Read Yamano Máfìù 6 Bible Online

Máfìù 6 - Yamano bible

Máfìù 6

¹“Kà ka yɛ́lɛ kɛ ka dìè píé ka zì yɛɓo lɛ́ à gbɛ̃̀ɛ̃̀ lɛ Wálà‐wɔ̃̀ mɔ̀ɔ kɛ̀ mia nyìɛ mɔ̀, kɛɛ mia ó ka gɛ̃̀ɛ mɔ́ɔ̀ wɔ̃̀ mɔ̀. Ká wɔ̃́ nì e kéa kɛ̀á mia nyìɛ mɔ̀ɔ, ka Dàa lɛ́ e lɛ̀ía lɛ̀ɛ́ ló ka fɔ́nɔ́ nɔɔ̀ à wɛ̃́ĩ̀.

²“À mɔ́ɔ̀ wɔ̃̀ mɔ̀ɔ, yé ɓaà pɛ nɔ mia lɛ́ pɛ wá o kɛ̀lɛ̀ɛ lɛ̀ɛ, yékɛ̀ í i dìè zɔ̃̀ɔ̃̀ à nɔɔ̀ yí, lɛ̀ zí míá ò o dìè wɛlɛ lia ò kɛ̀ à ká Zúù‐mìà zì Wálà‐kà wì, ɛ̃́ɛ̃́ lɛ̀ zí ò kɛ̀á zi ɓɛ̀lɛ̀ĩ̀‐fĩ̀ã̀ píéa lɛ́ ɓe. Óò kɛ̀ kíli kɛ mia ó o tɔ́ li. Wánà‐wɔ̃̀ lɛ́ m̀ gèe ka lɛ̀ɛ ɓɛ. Waà nyɛ o fɔ́nɔ́ sì à kɛ̀ kíli mɔ́ɔ̀ wɔ̃̀ mɔ̀.

³Kɛɛ yé ɓaà pɛ nɔ mi lɛ́ pɛ wá à kɛ̀lɛ̀ɛ lɛ̀ɛ, yékɛ̀ ɓá tó i kɔ̀ gbiè é wɔ̃́ lɛ́ i kɔ̀ yiè lɛ à kɛpìàa yí dɔ.

⁴É kɛ̀á kília, i zì pɛ‐nɔ‐kɔ̀ e kília lɛ́ɛ̀ lo kɛɛ̀ e bĩ̀ĩĩ̀ zɛ̀ ká. Tó i Dàa lɛ́ è wɔ̃́ lɛ́ ɓà kɛ̀ bĩ̀ĩ̀ káa gɛ̃̀ɛ, lɛ́ɛ̀ lo i fɔ́nɔ́ nɔɔ̀ à wɛ̃́ĩ̀.

⁵“Í sɛ̀nɛ ɓoáa, yékɛ̀ ɓá ɓo lɛ̀ míá ò o dìè wɛlɛ lia, lɛ́ ò sɛ̀nɛ ɓo. Óò nàà ó dɔ o gã̀ mɔ̀ Zúù‐mìà zì Wálà‐kà wì, ɛ̃́ɛ̃́ zi ɓɛ̀lɛ̀ĩ̀‐fĩ̀ã̀ soũ yí píé, tó wáà sɛ̀nɛ ɓò. Óò à kɛ̀ kíli, kɛɛ mia ó o gɛ̃̀. Wánà‐wɔ̃̀ lɛ́ m̀ gèe ka lɛ̀ɛ ɓɛ. Waà nyɛ o fɔ́nɔ́ sì à kɛ̀ kíli mɔ́ɔ̀ wɔ̃̀ mɔ̀.

⁶Kɛɛ yé ɓaà dɔ í sɛ̀nɛ ɓoa, ì lo i píé kɛ́ì, í ká lé gbɛ̃̀ i bĩ̀ĩ̀, í sɛ̀nɛ ɓo i Dàa lɛ́ lɛ e bĩ̀ĩ̀pìàa lɛ̀ɛ. Yé aà kɛ kília, i Dàa lɛ́ è wɔ̃́ lɛ́ ɓà kɛ̀ bĩ̀ĩ̀ káa gɛ̃̀ɛ, lɛ́ɛ̀ lo i fɔ́nɔ́ nɔɔ̀ à wɛ̃́ĩ̀.

⁷“Yé kaà kɛ sɛ̀nɛ ɓopìàa, yékɛ̀ ká wéé lɛ́ à yí wá à mɔ̀ɔ gèe nɔ́ ɓɔ̀ɔ sóló tótó le, lɛ̀ zí mia lɛ́ òó Wálà dɔɔ ò kɛ̀ à káa lɛ́ ɓe. Óò gɛ̃̀ ɓɔ̀ɔ kélɛ̀ Wálà lɛ́ɛ̀ lo wà sɛ̀nɛ‐ɓo‐wè maà yé waà sɛ̀nɛ ɓo gbèĩa ká.

⁸Yékɛ̀ ká kɛ lɛ̀ o lɛ́ ɓe. Ka Dàa lɛ́ɛ̀ pɛ lɛ́ lɛ ka mɔ̀ ká sɔ̀lɔ̀ ɓoa dɔ, kɛ bɛ̃̀ɛ̃ ká tĩã́ à pɛ̃́ɛ̃̀ à mɔ̀.

⁹À mɔ́ɔ̀ wɔ̃̀ mɔ̀ɔ, zi lɛ́ lɛ ka mɔ̀ ká sɛ̀nɛ ɓo à káa, gɛ̃̀ e ké. ‘Ko Dàa lɛ́ i lɛ̀ía, i tɔ́ è kɛ tɔ́ lɛ́ lɛ mia séĩ́ lɛ̀ɛ tɔ́ yiè káa ká.

¹⁰I zì tò‐mia‐là è nu. Wɔ̃́ lɛ́ ɓà nàà à káa, è kɛ tã́ã̀ zèe lɛ̀ zí à kɛɛ̀ lɛ à ká lɛ̀ía lɛ́ ɓe.

¹¹Ì léɓèlè lɛ́ lɛ ko mɔ̀ kó sɔ̀lɔ̀ ɓoa, nɔ ko lɛ̀ɛ pɛ́nɛɛ.

¹²Ì kã́ wɔ̃́ yɔɔ lɛ́ kɔaà kɛɛ mɔ̀, ɓá káá tã́ã̀, lɛ̀ zí kò kãá wɔ̃́ yɔɔ lɛ́ mia ò kɛ̀ ko káa mɔ̀, kɔ́áà kàà à ká tã́ã̀a lɛ́ ɓe.

¹³Yékɛ̀ í nu ko ká lɛ̀ lɛ́ mia yí‐dã́‐wɔ̃̀ lɛ yía mɔ̀. Kɛɛ ì ko la Kɛ‐pɛ̀ Yɔɔ kɛ‐mìa kɛ̀lɛ̀.’

¹⁴“Yé kaà kã́ wɔ̃́ yɔɔ lɛ́ mia ò kɛ̀ ka káa mɔ̀, lɛ́ kaà káá tã́ã̀a, ka lɛ̀í Dàà lɛ́ɛ̀ lo kã́ã̀ ka zìa mɔ̀, tó a káá tã́ã̀.

¹⁵Kɛɛ yé kàá kã́ wɔ̃́ yɔɔ lɛ́ mia ò kɛ̀ ka káa mɔ̀, kɛ ká káá ka píé yía, ka Dàa lɛ̀ɛ́ ló kã́ã̀ ka zìa mɔ̀, kɛ á káá tã́ã̀.

¹⁶“Yé kaà kɛ ka sṹũ yía, yékɛ̀ ká yolo kṹ, lɛ̀ zí mia lɛ́ ò o dìè wɛlɛ lia ò kɛ̀áa lɛ́ ɓe. Óò o wɛlɛ sìè kɛ mia ó o yí dɔ kélɛ̀ o o sṹũ yí. Wánà‐wɔ̃̀ lɛ́ m̀ gèe ka lɛ̀ɛ ɓɛ. Waà nyɛ o fɔ́nɔ́ sì à kɛ̀ kíli mɔ́ɔ̀ wɔ̃̀ mɔ̀.

¹⁷Kɛɛ yé ɓie ɓaà kɛ i sṹũ yía, ì i wɛlɛ pɛ́lɛ́, í i wĩĩ́ dùò,

¹⁸yékɛ̀ mia gbɛɛ ó i kɛ̀ sṹũ yí míní sí. I Dàa lɛ́ lɛ e bĩ̀ĩ̀pìàa lɛ́ nɔ́ è lo à yí dɔɔ̀ɔ. Tó i Dàa lɛ́ è wɔ̃́ lɛ́ ɓà kɛ̀ bĩ̀ĩ̀ káa gɛ̃̀ɛ, lɛ́ɛ̀ lo i fɔ́nɔ́ nɔɔ̀ à wɛ̃́ĩ̀.

¹⁹“Yékɛ̀ ká dɔ‐pɔ̀ɔ̀ yàlà bɛ̀i ka dìè lɛ̀ɛ kpóṹ là zèe. Pɛ‐sìè‐pɛ̀ wà kàkpa óò pɛ sìè zèe. Ɛ́ɛ̃́ kã̀ã‐mìà óò ká lé wi zèe, tó wáà kã̀ã ɓò.

²⁰Kɛɛ kà dɔ‐pɔ̀ɔ̀ yàlà bɛ̀i ka dìè lɛ̀ɛ Wálà‐pà. Pɛ‐sìè‐pɛ̀ wà kàkpa òó pɛ sìè yi, ɛ̃́ɛ̃́ kã̀ã‐mìà òó ká lé wí yi, kɛ ó kã̀ã ɓo.

²¹Ƃii lɛ̀ lɛ́ kà dɔ‐pɔ̀ɔ̀ lɛ yía, ka zò lɛ̀ɛ́ wɛ̀lɛ̀ à lɛ̀ mɔ̀.

²²“Nyìɛ lɛ nábò ká gbĩ‐kpàla mɔ́ɔ̀ wɔ̃̀ mɔ̀. À mɔ́ɔ̀ wɔ̃̀ mɔ̀ɔ, i nyìɛ é kɛ̀á zéĩ́‐zèĩ̀a, i gbĩ‐kpàla lɛ̀ séĩ́ lɛ́ɛ̀ lo paà lɛ̀ fɔ̀nɔɔ̀ɔ ká.

²³Kɛɛ é kɛ̀á i nyìɛ lɛ ɓílí‐ɓìlìa, i gbĩ‐kpàla lɛ̀ séĩ́ lɛ́ɛ̀ lo kɛɛ̀ bĩ́ bà. À mɔ́ɔ̀ wɔ̃̀ mɔ̀ɔ, yé lɛ̀‐fɔ̀nɔ‐kɔ̀ lɛ́ e i yía, lɛ bĩ́ tii káa, zi sùu kpɛɛ̀ lɛ́ bĩ́ e kília míì lɛ mɔṹ à ká ké.

²⁴“Mi nɔ́ɔ fé lɛ̀ɛ́ bɛ̀i kɛɛ̀ lùò ká mia wũ‐là‐mìà pèèlɛ lɛ̀ɛ e kíe ká. É kɛ̀á kília, mi doó‐mì lɔ̀ lɛ́ɛ̀ lo nyɛɛ̀ à mɔ̀, tó mi doó‐mì lɔ̀ áà kpɔ̀ à mɔ̀. Lɛ́ɛ̀ lo kɛɛ̀ wánà zɛ̀ mi doó lɛ̀ɛ, tó à nyìɛ e fɔ̃́ mi yé e tóa yí. Ìí bɛ̀i kɛɛ̀ Wálà là lùò ká, tó ɓáà kɛ̀ zeĩ́ pɛlèe là lùò ká.

²⁵“À mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ, yékɛ̀ ká kɛ zò‐gɔ̃́ zɛ̀ léɓèlè lɛ́ kà lo à ɓèlè, ɛ̃́ɛ̃́ pɛ́ kà lo à miì kɛ ká kɛ ɓe, ɛ̃́ɛ̃́ sɔ lɛ́ kà lo à naà ká dà ka gbĩ‐kpàla mɔ̀ɔ mɔ́ɔ̀ wɔ̃̀ mɔ̀. Kéa, kɛ̀ɓe wá dóo kpànazɛ̀ é dieá léɓèlè là? Ɛ́ɛ̃́ gbĩ‐kpàla bɛ̃̀ɛ̃ wá kpànazɛ̀ é dieá sɔ là?

²⁶Kà mɔ̀ɔ̀ vɔ̀ lɛ́ ò dìè lɛ̀ía gɛ̃̀. Òó ɓu taa bɛ̃̀ɛ̃ kɛ ó gèe óò à kã, kɛ ó dùò gbã́ã́ lɛ̀í. É kɛ bɛ̃̀ɛ̃ kília, ka Dàa lɛ́ e lɛ̀ía, lɛ́ɛ̀ léɓèlè nɔ o lɛ̀ɛ. Ka wá kpànazɛ̀ é dieá o là?

²⁷Yé ka dò aà e zò gɔ̃́ e zì kɛ̀ɓe wɛ̃́ĩ̀a, zò‐gɔ̃́ lɛ́ɛ̀ lo à kɛɛ̀, kɛ é yìì ɓéĩ́ ɓo fɛ̃̀ɛ̃̀?

²⁸“Zéniía, mɛ́ e kɛ lɛ́ kà ka zò gɔ̃ sɔ lɛ́ kà nàà ká dàa, mɔ́ɔ̀ wɔ̃̀ ká? Sùu nì lɛ́ è kɛ̀ áà e bĩ̀ luúa, zi lɛ́ ò fàa à káa, kà gɛ̃̀. Òó yɛɓo kɛ, ɛ̃́ɛ̃́ òó sɔ kɛ o dìè lɛ̀ɛ.

²⁹Kà tó ḿ gèe ka lɛ̀ɛ, Sɔ́lómɔ̀ e kɛ mi kpànazɛ̀ kpó‐kpó ká, ɛ̃́ɛ̃́ sɔ yiè yiè e kɛ à kɛ̀lɛ̀. Kɛɛ sɔ nì e kília lɛ̀ɛ́ gbaa kɛ sɛ̀, é dieá sùu bĩ́ e kéa doó fèle là.

³⁰Wálà lɛ́ è sɔ yèlè sùu nì mɔ̀ɔ. Sùu e kília lɛ pɛ́nɛɛ ɓe luú, kɛɛ yé tòò aà kɛɛ, óò lo à káà tíè. Yé mɔṹ lɛ kília, zi sùu kpɛɛ̀ lɛ́ è lo sɔ yèlèá ka yee ka mɔ̀ ké. Ka zì zò‐dɔ̀à‐mɔ̀ lɛ dóo nyɔ̀nɔ́ kpó‐kpó ɓo.

³¹À mɔ́ɔ̀ wɔ̃̀ mɔ̀ɔ, yékɛ̀ ká ka zò gɔ̃́, káà gèè kélɛ̀, ‘Mɛ́ kò lo à ɓèlè,’ ɛ̃́ɛ̃́ ‘Mɛ́ kò lo à miì?’ Ɛ́ɛ̃́ ‘Kóò lo sɔ gɛ̃̀ɛ̃̀ mɛ́ kó dà ko mɔ̀?’

³²Ƃii mia lɛ́ òó Wálà dɔɔ, pɔɔ̀ séĩ́ nì e kília wɔ̃̀ diè lɛ o zò ká. Ka lɛ̀í Dàà lɛ́ɛ̀ à yí dɔ kélɛ̀ lɛ ka mɔ̀ ká pɛ séĩ́ nì e kília sɔ̀lɔ̀ ɓo.

³³Kɛɛ pɛ lɛ́ lɛ à mɔ̀ à wɔ̃̀ é die ka zò ká, é dieá pɛ séĩ́ làa, lɛ́ e kélɛ̀, Wálà zì tò‐mia‐là, wà wɔ̃́ lɛ́ à nàà mia ó kɛɛ. Yé aà kɛ kília, lɛ́ɛ̀ lo pɔɔ̀ séĩ́ nì e kília nɔɔ̀ ka lɛ̀ɛ.

³⁴À mɔ́ɔ̀ wɔ̃̀ mɔ̀ɔ, yékɛ̀ ká ka zò gɔ̃́ tòò mɔ́ɔ̀ wɔ̃̀ mɔ̀. Ƃii tòò zì zò‐gɔ̃́ bɛ̀iì lɛ à mɔ̀. Lúó séĩ́ zì wɔ̃́ nyɔ́ɔ̀ɔ lɛ ɓe. À mɔ́ɔ̀ wɔ̃̀ mɔ̀ɔ, ye wá ka mɔ̀ kɛɛ ká lúó dò zì là kpɔ́.