Read Yamano Máfìù 26 Bible Online

Máfìù 26 - Yamano bible

Máfìù 26

¹Lɛ̀ Zízɛ̀ e nyɛ wɔ̃́ nì e kéa séĩ́ gèeè mɔ̀ɔ, a gèe là tòà‐píé‐mìà lɛ̀ɛ kélɛ̀,

²“Káà yí dɔ kélɛ̀ Dìè‐mia‐là Kpílìa lúó aà tó pèèlɛ kɛ é ɓɔ. Ɛ́ɛ̃́ óò lo Mi Gbe nɔɔ̀ mia lɛ̀ɛ kɛ ó à pá nélè ká kɔ́lɔ́sì mɔ̀.”

³Lɛ̀ e kɛ kília, sálà‐ɓò‐Wálà‐mɔ̀‐mìà kpànazɛ̀ ɛ̃́ɛ̃́ Zúù‐mìà dìè‐dìè vɔ̀ɔ o pá o kíe mɔ̀ Káyáfà, lɛ́ e kɛ sálà‐ɓò‐Wálà‐mɔ̀‐mìà wũ‐là‐mì káa, yà‐pìà.

⁴O wéé o kíe nì wéè mɔ̀ kɛ ó Zízɛ̀ kṹ mìàà le, ó zɛ.

⁵Kɛɛ wa gèe, “Yékɛ̀ kɔ́á kɛ kpílìa lúó ká, yékɛ̀ mia ó nìɛ̀ kɔa mɔ̀.”

⁶Lɛ̀ Zízɛ̀ e kɛ Sáímɔ̀, lɛ́ gbéè e kɛ à mɔ̀ɔ, píé kɛ́ì Bɛ́fénìa,

⁷lee doó e nu à píé kpòóò lɛ́ à kɛɛ̀ e kɛá álàbásà‐gɛ̀lɛ̀ káa ká. À paà e kɛá tààlà nyɔ́nɔ́ sɔ̃̀ɔ̃́ gbùò zɛ̀ ká. E nyɔ́nɔ́ɔ káá Zízɛ̀ wĩĩ́ lɛ̀ lɛ́ Zízɛ̀ e kɛ pɛ ɓèlèpìàa ká.

⁸Là tòà‐píé‐mìà o wɔ̃́ e kília gɛ̃̀. Wɔ̃́ e o wàa ù kɛ́ a ɓo kília mɔ́ɔ̀ wɔ̃̀ mɔ̀. Wa gèe kélɛ̀, “Mɛ́ e kɛ lɛ́ ò pɛ́ e kéa yí sìè ké?

⁹Ƃii nyɔ́nɔ́ e kéa, wáá lɔ̀ɔ̀ nì dɔɔ̀ pɛlèe gbùò kpó‐kpó mɔ̀, tó wa sí, wa nɔ mia lɛ́ pɛ wá o kɛ̀lɛ̀ɛ lɛ̀ɛ.”

¹⁰Zízɛ̀ e wɔ̃́ lɛ́ o kɛ à gèepìàa dɔ. A mɔ́ɔ̀ à gèe ɓo o lɛ̀ɛ kélɛ̀, “Mɛ́ e kɛ lɛ́ kà lééa wèĩ́ nàà ɓɛ? Ƃii wɔ̃́ lɛ́ lééa aà kɛ m lɛ̀ɛ, lɛ sɛ̀ kpó‐kpó ɓo.

¹¹Ƃii kà mia lɛ́ pɛ wá o kɛ̀lɛ̀ɛ nì, káà lo kɛɛ̀ tĩã́ zèe. Kɛɛ m̀ḿ ló kɛɛ̀ ka píé zèe teele.

¹²Wɔ̃́ lɛ́ lééa a kɛɛ, lɛ́ e tɔ́ e nyɔ́nɔ́ɔ káá m gbĩ‐kpàla là à pɛ̀ kɛɛ̀ ká, kɛ ó m bĩ̀ĩ̀.

¹³Wánà‐wɔ̃̀ lɛ́ m̀ gèe ka lɛ̀ɛ ɓɛ. Lɛ̀ nɔ́ɔ fé lɛ́ ò lo wɔ̃́ làṹ yiè e kéa gèeè yi lòũ̀ ká kpóṹ là zèe lɛ̀ɛ tɛ̃̀ɛ̃́ɛ mɔ̀ɔ, óò lo wɔ̃́ lɛ́ a kɛɛ gèeè, kɛ é mia zò vùò à mɔ́ɔ̀ wɔ̃̀ ká.”

¹⁴Lɛ̀ e kɛ kília, tòà‐píé‐mìà vũ̀ doó wɛ́lɛ́ pèèlɛɛ doó‐mì lɛ́ ò si Zúdà Ɛ̀sɛ̀kélìàa, e ló sálà‐ɓò‐Wálà‐mɔ̀‐mìà kpànazɛ̀ píé,

¹⁵áà gèè kélɛ̀, “Mɛ́ kà lo à nɔɔ̀ m lɛ̀ɛ yé maà Zízɛ̀ nɔ ka lɛ̀ɛ ká?” Lɛ̀ e kɛ kília, o pɛlèe púlú gbá vũ̀ yààka lóní, wa nɔ à lɛ̀ɛ.

¹⁶É kã́ lúó e kília mɔ̀ɔ, e kɛ à kɛ‐zì naapìà kɛ é Zízɛ̀ lé gó o lɛ̀ɛ.

¹⁷Belè lɛ́ belè‐fɔ̀ɔ‐pɛ̀ wá à bàa, zì kpílì lúó bèĩzɛ̀ káa, Zízɛ̀ là tòà‐píé‐mìàa o nu à píé, wáà gèè kélɛ̀, “Mɛ́ɛ̀ zàá lɛ́ ɓà nàà kó léɓèlè pɛ̀ kɛ i lɛ̀ɛ ɓá ɓèlè Dìè‐mia‐là Kpílìa wɛ̃́ĩ̀?”

¹⁸Zízɛ̀ a gèe o lɛ̀ɛ, “Kà lo pɛlɛí, ká ló gɔ̃́ e yía píé, ká gèe à lɛ̀ɛ kélɛ̀, ‘Tísɛ̀ a gèe kéèé, M zì lúó aà ɓɔ. Kò m̀ tòà‐píé‐mìà kóò lo Dìè‐mia‐là Kpílìa kpɛ̀ɛ̀ yɛ́ɛ̀ i píé kɛ́ì.’ ”

¹⁹Tòà‐píé‐mìàa o wɔ̃́ kɛ lɛ̀ zí Zízɛ̀ a gèeá o lɛ̀ɛ lɛ́ ɓe. Yé e kɛ kília, o Dìè‐mia‐là Kpílì mɔ́ɔ̀ léɓèlèa pɛ̀ kɛ.

²⁰Lɛ̀ nyɛ́ŋɛ̀ĩpíé e kɛɛ, Zízɛ̀ wà là tòà‐píé‐mìà vũ̀ doó wɛ́lɛ́ pèèlɛɛ o yà tã́ã̀ kɛ ó pɛ ɓèlè.

²¹Lɛ̀ o kɛ o lé ɓèlèpìà gbaa, Zízɛ̀ a gèe kélɛ̀, “Wánà‐wɔ̃̀ lɛ́ m̀ gèe ka lɛ̀ɛ ɓɛ. Ka doó‐mì lɛ́ɛ̀ lo m lé góò.”

²²Là tòà‐píé‐mìàa o zò e dɔ e gã̀ mɔ̀, o gbɛ̃̀ gbaa, wáà gèè Zízɛ̀ lɛ̀ɛ tá‐tà‐tá le kélɛ̀, “M Dàa‐mì, ḿ gɔ̃̀, ma wáá ká?”

²³Zízɛ̀ a gèe zeĩ́ kélɛ̀, “Mi lɛ́ kò ye kò belè wàà kɔ̀ɛ̀ doó yí e kéa, lɛ́ è lo m lé góòa.

²⁴Mi Gbe lɛ́ɛ̀ lo gaà, lɛ̀ zí nɔ́ à bɛ̃̀ɛ̃ɛ̃̀ lɛ à ká Wálà‐kii yía lɛ́ ɓe. Kɛɛ gɔ̃ lɛ́ è lo à lé góòa, é ké nìé, gɔ̃́ e kília mɔ́ɔ̀ wɔ̃̀ lɛ́ɛ̀ lo kɛɛ̀ yéĩ̀zɛ̀ò. Áá kɛɛ̀ sɛ̀ gɔ̃́ e kília lɛ̀ɛ, è kɛ̀á òó gbaa à yea ká.”

²⁵Zúdà lɛ́ e à lé góa, a gèe à lɛ̀ɛ, “Tísɛ̀, ḿ gɔ̃̀, ma wáá ká?” Zízɛ̀ a gèe kélɛ̀, “Zí ɓa gèe à káa lɛ.”

²⁶Lɛ̀ o kɛ pɛ ɓèlèpìàa, Zízɛ̀ e belè sí, e Wálà zúo ɓo, a kpuú yɛ́ kélé kélé, áà nɔ̀ là tòà‐píé‐mìàa lɛ̀ɛ, áà gèè, “Kà à sí, ká ɓèlè. M gbĩ‐kpàla lɛ́ ɓɛ.”

²⁷Zeĩa, e kɔ̀ɛ̀ɛ sí, e Wálà zúo ɓo, a sí, a dɔ̀ kɛ o kɛ̀lɛ̀, áà gèè, “Ka séĩ́, kà à mi.

²⁸M léà lɛ́ e ké ɓɛ. Ye lɛ́ e Wálà zì wè‐dɔ‐wèa wɛ́lɛ́ káa. Lɛ́ɛ̀ lo káà tã́ã̀ mia búnùzɛ̀ wɛ̃́ĩ̀, kɛɛ o kɛ‐wɔ̃̀ yɔɔ é ɓo o wũ mɔ̀.

²⁹Ḿm̀ gèe ka lɛ̀ɛ, m̀ḿ ló gbaa ɓɛ̀lɛ̀‐wɛ́lɛ́ ɓɛɛ yíí e kéa miì, é tóá kíli lúó lɛ́ kɔ̀à ɓi nì kɔ̀à lo à yíí dɛɛ miì à ká, lɛ̀ lɛ́ m Dàa tóò lɛ mia là yia mɔ̀ɔ é ɓɔ.”

³⁰Yé e kɛ kília, o tã́ doó ɓo, o ló gbaa tɔ̃̀ũ̀ lɛ́ ò si Ɔ́lèa mɔ̀.

³¹Lɛ̀ e kɛ kília, Zízɛ̀ a gèe o lɛ̀ɛ, “Bĩ́ nɔ́ e kéa míàa, ka séĩ́ káà lo kã́ã̀ m mɔ̀, m tó m doó ká. Ƃii à bɛ̃̀ɛ̃ɛ̃̀ lɛ Wálà kii yí kélɛ̀, ‘Wálà lɛ́ɛ̀ lo ɓáá vɔ̀ líé‐sí‐mì zɛɛ̀, tó ɓáá kù e kília bɛ̃̀ɛ̃ o wɛ̃̀ĩ gbaa.’

³²Kɛɛ yé maà wɛ̀lɛ̀ ga kɛ̀lɛ̀ɛ, ḿm̀ lo dɔɔ̀ ka mɔ̀ líé, m ló Gálàlíì.”

³³Pílɛ̀ a gèe Zízɛ̀ lɛ̀ɛ, “Mia yé o tóa, o séĩ́ ó kã̀ã́ i mɔ̀ɔ, ma ye m̀ḿ ló kã́ gbɛɛ ɓoò i mɔ̀.”

³⁴Zízɛ̀ a gèe à lɛ̀ɛ, “Wánà‐wɔ̃̀ lɛ́ m̀ gèe i lɛ̀ɛ ɓɛ. Bĩ́míà téé‐tèè e ké ɓɛ, kɛɛ tɔ̀ɔ̀ é tĩã́ wéèa, ɓi kpó‐kpó íì lo à gèeè e kíe yí yààka kélɛ̀ ìí m dɔ.”

³⁵Pílɛ̀ a gèe à lɛ̀ɛ, “Ó kɛ̀á ó kò ɓi ko zɛ bɛ̃̀ɛ̃, m̀ḿ ló à gèeè m̀ḿ i dɔ.” Tòà‐píé‐mìàa séĩ́ o wɔ̃́ nɔ́ doó e kília gèe.

³⁶Lɛ̀ e kɛ kília, Zízɛ̀ wà là tòà‐píé‐mìàa o ló lɛ̀ lɛ́ ò si Gɛ̀sɛ́mɛ́nìa mɔ̀. Zízɛ̀ a gèe o lɛ̀ɛ, “Kà yà nɔ̀ɔɔ̀ ké, lɛ̀ lɛ́ m lópìà dĩ̀ĩ ké sɛ̀nɛ ɓopìàa ká.”

³⁷Zízɛ̀ e Pílɛ̀ wà Zɛ́bɛ́dìì gbe nì pèèlɛɛ o sí, e ló o ká. Lɛ̀ e ló o káa, Zízɛ̀ zò e gbɛ̃̀ gbaa, áà kɛ̀ à gé yéĩ̀zɛ̀, ɛ̃́ɛ̃́ áà mɛ̀ à mɔ̀.

³⁸Lɛ̀ e kɛ kília, a gèe o lɛ̀ɛ, kélɛ̀, “Zò‐dà‐zízàá nì lɛ́ lɛ m mɔ̀ɔ, lɛ ɓúópìà m zɛɛ̀. Kà tó nɔ̀ɔɔ̀ ké, kɔ́á yà kɔa nyìɛ́.”

³⁹E ló líé e ɓéĩ́ ká, e pèlè e gí là, áà sɛ̀nɛ ɓò weeá kélɛ̀, “M Dàa, é kɛ̀á à kɛ‐zì lɛ ɓea, wɔ̃̀ nyɔ́ɔ̀ɔ kɔ̀ɛ̀ e kéa, ì à kɛ é m mɛ́ kpɔ́. Kɛɛ ì i dìè nàà‐ká‐wɔ̃̀ kɛ, kɛɛ yékɛ̀ í m nàà‐ká‐wɔ̃̀ kɛ.”

⁴⁰Yé e kɛ kília, Zízɛ̀ e yɛ́ e zí, e nu là tòà‐píé‐mìà yààkaa gɛ̃̀ɛ̃̀ yi bà. A gèe Pílɛ̀ lɛ̀ɛ, “Yée, kàá bɛ̀i yàà ka nyìɛ́ áwà doó fèle yee mɔ̀ m sɔ́nɔ́?

⁴¹Kà ka yɛ́lɛ́ kɛ ka dìè mɔ̀, káà sɛ̀nɛ ɓò, yékɛ̀ yí‐dã́‐wɔ̃̀ é ɓɔ ka mɔ̀. Ka zò yɛɛ̀ lɛ ka lɛ̀ɛ, kɛɛ ka gbĩ‐kpàla yí lɛ́ɛ̀ ga.”

⁴²Zízɛ̀ e ló lɛ̀ dò mɔ̀ zeĩ́, áà sɛ̀nɛ ɓò weeá kélɛ̀, “M Dàa, é kɛ̀á kɔ̀ɛ̀ e kéa lɛ̀ɛ́ bɛ̀i m mɛ́ kpɔ́ɔ̀ lɛ m mɔ̀ ḿ pɛ mi à yí téé‐tèèa, i zì nàà‐ká‐wɔ̃̀ è kɛ.”

⁴³E yɛ́ zeĩ́ e zí, e nu là tòà‐píé‐mìàa gɛ̃̀ɛ̃̀ yi bà, ɓii o nyìɛ‐kèlè e kɛ gbíínia mɔ́ɔ̀ wɔ̃̀ mɔ̀.

⁴⁴Zízɛ̀ e gó o píé zeĩ́, e ló, e sɛ̀nɛ kpolà yààka zɛ̀ ɓo zeĩ́, áà wɔ̃́ nɔ́ doóa gèè.

⁴⁵Lɛ̀ e kɛ kília, e yɛ́ zeĩ́ e zí, e ló là tòà‐píé‐mìàa píé, áà gèè o lɛ̀ɛ, “Ka tĩã́ ka fĩ́ĩ́ dɔpìà, ɛ̃́ɛ̃́ ka tĩã́ yi zɛpìà? Kà lɛ̀ gɛ̃̀, lúó aà ɓɔ à mɔ̀ gbaa. Waà Mi Gbe dɔ̀ kɛ kɛ‐wɔ̃̀ yɔɔ kɛ‐mìà kɛ̀lɛ̀ gbaa.

⁴⁶Kà wɛ̀lɛ̀, kɔ́á ló. Kà lɛ̀ gɛ̃̀. M lé‐gó‐mìa gɛ̃̀ e ké.”

⁴⁷Zízɛ̀ e kɛ tĩã́ wéépìà lɛ̀ Zúdà, lɛ́ e kɛ là tòà‐píé‐mìà vũ̀ doó wɛ́lɛ́ pèèlɛɛ o doó‐mì káa, e ɓɔ à mɔ̀ɔ ká. Mia kù gbùò zɛ̀ lɛ́ gèlè‐gɔ̃‐làà, ɛ̃́ɛ̃́ mia mɛ̀‐yìlì‐kpuú nì e kɛ o kɛ̀lɛ̀ɛ, Zúdà e kɛ o bà wáà nù. Míá o kília, sálà‐ɓò‐Wálà‐mɔ̀‐mìà kpànazɛ̀ ɛ̃́ɛ̃́ Zúù‐mìà dìè‐dìè vɔ̀ lɛ́ o o vɔɔ.

⁴⁸Mí è lo Zízɛ̀ nɔɔ̀ mia lɛ̀ɛ aà gèe míáa lɛ̀ɛ líé kélɛ̀ lɛ́ɛ̀ lo Zízɛ̀ zɔ̃̀ɔ̃̀ o lɛ̀ɛ. A gèe, “Gɔ̃ lɛ́ m̀ lo lóò ḿ m bè gbɛ̃̀ à kpéĩ́ mɔ̀ɔ, kɛɛ à ye lɛ. Kà kṹ.”

⁴⁹Lɛ̀ Zúdà e ɓɔɔ, e ló Zízɛ̀ píé kpeĩ le, áà gèè à lɛ̀ɛ, “Tísɛ̀, i túó,” áà e bè gbɛ̃̀ à kpéĩ́ mɔ̀.

⁵⁰Zízɛ̀ a gèe à lɛ̀ɛ, “M ɓɛ́ɛ, wɔ̃́ i nu à wɛ̃́ĩ̀a, à kɛ.” Lɛ̀ e kɛ kília, o nu, o wí Zízɛ̀ mɔ̀, wa kṹ gbaa.

⁵¹Yé e kɛ nɔ́ kília, mia lɛ́ wà Zízɛ̀ nì o kɛ yía, doó‐mì e là gèlè‐gɔ̃‐làà gã́ã́ e kéĩ́, e sálà‐ɓò‐Wálà‐mɔ̀‐mìà wũ‐là‐mì là lùò yà à ká e tóó mɔ̀. A tóó kã́ pɛ̃ĩ le.

⁵²Lɛ̀ e kɛ kília, Zízɛ̀ a gèe à lɛ̀ɛ, “Ƃà lààa wàà e kéĩ́, ɓii mia séĩ́ lɛ́ ò làà sia, óò lo gaà làà kolo là.

⁵³Ìí à yí dɔ kélɛ̀ ḿm̀ bɛ̀i à mɔ̀ ḿ mɛ́ĩ́ ɓo m Dàa píé, kɛ é gbũ m mɔ̀, ɛ̃́ɛ̃́ tó e là vɔ‐mìà vɔ m lɛ̀ɛ nɔ́ zá le? Ɛ́ɛ̃́ vɔ‐mìà è lo o vɔɔ̀ɔ diè lɛ́ɛ̀ lo kɛɛ̀á vɔ‐mìà kù vũ̀ doó wɛ́lɛ́ pèèlɛ là.

⁵⁴Kɛɛ yé aà kɛ kília, zi sùu kpɛɛ̀ lɛ́ mɔṹ Wálà kii lɛ̀ yé e à gèe lɛ à mɔ̀ wɔ̃́ e kéa é kɛ m káa, è lo kɛɛ̀á wánà zɛ̀?”

⁵⁵Lɛ̀ e kɛ kília, Zízɛ̀ e mɛ́ĩ́ ɓo mia kùa lɛ̀ɛ weeá kélɛ̀, “Káà nu gèlè‐gɔ̃‐làà wà mia mɛ̀‐yìlì‐kpuú nì ká, káà nù m kṹũ̀ à ká, lɛ̀ mi lɛ́ è nu mi dà‐luú‐là zɛ̀ kṹũ̀? Lúó séĩ́ káa, m kɛ yàá sálà‐ɓò‐Wálà‐lɛ̀ɛ‐kàa wì, máà pɛ zɔ̃̀ɔ̃̀. Kɛɛ kàá gbaa m kṹ.

⁵⁶Kɛɛ wɔ̃́ nì e kéa séĩ́ lɛ́ɛ̀ kɛ̀, kɛ wɔ̃́ lɛ́ dɔ̀‐Wálà‐lé‐là‐mìàa wa bɛ̃̀ɛ̃ Wálà‐kiia yía, é kɛ wánà zɛ̀.” Lɛ̀ e kɛ kília, là tòà‐píé‐mìàa séĩ́ o kã́ à mɔ̀, wáà wà ló ɓò.

⁵⁷Mia lɛ́ o Zízɛ̀ kṹa, o ló à ká Káyáfà, lɛ́ e kɛ sálà‐ɓò‐Wálà‐mɔ̀‐mìà wũ‐là‐mì káa píé. Wálà kii‐dɔ‐mìà wà mia dìè‐dìè vɔ̀ o páà e kɛá o kíe mɔ̀ yi.

⁵⁸Pílɛ̀ e kɛ Zízɛ̀ ká gbèkèni, áà tò à píé, e ló gbaa, e ɓɔ sálà‐ɓò‐Wálà‐mɔ̀‐mìà wũ‐là‐mìa píé‐dɔ‐gàlà mɔ̀. E wàà gbaa gàlàa yí, e yà gbaa gɔ̃́ e kília nyìɛ‐kɛ̀à‐mɔ̀‐mìà sɔ́nɔ́, kɛ é zi lɛ́ Zízɛ̀ mɔ́ɔ̀ wɔ̃̀ líé è lo nyɛɛ̀ à káa gɛ̃̀.

⁵⁹Sálà‐ɓò‐Wálà‐mɔ̀‐mìà kpànazɛ̀, wà mɛ̀ĩ́‐sà ɓo‐mìà séĩ́ o mi naa é kélá‐wè ɓo Zízɛ̀ gbĩ mɔ̀, kɛɛ ó Zízɛ̀ zɛ.

⁶⁰Kɛɛ òó gbaa mi gbɛɛ gɛ̃̀, yé bɛ̃̀ɛ̃ kélá búnùzɛ̀ o nu, wáà nɛ̀ kpɔ̀ Zízɛ̀ mɔ̀ɔ ká. Yé gbaa e kɛ kília, gɔ̃à pèèlɛ o ɓɔ, o dɔ,

⁶¹wáà gèè, “Gɔ̃́ e kéa a gèe kélɛ̀, lɛ́ɛ̀ bɛ̀i sálà‐ɓò‐Wálà‐lɛ̀ɛ‐kàa wíì tã́ã̀, é à dɔ lɛ̀‐kpɛ̀iì yààka yíí wì.”

⁶²Sálà‐ɓò‐Wálà‐mɔ̀‐mìà wũ‐là‐mìa e wɛ̀lɛ̀ e dɔ, áà gèè kélɛ̀, “Wɔ̃́ gbɛɛ wá i lé, kɛ ɓá gèe wɔ̃́ ò gèe i gbĩ mɔ̀ɔ yí?”

⁶³Kɛɛ Zízɛ̀ lɛ̀à gaà e kɛá. Zeĩ́a, sálà‐ɓò‐Wálà‐mɔ̀‐mìà wũ‐là‐mìa a gèe à lɛ̀ɛ kélɛ̀, “Maà i dɔ gbaa Wálà ɓéèe ɓɛ wɛlɛ mɔ̀. É kɛ̀á i Kɛ́lɛ̀ì lɛ́ e Wálà Gbe káa káa, ì à gèe ko lɛ̀ɛ.”

⁶⁴Zízɛ̀ a gèe à lɛ̀ɛ, “Zí ɓa gèe à káa lɛ. Kɛɛ ḿm̀ à gèe ka lɛ̀ɛ kélɛ̀, káà lo Mi Gbe gɛ̃̀ɛ̃̀ yàá Wálà lɛ́ yíkɛ̀ gáàa laa kɛ̀lɛ̀ɛ, kɔ̀ yiè yí líé zàá. Ɛ́ɛ̃́ káà lo à gɛ̃̀ɛ̃̀, áà nù lɛ̀í‐kii là lɛ̀í.”

⁶⁵Yé e kɛ nɔ́ kília, sálà‐ɓò‐Wálà‐mɔ̀‐mìà wũ‐là‐mìa e e mɔ̀‐sɔ̀ pɛ́ɛ́, áà gèè, “Aà wɔ̃́ yɔɔ gèe Wálà gbĩ mɔ̀. Mɛ́ kɔa tĩã́ mɔ́ɔ̀ kélá vɔ̀ naapìà ɓɛ? Ƃii kaà zi lɛ́ e wɔ̃́ yɔɔ gèe à ká, é gbɛ̃̀á Wálà gbĩ mɔ̀ɔ, kaà ma gbaa.

⁶⁶Káà ka yɛ́lɛ́ tàà kpɛ?” Wa là nìɛ̀ weeá kélɛ̀, “Mɛ̀ĩ́‐sà aà káá à wĩĩ́. Lɛ à mɔ̀ é ga.”

⁶⁷Lɛ̀ e kɛ kília, o o leí suo à wɛlɛ yí, wáà à mɛ̀. Ɛ́ɛ̃́ tó mia lɛ́ o à mɛ̀ o kɔ̀ gbá káa,

⁶⁸wáà gèè à lɛ̀ɛ, “Ƃí i Kɛ́lɛ̀ì ká ɓɛ. Ì i kɛ̀ dɔ̀‐Wálà‐lé‐là‐mì ká zɔ̃̀ɔ̃̀ ko lɛ̀ɛ. Mí e i mɛ̀ɛ tɔ́ gèe.”

⁶⁹Pílɛ̀ e kɛ yàá pɛ́lɛ̀ zèí sálà‐ɓò‐Wálà‐mɔ̀‐mìà wũ‐là‐mìa píé‐dɔ‐gàlà yí, lɛ̀ lɛ́ yɛɓo‐kɛ‐loàa doó‐mì e nu à píé, áà gèè à lɛ̀ɛ kélɛ̀, “Ƃi vɔ̀ɔ i kɛ gɔ̃ lɛ́ è go Gálàlíì, lɛ́ ò si Zízɛ̀ɛ píé.”

⁷⁰Kɛɛ Pílɛ̀ a tèé ɓo o séĩ́‐séĩ́ o nyìɛ mɔ̀ weeá kélɛ̀, “Wɔ̃́ ɓà gèea, m̀ḿ à yí dɔ.”

⁷¹Lɛ̀ e kɛ kília, Pílɛ̀ e ló gbaa gàlà‐lé‐mɔ̀ zì píé. Yɛɓo‐kɛ‐loàa doó‐mì a gɛ̃̀ zeĩ́, áà gèè mia lɛ́ o kɛ dɔ̀á yi píéa lɛ̀ɛ, “Gɔ̃́ e kéa wà Zízɛ̀ lɛ́ è go Názàlɛ̀ɛ, o kɛ doó.”

⁷²Pílɛ̀ e bɛ̀i, a tèé ɓo zeĩ́ e náá kpɔ́ɔ̀ ká kélɛ̀, “M̀ḿ gɔ̃́ ɓà wɛ̃̀ɛ̃ dɔ.”

⁷³Yé à lɛ̀ ɓéĩ́ e túóa, míá o kɛ dɔ̀á yia, o nu Pílɛ̀ píé, wáà gèè à lɛ̀ɛ, “Ké, i o doó‐mì ká wánà kpó‐kpó ká mɔṹ. Ƃii kɔaà i kṹ i lé‐wè mɔ̀.”

⁷⁴Lɛ̀ e kɛ kília, Pílɛ̀ e gbɛ̃̀ gbaa, áà e dìè náá kpɔ̀ dóo gágà, áà gèè, “M̀ḿ gɔ̃́ ɓà wɛ̃̀ɛ̃ dɔ.” Yé e kɛ nɔ́ kília, tɔ̀ɔ̀ áà wèè.

⁷⁵Ɛ́ɛ̃́ Pílɛ̀ zò e vùò wɔ̃́ lɛ́ Zízɛ̀ aà gèe à lɛ̀ɛ ká gbaa. Wɔ̃́ɔ lɛ́ e kélɛ̀, “Kɛ tɔ̀ɔ̀ é tĩã́ wéèa, ɓi kpó‐kpó íì lo à gèeè e kíe yí yààka kélɛ̀ ìí m dɔ.” Lɛ̀ e kɛ kília, Pílɛ̀ e gó gbaa yí, áà gbóó ɓò gbaa wɛlɛ yɔɔ zɛ̀.