Read Yamano Máfìù 28 Bible Online

Máfìù 28 - Yamano bible

Máfìù 28

¹Lɛ̀ lɛ́ fĩ́ĩ́‐dɔ‐lùòa e die, lɛ́ lɛ̀‐kpɛ̀iì bèĩzɛ̀ lɛ́ e lɔ́ɔ́ yía, kpɛ̀i‐gã̀‐là e kɛɛ, Melé lɛ́ è go Mádɛ̀lɛ̀‐pɛlɛía, ɛ̃́ɛ̃́ Melé yéa bɛ̃̀ɛ̃, o ló kɛ ó ɓɔ́àa gɛ̃̀.

²Nɔ́ zá lea, tã́ã̀ e vĩ́ ɓo yí gbùò zɛ̀. Ko Dàa‐mì là vɔ‐mì doó e gó lɛ̀í, e nu tã́ã̀. E gɛ̀lɛ̀ɛ gìni‐gíní, e gó bṹa lé, e yà à là.

³À zì kɛ‐kɔ̀ɔ e kɛ lɛ̀ lɛ̀í‐kɛ‐gɛ́lɛ́ lɛ́ ɓe. À mɔ̀‐sɔ̀ e kɛ púlú lɛ̀ laa‐wɛ́lɛ́ lɛ́ ɓe.

⁴Mia lɛ́ o kɛ o nyìɛ kɛpìà ɓɔ́à e kília mɔ̀ɔ, túó e kɛ o kɛpìà nyɔ́ɔ̀ɔ. O mɛ́ a mɔ́ɔ̀ tàle ɓo, tó wáà kɛ̀ lɛ̀ mia bílí lɛ́ ɓe.

⁵Kɛɛ Wálà là vɔ‐mìa a gèe loàa lɛ̀ɛ kélɛ̀, “Yékɛ̀ ká túó. Ḿm̀ à yí dɔ kélɛ̀ ka Zízɛ̀ lɛ́ wa pá nélè ká kɔ́lɔ́sì mɔ̀ɔ naapìà.

⁶Ye wá lɛ̀ɛ mɔ̀. Aà wɛ̀lɛ̀ ga kɛ̀lɛ̀, lɛ̀ zí a gèe à káa lɛ́ ɓe. Kà nu ká lɛ̀ lɛ́ e kɛ wɔ̀á yia gɛ̃̀.

⁷Kà lo tíè‐tíèe dɛɛ ká, ká gèe là tòà‐píé‐mìà lɛ̀ɛ kélɛ̀, aà wɛ̀lɛ̀ ga kɛ̀lɛ̀, ɛ̃́ɛ̃́ lɛ dɔpìà o mɔ̀ líé, áà lò Gálàlíì. À lɛ̀ mɔ̀ lɛ́ ò lo à gɛ̃̀ɛ̃̀ yia. Ɛ̀ɛ̀, maà à gèe gbaa ka lɛ̀ɛ.”

⁸Lɛ̀ e kɛ kília, loàa o gó gbaa ɓɔ́àa mɔ̀ tíè‐tíèe. O kɛ túópìà, kɛɛ o paà e kɛá géli kpó‐kpó ká. O ló bàlá kɛ ó wɔ̃̀ gèe là tòà‐píé‐mìà lɛ̀ɛ.

⁹Nɔ́ zá lea, wà Zízɛ̀ nì o o kíe gɛ̃̀, áà gèè o lɛ̀ɛ kélɛ̀, “Kaà vùò.” O nu à sɔ́nɔ́ kɔ̀ɛ́, o wí à gã̀ mɔ̀, wáà gbìnì à lɛ̀ɛ.

¹⁰Zízɛ̀ a gèe o lɛ̀ɛ, “Yékɛ̀ ká túó. Kà lo ká gèe m lèe‐gé vɔ̀ lɛ̀ɛ ó ló Gálàlíì. À lɛ̀ mɔ̀ lɛ́ ò lo m gɛ̃̀ɛ̃̀ yia.”

¹¹Lɛ̀ loàa o kɛ lópìàa, gɔ̃à lɛ́ o kɛ o nyìɛ kɛpìà ɓɔ́àa mɔ̀ɔ, o dò o ló pɛlɛí, o wɔ̃́ séĩ́ lɛ́ à kɛɛ̀ e kɛáa, gèe sálà‐ɓò‐Wálà‐mɔ̀‐mìà kpànazɛ̀ɛ lɛ̀ɛ.

¹²Sálà‐ɓò‐Wálà‐mɔ̀‐mìà kpànazɛ̀ɛ wà mia dìè‐dìè vɔ̀ɔ o o kíe gɛ̃̀ wɔ̃́ lɛ́ ò lo à kɛɛ̀ɛ mɔ́ɔ̀ wɔ̃̀ ká. O pɛlèe gbùò kpó‐kpó nɔ sóyà vɔ̀ɔ lɛ̀ɛ,

¹³wáà gèè o lɛ̀ɛ kélɛ̀, “Kà à gèe kélɛ̀ là tòà‐píé‐mìà o nu bĩ́míà, o à kã̀ã ɓo lɛ̀ lɛ́ ka kɛ yi bàa ká.

¹⁴Ɛ́ɛ̃́ yé wɔ̃́ sùua aà dà mia wũ‐là‐mì tóó kɛ̀lɛ̀ɛ, kóò lo mɛ́ĩ́ ɓoò à píé, tó pɛ gbɛɛ lɛ̀ɛ́ ló kɛɛ̀ ka ká.”

¹⁵Míáa o pɛlèea kṹ, o wɔ̃́ lɛ́ wa gèe o lɛ̀ɛ ó kɛɛ kɛ. É tóá kíli é ɓɔá pɛ́nɛɛ mɔ̀ɔ, wɔ̃́ lɛ́ Zúù‐mìà o ló à gèèá sí lɛ̀ séĩ́ mɔ̀ɔ, lɛ́ ɓɛ.

¹⁶Tòà‐píé‐mìà vũ̀ doó wɛ́lɛ́ doóa o ló Gálàlíì, tɔ̃̀ũ̀ lɛ́ Zízɛ̀ a gèe ó ló à mɔ̀ɔ mɔ̀.

¹⁷Lɛ̀ wa gɛ̃̀ɛ, o gbini à lɛ̀ɛ, yé bɛ̃̀ɛ̃ zò pèèlɛ e kɛ o dò géa ká.

¹⁸Zízɛ̀ e nu o ká kɔ̀ɛ́, áà gèè o lɛ̀ɛ kélɛ̀, “Yíkɛ̀ gáàa séĩ́ lɛ́ e lɛ̀í, ɛ̃́ɛ̃́ lɛ́ e tã́ã̀ zèea, nɔɔ̀ lɛ m lɛ̀ɛ.

¹⁹À mɔ́ɔ̀ wɔ̃̀ mɔ̀ɔ, kà lo mia lɛ́ o sɛ́lɛ́ séĩ́ yía, ká o kɛ tò‐m‐píé mìà ká. Kà o bàtáì kɛ m Dàa tɔ́ yí, à Gbe tɔ́ yí, ɛ̃́ɛ̃́ là Gɛ̀ɛ̀ Púlúa tɔ́ yí.

²⁰Ɛ́ɛ̃́ ká à kɛ ó kɛ wɔ̃́ séĩ́ lɛ́ maà à gèe ka lɛ̀ɛ kɛ‐mìà ká. Ka zò è vùò kélɛ̀ ḿm̀ lo kɛɛ̀ ka píé teele, é tóá kíli é ɓɔá lúó yé kɔa yàáa líé nyɛpìà.”