̀ e kɛ kília, Zízɛ̀ e mɛ́ĩ́ ɓo là tòà‐píé‐mìà lɛ̀ɛ mɛ́ gágà zɛ̀ kélɛ̀, yékɛ̀ ó gèe mi nɔ́ɔ fé lɛ̀ɛ kélɛ̀ à ye lɛ́ e Kɛ́lɛ̀ì káa.

²¹Lúó e kília káa, Zízɛ̀ e gbɛ̃̀ gbaa, áà wɔ̃́ gèè e yí púlú zɛ̀ ká là tòà‐píé‐mìà lɛ̀ɛ kélɛ̀, “Lɛ m mɔ̀ ḿ ló Zùlúsàlɛ̀. Ɛ́ɛ̃́ ḿm̀ lo wɔ̃́ nyɔ́ɔ̀ɔ búnùzɛ̀ gɛ̃̀ɛ̃̀, áà gò mia dìè‐dìè vɔ̀ wà sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìà kɛ̀lɛ̀. Óò lo m zɛɛ̀, ɛ̃́ɛ̃́ zeĩ́, ḿm̀ lo wɛ̀lɛ̀ ga kɛ̀lɛ̀ à lɛ̀‐kpɛ̀iì yààka lùò ká.”

²²Pílɛ̀ e Zízɛ̀ súo kɛ zi doó ká, e gbɛ̃̀ áà mɛ́ĩ́ ɓò à lɛ̀ɛ kélɛ̀, “M Dàa‐mì, Wálà áá wéé wɔ̃́ sùua kɛ̀ i ká wɔ̃̀ mɔ̀ gbɛɛ ɓo.”

²³Zízɛ̀ e nìɛ̀, áà gèè Pílɛ̀ lɛ̀ɛ, “Sétɔ̃̀, gó dɔ̀á m là. I mi sã́‐gɛ̀lɛ̀‐kpùlù ká m gɛ̀nɛ̀. Ƃii i zì yɛ́lɛ́‐tááa, ye wá Wálà zì yɛ́lɛ́‐táá ká. Kpóṹ là mìà zì yɛ́lɛ́‐táá lɛ́ e à káa.”

²⁴Lɛ̀ e kɛ kília, Zízɛ̀ a gèe là tòà‐píé‐mìà lɛ̀ɛ, “Yé mi nɔ́ɔ fé à nàà kò ye kó tàà‐kíe‐píé kɛɛ, lɛ à mɔ̀ é kã́ e nàà‐ká‐pɛ̀ séĩ́ lɛ̀ɛ, é là kɔ́lɔ́sì lɛ́ è lo gaà mɔ̀ɔ sí, é tó à ká m píé.

²⁵Ƃii mi lɛ́ à nàà é e dìè zì kɛ̀ɓe laa, lɛ́ɛ̀ lo kɔ̃́ɔ̃̀ e dìè wɔ̃̀ yí ká. Kɛɛ mí è e dìè wɔ̃̀ dà tã́ã̀ m mɔ́ɔ̀ wɔ̃̀ mɔ̀ɔ, lɛ́ɛ̀ lo e dìè laà.

²⁶Yé kpóṹ là zèe séĩ́ aà kɛ mi doó là pɛ ká, ɛ̃́ɛ̃́ aà e kɛ̀ɓe gíni à mɔ́ɔ̀ wɔ̃̀ mɔ̀ɔ, mɛ́ è lo à sɔ̀lɔ̀ ɓoò à kolo là? Mɛ́ e ɓe kɛ mi á nɔ, kɛɛ é là kɛ̀ɓe sɔ̀lɔ̀ ɓo e mɛ̀ĩ́?

²⁷Ƃii Mi Gbe laa kɛpìà é nu e Dàa zì lɛ̀‐fɔ̀nɔɔ̀ɔ yí wà là vɔ‐mìà ká. Yé aà kɛ gbaa kília, lɛ́ɛ̀ lo mia séĩ́ fɔ́nɔ́ nɔɔ̀ wɔ̃́ lɛ́ waà kɛɛ kolo là.

²⁸Wánà‐wɔ̃̀ lɛ́ m̀ gèe ka lɛ̀ɛ ɓɛ. Mia gbú o dɔ̀á lɛ̀ɛ mɔ̀ɔ, òó ló gaà é tóá kíli ó Mi Gbe gɛ̃̀, áà nù e zì tò‐mia‐là mɔ́ɔ̀ yíkɛ̀ gáàa ká.”