Read Yamano Máfìù 19 Bible Online

Máfìù 19 - Yamano bible

Máfìù 19

¹Lɛ̀ Zízɛ̀ e nyɛ wɔ̃́ nì e kéa gèeè mɔ̀ɔ, e gó Gálàlíì, e ló sɛ́lɛ́ lɛ́ e kɛ Zùdíà lɛ̀ dò mɔ̀ Zɔ́dã̀‐yìì mɛ̀ĩ́a yí.

²Mia búnùzɛ̀ o tó à píé, ɛ̃́ɛ̃́ e o la yí.

³Fálásíì‐mìà dò o nu à píé, wáà dà à wì weeá kélɛ̀, “Kéa, lɛ gɔ̃ mɔ̀ é e na ɓo luú wɔ̃́ nɔ́ɔ fé dò wɛ̃́ĩ̀ nɔ́ ɓɔ̀ɔ?”

⁴Zízɛ̀ a là nìɛ̀ weeá kélɛ̀, “Kàá Wálà kiia lɛ̀ yé e kéa gèe do? ‘Kpóṹ là gã̀‐gbɛ̃̀ lùò káa, mia Kɛ‐mì e pɛ gɔ̃ wà pɛ mu o kɛ,

⁵lɛ́ a gèe kélɛ̀, “Wɔ̃́ e kília mɔ́ɔ̀ wɔ̃̀ mɔ̀ɔ, gɔ̃ lɛ́ɛ̀ lo e dàa wà e lèe o tóò, tó wà e na o dà o kíe bà, tó o pèèlɛɛ o kɛ gbaa doó.” ’

⁶Yé aà kɛ kília, kɛɛ o wá gbɛɛ ɓo gbaa pèèlɛ. Kɛɛ waà kɛ doó gbaa. Yé lɛ kília, pɛ lɛ́ Wálà aà dà e kíe zìa, yékɛ̀ mi á ɓo e kíe mɔ̀.”

⁷Wa gèe à lɛ̀ɛ kélɛ̀, “Yé lɛ kília, mɛ́ e kɛ mɔṹ lɛ́ Móózè a gèe kélɛ̀, lɛ gɔ̃ mɔ̀ é lee‐ɓò‐luú kii nɔ e na lɛ̀ɛ, é à vɔ e mìà nì píé?”

⁸Zízɛ̀ a gèe o lɛ̀ɛ, “Móózè e à tó ká ka na ɓo luú, ɓii ka wũ‐kèlè yí lɛ gágàa mɔ́ɔ̀ wɔ̃̀ mɔ̀. Kɛɛ lɛ̀ɛ́ gbaa kɛ kíli kpóṹ là gà‐gbɛ̃̀ lùò ká.

⁹Ḿm̀ gèe ka lɛ̀ɛ kélɛ̀, yé gɔ̃ aà e na lɛ́ lɛ̀ɛ́ sɔ̃̀ɔ̃ yɔɔ kɛ doa ɓo luú, lɛ́ aà lee gbɛɛ sía, kɛɛ aà sɔ̃̀ɔ̃ yɔɔ kɛ.”

¹⁰Là tòà‐píé‐mìàa wa gèe à lɛ̀ɛ, “É kɛ̀á zía lɛ́ lɛ gɔ̃ wà e na o mɔ̀ ó kɛáa, kɛɛ áá kɛɛ̀ mɔṹ sɛ̀ yé òó lee sía ká.”

¹¹Zízɛ̀ a gèe o lɛ̀ɛ, “Pɛ‐zɔ̃̀ɔ̃̀‐kɔ̀ e kéa, bɛ̀i wá mia séĩ́ mɔ̀ kɛ ó sɔ̀lɔ̀ ɓo. Lɛ nɔ́ sɛ̀ mia lɛ́ à nɔɔ̀ lɛ o lɛ̀ɛ wɛ̃́ĩ̀.

¹²Pɛ́ à kɛ̀ lɛ́ gɔ̃à òó lee sía, lɛ doò do. À gbú lɛ yía, o à ye kíli. Ɛ́ɛ̃́ zeĩ́, à dò bɛ̃̀ɛ̃ lɛ yía, mia lɛ́ wa kɛ lɛ́ lɛ̀ɛ́ wɔ̃́ sùua kɛɛ. Ɛ́ɛ̃́ mia dò bɛ̃̀ɛ̃ lɛ̀ lɛ́ Wálà lɛ́ e lɛ̀ía tóò lɛ mia là yia mɔ́ɔ̀ wɔ̃̀ mɔ̀ɔ, òó mɔ́ɔ̀ lee sí ɓo. Mi lɛ́ bɛ̀i lɛ à mɔ̀ é pɛ‐zɔ̃̀ɔ̃̀‐kɔ̀ e kéa sɔ̀lɔ̀ ɓoa, è à sɔ̀lɔ̀ ɓo.”

¹³Mia dò o nu nɔ́ɔ̀ɓé ká Zízɛ̀ píé kɛ é e kɔ̀ kpɔ́ o là, áà sɛ̀nɛ ɓò. Kɛɛ là tòà‐píé‐mìàa wa gèe míáa lɛ̀ɛ yékɛ̀ ó kɛ kíli.

¹⁴Kɛɛ Zízɛ̀ a gèe kélɛ̀, “Kà tó nɔ́ɔ̀ɓéa ó nu m píé. Yékɛ̀ ká o tèá nuù mɔ̀. Ƃii mia sùu o kéa, Wálà lɛ́ e lɛ̀ía, lɛ́ɛ̀ lo tóò o là.”

¹⁵E e kɔ̀ kpɔ́ o là, e là ló ɓo.

¹⁶Lúó doó káa, gɔ̃ doó e nu Zízɛ̀ píé, áà gèè à lɛ̀ɛ, “Tísɛ̀, wɔ̃́ yiè sùu kpɛɛ̀ lɛ́ lɛ m mɔ̀ ḿ kɛ, kɛ ḿ kɛ̀ɓe wɔ́lɔ́‐wɔ́lɔ́ sɔ̀lɔ̀ ɓo?”

¹⁷Zízɛ̀ a gèe à lɛ̀ɛ, “Mɛ́ e kɛ lɛ́ ì m wɛ̃́ĩ́‐lɔ̀ɔ kɛ̀ wɔ̃́ yiè mɔ́ɔ̀ wɔ̃̀ ká? Mi doó lɛ́ nɔ́ à sɔ̃̀ɔ̃ lɛ sɛ̀ɛ. É kɛ̀á ɓáà nàà í ló lɛ̀ lɛ́ kɛ̀ɓe lɛ yía mɔ̀ɔ, ì Wálà là lɔ́ɔ̀ɔ kṹ tã́ã̀.”

¹⁸A gèe à lɛ̀ɛ, “Lɔ́ɔ̀ɔ kpɛɛ̀ ká?” Zízɛ̀ a gèe kélɛ̀, “Yékɛ̀ í mi zɛ. Yékɛ̀ í wàà i ɓɛ́ĩ̀ gbɛɛ na píé kɛ́ì. Yékɛ̀ í kã̀ã ɓo. Yékɛ̀ í nɛ̀ kpɔ́ i ɓɛ́ĩ̀ gbɛɛ mɔ̀.

¹⁹Ì ɓɛ̀lɛyà nɔ i dàa wà i lèe o lɛ̀ɛ. Ɛ́ɛ̃́, i yà‐sɔ́nɔ́‐mìà zì lɔ̀‐kpɔ̀ i mɔ̀ɔ, lɛ à mɔ̀ é kɛ lɛ̀ zí i dìè lɔ̀ kpɔ́ɔ̀ lɛ à ká i mɔ̀ɔ lɛ́ ɓe.”

²⁰Gɔ̃‐nɛ̀fúa a gèe à lɛ̀ɛ, “Wɔ̃́ lɛ́ Wálà a gèe kília, maà séĩ́ kṹ tã́ã̀. Mɛ́ m kɔ̃́ɔ̃̀ lɛ tĩã́ à kɛ‐wɔ̃̀ mɔ̀?”

²¹Zízɛ̀ a gèe à lɛ̀ɛ kélɛ̀, “Ƃá nàá í kɛ kpeĩ fɛ́fɛ́ lea, lo í pɔɔ̀ séĩ́ lɛ́ o i kɛ̀lɛ̀ɛ lɔ̀ɔ̀ dɔ, ɓá pɛ̀lèe sí, ɓá nɔ mia lɛ́ pɛ wá o kɛ̀lɛ̀ɛ lɛ̀ɛ. Yé ɓaà kɛ kília, pɛ kpɔ́lɔ̀ bɛ̀iì lɛ́ɛ̀ lo kɛɛ̀ à ká i lɛ̀ɛ Wálà‐pà. Ƃáà kɛ̀á kília, ì nu kɔ́á tàà‐kíe‐píé kɛ.”

²²Lɛ̀ gɔ̃‐nɛ̀fúa e wɔ̃́ɔ maa, à zò e dà zízàá nyɔ́ɔ̀ɔ, áà lò. Ƃii e kɛ dóo mi kpànazɛ̀ kpó‐kpó ká.

²³Lɛ̀ e kɛ kília, Zízɛ̀ a gèe là tòà‐píé‐mìàa lɛ̀ɛ kélɛ̀, “Wánà‐wɔ̃̀ lɛ́ m̀ gèe ka lɛ̀ɛ ɓɛ. Lɛ́ɛ̀ lo kɛɛ̀ gágà kɛ mi kpànazɛ̀ é kɛ Wálà lɛ́ e lɛ̀ía zì tò‐mia‐là wì.

²⁴Zéniía, ḿm̀ gèe ka lɛ̀ɛ kélɛ̀, lɛ gágà kɛ mi kpànazɛ̀ é kɛ Wálà zì tò‐mia‐là wì, é dieá wìì lɛ́ ò si kĩ́ã́mòa dìè mià‐léĩ́ bũ‐yí‐pìà là.”

²⁵Lɛ̀ lɛ́ tòà‐píé‐mìàa o wɔ̃́ nìa maa, o lé kpó‐kpó paà e kɛá, wáà gèè kélɛ̀, “Yé aà kɛ kília, deĩ̀ kpó‐kpó lɛ́ à laà è bɛ̀i kɛɛ̀ à ká?”

²⁶Zízɛ̀ e lɛ̀ gɛ̃̀ o píé, áà gèè, “Wɔ̃́ e kéa, bɛ̀i wá mia mɔ̀ ó à kɛ. Kɛɛ bɛ̀i lɛ Wálà mɔ̀ kɛ é pɛ séĩ́ kɛ.”

²⁷Lɛ̀ e kɛ kília, Pílɛ̀ a gèe kélɛ̀, “Lɛ̀ gɛ̃̀, ko bɛ̃̀ɛ̃, kɔaà kã́ pɛ nɔ́ɔ fé lɛ̀ɛ, ko tópìà i píé. Mɛ́ lɛ à mɔ̀ é kɛ kò pɛá mɔṹ?”

²⁸Zízɛ̀ a gèe o lɛ̀ɛ kélɛ̀, “Wánà‐wɔ̃̀ lɛ́ m̀ gèe ka lɛ̀ɛ ɓɛ. Yé Mi Gbe aà yà là dɔ‐táŋáná kpànazɛ̀ ɓɛ là pɛ dɛɛ kɛ‐lùò káa, mia lɛ́ ka tò‐m‐píé‐mìà káa, ka bɛ̃̀ɛ̃, káà lo yàà dɔ‐táŋáná vũ̀ doó wɛ́lɛ́ pèèlɛ là, káà mɛ̀ĩ́‐sà dɔ̀ mia sùu doò do vũ̀ doó wɛ́lɛ́ pèèlɛ lɛ́ o Éézɛ̀lɛ̀‐mìà káa mɔ̀.

²⁹Ɛ́ɛ̃́ mia séĩ́ lɛ́ waà kã́ o pà, wà o lèe‐gé nì, ɛ̃́ɛ̃́ o dàa nì wà o lòóò nì, zéniía, wà nɔ́ɔ̀ ɛ̃́ɛ̃́ o píé luú nì mɔ̀ m mɔ́ɔ̀ wɔ̃̀ mɔ̀ɔ, óò lo à sɔ̀lɔ̀ ɓoò e kíe yí wũ doó, ɛ̃́ɛ̃́ kɛ̀ɓe wɔ́lɔ́‐wɔ́lɔ́ nɔɔ̀ lɛ́ɛ̀ lo kɛɛ̀á o lɛ̀ɛ.

³⁰Kɛɛ mia búnùzɛ̀ lɛ́ o líé dɛɛ káa, óò lo kɛɛ̀ zízàá, tó mia búnùzɛ̀ yé o zízàá dɛɛ káa, wáà kɛ̀ líé‐mìà ká.