Read Yamano Máfìù 21 Bible Online

Máfìù 21 - Yamano bible

Máfìù 21

¹Lɛ̀ o kɛ ɓɔpìà Zùlúsàlɛ̀ ká kɔ̀ɛ́ɛ, o nu lɛ̀ lɛ́ ò si Bɛ́fézì, lɛ́ e tɔ̃̀ũ̀ lɛ́ ò si Ɔ́lèa dĩ́ mɔ̀ɔ mɔ̀. Zízɛ̀ e là tòà‐píé‐mìàa pèèlɛ vɔ,

²áà gèè o lɛ̀ɛ, “Kà lo pɛ́lɛ lɛ́ e ka líé yia yí. Yé kaà ɓɔ nɔ́ yia, káà lo sòofàné gɛ̃̀ɛ̃̀ dɔ̀á e yèleèe zɛ̀ ká. À nyɔ̀nɔ́ lɛ́ɛ̀ lo kɛɛ̀ à píé. Kà o fóló, ká nu o ká m píé.

³Yé mi dò aà wɔ̃́ nɔ́ɔ fé gèe ka lɛ̀ɛ, kà gèe à lɛ̀ɛ kélɛ̀, ‘Ko Dàa‐mì láà nàà o ká.’ Yé aà kɛ nɔ́ kília, lɛ́ɛ̀ lo kã́ã̀ o mɔ̀.”

⁴À kɛɛ̀ e kɛá kíli kɛɛ wɔ̃́ lɛ́ dɔ̀‐Wálà‐lé‐là‐mìa a gèea é kɛ wánà zɛ̀. Wɔ̃́ a gèea lɛ́ e kélɛ̀,

⁵“Kà gèe Záyɔ̃̀‐pɛ̀lɛ̀ lɛ̀ɛ kéèé, Lɛ̀ gɛ̃̀, i líé‐sí‐mì lɛ nupìà i píé. Lɛ kpóló‐kpɔ̀‐mɔ̀ zɛ̀, ɛ̃́ɛ̃́ à yàà lɛ sòofàné là. Sòo e kília lɛ sòo gbɔ̃̀ũ̀ ká. Ɛ́ɛ̃́ lɛ sòofàné nyɔ̀nɔ́ ká.”

⁶Là tòà‐píé‐mìà o ló, o wɔ̃́ lɛ́ Zízɛ̀ a gèe o lɛ̀ɛ ó kɛɛ kɛ.

⁷O nu sòofànéa wà e nyɔ̀nɔ́ o ká. Míáa o wà sɔ‐là‐sɔ̀ káá sòoa là. Zízɛ̀ e yà gbaa à là.

⁸Mia kù gbùò zɛ̀ o wà sɔ káá píé zi gbùò mɔ̀. Mia dò bɛ̃̀ɛ̃ o yílí‐kɔ̀ kã́ píé, wáà o kàà zi gbùò mɔ̀.

⁹Mia kù lɛ́ o kɛ líéa, wà míá o kɛ tópìà à píé zízàáa, o gbɛ́ɛ́ wáà gèè, “Dèɓé Gbe, i sɛ́nɛ́ò. Lúà é kpɔ́ mi lɛ́ è nu ko Dàa‐mì tɔ́ yía mɔ̀. Kɔ̀à Wálà zúo gèe.”

¹⁰Lɛ̀ Zízɛ̀ e ɓɔ Zùlúsàlɛ̀ɛ, mia séĩ́ zò dɔɔ̀ e kɛá e gã̀ mɔ̀, wáà gèè, “Dé e ké ɓɛ?”

¹¹Mia kùa o à yí zṹ weeá kélɛ̀, “Dɔ̀‐Wálà‐lé‐là‐mì Zízɛ̀, lɛ́ è go Názàlɛ̀ lɛ́ e Gálàlíìa lɛ́ ɓɛ.”

¹²Zízɛ̀ e wàà sálà‐ɓò‐Wálà‐lɛ̀ɛ‐kà wì. E mia séĩ́ lɛ́ o kɛ pɛ lɔ̀ɔ̀ dɔpìà, ɛ̃́ɛ̃́ o yé o kɛ pɛ lɔ́pìà Wálà‐kà e kília wìa yí lúó. E téɓò lɛ́ mia o kɛ pɛlèe mɛ́ vɔ̀ɔpìà à làa nìɛ̀ à gã̀ e dɔ lɛ̀í. E pɛ nɔ́ doóa kɛ pɛ lɛ́ o kɛ yàpìà là, wáà tèŋè lɔ̀ɔ̀ dɔ̀ɔ ká.

¹³A gèe o lɛ̀ɛ, “À bɛ̃̀ɛ̃ɛ̃̀ lɛ Wálà là kíía yí kélɛ̀, ‘M̀ ká ɓɛ, óò lo à síì sɛ̀nɛ‐ɓòà‐wì‐kà.’ Kɛɛ ka à kɛpìà gbaa kã̀ã‐mìà bĩ̀ĩ̀pìà ká.”

¹⁴Mia nyìɛ káàa zɛ̀ wà mia kpɔ́lɔ̀ɔ zɛ̀ o nu à píé Wálà‐kàa wì, áà o là.

¹⁵Sálà‐ɓò‐Wálà‐mɔ̀‐mìà kpànazɛ̀, ɛ̃́ɛ̃́ Wálà kii‐dɔ‐mìàa o wɔ̃́ kpàlézɛ̀ lɛ́ e kɛ à kɛpìàa gɛ̃̀. Ɛ́ɛ̃́ o nɔ́ɔ̀ɓé gɛ̃̀ Wálà‐kàa wì, wáà gbɛ̀ɛ̀ weeá kélɛ̀, “Dèɓé Gbe, i sɛ́nɛ́ò.” Lɛ̀ o wɔ̃́ nì e kília gɛ̃̀ɛ, wɔ̃́ e o wàa à mɔ́ɔ̀ wɔ̃̀ mɔ̀.

¹⁶Lɛ̀ e kɛ kília, wa gèe Zízɛ̀ lɛ̀ɛ, “Wɔ̃́ ò gèea, ɓáà ma?” Zízɛ̀ a gèe kélɛ̀, “M̀m̀, ḿm̀ ma. Kéa, kàá Wálà kii yé e kéa gèe do? Ye lɛ́ e kélɛ̀, ‘Ƃaà nɔ́ɔ̀ɓé wà nɔ́ɔ̀ɓé dɛɛ nì tòlò, kɛ ó tɔ́‐ɓɔ nɔ Wálà lɛ̀ɛ lɛ̀ zí wáá nɔɔ̀áa lɛ́ ɓe.’ ”

¹⁷Zízɛ̀ e gó gbaa o píé pɛ́lɛɛ yí, e ló gbaa Bɛ́fénì, kɛ é yìì yi.

¹⁸Lɛ̀ e kɛ nupìà e mɛ̀ĩ́ làapíé sɛ́lɛɛ yía, lɔ̀ɔ e kɛ à kɛpìà.

¹⁹E féè‐yìlì doó gɛ̃̀ dɔ̀á zi sɛ̃́ĩ́, e ló à píé. Kɛɛ lɛ̀ɛ́ gbaa pɛ gbɛɛ gɛ̃̀ à mɔ̀, é kã́ à lɛ́ɛ́ dòló mɔ̀ɔ ká. Lɛ̀ e kɛ kília, a gèe à lɛ̀ɛ, “Yékɛ̀ í ɓa gbɛɛ ɓo gbaa.” Lɛ̀ e kɛ nɔ́ kília, féè‐yìlìa e kpáa kṹ.

²⁰Lɛ̀ là tòà‐píé‐mìàa o wɔ̃́ sùua gɛ̃̀ɛ, o lé kpó‐kpó paà e kɛá, wáà gèè, “E dɔ kpɛɛ̀ lɛ́ féè‐yìlìa e ga nɔ́ ké wànà le ɓe?”

²¹Zízɛ̀ a gèe o lɛ̀ɛ, “Wánà‐wɔ̃̀ lɛ́ m̀ gèe ka lɛ̀ɛ ɓɛ. Zò‐dɔ̀à‐mɔ̀ é kɛá ka yí, lɛ́ zò pèèlɛ wá ka géa, bɛ̀i lɛ́ɛ̀ lo kɛɛ̀ ka mɔ̀ kɛ ká wɔ̃́ lɛ́ ma kɛ yílí e kéa káa kɛ. Ye wá bɛ̃̀ɛ̃ wɔ̃́ e kéa doó ká. Kɛɛ káà lo vɔ̀ à gèeè tɔ̃̀ũ̀ e kéa lɛ̀ɛ, ‘Wɛ̀lɛ̀ í ló, í i dìè dùò mɛ̀ĩ́ bà,’ tó áà ka wéè kɛ̀.

²²Pɛ nɔ́ɔ fé lɛ́ kà pɛ̃, ɛ̃́ɛ̃́ lɛ́ kà sɛ̀nɛ ɓo à wɛ̃́ĩ̀a, káà lo à sɔ̀lɔ̀ ɓoò, é kɛ̀á zò‐dɔ̀à‐mɔ̀ lɛ ka yía ká.”

²³Zízɛ̀ e yɛ́ e zí, e nu sálà‐ɓò‐Wálà‐lɛ̀ɛ‐kàa wì. Lɛ̀ e kɛ pɛ zɔ̃̀ɔ̃̀pìàa, sálà‐ɓò‐Wálà‐mɔ̀‐mìà kpànazɛ̀ ɛ̃́ɛ̃́ Zúù‐mìà dìè‐dìè vɔ̀ o nu à píé, wáà wɛ̃́ĩ́‐lɔ̀ɔ kɛ̀ kélɛ̀, “Yíkɛ̀ gáàa kpɛɛ̀ zɛ̀ lɛ́ e i kɛ̀lɛ̀, lɛ́ ì wɔ̃́ sùu e kéa kɛ̀á ɓɛ? Deĩ̀ lɛ́ e yíkɛ̀ gáàa sùua nɔ i lɛ̀ɛ?”

²⁴Zízɛ̀ e à yí ɓo o lɛ̀ɛ kélɛ̀, “Kà tó ḿ wɛ̃́ĩ́‐lɔ̀ɔ kɛ ka yee ka kɛ̀lɛ̀. Káà à yí ɓòá m lɛ̀ɛ, ḿm̀ lo yíkɛ̀ gáàa lɛ́ m̀ wɔ̃́ sùu e kéa kɛ̀ à káa, zɔ̃̀ɔ̃̀ ka lɛ̀ɛ.

²⁵Dé a gèe Zɔ̃̀ɔ̃́ lɛ̀ɛ é mia bàtáì kɛ? Wálà lɛ, ɛ̃́ɛ̃́ mia lɛ?” O gbɛ̃̀ gbaa, wáà tèé dà o kíe nì ká weeá kélɛ̀, “Yé kɔaà gèe Wálà lɛɛ, lɛ́ɛ̀ lo à gèeè ko lɛ̀ɛ, ‘Mɛ́ mɔṹ e kɛ lɛ́ kàá wɔ̃́ lɛ́ Zɔ̃̀ɔ̃́ a gèea gɛ̃̀ wánà ká?’

²⁶Ɛ́ɛ̃́ kòó bɛ̀i à gèeè mia lɛ, ɓii kóò tùò wɔ̃́ lɛ́ míáa ò lo à kɛɛ̀ ko káa mɔ́ɔ̀ wɔ̃̀ mɔ̀. Ƃii o séĩ́ o kɛɛ̀ lɛ, wáà yí dɔ̀ kélɛ̀ Zɔ̃̀ɔ̃́ e kɛ dɔ̀‐Wálà‐lé‐là‐mì ká wánà ká.”

²⁷Yé e kɛ kília, wa gèe Zízɛ̀ lɛ̀ɛ, “Kòó à yí dɔ.” A gèe o lɛ̀ɛ, “M̀ḿ ló mɔṹ yíkɛ̀ gáàa lɛ́ m̀ wɔ̃́ sùu e kéa kɛ̀áa, zɔ̃̀ɔ̃̀ ka lɛ̀ɛ.

²⁸“Ka bɛ̃̀ɛ̃, káà ka yɛ́lɛ́ tàà kpɛ? E kɛ gɔ̃ doó lɛ́ à gbe nì o kɛ pèèlɛɛ ká. E ló e gbe gbùò‐mìa píé, áà gèè à lɛ̀ɛ, ‘M gbe, lo pɛ́nɛɛ yɛɓo kɛɛ̀ nyɛ́nɛ̀ĩ̀.’

²⁹A gèe e dàa lɛ̀ɛ kélɛ̀, ‘M̀ḿ zṹ.’ Kɛɛ lɛ̀ e kɛɛ, e e wúú mɛ́ vɔ̀ɔ, e ló gbaa.

³⁰Gɔ̃́ɛɛ e ló e gbe nyɔ̀nɔ́‐mìa bɛ̃̀ɛ̃ píé, e wɔ̃́ nɔ́ doóa gèe à lɛ̀ɛ. À bɛ̃̀ɛ̃, a gèe e dàa lɛ̀ɛ, ‘M̀m̀, m dàa, ḿm̀ lo lóò.’ Kɛɛ lɛ̀ɛ́ gbaa ló.

³¹Mia pèèlɛ o kília, dé e wɔ̃́ lɛ́ à dàa a naa à káa kɛ?” Wa gèe kélɛ̀, “Mi dìè‐mìa lɛ.” Zízɛ̀ a gèe o lɛ̀ɛ, “Wánà‐wɔ̃̀ lɛ́ m̀ gèe ka lɛ̀ɛ ɓɛ. Ƃo‐pɛ̀ ɓo‐mìà wà nɛ́ĩ̀‐zɛ‐lòà o dɔpìà líé ka mɔ̀, wáà kɛ̀ Wálà zì tò‐mia‐là wì.

³²Ƃii Zɔ̃̀ɔ̃́ e nu ka píé, áà zi lɛ́ lɛ kpeĩ ká tó à píéa zɔ̃̀ɔ̃̀ ka lɛ̀ɛ, kɛɛ kàá gbaa à wéè gɛ̃̀ wánà ká. Kɛɛ ɓo‐pɛ̀ ɓo‐mìà wà nɛ́ĩ̀‐zɛ‐lòà o à wéè gɛ̃̀ wánà ká. Yé bɛ̃̀ɛ̃ ka wɔ̃́ e kília gɛ̃̀ɛ, kàá gbaa ka yɛ́lɛ́‐táá mɛ́ vɔ̀ɔ, kɛ ká à wéè gɛ̃̀ wánà ká.

³³“Kà ka tóó dɔ pĩ̀ã̀ dò mɔ̀ zeĩ́. E kɛ gɔ̃ lɛ́ luú e kɛ à kɛ̀lɛ̀ɛ ká. E ɓɛ̀lɛ̀‐wɛ́lɛ́ lɛ́ ò à ɓɛɛ yíí mia nyɛ́nɛ̀ĩ̀ kpɔ́. E gàlà ɓo à mɔ̀. E gùlù dò kã́ lɛ̀ lɛ́ ò lo taa‐pɛ̀ e kília ɓɛɛ yíí ɓoò à lɛ̀ mɔ̀ɔ mɔ̀. E kàmà ɓo. E nyɛ́nɛ̀ɛ kpɔ́ mia dò kɔ̀ là, kɛ ó o nyìɛ kɛ à mɔ̀. Yé e kɛ kília, e ló gbaa táá mɔ̀ lɛ̀ gbèkèni mɔ̀.

³⁴Lɛ̀ pɛ́ e kília ɓa‐lùò e ɓɔɔ, gɔ̃́ɛɛ e là lùò nì vɔ mia lɛ́ o kɛ o nyìɛ kɛpìà nyɛ́nɛ̀ɛ mɔ̀ɔ píé, kɛ ó nu à zì ká.

³⁵Nyìɛ‐kɛ̀‐nyɛ́nɛ̀ɛ‐mɔ̀‐mìàa o lùò vɔ̀ɔ kṹ, o o doó‐mì mɛ̀, ɛ̃́ɛ̃́ wa doó‐mì zɛ, tó wa doó‐mì bɛ̃̀ɛ̃ pá gɛ̀lɛ̀ ká.

³⁶Zéniía, gɔ̃́ɛɛ e lùò vɔ̀ búnùzɛ̀ vɔ zeĩ́, é dieá míá e o vɔ kpáa là. O wɔ̃́ nɔ́ doóa kɛ o ká.

³⁷À líé‐nyɛ‐mɔ̀ɔ gɔ̃́ɔ e e gbe vɔ o píé. A gèe kélɛ̀, ‘Óò lo ɓɛ̀lɛyà nɔɔ̀ m gbéa lɛ̀ɛ.’

³⁸Kɛɛ yé nyìɛ‐kɛ̀‐nyɛ́nɛ̀ɛ‐mɔ̀‐mìàa o à gbéa gɛ̃̀ɛ, wa gèe o kíe nì lɛ̀ɛ, ‘Mí à dàa là pɔɔ̀ è lo tóò à kɛ̀lɛ̀ɛ, lɛ́ e kéa. Kɔ̀à à zɛ wɛ̀. Yé aà kɛ kília, pɛ́ è lo tóò à kɛ̀lɛ̀ɛ, kóò lo à sɔ̀lɔ̀ ɓoò.’

³⁹Yé e kɛ kília, wa kṹ, o gó à ká nyɛ́nɛ̀ɛ mɔ̀, wa zɛ.

⁴⁰“Yé nyɛ́nɛ̀ĩ̀ e kília dàa‐mì aà nua, lɛ́ɛ̀ lo à kɛɛ̀ kpɛ nyìɛ‐kɛ̀‐nyɛ́nɛ̀ɛ‐mɔ̀‐mìàa ká?”

⁴¹Wa gèe à lɛ̀ɛ, “Lɛ́ɛ̀ lo mia kɛ‐pɛ̀ yɔɔ zɛ̀ o kília zɛɛ̀ wɛlɛ yɔɔ zɛ̀. Ɛ́ɛ̃́ lɛ́ɛ̀ lo gbaa nyɛ́nɛ̀ɛ kpɔ́ɔ̀ mia yé lɛ́ ò lo à zì pɛ ɓɛɛ nɔɔ̀ yé aà ɓaa káa lɛ̀ɛ.”

⁴²Zízɛ̀ a gèe o lɛ̀ɛ, “Wɔ̃́ lɛ́ Wálà là kíía à gèea, kàá wɔ̃̀ gèe do? Ye lɛ́ e kélɛ̀, ‘Gɛ̀lɛ̀ lɛ́ ká dɔ‐mìà wa dà o kɔ̀ mɛ̀ĩ́a, aà kɛ gbaa gɛ̀lɛ̀ kpànazɛ̀ ká, é dieá gɛ̀lɛ̀ séĩ́ là. Wɔ̃́ e kéa, ko Dàa‐mì lɛ́ e à kɛɛ. Lɛ wɔ̃́ kpàlézɛ̀ ká ko lɛ̀ɛ.’

⁴³“À mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ, óò lo lɛ̀ lɛ́ Wálà tóò lɛ mia là yia kṹũ̀ ka kɛ̀lɛ̀, tó wa nɔ mia lɛ́ ò lo dɔɔ̀ à là, áà ɓà e ɓɛɛ káa kɛ̀lɛ̀. [

⁴⁴Mi lɛ́ è lo pèlè gɛ̀lɛ̀ e kéa làa, mí e kília lɛ́ɛ̀ lo wɛ̃̀ĩ‐wɛ̃́ĩ̀, e gó e kíe lé. Ɛ́ɛ̃́ yé gɛ̀lɛ̀ e kília aà dà mi dò làa, lɛ́ɛ̀ lo à tɛ̀lɛ‐tɛ́lɛ̀, tó e mùnú kã́.]”

⁴⁵Sálà‐ɓò‐Wálà‐mɔ̀‐mìà kpànazɛ̀ ɛ̃́ɛ̃́ Fálásíì‐mìàa o pĩ̀ã̀ lɛ́ Zízɛ̀ a vɔɔ ma. Wa yí dɔ kélɛ̀ e kɛ wéépìà o gbĩ mɔ̀.

⁴⁶Lɛ̀ e kɛ kília, wa kɛ‐zì naa ó à kṹ. Kɛɛ o kɛ túópìà mia gbũa lɛ̀ɛ, ɓii míáa o Zízɛ̀ sí dɔ̀‐Wálà‐lé‐là‐mìa mɔ́ɔ̀ wɔ̃̀ mɔ̀.