Read Yamano Máfìù 3 Bible Online

Máfìù 3 - Yamano bible

Máfìù 3

¹Lúó e kília káa, Zɔ̃̀ɔ̃́ mia bàtáì‐kɛ‐mì e nu, áà wɔ̃́ gèè lòũ̀ ká yɛ̀í lɛ́ e kɛ Zùdíàa là.

²Wɔ̃́ a gèe lòũ̀ káa, gɛ̃̀ e ké. “Kà ka sɔ̃̀ɔ̃ yɔɔ mɛ́ vɔ̀ɔ. Ƃii Wálà lɛ́ e lɛ̀ía zì tò‐mia‐là nu‐lùò aà ɓɔ kɔ̀ɛ́.”

³Zɔ̃̀ɔ̃́ lɛ́ e kɛ mi lɛ́ dɔ̀‐Wálà‐lé‐là‐mì Ààzáyà e kɛ wɔ̃́ gèepìà, áà gbɛ̃̀ à mɔ̀ɔ káa. E kɛ à gèepìà kélɛ̀, “Mi dò gbɛ́ɛ́‐wè lɛ́ɛ̀ dɔ yɛ̀í là, áà gbɛ̀ɛ̀ weeá kélɛ̀, ‘Kà zía pɛ̀ kɛ kɔa Dàa‐mì lɛ̀ɛ, kà à kɛ zía é dɔ kpeĩ.’ ”

⁴Sɔ lɛ́ e kɛ Zɔ̃̀ɔ̃́ mɔ̀ɔ, à kɛɛ̀ e kɛá wìì lɛ́ ò si kĩ́ã́mòa, kɛì ká. Wìì‐kii‐ɓɛ̀lɛ̀ dɔɔ̀ e kɛá à gbĩĩ́. À zì ɓèlè‐pɛ̀ lɛ́ e kɛ pélé‐tòo‐tòò wà zɔ́ɔ́ nyɔ́nɔ́ o káa.

⁵Lúó e kília káa, mia lɛ́ ò go Zùlúsàlɛ̀ wà Zùdíà lɛ̀ séĩ́ mɔ̀, ɛ̃́ɛ̃́ o yé ò go sɛ́lɛ́ séĩ́ lɛ́ e kɛ Zɔ́dã̀‐yìì sɔ́nɔ́ɔ yí píéa, o kɛ gópìà yi, wáà lò Zɔ̃̀ɔ̃́ píé,

⁶wáà wèè o kɛ‐wɔ̃̀ yɔɔ mɔ̀, tó Zɔ̃̀ɔ̃́ áà o bàtáì kɛ̀ Zɔ́dã̀‐yìì bà.

⁷Kɛɛ lɛ̀ lɛ́ Zɔ̃̀ɔ̃́ e Fálásíì‐mìà ɛ̃́ɛ̃́ Sáyúsíì‐mìà búnùzɛ̀ gɛ̃̀, wáà nù à píé kɛ é o bàtáì kɛɛ, a gèe o lɛ̀ɛ, “Mɛ̀nɛ là nɔ́ɔ̀ ka ké ɓɛ. Dé a gèe ka lɛ̀ɛ ká wàà Wálà là wɔ̃́à‐wàa‐kɔ̀ lɛ́ è lo nuùa mɔ̀?

⁸Kà wɔ̃́ lɛ́ è lo à zɔ̃̀ɔ̃̀ kélɛ̀ kaà ka sɔ̃̀ɔ̃ yɔɔ mɛ́ vɔ̀ɔ kɛ.

⁹Yékɛ̀ ká gɛ̃̀ ɓɔ̀ɔ kélɛ̀ káà bɛ̀i ka dìè ɓoò wɔ̃́ yí yé kaà gèe kélɛ̀, ‘Éɓɔ́lɔ́hã́ã̀ lɛ ko dàa ye dàà káa ká.’ Ḿm̀ bɛ̀i à mɔ̀ ḿ gèe ka lɛ̀ɛ kélɛ̀, Wálà lɛ́ɛ̀ bɛ̀i à mɔ̀ é gɛ̀lɛ̀ nì e kéa sí, é o kɛ Éɓɔ́lɔ́hã́ã̀ sùu‐là‐mìà ká.

¹⁰Gbɔ̀ɔ lɛ́ è lo yílí kã́ã̀ e gáná yí kpó‐kpó mɔ̀ɔ, à pɛ̀ kɛɛ̀ lɛ. Yílí séĩ́ lɛ́ lɛ̀ɛ́ ló ɓaà e ɓɛɛ yiè káa, óò lo à kã́ã̀, tó wa dùò tíé yí.

¹¹Ḿm̀ ka bàtáì kɛ̀ yíí ká, kɛ á zɔ̃̀ɔ̃̀ kélɛ̀ kaà ka sɔ̃̀ɔ̃ yɔɔ mɛ́ vɔ̀ɔ. Kɛɛ mi yé è lo tóò m ko mɔ̀ɔ, lɛ́ɛ̀ lo ka bàtáì kɛɛ̀ Gɛ̀ɛ̀ Púlú wà tíé o ká. À zì yíkɛ̀‐gágà‐kɔ̀ diè lɛ m zìa là. Ma wá bɛ̃̀ɛ̃ kpeĩ kɛɛ ḿ là bàá vũ.

¹²Là ɓu‐pìè‐pɛ̀ lɛ à kɛ̀lɛ̀, kɛ é ɓu séĩ́ pìè à ká. Lɛ́ɛ̀ lo là ɓu páà e kíe mɔ̀, tó a yà à yàlà bɛ̀ipìà. Kɛɛ lɛ́ɛ̀ lo ɓu‐tòlòa síì, a gélé tíé lɛ́ lɛ̀ɛ́ bɛ̀i númíàa ká.”

¹³Lɛ̀ e kɛ kília, Zízɛ̀ e gó Gálàlíì. E nu Zɔ̃̀ɔ̃́ píé Zɔ́dã̀‐yìì sɔ́nɔ́, kɛɛ Zɔ̃̀ɔ̃́ á bàtáì kɛ.

¹⁴Zɔ̃̀ɔ̃́ a kɛ‐zì naa kɛ é tèá Zízɛ̀ bàtáì kɛɛ̀ mɔ̀ weeá kélɛ̀, “Ƃi lɛ́ yee, ɓáá m bàtáì kɛɛ̀ɛ. Ye lɛ́ ɓi yee ì nu m píé ɓɛ.”

¹⁵Kɛɛ Zízɛ̀ a là nìɛ̀ weeá kélɛ̀, “Ì wéé à mɔ̀ é kɛ kíli. Ƃii zí e kéa káa, lɛ́ɛ̀ ko mɛ́ kũá kɛ kó wɔ̃́ kpeĩ séĩ́ lɛ́ Wálà à nàà kó kɛɛ kɛáa.” Zɔ̃̀ɔ̃́ e wéé gbaa à mɔ̀.

¹⁶Lɛ̀ lɛ́ o nyɛ Zízɛ̀ bàtáì kɛɛ̀ mɔ̀ɔ, Zízɛ̀ e gó yíía bà. Ɛ́ɛ̃́ lɛ̀í lé ɓoò e kɛá à là. Ɛ́ɛ̃́ Zízɛ̀ e Wálà Gɛ̀ɛ̀ gɛ̃̀, áà nù tã́ã̀ kélɛ̀ tèŋè lɛ́ ɓe, áà yà à là.

¹⁷Lɛ̀ e kɛ kília, wéé dò e gó Wálà‐pà weeá kélɛ̀, “M zì lɔ̀‐kɛ̀á‐nɛ̀ lɛ́ e yía. M zò dàà lɛ à píé.”