Read Yamano Máà 11 Bible Online

Máà 11 - Yamano bible

Máà 11

¹O kɛ ɓɔpìà Zùlúsàlɛ̀ ká kɔ̀ɛ́. Lɛ̀ o ɓɔ pɛ́lɛ lɛ́ ò si Bɛ́fézì wà Bɛ́fénì, ɛ̃́ɛ̃́ tɔ̃̀ũ̀ lɛ́ ò si Ɔ́lèa mɔ̀ɔ, Zízɛ̀ e là tòà-píé-mìàa o pèèlɛ vɔ,

²áà gèè o lɛ̀ɛ, “Kà lo pɛ́lɛ lɛ́ e ka líé yia yí. Ká dàá nɔ́ pɛlɛí kéa, káà lo sòofàné nyɔ̀nɔ́ gɛ̃̀ɛ̃̀ dɔ̀á e yèleèe zɛ̀ ká. Mi gbɛɛ lɛ̀ɛ́ yà do à là. Kà à fóló, ká nu à ká.

³Yé mi dò aà ka wɛ̃́ĩ́-lɔ̀ɔ kɛ weeá kélɛ̀, ‘Mɛ́ e kɛ lɛ́ kà wɔ̃́ sùua kɛ̀ɛ,’ kà gèe à lɛ̀ɛ kélɛ̀, ‘Ko Dàa-mì láà nàà à ká, ɛ̃́ɛ̃́ lɛ́ɛ̀ lo à vɔɔ̀ e mɛ̀ĩ́ dɛɛ ká zèe.’ ”

⁴Lɛ̀ e kɛ kília, o ló, o sòofàné nyɔ̀nɔ́ gɛ̃̀ dɔ̀á zi gbùò mɔ̀. À yèleè e kɛá kpóũ mɔ̀. O à fóló.

⁵Mia lɛ́ o kɛ dɔ̀á yia, o dò a gèe o lɛ̀ɛ, “Mɛ́ e kɛ lɛ́ kà ɓɛ̀lɛ̀ fòlò sòofànéa mɔ̀ ɓɛ?”

⁶Wa yí ɓo zí nɔ́ Zízɛ̀ e à gèe à ká o lɛ̀ɛ ká. Yé e kɛ kília, míáa o wéé gbaa à mɔ̀, o ló.

⁷O nu gbaa sòofànéa ká Zízɛ̀ píé. O wà sɔ káá gbaa sòoa là. Lɛ̀ e kɛ kília, Zízɛ̀ e yà gbaa à là.

⁸Ɛ́ɛ̃́ mia búnùzɛ̀ o wà sɔ káá píé zi gbùò mɔ̀. Mia dò bɛ̃̀ɛ̃ o yílí-kɔ̀ lɛ́ à lɛ́ɛ́ e kɛ à mɔ̀, lɛ́ e kɛ lɛ̀ e kília mɔ̀ kɔ̀ɛ́ɛ kã́ píé, wáà à kàà píé zuú.

⁹Míá o kɛ líéa, wà míá o kɛ tópìà à píé zízàáa, o gbɛ́ɛ́ wáà gèè, “I sɛ́nɛ́ò. Lúà é kpɔ́ mi lɛ́ è nu ko Dàa-mì tɔ́ yía mɔ̀.

¹⁰Lúà é kpɔ́ ko dàa Dèɓé là tò-mia-là lɛ́ lɛ nupìàa mɔ̀. Kɔ̀à Wálà zúo gèe.”

¹¹Zízɛ̀ e dà gbaa Zùlúsàlɛ̀-pɛlɛí, e ló sálà-ɓò-Wálà-lɛ̀ɛ-kà wì, áà lɛ̀ gɛ̃̀ píé píé pɔɔ̀ séĩ́ là. Kɛɛ nyɛ́nɛ́ e kɛ gbaa lópìà. À mɔ́ɔ̀ wɔ̃̀ mɔ̀ɔ, wà là tòà-píé-mìà vũ̀ doó wɛ́lɛ́ pèèlɛɛ, o ló gbaa Bɛ́fénì.

¹²Lúó e tó à ko mɔ̀ɔ káa, lɛ̀ o kɛ yɛ́pìà o zí, wáà gò Bɛ́fénìa, lɔ̀ɔ e kɛ Zízɛ̀ kɛpìà.

¹³E féè-yìlì gɛ̃̀ dóo dɔ̀á à ká líé gbèkèni. À lɛ́ɛ́ ɓɔɔ̀ e kɛ à ká à mɔ̀ gbùò. Yé e kɛ kília, e ló gbaa yí, á gɛ̃̀ é kɛ̀á lɛ́ɛ̀ bɛ̀i à ɓɛɛ dò gɛ̃̀ɛ̃̀ à wĩĩ́a ká. Lɛ̀ e ɓɔ à ká kɔ̀ɛ́ɛ, à lɛ́ɛ́ dòló lɛ́ nɔ́ a gɛ̃̀ɛ. Ƃii lɛ̀ɛ́ gbaa kɛ féè-ɓa-lùò ká.

¹⁴A gèe à lɛ̀ɛ, “Yílí i dɔ ɓɛ, mi nɔ́ɔ fé áá gbaa i ɓɛɛ wàà e lé tòá kíli ká.” Yé e kɛ kília, là tòà-píé-mìà wa ma.

¹⁵Lɛ̀ o ɓɔ Zùlúsàlɛ̀ɛ, Zízɛ̀ e wàà sálà-ɓò-Wálà-lɛ̀ɛ-kà wì. E gbɛ̃̀ gbaa, áà mia lɛ́ o kɛ pɛ lɔ̀ɔ̀ dɔpìà, ɛ̃́ɛ̃́ o yé o kɛ pɛ lɔ́pìà Wálà-kà e kília wìa, o yí lùò. E téɓò lɛ́ mia o kɛ pɛlèe mɛ́ vɔ̀ɔpìà à làa, nìɛ̀ à gã̀ e dɔ lɛ̀í. E pɛ nɔ́ doóa kɛ pɛ lɛ́ o kɛ yàpìà là, wáà tèŋè lɔ̀ɔ̀ dɔ̀ɔ ká.

¹⁶Ɛ́ɛ̃́ Zízɛ̀ lɛ̀ɛ́ gbaa wéé à mɔ̀ kɛɛ mi nɔ́ɔ fé é die pɔɔ̀ ká Wálà-kà e kília sɔ́nɔ́ píé.

¹⁷Zízɛ̀ e pɛ zɔ̃̀ɔ̃̀ gbaa míáa lɛ̀ɛ weeá kélɛ̀, “Ḿ gɔ̃̀, à bɛ̃̀ɛ̃ɛ̃̀ lɛ kélɛ̀ Wálà a gèe, ‘M̀ ká ɓɛ, óò lo à síì ká lɛ́ sɛ́lɛ́ séĩ́ yí-mìà ò lo sɛ̀nɛ ɓoò à wìa’? Kɛɛ kaà à kɛ gbaa kã̀ã-mìà bĩ̀ĩ̀pìà ká.”

¹⁸Sálà-ɓò-Wálà-mɔ̀-mìà kpànazɛ̀ ɛ̃́ɛ̃́ Wálà kii-dɔ-mìà o wɔ̃́ e kília làṹ ma gbaa. O gbɛ̃̀ gbaa, wáà zi nàà Zízɛ̀ mɔ̀ kɛ ó zɛ. O kɛ túópìà à lɛ̀ɛ, ɓii míáa séĩ́-séĩ́ o lé paà e kɛ à ká pɛ́ e kɛ à zɔ̃̀ɔ̃̀pìàa mɔ́ɔ̀ wɔ̃̀ mɔ̀.

¹⁹Lɛ̀ nyɛ́ŋɛ̀ĩpíé e kɛɛ, Zízɛ̀ wà là tòà-píé-mìàa o gó pɛ́lɛ e kília yí.

²⁰Lɛ̀ o kɛ diepìà zeĩ́ làapíéa, o féè-yìlìa gɛ̃̀. À gaà e kɛ à ká é ló é wàà à ká e gáná yí.

²¹Pílɛ̀ zò e vùò gbaa, áà gèè Zízɛ̀ lɛ̀ɛ, “Tísɛ̀, lɛ̀ gɛ̃̀. Féè-yìlì lɛ́ i náá tó à mɔ̀ɔ, gɛ̃̀ à gaà lɛ ɓe.”

²²Zízɛ̀ a gèe o lɛ̀ɛ, “Kà ka zò dɔ Wálà mɔ̀.

²³Wánà-wɔ̃̀ lɛ́ m̀ gèe ka lɛ̀ɛ ɓɛ. Mí è lo à gèeè tɔ̃̀ũ̀ e kéa lɛ̀ɛ, ‘Wɛ̀lɛ̀ í ló í i dìè dùò mɛ̀ĩ́ bàa,’ lɛ́ɛ̀ lo kɛɛ̀ kíli à lɛ̀ɛ, yé zò pèèlɛ wá à géa ká. Lɛ à mɔ̀ é à gɛ̃̀ wánà ká kélɛ̀ wɔ̃́ a gèea, lɛ́ɛ̀ lo kɛɛ̀.

²⁴À mɔ́ɔ̀ wɔ̃̀ mɔ̀ɔ, ḿm̀ gèe ka lɛ̀ɛ, pɛ nɔ́ɔ fé lɛ́ kà pɛ̃, ɛ̃́ɛ̃́ lɛ́ kà sɛ̀nɛ ɓo à wɛ̃́ĩ̀a, kà gɛ̃̀ wánà ká kélɛ̀ kaà à sɔ̀lɔ̀ ɓo. Yé aà kɛ kília, káà lo à gɛ̃̀ɛ̃̀.

²⁵Yé kaà dɔ ka gã̀ mɔ̀ ká sɛ̀nɛ ɓoa, yé wɔ̃́ dò lɛ ka gé mi dò gbĩ mɔ̀ɔ, kà kã́ à mɔ̀ ká káá tã́ã̀. Kà kɛ kíli, kɛɛ ka lɛ̀í Dàà é kã́ ka bɛ̃̀ɛ̃ ka kɛ-wɔ̃̀ yɔɔ mɔ̀, á káá tã́ã̀. [

²⁶Kɛɛ yé kàá kã́ wɔ̃́ mɔ̀ kɛ ká káá tã́ã̀a, ka lɛ̀í Dàà lɛ̀ɛ́ ló kã́ã̀ ka zì kɛ-wɔ̃̀ yɔɔ mɔ̀, kɛ á káá tã́ã̀.]”

²⁷O nu o mɛ̀ĩ́ Zùlúsàlɛ̀. Lɛ̀ Zízɛ̀ e kɛ táápìà sálà-ɓò-Wálà-lɛ̀ɛ-kà wìa, sálà-ɓò-Wálà-mɔ̀-mìà kpànazɛ̀, ɛ̃́ɛ̃́ Wálà kii-dɔ-mìà wà mia dìè-dìè vɔ̀ o nu à píé,

²⁸wáà gèè à lɛ̀ɛ, “Yíkɛ̀ gáàa kpɛɛ̀ zɛ̀ lɛ́ e i kɛ̀lɛ̀, lɛ́ ì wɔ̃́ sùu e kéa kɛ̀á ɓɛ? Deĩ̀ lɛ́ e yíkɛ̀ gáàa sùu lɛ́ ì wɔ̃́ kɛ̀á ɓaa, nɔ i lɛ̀ɛ?”

²⁹Zízɛ̀ a gèe o lɛ̀ɛ, “Ḿm̀ lo wɛ̃́ĩ́-lɔ̀ɔ doó kɛɛ̀ ka kɛ̀lɛ̀. Káà à yí ɓòá m lɛ̀ɛ, ḿm̀ lo yíkɛ̀ gáàa lɛ́ m̀ wɔ̃́ sùu e kéa kɛ̀ à káa, zɔ̃̀ɔ̃̀ ka lɛ̀ɛ.

³⁰Dé a gèe Zɔ̃̀ɔ̃́ lɛ̀ɛ é mia bàtáì kɛ? Wálà lɛ, ɛ̃́ɛ̃́ mia lɛ? Kà à yí ɓo m lɛ̀ɛ.”

³¹O gbɛ̃̀ gbaa, wáà tèé dà o kíe nì ká weeá kélɛ̀, “Yé kɔaà gèe, Wálà lɛɛ, lɛ́ɛ̀ lo à gèeè, ‘Mɛ́ mɔṹ e kɛ lɛ́ kàá wɔ̃́ lɛ́ Zɔ̃̀ɔ̃́ a gèea gɛ̃̀ wánà ká?’

³²Lɛ kɔa mɔ̀ kɔ́á gèe mia lɛ?” Kɛɛ o kɛ túópìà míáa lɛ̀ɛ, ɓii o séĩ́ o kɛɛ̀ e kɛá, wáà yí dɔ̀ kélɛ̀ Zɔ̃̀ɔ̃́ e kɛ dɔ̀-Wálà-lé-là-mì ká wánà ká.

³³Yé e kɛ kília, wa gèe Zízɛ̀ lɛ̀ɛ, “Kòó à yí dɔ.” Zízɛ̀ a gèe o lɛ̀ɛ, “M̀ḿ ló mɔṹ yíkɛ̀ gáàa lɛ́ m̀ wɔ̃́ sùu e kéa kɛ̀áa zɔ̃̀ɔ̃̀ ka lɛ̀ɛ.”