Read Yamano Máfìù 4 Bible Online

Máfìù 4 - Yamano bible

Máfìù 4

¹Lɛ̀ e kɛ kília, Gɛ̀ɛ̀ Púlú e Zízɛ̀ líé sí, e ló à ká yɛ̀í là, kɛɛ Dɛ́ɓò é à yí dã́ yi.

²Lɛ̀ lɛ́ Zízɛ̀ e kɛ yí lúó vũ̀ yììsɛ wà bĩ́míà vũ̀ yììsɛ píé yi, lɛ́ léɓèlè lɛ̀ɛ́ gbaa kɛ à kɛ̀lɛ̀ɛ, lɔ̀ɔ e kɛ à kɛpìà gbaa.

³Dɛ́ɓò e nu à píé, áà gèè à lɛ̀ɛ, “É kɛ̀á i Wálà Gbe káa, ì à gèe gɛ̀lɛ̀ vɔ̀ o kéa lɛ̀ɛ ó kɛ belè ká.”

⁴Zízɛ̀ a là nìɛ̀ weeá kélɛ̀, “À bɛ̃̀ɛ̃ɛ̃̀ lɛ Wálà là kíía yí kélɛ̀, ‘Mi ìí bɛ̀i kɛɛ̀ ɓe belè dòló là. Kɛɛ pɛ́ mi ì bɛ̀i kɛɛ̀ à làa, lɛ́ e wéé doó doó séĩ́ lɛ́ Wálà à gèea káa.’ ”

⁵Lɛ̀ e kɛ kília, Dɛ́ɓò e Zízɛ̀ sí, e ló à ká Wálà là Sɛ́lɛ́ yí. E ló, a yà sálà‐ɓò‐Wálà‐lɛ̀ɛ‐kà gbãã̀ lɛ̀í gbèkèni,

⁶áà gèè à lɛ̀ɛ, “É kɛ̀á i Wálà Gbe káa, ì kã́ i dìè mɔ̀, í dà tã́ã̀. Ƃii à bɛ̃̀ɛ̃ɛ̃̀ lɛ Wálà là kíía yí kélɛ̀, ‘Wálà lɛ́ɛ̀ lo wɔ̃́ gèeè là vɔ‐mìà lɛ̀ɛ é gbɛ̃̀á i mɔ́ɔ̀ wɔ̃̀ mɔ̀. Óò lo o kɔ̀ yàà i wì, yékɛ̀ gɛ̀lɛ̀ é i gã̀ gĩ̀ĩ.’ ”

⁷Zízɛ̀ a gèe à lɛ̀ɛ, “À bɛ̃̀ɛ̃ɛ̃̀ lɛ zeĩ́ Wálà là kíía yí kélɛ̀, ‘Yékɛ̀ í i Dàa‐mì lɛ́ e ɓà Wálà káa yí dã́.’ ”

⁸Lɛ̀ e kɛ kília, Dɛ́ɓò e Zízɛ̀ sí, e ló à ká tɔ̃̀ũ̀ gbèkèni kpó‐kpó wĩĩ́. E kpóṹ là zèe lɛ̀ séĩ́ lɛ́ sɛ́lɛ́ líé‐sí‐mìà o kɛ o líé sípìà, é dàá o zì kɛ̀‐kpànazɛ̀‐kɔ̀ séĩ́ bàa, a zɔ̃̀ɔ̃̀ Zízɛ̀ lɛ̀ɛ.

⁹Dɛ́ɓò a gèe à lɛ̀ɛ, “Ḿm̀ lo pɔɔ̀ e kéa séĩ́ nɔɔ̀ i lɛ̀ɛ, yé ɓaà káá i kpuò là, tó ɓáà gbìnì m lɛ̀ɛ ká.”

¹⁰Lɛ̀ e kɛ kília, Zízɛ̀ a gèe à lɛ̀ɛ, “Sétɔ̃̀, gó dɔ̀á m là. À bɛ̃̀ɛ̃ɛ̃̀ lɛ Wálà là kíía yí kélɛ̀, ‘Ì gbini i Dàa‐mì lɛ́ e ɓà Wálà káa lɛ̀ɛ. Ì kɛ à doó là yɛɓo‐kɛ‐mì ká.’ ”

¹¹Lɛ̀ e kɛ kília, Dɛ́ɓò e gó gbaa à mɔ̀. Wálà là vɔ‐mìà o nu gbaa, wáà gbũ̀ à mɔ̀.

¹²Lɛ̀ Zízɛ̀ a ma kélɛ̀ waà Zɔ̃̀ɔ̃́ dùò bĩ́‐kɛ̀ìa, e ló gbaa Gálàlíl.

¹³Ló a ɓoa, lɛ̀ɛ́ gbaa tó Názàlɛ̀, kɛɛ e ló, e e yàlà kṹ Kàpɛ́nìɛ̀ lɛ́ e kɛ Gálàlíì Yíí‐pṹã́ sɔ́nɔ́ɔ yí. Lɛ̀ e kília, e kɛ sɛ́lɛ́ lɛ́ ò o si Zɛ́ɓílɔ̀ũ̀ wà Nátálèa o yí.

¹⁴Wɔ̃́ e kéa kɛɛ̀ e kɛá, kɛɛ é wɔ̃́ lɛ́ dɔ̀‐Wálà‐lé‐là‐mì Ààzáyà a gèea, á kɛ wánà zɛ̀. Wɔ̃́ a gèea, gɛ̃̀ e ké.

¹⁵“Zɛ́ɓílɔ́ũ̀‐sɛ̀lɛ̀, e bɛ̀i Nátálè‐sɛ̀lɛ̀, lɛ́ o mɛ̀ĩ́ gbĩ mɔ̀ zàá, ɛ̃́ɛ̃́ lɛ́ o Zɔ́dã̀‐yìì mɛ̀ĩ́a, o sɛ́lɛ́ gbɛɛ yí‐mìà zì Gálàlíì ká.

¹⁶Mia lɛ́ o yàaà e kɛá bĩ́ tii bàa, waà lɛ̀‐fɔ̀nɔ‐kɔ̀ kpàlézɛ̀ dò gɛ̃̀. Ɛ́ɛ̃́ mia lɛ́ o yàaà e kɛá sɛ́lɛ́ dò yí, tó ga bĩ́ nuù e kɛá o làa, lɛ̀ aà fɔ̀nɔ o bà.”

¹⁷É kã́ lúó e kília mɔ̀ɔ, Zízɛ̀ e gbɛ̃̀ gbaa, áà gèè lòũ̀ ká kélɛ̀, “Kà ka sɔ̃̀ɔ̃ yɔɔ mɛ́ vɔ̀ɔ. Ƃii Wálà lɛ́ e lɛ̀ía zì tò‐mia‐là nu‐lùò aà ɓɔ kɔ̀ɛ́.”

¹⁸Yé Zízɛ̀ e kɛ táápìà Gálàlíì Yíí‐pṹã́ sɔ́nɔ́ɔ, e lèe‐gé vɔ̀ pèèlɛ gɛ̃̀, wáà fɛ̃́ĩ̀ kàà yíí bà. O lɛ́ o kélɛ̀, Sáímɔ̀, lɛ́ o kɛ à sípìà Pílɛ̀, e bɛ̀i Áã́dùlù, lɛ́ e kɛ à lèe‐gé káa káa. O kɛ kpã̀ã́‐zɛ‐mìà ká.

¹⁹A gèe o lɛ̀ɛ kélɛ̀, “Kà nu kɔ́á tàà‐kíe‐píé kɛ. Ḿm̀ lo ka kɛɛ̀ ká mia sɔ̀lɔ̀ ɓo lɛ̀ zí kà kpã̀ã́ sɔ̀lɔ̀ ɓoáa lɛ́ ɓe.”

²⁰A ɓo nɔ́ e lé kéa, wáà kã̀ wà fɛ̃́ĩ̀a mɔ̀, wáà tò à píé.

²¹Lɛ̀ e ló líé zeĩ́a, e lèe‐gé vɔ̀ pèèlɛ gɛ̃̀ zeĩ́. O lɛ́ o kɛ Zĩ́ĩ̀ ɛ̃́ɛ̃́ Zɔ̃̀ɔ̃́, lɛ́ o kɛ Zɛ́bɛ́dìì gbe nì káa káa. Wà o dàa Zɛ́bɛ́dìì nì lɛ́ o kɛ gɔɔ yía. O kɛ wà fɛ̃́ĩ̀ pɛ̀ kɛpìà. Zízɛ̀ e o súo kɛ.

²²Lɛ̀ e kɛ nɔ́ kília, o gɔ́ɔ́ɔ wà o dàa o tó yi, wáà tò Zízɛ̀ píé.

²³Zízɛ̀ e ló Gálàlíì lɛ̀ séĩ́ mɔ̀. E kɛ pɛ zɔ̃̀ɔ̃̀pìà Zúù‐mìà zì Wálà‐kà wì píé, ɛ̃́ɛ̃́ áà wɔ̃́ làṹ yiè lɛ́ à gbɛ̃̀ɛ̃̀ lɛ Wálà zì tò‐mia‐là wɔ̃̀ mɔ̀ɔ, gèè lòũ̀ ká. E kɛ mia lapìà yáá doò do wà mɛ́‐kpɔ̀nɔ gbɛɛ̀ gbɛɛ bà.

²⁴Zízɛ̀ làṹ e wɛ̃̀ĩ gbaa Sílìà‐sɛ̀lɛ̀ lɛ̀ séĩ́ mɔ̀. À mɔ́ɔ̀ wɔ̃̀ mɔ̀ɔ, mia o kɛ nupìà mia lɛ́ yáá doò do e kɛ o kɛpìà, ɛ̃́ɛ̃́ mia yé o kùnuù e kɛá mɛ́‐kpɔ̀nɔ doò do káa ká Zízɛ̀ píé. Míá o kília, o kɛ mia lɛ́ pɛ yɔɔ e kɛ o píé, ɛ̃́ɛ̃́ mia lɛ́ sãsã e kɛ o ɓopìàa nì, e bɛ̀i, mia lɛ́ o dɔ‐pɛ gaà e kɛá o mɔ̀ɔ káa. Kɛɛ Zízɛ̀ e o séĩ́ o la.

²⁵Lɛ̀ e kɛ kília, mia kù gbùò zɛ̀ o tó à píé wìà‐wìà le. Míá o kília o góò e kɛá Gálàlíì, wà lɛ̀ lɛ́ ò si Pɛ́lɛ Vũ̀ Doóa yí, ɛ̃́ɛ̃́ Zùlúsàlɛ̀, wà Zùdíà, ɛ̃́ɛ̃́ zeĩ́ o dò góò e kɛá Zɔ́dã̀‐yìì mɛ̀ĩ́.